آآه من طعونك يا سيف الغدر

[الساجدة لله وحده]

السلام عليكم و رحمة الله و بركاته

كيفكم بنات؟ان شاء الله تكونون بخير


اليوم نقلت لكم قصة اكثر من رائعة من احدى المنتديات و ان شاء الله تنال اعجابكم و ابي ارائكم بصراحة تامة فيها


كاتبة القصة و مؤلفتها على ما اضن: عيناوية دلوعة

القصة:

الشخصيــات :
عائلة حمد راشد (بو عبدالله)
عبدالله 26 سنه معرس حرمته إسمها روضه و عنده بنت وولد شياطين زايد و حمده
سلامه 23 معرسه و ريلها إسمه خليفه و عندها ولد إسمه عبيد
مبارك 19 سنه أول سنه جامعه كشيخ و حليو إجتماعي وحبوب
ريم أول ثانوي حلوه و حبوبه و الكل يمدح فيها و فيها شويه صرقعه
سعيد في صف خامس دبدوب شيطان نمبر ون و ما يرتاح إلا إذا أذى هله في البيت و في المدرسه
عويش الصغيرونه وااايد دلوعه و تحب الكاكو
عائله سعيد راشد (بو محمد
محمد 25 سنه معرس حرمته إسمها أسماء و ماعندهم عيال لأنه ماصارلهم سنه من عرسوا
سيف 19 سنه أول سنه جامعه وسيف حليوو الا قمر وواايد حبووب ورومانسي
شيخه أول ثانوي حلوه و شاطره فالمدرسه وتموووت على عالم السيارات ومشكلتها في الحياة انها دلووعة وااايد .. ودلعها زايد عند حده في بعض المواقف.
نااصر ثاني اعدادي هاادي ومايهمه شي عنده بس اللهم عمري و يحب يلعب كوره وااايد و ممكن تلقونه طول القصه جدام التلفزيون يلعب سوني ولا يشوف مبارياات وتربطه علاقة قويه مع اخته شيخه
أما أخر العنقوود مريم الملقوفه والحشريه عمرها 10 سنوات فصف رابع و كله تحب تضارب العيال ومحد سلم منها ولا من لسانها


(الجــزء الاول)
نبدا القصه في بيت أبو عبدالله :-
في يوم من أيام شهر رمضاان الفضيل اجتمعت عايله بو عبدالله على السفره قبل آذان المغرب و الكل يالس يدعي ربه عسى أنه يتقبل صيامهم إلا سعيد هذا ما خلى حد بحاله مسويلهم عوار راس لأنه أول يوم يصوم فيه :-
سعيد: يمااااه بطني تعورني باكل
أم عبدالله : اصبر اصبر ما بقى شي ع الأذان
سعيد : ما أروم أتحمل بطني يعورني خلاص باكل
أم عبدالله : يوووه صخ عني الحين عنبوك ريال شكبرك ما تروم تتحمل دقايق
سعيد : أمي دخيلج خليني أكل
مبارك : إيه إنت سعوود ماتروم تسكت نبا نعرف ندعي شرات الناس
سعيد: إنت ما يخصك يالدب
ريم : عاشو .. أحلى و أحلى .. يلا يا سعود عطه من ذاك الزين
مبارك : أنا دب يالدراام .. و بعدين إنتي بتنجبين ولا بفلعج بالنعاال
أم عبدالله : حسبي الله عليكم .. بسكم خلاص بسكم مناقره .. إدعوا ترى مافي شرات دعاء الصايم و هذي الساعه ساعة إستجابه
ريم : إن شــاء الله يالغاليه >> و فنفسها تدعي على أخوها برووك
وبين مالعايله تدعى أذن المغرب و الكل قام ياكل و سعود طبعا شاق الحلج
مبارك : أمي .. ابى صحــن الهــريــس
أم عبدالله: .. هــاك
ويوم كان مبارك ماســك صحــن الهريــس طاااح وانجب الصحن علي كندورته
ريم : صدقج يا ماه كانت ساعه استجابه .. خخخخخ
أم عبدالله : حسبي الله عليج .. ما منج صلاح تدعين على أخوج ..!!
مبارك : أنا براويج يالدبه .. كله من عيونج الحمرا هذي ..
و بعدين الكل راح يصلي و يوم ردوا يلسوا ع السفره قامت ريم تفرفر بين قنوات التلفزيون .. بس مالقت مسلسل عيبها فسكرته
ريم : اوووف .. مافي شي يستاهل الواحد يشوفه
ريم : هيه صح شرايكم بالسندويتشات؟
مبارك : دام سمر سوتها .. أكييد حلوه .. خخخخ
ريم: إنت جب ترى أنا إلي سويتها و بعدين رايك ما يهمني أنا راي سعود هو إلي يهمني
سعيد: لووعه ربي يلوع جبدج .. شو حاطه فيهن ؟؟!!
مباارك : هههههههههههه .. ويييييه قفطوووووهااااا ... ههههههههه يلا بسرعه خمي ويهج
ريم : اهئ اهئ اهئ .. ابوووي شوووف برووك يتطنز علي << اونها عاد تتغلا
ابو عبدالله : ما علييج منهم هايييل يحقدون عليج لأنج بنتي الغالية .. واايد حلوين السندويتشاات
ريم : أبوي إنت كليت من السندوتشات أصلا ؟؟ ....
أبو عبدالله : طااعوا .. حمدي ربج يوم إني أبا أراضييج
ريم : خخخخ أوكي خلاص حقك علي .. و أنا إلحين بترخص منكم تآمرون على شي؟
ابو عبدالله : ويــن ؟؟ .. زعلتي ؟
ريم : أنا أزعل ..!! ويهي لووح عادي عندي ... و بعدين أنا بسير برمس شواخي من زمان ما رمستها
وسااارت ريم تدق على شيخه و هي فخاطرها سيف يرد ع التلفوون
ريم : ألووو
شيخه: ألووهاات
ريم : هلا و الله بالقاطعه .. ليش ما تتصلين ؟؟
شيخه : اهلين و الله .. بس شو أسوي الدنيا و أشغالها
ريم : اهاا .. إنزين شحالج ؟ .. و شحال العرب عندج؟
شيخه: .. والله يسرج الحال .. و من صوبج؟
ريم: الحمد الله ما أشكي من بااس
شيخه: شخبار الدراسه وياج؟
ريم: زفت و الحمد الله .. بس تعرفين عندنا مس ملوعه جبدي ترمس من خشمها و يوم تطالعنا جنا صراصير عندها
شيخه: حلييلكم .. إنتوا المساكين قطوكم عند مس خوله .. ههههه
ريم : هيه صح شواخي .. من بدايه رمضان و انا أدور على مسلسل أجوفه بس مالقييت كلهن بايخات !!
شيخه : والله صدقتي يا بنت عمي .. ماشي مسلسلات تستاهل الشوفه
ريم : إنزين إنتو متى بتتيون؟
شيخه : ما أدري و الله
و بين ما شيخه ترمس ريم دخل عليها سيف و تم يلعوزها لأنه يبا يسمع صوت ريم بس شيخه ماخلته
سيف: دخيلج شيخه بس خليني أسمع
شيخه : يلا إذلف ..السما أقرب لك
شيخه : اقولج ريماني .. هذا سواف ملعوزني منيه فبترخص منج يا الغاليه
ريم : أوكي شواخي .. ربي يحفظج
شيخه : فأمان الله
وكل وحده بندت عن الثانيــه .. وريموووه على طوول سارت حجرتها وتمددت عالشربية .. وغمضت عيونها ويلست تتذكر ايام طفولتها ويا سيف ولد عمها .. وشكثر هي تحبه وهو يحبها من كانو صغار .. وهني ماقدرت ريمووه تقااوم النووم .. وراحت لعالم الأحلام الوردية



في اليوم الثاني .. راح سعوود أخوها يوعيها .. وعااد شوفوا شو سوا السبال في البنيه :
سعيد: إي يالخسفه يدوتي تباج تحت .. يلا بسررعه قوومي
ريم تقووم وهي تنتفض حليلها وتقول بخاطرها : ( غربل الله بليسك يا سعووود )
ريم : زين زين .. الحين بقووم


قامــت ريمــووه وتسبحت وغسلت ويهها وتكشخت عسب تستقبل يدتها الحنوونه


ريم: هلا والله بالطيبيين .. نورت دبــــي بهالشــووف
اليده : منــوره بأهلها حبيبتــي
ريم : شحالج عووشه؟؟ .. هييه صــح مبارك عليج الشهر
اليده : منو هاي عوشه بعد ؟؟ اصغر عيالج ؟؟
ريم : انتي عوشه منو بعد غيرج .. ولا لاتكونين مغيره اسمج
اليده : لا حشى علي مالي اسم غير الي سموني فيه امي وابويه
ريم : انزين يدووه ... امج وابوج بعدهم موجودين؟؟(تبي اطفر بديتها)
اليده : الله يرحمهم برحمته
ريم : الله يرحمهم .. اهئ اهئ اه كانوا اب وام حنونيين وطيبيين اهئ اهئ
اليده : تتطنزين حضرتج .. يلا يلا قوومي من ويهي اشوووف .. خس الله ابليسج من ابنيه


ريم : ههههه لا تدعين على ابليسي حليله ماسوو شي
اليده : الا مسوي سوايا فيج .. أنا شكلي لازم اوديج عند ام احمد تقرا عليج منه
ريم : ان شاء الله .. وبخليها تقرا على سعوود وبرووك وعوااش ههههه
وسارت ريم حجرتها ... و بننتقل لمبارك إلي كان رااقد في سابع نوومه الا ويدق عليه سيف :


سيف : صبـــاح الخيـــر يا ويــهه الخيـــر
مباراك : بسم الله .. انت شو عندك حارق تلفووني من صبح الله خيرنا
سيف : بسم الله منك ... الناس الراقيه تصبح بصوتي وانا اقول صباح الخير بكل رقه
مبارك : والله احيدك طالب جامعي مب دييك هع هع هع
سيف : هييه يطنز الشييخ مباراك .. محد بسكتك تدري ان نكتك هاي تعيبني .. باجر تلقاني حاطنها رنه
مبارك : طويل العمر .. شي طبيعي مب انت اول واحد تقوولي هالكلام .. بس بيني وبينك حلووه هذي رنه
سيف : اذا حلوه يلا اشووف رقمها
مباراك : 050 والباقي ماتغير
سيف : ههههههههههههههه والله ما اتيووز عن حركاتك هههههههههه
مباراك : بل خييبه تفالك واصل لين عندي عنبووك هدي شووي
سيف : مالت على هالويهه انا الي تفالي واصل لين عندك .. عيل انت شو بتقوول يوم بتشم ريحت حلجك الي ساده الغرفه ههههههه
مباراك : انته ماينفع حد يمزح ويااك .. على طوول الرد بطرف لسانك .. انزين الغالي شو تبي ؟؟
سيف : مممممم .. والله نسيت تصدق
مباراك : شوووه نسييت ؟؟ انت الحين موعيني على شووه ؟؟
سيف : هيييه وعيتك عسب اسوولف ويااك ... يعني ليش بدقلك اكييد اذا في طلعه
مباراك : ادريبك زطي ما تبي تطلع برووحك عسب انا الي اعزمك وادفع على حسابي
سيف : ههههه رحم الله امرء عرف قدر نفسه
مباراك : ويا ويهك .. انزين وين ؟؟ وويا منو ؟؟
سيف : والله الشباب يقولون بروحون الفجيرة .. وقالولي اتخبرك
مبارك : الله .. اووكيه خلاص متى ان شاء الله بنطلع ؟؟
سيف : اليوم العصر .. بمر علييك وبنرووح .. وطبعا باخذ سيارتي وخل سيارتك عند اهلك ممكن البرنسيسه ريم تبي تروح مكان
مباراك : قصدك البشكاره ريم .. انزين ماعلينا خلاص يعني بشووفك العصر اوكيه
سيف : اوكيه
مبارك : يلا عيل في داعة الرحمن
سيف : مع السلامه
وبند مباراك عن سيف .. الا ويظهر له على الشاشه (البطاريه فارغه )
مباراك : خس الله عدوينك يا سيفوووه .. الحين بيلس ساعه كامله لين مايشحن


و إلحين بننتقل لبيت بو محمد


شيخه وامها والخدامه سونيا يالسين في المطبخ يزهبون الاكل


شيخه : امــي مابنسير دبي هالويك آند ؟؟
ام محمد : والله ما ادري .. ودي لو نسير عند خالتج ام عبدالله ونفطر عندها
شيخه : هي والله اماايه .. والله اني ولهت على ريمووه وخالتي .. خلاص انا بسير بخبر ابوويه


شيخه مطبخهم خارجي ولازم تلف نص الحوي عسب تدخل البيت .. وهي رايحه تبي تدخل البيت الا وتطلع لها قطوه وجان تصااارخ .. وتظهر الام تركض من المطبخ تبي تعرف شو السالفه


الام: بسم الله الرحمن الرحيم .. شوااخ حبيبتي شو فيج ؟؟


شيخه وهي زايغه : اميييييه شيلي هاليعري من جداامي .. بياكلني


الام : هههههه غربل الله ابليسج من بنت .. بس عشان هالقطوو المسجيين مخرعتني انا اسير اجابل الطبخ احسن لي
شيخه : امييييه لا لا تسيريييين بياكلني
الام : شو يبي فييج ياكلج هههههه ... فريله أي شي وبيووز عنج
شيخه تفر نعالها وتركض داخل البيت وتيلس في الصاله وهي تتنافض وتيلس تسب في القطوو بهاللحظة سيف كان تووه نازل


سيف : بسم الله ... اختي شيخووه شو فييج ترمسين عمرج ؟؟ اكييد محموومه ولا مريضه قومي قومي بودييج مستشفى نفسي
شيخه : استووب استووب عني مهله ثانية بس اضحك .. ها ها ها ها .. اقوول بس فارج مب متفيجتلك
سيف : ملات على ويهج هذا يزاي بعد قلت بيلس بسوولف ويا اختي الصغيره تشكيلي واشكيلها . بس الشرهه مب علييج الشرهه علي انا الي معطييج ويهه هاليومين
شيخه : انزين بسالك .... شحقه هالكشخه كلها ؟؟
سيف : ليش شكلي واايد حلوو .. بسيير بشووف ماي لووف مواعدنها في المطعم
شيخه : عشتوووووو ... والله خلاص انا بعد بتعرف لالي على واحد وبخليه يواعدني في المطعم
سيف : انتي بس جربي ... قبل لا يذبحج ابووي انا بدفنج في مكاانج يالخايسه
شيخه : يووووه انت شو فيك يالسه امزج ويااك ... شو يعني انتوا محد يسمع منكم كلمه حلوة في هالبيت (اونها زعلت)
سيف : والله سووري شوااخ فديتج اختي .. ماكنت اقصد اني اجرح مشاعرج بس تدرين غيرتي عليييج لوين واصله
شيخه : لا والله .. على بالك انا مثل حبيبتك بالكلام المعسوول بتراضيني
سيف : اييه انتي لاتصدقيين عمرج .. أنا ماعندي حبيبه غير الشيخه ريــــم ... هي صحيح شو اخبارها ؟؟
شيخه : ماتت الله يرحمها
سيف : ايييه لا تتفاوليين على البنييه هب زييين
شيخه : انزين انا شو قالت قلت ماتت من الوله لشووفت بنت عمها الغالية بنت الغالي
سيف : واخوها الغالي ولد الغالي
شيخه : لا والله منو قال انك انت غالي ؟؟
سيف : انا قلت ... انزين سمعي انا واايد طولت ويياج على هالهذره من الصبح ... انا بطلع بسيير ويا الشبااب الفجييرة ... والحين انا بسيير دبي بيت عمي باخذ مبارك وبنتوكل ... لاتنسيين قوولي حق اماايه عسب ماتخااف وتشغل عمرها فيني
شيخه : ياحيييكم والله بتسيرون الفجيرة .. يالله ماعلينا ترووح واتي بالسلاامه
سيف : اووكيه حايه ولا اماره ؟
شيخه : سلامتك
سيف : وفرتي ..


ويطلع سيف من بيتهم ساير دبي ...اماا شيخووه تطلع حجرتها بتصلي الظهر وبتقرا قرآن وفي الطريج كانت حجرة ناصر مجابله لحجرتها وكانت تسمع حشره وازعااج من الغرفه ..


ياترى شو في الحجرة ؟؟


وشو راح يستوي لسيف ؟؟



تابعـــونــي .. في الجزء القادم

[الساجدة لله وحده]

الجــزء الثانــي


ويطلع سيف من بيتهم ساير دبي ...اماا شيخووه تطلع حجرتها بتصلي الظهر وبتقرا قرآن وفي الطريج كانت حجرة ناصر مجابله لحجرتها وكانت تسمع حشره وازعااج من الغرفه ..



تبطل شيخوه الباب وتشووف اخوها ناصر وويا مريووم يتضاربووون .. والسووني الصووت على الاخير


شيخه : اييييه بس انت وهي ... شو مستوي فيكم ؟؟ قبل شوي كنتوا هاديين مسرع ماينيتوو.
ناصر : هذي اختج مريم الطفسه .. خذت المومري مال السوني وفرته من الدريشة
مريم : يستااااهل الدب .. محد قاله مايلعبني
ناصر : انتي اصلا ويهه لعب .. قوليلي كم قير خربتي للحين ؟؟ وكم شريط سووني لازم اشتري كل اسبووع كله منج .. ما أدري شو تسوين فيهن .. قوليلي ابوي حرم عليج الاكل يالسه تاكلين الاشرطة ..
شيخه : بــس انزين خــلاص .. مريوم يلا اتأسفي لناصر عسب بعدين يلعبج
مريم : لا والله .. ليش هو مايتأسفلي .. شوفي كيف خرب شعري استويت ام كشه مثل ريمووه بنت عمي
شيخه : هههههه في هذي صدقتي .. بس خليها تسمعج الحين تلقين نفسج مدفوونه في مكانج


تظهر مريم من الحجرة بعد ما حلوا القضية بابتعاد ناصر ومريم عن بعض ... وسارت شيخة تصلي الظهر وقرت قرآن وبعدين سارت تلعب ويا ناصر اخوها سوني ... واذن العصر وسارت شيخه توضت وصلت .. اما ناصر سار المسيد ومن عقب ظهر ويا ربعه


شيخه : السلام عليكم ورحمة الله .. السلام عليكم ورحمة الله (خلصت الصلاة) .. استغفر الله العظيم من كل ذنب عظيم .. اللهم انت السلام ومنك السلام تباركت يا ذا الجلال والاكرام ..


وعقب ظهرت من الحجرة .. وهي في الصاله تبي تطلع المطبخ تشوف امها .. دق التلفوون


شيخه : مرحبا
مباراك : مرحبيتن .. منو معاي؟؟
شيخه : شو بعد منو معاي .. انت الي داق هب انا
مبارك : اسمحيلي اختي .. بس هذا بيت سيف سعيد راشد
شيخه : أي نعم ؟؟ منو تبي ؟؟
مبارك : سيف وينه ؟؟
شيخه: والله ظهر من الصبح ساير دبي .. منو اقوله ؟؟
مبارك : لا لا خلاص بس انا مستغرب ليش ما يرد على موبايله؟؟
شيخه : اخوي سيف مايرد على موبايله ؟؟!! غريبـــــه !!
مبارك : انتي مريوم ؟؟!! والله كبــرنــ استوى صوتنا ناعــم شسالفه ؟؟
شيخه : لا مب مريوم أنا شواخ
مبارك : اووه اسمحيلي بنت عمي والله ماعرفتج
شيخه : لا عادي ولد العم .. انا بروحي ماعرفتك
مباراك : المهم شحالج ؟؟ وشحال الاهل ؟؟
شيخه : والله تمام .. وانتوا اخباركم ؟؟
مبارك : لا جديد .. المهم الغالية مابطوول علييج بس لاتنسين اذا دق سيف قوليله اني سألت عنه
شيخه : ان شاء الله .. يـــوصل
مباراك : يلا عيل في داعة الرحمن
شيخه : مع السلامه ..



بنـــد مبـــارك عن شيخه .. وهو كان مستغرب انه ماعرفها وكيف نسى بنت عمه ... بس بسرعه قطع حبل تفكيره صوت التلفون ... سيــف متصــل


مبارك : الوو سيفووه .. وينك ؟؟ مابغييت ادق ... وبعدين وينك تراك أخرتني ؟؟
سيف : اسمحلي ولد عمي حبيبي .. كنت في المسيد فسكرته ونسيت ما افتحه .. المهم خلاص انا الحين عند البيت .. يلا انزل بطل لشيخك الباب ..


مبارك : اقوول دش يلا دش .. ترى الباب الرئيسي مايتبطل الا لكبار الشخصيات شوف الباب الوراني .. ممكن تلقى امي ولا وحده من خواتي ولا الفراشه في استقبالك ..
سيف : والله .. عيل خلاص بييك من الباب الوراني .. بس خل ريمانــي تفتــح لي البــاب ..
مبارك :لا خلاص غيرت راي تعال من الباب الرئيسي .. ههههههه
سيف : لا لا خله مثل قبل شووي احسن
مبارك : شووف بتدخل من الباب الرئيسي ولا برايك لا اتيي
سيف : اووكيه .. خلاص برد العين
مبارك : اييه الغالي لا تكون زعلت ؟؟ افا علييك البيت كله تحت ايدك
سيف : احم احم .. خلاص زيين بييكم من الباب الوراني وخل ريم تبطله وييبلي انت العصير ههههههههههه
مبارك : مالت على ويهك بسرعه تصدق .. انزين يلا اترياك
سيف : يلا مع السلامه ..



ووصل سييف بيت عمه ( قبل اذان المغرب) واستقبله مبارك بصدر رحب .. ودخله الميلس .


سيف : الله ميلسكم حلوو .. تصدق من زمااان ما ييت بيتكم .. شو شيلتوا المريحانه المصديه ولا لا ؟؟
مبارك : لا بنتريااك اتيي وتشلها ..
سيف : والله حراااام .. كانت تعيبني .. تحييد يوم طيحنا ناصر اخووي وتكسرن ضروسه وعقب عاقبونا وخلونا انظف السايير ..
مبارك : الله ياوقت مضى .. ايام مرت وين ..
سيف : الحين عرفت ليش ميحد حمد غناها بالعوود .. بداال الفيديو كلييب عشان حضرتكم ما ادري وين وديتوا المريحانه
مبارك : والله انك متفيج .. انزين يلا قووم بنسيير الحجره الثانية بنفطر
سيف : انزين .. شو فطوركم اليوم؟؟
مبارك : والله ما ادري .. بس انت يسدك ان ريم سووت شي منه
سيف : والله .. عيل خلاص مابخلي شي الا وكليت منه
مبارك : هههههه والله حالتك صعبه


ودشوا الغرفه الثانية ويلسوا ياكلوون ... بس ريم يوم كانت تحط السفره نست ما اتييب دلة القهوة .. فيوم كانوا العرب ياكلوون دقت ريم الباب


مباراك : هااه .. خير شتبوون ؟؟ خلونا نفطر عدل


ريم : احم .. احم (بصووت واطي ماسمعه سييف الي كان مشغوول في الاكل ويسال نفسه أي حبه سوتها ريم ؟؟)


مبارك : اهاا زين زين يااااي
وياخذ مبارك دلة القهوة من ريم .. وهي كانت تحاول انها تشووف سيفووه بس ماقدرت لان مبارك كان اطول عنها وسد عليها
مبارك : خير شو بعد تبين ؟؟ يلا فارجي
ريم : زيييين لا تكلني عنبووو ماسووويت شي


وكملوا سيف ومبارك اكل وعقب ساروا يصلون وراحوا لمشوارهم للفجيرة .. في الطريج .. نزل مبارك الشيشه وخلى موبايله عند سيف في السياره .. وجان يدق موبايل مبارك وسيف ماعرف شو يسوي .. كان الرقم رقم بيت عمه .. فحس انه ممكن يكون شي مهم .. فرد
ريم : الوه
سيف : السلام عليكم ..
ريم (باستغراب): وعليكم السلام .. منو ؟؟
سيف : انتي الي منو .. انتي الي داقة ؟؟
ريم : لاوالله موبايل اخوي كيفي بدق عليه متى ما ابى انت شعليك
سيف : اووه .. السموحة منج .. انا سيف
ريم ( بنبرة صوت غريبه تعني لا مبالاه) : اهاا.. انزين وينه مبارك ؟؟
سيف (بدى عليه الاستغراب) : ليش؟
ريم : يوووووه انت شوفيك .. اقووول عطني مبارك وخلاص ..
سيف (منصدم) : ........
ريم : اففف .. قوله ان اخته ربت ويابت ولد
سيف )بعده تحت تأثير الصدمه) : ان شاء الله
ريم : باي .


وسكرت في ويهه ... وسيــــف تــم مصــدووووم مايعرف شو يسوي ..


ياترى شو استوى على ريم؟؟
ومبارك شو بتكون علاقته ويا شيخه ؟؟


تابعــــونــا في الجــــزء القــــــــادم ..

[الساجدة لله وحده]

الجــزء الثالـــــــث


يا قايد الريم ذكراك ماغابت عن خاطري ساعة .. الروح لك مع صاحب الروح نزاعة

وصلنا في الجزء السابق لرحلة شبابنا للفجيره .. والمكالمه الي استوت بين سيف وريم وللحين سيف مصدووم من حركة ريم الغريبه الي ماعرف لها أي معنى او تفسير .. عالعموم خلونا نكمل القصة الحين ونشووف هالجزء شو يخبي لنا ..

رد مبارك وركب السياره وكمل مشواره .. وسييف تم مصدووم وسرحااان في ريم .. واستغرب مبارك منه والا ويبي يعرف شو سبب سكوووت سيف المفاجئ والغريب

مبارك : سواااف ... بلااك منو قص لسانك ؟؟
سيف : ......
مبارك: حوووووه سوااف .. وين وصلت ؟؟؟ يالس ارمسك من سااعه
سيف : هاااه .. ترمسني انا ؟؟!!!
مبارك : لا تخبلت ويالس ارمس عمري .. انت شو رايك ؟؟
سيف : ممكن ؟؟ ما أدري فيك
مبارك : لا والله .. اكييد فيك شي .. لا لا لا انت مب طبيعي ابداااا
سيف حس انه صدق بدى ينكشف : هييه اقوولك بروووك .. اختك ربت
مبارك : هههههههه لا الرياااال فيه شي
سيف : لا صج والله ... يوم نزلت الشيشه دقوا على تلفونك ورديت طبعا بعد تردد وقالولي انها ربت ويابت ولد
مبارك : اهاااااا .. وانا اقوول شو الي قالب تفكيير الرياال وماخذه عقله ... يعني هي الي اتصلت صح ؟؟
سيف : هييه هي الي اتصلت .. الحين لو سمحت ممكن تنتبه للطرييج كنت بتودينا في سته وستين دااهيه
مبارك : ههههههه عشتووو .. الحين سيفوووه استوا يخااف من الحوادث .. والله ما احيدك جذيه يا ولد عمي .. المهم شو قالت لك ؟؟
سيف : ماقالت شي .. الحين لو سمحت ممكن تسكت شووي ترى حدي معصب وطفراان الحين
مبارك : يالله .. انزيين لا تاكلنااا .. خلااص سكت
ووصلوا الشاليه الساعة 10:30 والشله كلها كانت تترياهم .. ويلسوا يسولفوون ويلعبوون يعني سهره على كيف كيفك .. وبدا النوم في حربه مع عيوون مبارك وما قدر يقاومه فاستأذن من ربعه وسار الغرفه عسب يناام .. ومن حط راسه على المخده .. يا في باله اسم شيخه .. شيخه بنت عمه .. شيخه اخت ربييع عمره وتوأم رووحه الي نسا كل شي يتعلق بها بعد سفرت المانيا (بتعرفون القصة قريبا) وحاول مبارك ان يدووس على ذاكرته ويتذكر أي شي يتعلق بها .. وتذكر شلتهم في بيت يدهم (الله يرحمه) كانوا كلهم يتولفون عند نخلة عووده في حديقة البيت .. كان مبارك وسيف وشيخه وريم وهادف وناصر وعليا وكان زعيم هالشله محمد أخو شيخه .. وتذكر يوم كانوا يشترون البالونات ويعبونها ماي ويتضاربوون ويا عيال الفريج .. وغرق مبارك في بحر من الذكريات السعيدة من احلى ايام العمر وبكل هدووء تسكرت عيوونه ورااح لعالم احلامه ..

سيف كانت حالته صعبة وااااايد ..اتصال واحد قلب تفكيرة فوق حدر .. ما يعرف يمينه من شماله .. حس بغصة في قلبه .. وبدى يسأل نفسه .. معقلووله هذي ريم الي اعرفها؟؟ وليش تكلمني بكل هالجفا والحقد هذا؟؟ معقووله هذي ريم الحبوبه الي اعرفها ؟؟ لا لا انا اكييد احلم أنا اكييد مب صااحي .. ريم عمرها ماتسوي جذيه ...... ويلس سيف تايهه ضاايع ما يعرف وين الله حاطه .. وشافه ربيعه حميد

حميد : الي ماخذ بالك يتهنى به
سيف : هاه .. هلا حميد
حميد : اهلين .. الا اقوول بلاك جذيه سرحاان وجنه مصايبي الدنيا على راسك
سيف : لا ابدا ولا شي .. بس تعبان شووي
حميد : سلامتك .. شو يعورك ؟؟
سيف : لا لا سلامتي مافيني شي يعورني .. بس تعبان ابى اسير انام
حميد : ولو ان في شي مستوي فيك .. بس ماعليه يا الغالي روح الله معاك


وفي هــذي الاثناء
ام محمد واسما (حرمت محمد) ساروا المستشفى عشان يشوفون سلامة .. وتمت شيخه ويا مريم وناصر وسونيا في البيت .. ناصر كان يشوف مباراة على الجزيرة الرياضية وماهمه من حد ومريوم يالسه تكتب واجباتها ..
شيخه : اففففففف ملل ملل ملل
مريم : سيري حلي واجبج ..
شيخه : ماعندي واجبات .. ابى اسوي أي شي
ناصر : تحوطي في البيت
شيخه : من كبره الحينه ... الا هو غرفتين وصاله
مريم : انزين شو رايج ترقدين شووي
شيخه : لا والله .. امااايه بترد بعد شوي وبتشوفكم هني وبتقول وينها عنكم
ناصر : انزين شو رايج ... قو ل قووول قوووووووووول
شيخه : صج ؟؟ منو سجله ؟؟
ناصر : ها الاعب فان نستلروي
شيخه : اشوفه أي واحد فيهم ... الخال ؟؟
ناصر : فعيينج .. هـذا الابيضاني بو شعر طويل
شيخه : هيييه ها كان ربيعي فالجامعة يوم كنت ادرس في اسبانيا ..
ناصر : ههههه مشكله الي خيالهم واسع ..

شيخه عطته نظرة وسارت حجرتها .. بطلت الاب دشت المسن .. لقد حد ضايفنها سوت قبول للاضافة تبي تعرف منو

عاشــق ليــوا: هلا والله
احســاس قلــب : منو؟؟
عاشــق ليــوا: انزيــن ردي الســلام ع الاقــل
احســاس قلــب : هلا.. منو معاي ؟؟
عاشــق ليــوا : معاج سهيل حمد ال......ي
احســاس قلــب : ما شاء الله .. الاسم كامــل مو ناقص الا تعطيني رقم جواز السفر والبطاقة الصحية
عاشــق ليــوا : ماعنــدي مانــع والله عسب نتعــرف اكثــر .. بس المشكلـه ناسيهــن
احســاس قلــب : انزين من وين يبت ايميلي ؟؟
عاشــق ليــوا : الهـــــام .. سرت البحــر طــرى ايميــلــج على بــالي ..
احسـاس قلــب : لا والله .. تستخــف بدمــك الحين ... بـــاي


ماعطــه أي مجــال او فرصــة للكــلام .. على طــوول بلــوك وديليـــت

شيخه : اففففف .. والله شباب هالايام مامنهم صلاح .. مضيعين وقتهم في اشياء تافهه
التفتت شيخه لقت موبايلها محطووط على الطاوله ويت في بالها فكرة جهنميه .. شلت موبايلها وبسرعة دقت لربيعتها "مهــره" (مهــره هي ربيعة شيخه الروح بالروح عمرهن ماتفارقن من ايام الابتدائية ..ووايد يتشابهن في الشكل ماشاء الله عليهن آيــة من الجمـال .. بس الفرق الوحيــد ان شيخه اطول من مهــره بشــوي .. ويجمعهن الولع بالسيارت بدرجة خياليه .. ) ..

تووت توووت تووت

مهــره : هلا والله .. هــلا شــواخــي
شيخــه : هـلا مهــاري .. شحالــج الغــلا ؟؟
مهــره : يســرج حــالي .. انتي علومــج؟؟
شيخــه : والله لا جـديد .. مهــاري باجــر دوام
مهــره : والله اعــرف غناتــي .. بس شو نســوي هي حال الدنيــا
شيخــه : هييه والله .. انزيــن باجــر أي لــون ؟؟(( حركــاتهــن لازم يطقمــن))
مهــره : مممم .. شو رايــج اصفــر ؟؟
شيخــه : ممممم اووكيه .. خلاص باجر بنطقم انا وانتي اصفـــر بنعمــي البنــات
مهــره : ههههه خلاص انا الحين بظهر الجوتي (اكرمكم الله) والدلاغات والاكسسرز
شيخــه : مي تـــوو .. هييه صح قـولي حــق امــج ترى ســلامــي ربــت ..
مهــره : صــج .. يابــت هــزاع ولا ميثــه ... ؟؟
شيخــه : ولا واحــد من الاثنيــن
مهــره : شوووه عيل ؟؟
شيخــه : يا بــت سعيــد
مهــره : هيييه يعنــي بسمونــه سعيــد ... انزيــن اقولــج امايه تزقرنــي بسير بشوف شتبي مع السلامة
شيخــه : الله معـاج .. سلميلــي عليهــا
مهــره : يوصــل باي ..


سكــرت مهــره عن شيخــه .. وسارت شيخه تزهب المريول والشنطة و.... الخ ونزلت تحت .. ولقــت الحبيبــة مريــوم راقــدة في الصالــه وناصــر ياكــل ولا يعــزم حــد .. زقــرت خدامتــهم سونيــا اتقــوم مريووم وتوديهــا الحجــره .. وسارت عند نــاصر تتمصلــح معاه

شيخه : هلا والله بنـاصر ..
ناصــر : اهليــن ... هــاج سندويتشــج وعطيتــج اياه .. شو تبين بعــد ؟؟
شيخه : ثانكــس والله .. تحسبتــك زطــي شرات سيــفــوه
ناصــر : والله يا بختته سيف .. سار هو ومبارك وربعهم الفجيرة باجر بردون
شيخــه : هييه ادري ..
ناصـر : آآآخ انا تعبــان بسيــر ارقــد .. تصبحيــن على خيــر
شيخه : وانــت من اهلــه ..

ســار ناصــر حجرتــه .. شيخــه بهالوقــت يا في بالهــا مبــارك .. هي صارلهــا مــدة ماشفتــه يعني دوم ترمس ريم وتقولها عنه .. وياما وياما سيف عزمه على بيتهم .. بس هو ليش مايتكــذرها معقووله غبــار السنيــن اثــر علـى ذاكرته ..حاولــت تتكـذر مــلامــح شكلــه ... الي تعرفه من كلام خالتها وامها انه يشبهه اخووه عبدالله ... شيخه حست شووي بالتعب والا رهاق سارت حجرتها ونامت ... وطبعا امها ردت من المستشفى الساعه 12 وكانت تعبانه فعلى طوول سارت ترقد ... بدوون ماتسال عن حد


في اليوم الثاني ...

الشباب في الفجيرة ماكانوا متسحرين ... وكل واحد يلووم الثاني ليش ما وعاهم .. وفي الاخير اضطروا ان يرد كل واحد بيته ..

سيف ومبارك في سيارة و حميد والشله مثل مايو بردوون ... سيف كان تعبااااان لانه مارقد عدل فتولى السواقه مباارك .. اذن الظهــر ونزلوا مبارك وسيف وصلوا وكملوا مشوارهم لين بيت بو عبدالله ... من وصل مبارك بيتهم وحاول سيف انه يتم عنده وعقب الفطور يرد .. بس سيف مارضى ومشى السيارة بسرعة قبل لا يشوفه عمه او خالته ويسوون له سالفة ... مبارك أول ماوصل البيت وصل تعبااان ودش البيت ومايسمع الا صوت سعيد وعويش يتضاربون

سعيد : عويش يالدبه والله بضربج .. قومي عني
عويش : مابى مابى .. اول عتني حواوه
سعيد : مابعطييج .. والله انا مو مشتريهن حقج .. سيري شربيلج نيدوو أحسن

يلست عويش تصيييييح .. وشافت مبارك عند الدري .. وجان تربع لعنده
عويش : برووك .. شوف ثعيد مايبى يعطيني حواواه
مبارك : سعوود يا الدب عطها حلاوة الحين ولا بسدحك .. ترى انا من زماان ماضربتك
سعيد ( آآآخ منج يا الدبه .. سرت شكيتي لبرووك) : اففففففف منك ومنها .. زييين بس بعطيها شووي
مبارك : شووه .. ؟؟ اقوول يب هالكيسه الي ويااك ... رياال شطوولك وماتصوووم ..
سعيد : كيفي والله .. انا اتعب يوم اصووم
مبارك : هييه تتعب يوم تصووم بس يوم تاكل موول ماتتعب .. وخــذ عنه الحلاوة وعطاها حق عويش وسار حجرته تسبح ورقد ..

سيف وصل العين الساعة 2 الظهر .. دخل البيت وهو مظلم وهاادي .. استغرب معقووله وين راحوا اهله واخوانه .. بس سمع صووت غريييييب من حجرة التلفزيون .. صوت رياال بس الصوت غامض .. مشى مشى مشى وصل عند باب الغرفه ولقى الدريشة مبطله .. بس الصوت بعده موجود .. دخل الغرفه وشاااف مصدر الصوت الغريب ..


ياترى شو ها الصوت ؟؟

ووين راحوا اهله ؟؟

تابعوني في الجزء القادم ..

[الساجدة لله وحده]

الجــزء الرابـــــع



وصلنا في الجزء الماضي لوصول سيف لبيته وانه سمع صووت غرييب من الحجرة .. الحين في هالجزء بنعرف صاحب الصوت " بطلنا اليديد في القصه" ياترى شو هل بغير حياتهم ؟؟ وبغير مجرى القصة الحالي ؟؟ خلونا نشووف ...


دخل سيف الحجرة .. وشاف الدريشة مبطله والصوت موجوود التفت الجهه الثانية ولقى واحد لابس كندورة سودا وكاب احمر يالس يرمس في التلفون .. سيف في خاطره : منو هذا ؟؟ كيف دخل بيتنا ؟؟ اقترب منه سيف اكثر بس الولد لف وشافهه .. وتقابلوا فيس تو فيس .. تفاجأ سييف معقووووله يكون هو الي جدااامه !!! بعد غيبه سنيين رد ... طبعا محد منهم كان يقاوم ويهه الثاني وارتموا في الاحضان ..

سيف : وينــك يا القاطع .؟؟ ما نشــوفك ولا نسمــع صــوتك ؟؟
هادف : موجــود ولــد عمــي موجــود ... انتــوا في القلــب والعيـــن
سيف : يسلمــلي قلبــك .. علومك الشيخ ؟؟ علوم هل الذيد ؟؟
هادف : والله يســرك حالهــم .. مايشكــون من بــاس

وقفه مع هادف .. هادف ولد عم سيف وكانوا في السابق يوم بو هادف عايش اكثر من اخوان وكانوا كلهم يعيشون في بيت يدهم (الله يرحمه) توفى عمهم سالم بخطـأ طبــي .. وكان في تلك الفترة هادف عمره 15 سنه وخواته عليا وشما 12 و6 سنه خذتهم امهم معاها عند اهلها في الذيد ومنعت عنهم كل سبل الاتصال بعمهم او عياله لان بو عبدالله حاول انه على الاقل يخلي هادف عنده .. بس هي مارضت وعاندت بس في هذه الفترة كان بو محمد في المانيا وتم فيها 6 سنوات .. 4 سنوات كان محمد يدرس فيها 2 سنتين لان شغل ابووهم تحوول هناك .. فتقريبا عاشوو فترة عصيبه .. الحين هادف عمره 22 سنه يشتغل مهندس اتصالات وهالوظيفه عينه لها عمه بو محمد لانه يشتغل في الاتصالات .. اما شما عمرها 19 سنه ودها تدخل الجامعة بس اهلها مب راضيين وشما عمرها 13 بعدها في الاعدادية ..

نرد لسيف وهادف ..

سيــف : انزين الغالي .. انت من وين دخلت البيت ؟؟ من الدريشه ؟؟!!
هادف : توقعتك بتقول جذيه .. لا انا ييت الصبح تقريبا الساعة 8 وسلمت ع الوالد والوالده وسرت المكتب اليديد ورديت قبلك بخمس دقايق تقريبا فتحت الجامه ابي هوا
سيف : اهاااا .. يعني انت الي البارحة ابوي كان يرمس عنه .. مبروووك الوظيفة اليديده عقبالي
هادف : لا انت اول خلص الجامعة .. هيه صحيح اليوم ليش ماسرت ؟؟
سيف : والله هذا الي مزيغني اخاف هالدكتووره الخبله تروغني .. ماعليه باجر بييبلها عذر .. بس تدري انا بس اول سنه بدرسها هني عقب بدرس برع شرات محمد اخوي ..
هادف : هييه عفيااا .. وعقب اتموون 6 سنوات ثانية
سيف : لا لا لا منو قالك باخذ وياي هالغجر كلهم <<يقصد اخوانه>> باخذ عمري وبسيير
هادف : الله يوفقك ان شاء الله .. عقبال ماتشتغل عندي فراش
سيف : تتمنـــى انت بــس ... الا اقوول وينهم اخواني ماردوا
هادف : ناصر سار النادي يلعب وعويش ويا خالتي ساروا الجمعية يتشرن ومن عقب بخطفن ع شيخه
سيف : الله يعينها شيخووه .. بترد فحمه

وجان يدق تلفون سيف .. شاف الرقم لقاه رقم بيت وغريب .. رد عليه
سيف : السلام عليكم ..

شيخه من المدرسه : وعليكم .. سوواف الحقني الدريوول واايد تأخر بتم برووحي بالمدرسه وانا خلاص احترقت .. والله خايفه اول مره اتاخر جيه .. علي واجبات واايد بلـــ..

سيف : بس بس عنبووه اذيتيني .. خلاص الحين بخطف علييج .. وبند عنها

سيف : حسبي الله عليهن هالبنات .. ما فيهن خير ..
هادف : منو ؟؟
سيف : البرنسيسه شيخه .. تباني اخطف عليها
هادف : هههههه ذكرنا الاط جانا ينط
سيف : على قولتك .. يلا يا الغالي بتيي وياي ولا ؟؟
هادف : لا انا تعبان بسير بتسبح وعقب برقد
سيف : نعيما .. نوم العوافي ههههههه

وسار سيف اييب اخته من المدرسه .. وصل عند الباب ويالله بالحيل عرف اخته من بين البنات وعرف ان شيخه جذابه بس تتدلع ..جان يشوف اخته يالسه اتسوولف ويا حد في السيارة .. نزل بسرعة يبي يشووف منو ... يا لين عندها ..

سيف : شيخه ؟؟

شيخه : اووه اخوي وصل يا مس .. مع السلامه
المس : مع السلامه
شيخه : يعني انت لازم تتشرف وتنزل من السيارة عسب تاخذني .. والله قطفتني جداام البنياات جنك الا ريلي ياي ياخذني .. اففف
سيف : انتي سكتي يا الجذابه .. مافي غيري في المدرسه انا خايفه << اونه يقلدها >> والي عدالج منو كانوا ؟؟ اشبااح بنات .. اقول بس ركبي ..

ركبت شيخه وهي معصبه .. بس قبل لا تسكر الباب .. يتها بنيه تبي ترمسها شووي .. طالعت سيف من المنظره الي جدام وقالها بلغة العيون نزلي بس شووي ... نزلت شيخه عند البنت ورمستها

شيخه : خير اختي .. شو تبين ؟؟
البنت : الخير بويهج الغالية .. بس حبيت اسالج هذا اخووج ؟؟ والبنت كانت تطالع شي من وراها ونص ابتسامه ع ويهها
شيخه : لا ريلي تصدقين .. هي اخووي ليش شو فيه ؟؟
البنت : لا مافي شي .. بس انا توني دقيت ع اهلي وقالوا ممكن يتأخروون .. عادي توصليني
شيخه عرفت ان شي بنات وراها : ممممم والله سمحيلي الغالية .. انا خاوي بياخذني على طوول لليحر
البنت : انزيين ماعلييه بس بيتنا حذاال المدرسه .. مابكلفكم واايد يتروول .. والله شوو ضرب عندج الحين عرج الزطوط ؟
شيخه عصبت من الخاطر وخصوصا من كلمه زطوط : نعم نعم .. شو قلتي ؟؟ وجان تعطيها ذااك الكف وردت البنت خطوتين لورى .. الحين بعلمج منو الي ضارب عندهم عرج الزط .. وردت ركبت السيارة ..

سيف في هذي الاثناء .. كان يدور في الاوراق الي في السيارة .. لف للجامه شاف البنات يطالعون شي .. لف وراى شاف البنت ماسكه خدها و تصييح وشيخوه يايه السيارة .. ركبت السيارة ومشى سيف وتم ساكت بانتظار اخته تعلق على هالشي .. وشيخه كانت مقهووره من حركة البنت ورمستها ..

شيخه : اففف صج انها جليلة حيا .. ملعوونه الصير باجر براويها السنع .. اللهم اني صايمه
سيف : ههههههه منو هذي ؟؟
شيخه : ووحده كرييهه .. حساافه اني ما اعرف اسمها .. بس حفظت شكلها
سيف : انزين شو سووت ؟؟
شيخه : اوونه الا بالغصب اوصلها بيتهم .. لا وآخر شي تقولي ضرب عندج عرج الزطوط .. والله مابغى يسكتها الا الكف في ويهها ..
سيف : شووه ؟؟ صفعتيها ؟؟
شيخه : اييه نعم صفعتها .. شو تباني عيل اسكت لها هي وشلتها ؟
سيف : والله انج قوويه يا بنت سعييد .. باجر اباج في طلبيه خاصه بنسيير المسعودي تتضاربين بدالي
شيخه : لا والله .. اشووفك واايد مصدق عمرك ..
سيف : انزين تدرين ان الي سويتييه غلط .. لو سبيتيها مثل ما سبتج احسنمن انج تصفعينها .. انا لازم اخبر الوالد عن حركتج ..
شيخه : سكتت سكووت مب طبيعي .. يلست تصييح

ووصلوا البيت وشافوا عوويش والخدامه والدريول ينزلون السامان من السيارة .. نزلت شيخه بسرعة ودخلت الصاله مالقت حد .. على طوول طلعت فووق حجرتها .. دشت وسكرت الباب وراها وعلى طوول ارتمت ع الشبريه ويلست تصيييح .. بس عشان سيف قالها بخبر الوالد .. ويلست الافكاار تروح واتي في بالها .. يا اما ابووي مابحبني وبيعتبرني مب بنته ولا بعاقبني ولا ولا لا .. بس بعدين اقنعت عمرها ان ابوها بحبها واذا سالها هي بتقوله ان البنت غلطت عليها وسووت جذييه .. وقامت وغسلت ويهها وتسبحت وغيرت ثيابها


ونزلت تحت بدوون شيله .. بس سمعت صووت ريال .. طلعت راسها شووي لقت ان في 3 ريايل لابسين كنادير .. ويلست تحسب وتحسب وتحسب .. لين ماسمعت اسم هادف ... على طوول طلعت حرجتها وخذت شيلتها ونزلت تحت .. وسارت تسلم ع ابوها وامها .. ويلست عدالهم .. ويلست تسوولف وياهم .. وهادف وسيف يالسين يسولفون ... شيخه خاطرها تسال ابوها سؤال . بس حي تخااف يوم الكل يسكت ويسمع لها
جمعت كل قواها الجسمانيه والعقليه والروحيه و..الخ وقررت تسظال ابوها بس في لحظة سيف وهادف يرمسون

شيخه : ابووي .. شو رايك هالويكند نسيير دبي ؟؟ والله تولهت على عمي وخالتي وريماني
بو محمد : ممممم والله بشووف جدول اعمالي .. ان فضييت هالاسبووع بوديكم ..
شيخه : ابووي خذ اجازة مب لازم تتعب عمرك جذيه
بو محمد : لا لازم اشتغل عسب ... تدرين نفس الاشياء كل مره ..ههه
شيخه : هييه عارفتها .. انزين خلاص بنسير يوم الخميس وبنرد السبت اووكيه ..؟؟
بو محمد : الخميس عندي اجتمااع ز..
شيخه : باباتــي ..<< اونها مبووزه
بومحمد : آآه منج ومن حركاتج .. تتغليين .. يلا خلاص عشانج بنسييير
شيخه صرخت بصوت عالي : هيييييييييه
الكل التفت لها .. عاد هي استحت واااايد ..ويلسوا يضحكون ..



الحين خلونا ننتقل لبيت بو عبدالله ... مبارك من رد وهو تعبااااان وهلكاااان على طوول رد تسبح وصلى وناام .. ريمووه ردت من المدرسه وتسبحت وصلت وقرت قران ونامت سعوود كالعاده ويا عويش يالسين مجابلين التلفزيون .. وام عبدالله ويا الخدامات في المطبخ تسوي الفطور وابو عبدالله مايرد من الشغل الا الساعة 4 لانه يشتغل في البنك ..

الساعة 5:00
سعيد يالس برووحه في الحجره وملاااان وطفشاان ... مايعرف شو يسوي .. والسوني ماخذها مبارك بحجة عقاب لسعييد واونه اذا درس عدل صام 3 ايام وراى بعض بيعطيه اياها ... سعيد مالقة أي وسيله غير انه يبطل الشنطة ويطلع كتابه ويدرس .. الاب تووه رااد من الشغل وريم نازله من الدري وطبعا التقوا في الصالة سلمت على ابوها وكانوا يبوون يسيروون الصالة الثانية الي فيها التلفزيون وهم عند الباب شافوا سعيد يقرا الكتاب ويحفظ ... خلاص ماعرفوا شو يسوون ريمووه ع طوول بطلت موبايلها وصورته .. وبو عبدالله مسك تلفونه وع بيتزا هت ع طوول شبك الخط ... الا كانت يايه من الطبخ وشافت ريم وبوعبدالله يطالعون شي سرات عندهم وشافت سعيد وهو يدرس .. ماصدقت على طوول سارت لعنده

ام عبدالله : سعوود حبيبي .. واخيرا درست ؟؟
سعيد : والله شو اسوي .. مبارك ماخذ عني السوني وناصر اليوم عنده تدريب في النادي مالقيت غير هالكتاب العله مافهمت منه شي ..
ام عبدالله : ماعلييه حبيبي .. انت خله عنك الحين وتعال ساعدني وييب القلاصات والعصير من المطبخ وعقب الفطور بقولك احسن طريقة تدرس فيها بسرعة وبوقت قصيير وتكون حفظت الكتاب كله ..

وطبعا سعييد ماصدق .. بيحصل على السوني .. وعلى طوول طاار للمطبخ ... مبارك وعى قبل الاذان بشووي على طوول توضأ ونزلت بسرعة تحت .. ولقة الكل يتريااه ومحطين التلفزيون ع القران .. سلم على ابووه وامه ويلس عدال ابووه يسبح ويدعي ..

مبارك يهمس لابوه : بلااه سعييد اليوم هااادي ؟؟ وحي نازل عليه ؟؟
بو عبدالله : السوني تعمل عمايل .. وع فكرة عقب الفطور ترد له اللعبه اووكيه
مبارك : ان شاء الله ...

ام عبدالله : بلاكم جيه تتهامسوون .. شو مخبينه عني ..؟؟
مبارك : لا مافي شي اميه .. بس يالس اساله عن اليعري الي عدالج ..
ام عبدالله : بلااه ولدي .. اليوم احسن عنك سلم علي وساعدني ..
ريم : تقول حق مبارك : اليوم سعيد ذاكر ومسك كتاب لاول مره ..
مبارك : صدق ...!! مبــرووك سعيــد ..
سعيد : الله يبارك فيك ..

واذن المغرب .. وسموا بالرحمن وكلوا ..

بو عبدالله : تدرون ان هادف في العين ؟؟ عمه سعيد حصله شغله عندهم ..
ام عبدالله : صج .. مبرووك يستاااهل ولدي
مبارك : والله .. وسيفووه الملعوون ماقالي .. الحين بدق عليه
بو عبدالله : وين وين وين ؟؟ الريال الحين في المسيد يصلي عقب الصلاة دقله .. ويلا قووم معااي

سار بو عبدالله ومبارك وسعيد المسيد يصلوون .. وهم رادين صاحب البيتزا عند الباب .. سعيد من تسلم البيتزا وهو مستاانس .. يلس جدام التلفزيون يشووف الفريج ويااكل .. وريم يالسه تتمصلح عنده لين ماعطها معااه .. وجان يدق التلفون .. وتربع ريم عسب ترد

ريم : الوو ..
سيف ( انتفض قلبه من سمع الصوت) : السلام عليكم
ريم : وعليكم السلام والرحمه
سيف ( بعد تردد) : مبارك موجود ؟
ريم : اييه موجود منو اقوله ؟
سيف (متردد): قوليله سيف
ريم : سيف ولد عمي ؟؟ شحالك ؟ بلاه جيه صوتك ماعرفتك تصدق
سيف (منصدم) : اااا الحمد لله .. لا بس صوتي رايح هاليويمن انتي شحالج ؟؟ وشخبار عميو خالتي؟؟
ريم : الحمد لله .. ااا سيف .. سووري لاني قبل كلمتك باسلوب غير حضاري .. كنتمعصبه من عويش
سيف : لا لا عاادي .. مسمووحه بنت عمي


مبارك : حووووه انتي منو ترمسين ؟؟
ريم : هذا سيف يبغااك ..
مبارك : ييبيه هالدب .. انا الي ابغااه

سيف : هلا والله بولد عمي .. هلا والله بحبيبي << عرف سييف انه بيلقااله تهزييبه من مبارك ..
مبارك : اهلييين وسهليين بالطيبييين ... تعال تعال تعال انت كييييف تسمح لك نفسك انك ماتخبرني ان هادف عندكم ... يعني يرضيك اكون انا آخر من يعلم ..
سيف : والله والله انت فاهم السالفه غلط .. الطيب انا رديت من دبي ولقيته موجود في بيتنا حتى اني ماعرفته عقب سرت اييب اختي من المدرسه ورديت وسلمت على اهلي ورقدت .. وقبل الفطور واعي ومامداني ادقلك
مبارك : انزين ماعليه .. هاي المره بسامحك بس المره اليايه يا ويلك .. بعدين تعال انت ماتعرف رقم غير رقم بيتنا يعني انا ماعندي موبايل ادق عليه ..
سيف : تعاتبني انا .. ليش ماتعاتب عمرك .. أي واحد يدقلك لازم يطلعله موبايلك مغلق .. يا ابووي انزين بطله شووي وشووف جم مسج طرشته وكم مسكول عندك ..
مبارك : هييه والله دووم انسى ابطله .. يلا بلغ سلامي لعمي وخالتي وهادف .. مع السلامه
سيف : يووصل .. مع السلامه ..

سيف من بند من مبارك .. وهو خلااص مستااااانس .. مب عاارف شو يسوي ..لو يروم يطير جان طاار .. وعلى طوول يــر عمره لسيارته ومشى يتحوط ..


سيف بعد ما عرف سبب ضيج ريم وسبب ردها ذاك اليوم شو راح يستوي بينهم ؟؟... وهادف بطلنا اليديد هل بغير مجرى القصة ؟؟
سعيد الشطور وناصر البطل .. شو راح يستوي بينهم ؟؟؟