طريقة عمل المسقعة باللحمة المفرومه
أول حاجة المقادير
كيلو ونص بدنجان
والفلفل رومي كبير
هات منه نص كمان
وبطاطس وطماطم
هات مـ الإتنين كيلو
وتفاصل في البياع
مش علطول تديلو
وتجيبلك كيلو بصل
وما تنساش راس الثوم
ملح وشطة وفلفل
غير نص كمان مفروم
هتقطع في بدنجان
وتخلي دوايره تخينه
وتملحه برضه عشان
بيخلي الزيت بنزينه
ونسيبه يصفي الميه
بعدين تقليه في الزيت
والفلفله زي ما هيه
وإقليها برضه يا ريت
وبطاطس تقليها
مقطوعة مكعبات
بس إوعى تزيد فيها
وكفاية 3 حبات
هتجيب لي خمس بصلات
بعدين هتقطعه
وياريت لو كان حلقات
وفي الطاسه تدلعه
هنجيب بقه ييجي راس ثوم
وبسرعة تفصصه
بس إوعى يجيلك نوم
وتنسى تهرسه
وأما البصلة هتصفر
علطول هتحط الثوم
ويدوب قبل ما تحمر
هنضيف دوغري المفروم
ونقلب بقه في الخلطة
ونحط معاها توابلها
وشوية ملح و شطة
وأما هتستوي هنجيلها
وتجيب بقه علبة صلصه
وتحـــــط 6 معالق
عاللحمة اللي كانت خالصه
هنقلب كده لدقايق
هتجيب كوبايتين ميه
وتحطها كده عالحاجة
وتضيف الخلطة التانيه
وتملح لو محتاجة
هتسيبها تغلي شوية
وتقطع قوطة شرايح
بعدين حطها في صينيه
والقوطة فوقيها يا فالح
وتدخلها على الفرن
وياريت تحت الشوايه
وأما الوش هيحمر
هتلاقي صينيه حكايه
نزلها وكل وإدعيلي
وإستنى الطبخه التانيه
وإياك تنسى تخليلي
علشان الجاي ملوخية
إنتظروني في الأكلات القادمة
مواقع النشر