المعلمة (عومه ماكوله و مذمومه) !!!
أنا هنا باسلط الضوء على فئة من مجتمعنا السعودي وهي فئة المعلمات
واللي دفعني لكتابة الموضوع هو اللي شفته بعيني وسمعته بأذني من شكاوي المعلمات
وهي منتشرة بكثرة في مجتمع المعلمات لا تكاد تخلو جلسة لهم منها
حتى ان وحدةمنهم قالت (المعلمة مثل العومة ماكولة ومذمومة)!!
ومن يومها وكلماتها هذي تقرقع باذني ماااااااااانسيتها والحين أنا باطرح مشكلتهم الكبرى في مجتمعنا واحكموا
أولا بتقولون ليش المعلمة بالذات مو أي موظفه؟؟
باقول لان المعلمة هي الوظيفة الغالبة للنساء عندنا بالمملكة
وبتقولون ليش المعلمة والمعلم لا؟باقول لان المعلم رجال يعني ملزوم بمصروف بيت وأولاد وزوجة
أما المعلمة فهي امرأة تستلم راتب وقدره ولانها امرأة فهي مسؤولة من ولي أمر (أب أو زوج أو أخ أو غيره) من ناحية المصروف حتى لو كانت موظفة
وهذا يعني أن راتبها (الكبير) لها لوحدها تسوي فيه اللي تبي وماهي ملزومة بأي مصاريف أخرى أبدا حتى مصروفها من حقها الحصول عليه من ولي أمرها
ومن هنا تبدأ الحكاية
أب المعلمة يقول في نفسه وش تسوي بنتي بكل هالراتب؟؟
زوجها يصرف عليها وعلى بيتها اجل هي وين توديه؟؟
أكيد تلعب فيه أو يمكن تعطي زوجها منه في هالحالة انا أولى أنا أبوها اللي ربيتها وكبرتها وصرفت عليها وعلمتها من حقي آخذ من راتبها بدل مايروح في أشياء مالها داعي
يطلب من بنته تطلع له قرض ويشتري سيارة أو أرض أو يبني أو غيرهاوطبعا البنت مابتقول لابوها لا وبتعطيه اللي يبي
تجي أمها وتقول فعلا راتبها كبير أكثر من حاجتها انا بعد أمها ولي حق عليها ومااظن ان اللي بتعطيني اياه بيهز ميزانيتها
يجي زوجها يقول كلل هالراتب وين يروح؟؟ليش ماتمتعني انا كمان فيه اللي يشوفني مايقول ان زوجتي معلمه ويطلب منها تطلع له سيارة آخر موديل (ومدري ليش اغلب ازواج المعلمات على بالهم انه شرط أساسي ان زوجاتهم يطلعون لهم سيارة؟)
وطبعا اذا طلبت المعلمة شغالة تقوم باعمال المنزل فمن الطبيعي انها هي اللي بتستقدمها وبتدفع راتبها لانها تخلت عن اعمال منزلها ومطلوب منها هي انها توفر البديل
واذا كانت تحتاج سواق يوديها لمدرستها فهي اللي راح تدفع له
وايضا مصاريف الاغراض اللي تحتاجها للتدريس هي اللي بتدفعها اجل زوجها اللي يدفع<<هذا اللي ناقص!!
بعض الازواج لما يجي نهاية الشهر يشعر بالظلم الشديد لانه يستلم راتب وزوجته تستلم راتب وعايشين مع بعض وهو بس اللي يدفع اجار البيت وفواتير الكهرباء والماء والتليفون ويقضي اغراض البيت ويشتري اللبس والاثاث وكل شي
فيطلب من زوجته من باب الانصاف انها تتعاون معاه
عالاقل تتكفل بكل مصاريفها واحيانا مصاريف عيالها وهو عليه الاجار والفواتير والمقاضي
وممكن بعد يخلي مقاضي البيت مرة عليه ومرة عليها عشان مايحس بالظلم ولانها في النهاية لهم كلهم مو له لحاله!!
والزوجة غالبا توافق حفاظا على استقرار حياتها الزوجيه وبيتها وتجنبا للمشاكل
واحيانا اهل الزوج اذا نقص عليهم شي يقولون مالنا الا ولدنا فلان زوجته معلمة ويستلمون راتبين طبعا يطلبون من ولدهم مو من زوجته لكن ولدهم لما يعطيهم بيرمي كل شي بعد كذا على زوجته لان فلوسه راحت لاهله
وبعد هذا كله اذا احتاج احد من أقارب المعلمه أوصديقاتها سلف فالعيون كلها بتكون عليها
لانه واضح جدا انها مو عارفة وين تودي فلوسها من كثرها هذي هي مطلعة سيارة لزوجها ومعطية ابوها ومعطية امها و ..و..و
واذا كانت في جلسة حريم وقاموا يشتكون الحال وفضفضت معاهم ياااااااااااويلها
لانهم بيقولون خايفة من الحسد شكلها يوم تشتكي؟؟
وبعضهم بيقول وش ذا البخل اللي فيها ماشفنا لاذهب ولابيوت ولا اراضي وتقول مامعاها اجل وين تودي راتبها اللي هذا كبره؟
وفي النهاية هذه المعلمة اللي راتبها لها وماهي ملزومة بمصاريف احد تكد وتتعب وتشقى ولما يجي راتبها مايبقى لها منه الا القليل القليل
ويظل الجميع يتساءل :وين يروح راتبها؟؟
حتى اذا كانت تعبانة وبحاجة اجازة تفكر الف مرة قبل تاخذها لان الراتب بينقص ويمكن يروح كله لاقساط البنك ومايبقى لها منه شي
وطبعا هذا الكلام ماأعممه على الكل لكنه ينطبق على الاغلب بشكل أو بآخر وماجبت كلام من نسج الخيال والله انه الواقع بحذافيره
أنا طرحت هذا الموضوع عشان بس أرد على تساؤلات الناس اللي يقولون وين يروح راتبها؟؟
واناماني ضد ان المعلمة واي موظفه تساعد والديها وزوجها ولكن مو بهذا الشكل
من حقها تتصرف بفلوسها زي ماتبي واتركوها تعطيكم من كيفها وبطيب خاطر
ايش رايكم يابنات هل هذا هو الحاصل والا أنا ابالغ؟؟؟
رد مع اقتباس
مواقع النشر