أخواتي
أنا عندي مشكلة وأحتاج مساعدة منكم بالحل
ولا تنسوني من الدعاء
أختي اللي أصغر مني ملكت قبل فترة
لكن من بعد الملكلة صارت معاي جدا رسمية وصارت تخبي عني كل شي حتى لو كان عادي
تخيلوا قبل كم يوم كانت تكلم بالتلفون سألتها تكلمين مين قالت مالك دخل
وأي سؤال أسألها تقول إيش تستفيدين لما تعرفين
وصارت مواقف كثيرة من هالقبيل خصوصا إنها تكون مسوية أشياء جدا عادية وما تحتاج تخبيها ومع ذلك تخبي
لما تناقشت مع أمي تقول إنتي أي شي يصير تقولين لزوجك
تحطمت وزعلت من جد
أنا صحيح أ؛يانا اقول له بس أكثر الأحيان يسمعني وأنا أتكلم بالتلفون بيتي صغير وما يمديني اتكلم الا ويسمعني
والمشكلة إنه أي شي يصير حتى لو أوصيه لا تقول لأحد يقول طيب وأتفاجأ إنه مكلم خطيب أختي ومناقشه بالموضوع اللي صار
يقول ما أحب اشوف الغلط بعيني وأسكت
أقول له ما لك دخل فيهم حتى لو يحرقون بعض إحنا مالنا دخل يقول لي طيب لكن ينسى نفسه بعد فترة
وبصراحة هذي مشكلة أعاني منها دايما
مايمديني اسوي شي او اروح مكان الا يقول لاهله مع إنهم ما يقولون لنا ولا شي
أحس انهم يعتبروني غريبة عنهم
وهو يقول ايش فيها ويعلمهم بكل كبيرة وصغيرة
وأنا مرة متضايقة
صرت ما أحب اروح مكان
احب اقعد بالبيت لدرجة اني بموت من الطفش
عندي شهادة جامعية ولا عندي وظيفة
كرهت نفسي وكرهت الزواج
احس انحرمت من اشياء كثيرة
العام عشان الحمل والسنة عشان عندي طفل
الصيف اللي فات اول صيف بحياتي ما اسافر والسنة هذي بعد
العام أول مرة ما أروح مكة والسنة بعد
العام ما اشتغلت عشان الحمل والسنة عشان الطفل
ما أطلع ما اروح ما اجي عشان كنت حامل والحين عندي طفل
العام أول سنة ما اروح البر بالشتاء عشان كنت حامل والسنة عشان الطفل
كرهت كل شي
وصرت ابكي اكثر الأيام
حاسة بملل فظيع ما أقدر اسوي ولا شي
طفلي من النوع اللي ما يبغى أحد ويبكي في بيوت الناس وياما أخذته معاي بيوت الناس ورجعت لأنه يبكي بشكل فظيع ما يحب الأطفال واذا شاف أحد يبكي واذا احد شاله يموت من الصياح
انحرمت من المناسبات لأني كنت حامل والحين لأني عندي طفل
أحس اني بظل على هالحال لين أموت
كل ما فكرت اسوي شي اتذكر الطفل وأبطل
سجلت بالتحفيظ ودفعت الرسوم وما داومت لأني عارفة انه بيتشنج من الصياح بالحضانة
جربت أخليه عند خالتي كنت بروح ملكة اخو زوجي
ودقت علي تقول تعالي خذيه بيموت من الصياح
جربت خليته عند جدته عشان ملكة أختي اللي قلت لكم عنها ورجعوه لي يقولون ما سكت وقالوا لي اطلعي وخذيه وكل الناس مستانسين ومحد طلع
لما نروح اي جمعة
كل ام وبحضنها طفلها وساكتين ويلعبون
الا انا قاعد يصيح ويحن واضطر اطلع من الطفش
طفشت
طفشت من كل شي
ما عاد عندي صديقات لأني نقلت بعد الزواج منطقة بعيدة شوي وصار لي سنة ونص ما عندي احد ولا اعرف كيف اتعرف ما عندي جيران لأن بيتي بالسوق تقريبا
حالتي النفسية صارت دمار
أستغفر الله بعض الأحيان اندم إني تزوجت
أحس اني فقدت كل شي
والحين بفقد حتى اهلي بسبب زوجي ولسانه
يتحرش بالكبير والصغير وصاروا ما يتقبلونه
هو قصده يمزح لكن مزحه ثقيل انا ما اتقبله كيف الناس
قولوا لي وش اسوي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مواقع النشر