[ALIGN=CENTER]بسم الله الرحمن الرحيم
السلام عليكم ورحمة الله وبركاته..
ياهلا فيكم وغلا...
بعد السلام أقولكم قصتي..- معاناتي - مع النظارات..
صارلي اكثر من 6سنوات وانا والنظارات جزء مني..
وللمعلومية حنا عائلة النظارات يعني تقريبا الكل يلبس النظارة ...
بدايتي مع النظارات...
قبل كم سنة بعد مارجعنا للمدرسة بعد الاجازة صرت مااشوف الكتابة على السبورة واضحة..
أقول لصديقتي ما أدري اشفي الأبلات من يوم رجعنا من الاجازة ويكتبوا بخط مو واضح قالت لي لا ..تراه زي اول.. انا شايفة زين حاكتب وانتي انقلي من دفتري .. - والله مشكلة وهي بطيئة في الكتابة اجلس انتظرها اتخلص عشان اكتب- المهم عرفت انو الخلل مني.. رجعت وانا فرحانة قلت اخيراً حالبس نظارة زي الشلة والاحباب..
ويوم خبرت أبوي قال خلاص بكرة في الصباح نروح لـمستشفى..... عشان
عندهم الدكتورة للنساء تكشفي على راحتك..وبالمرة الكل يكشف من جدتي إلى أخوي اللي عمره 5 سنوات
وفرحنا بالحيل حنا البنات عشان ابوي أعطانا اجازة جماعية للكل في البيت من المدرسة..
في الصباح يوم رحنا للمستشفى قالت لي الدكتورة انو عندك ضعف بسيط واختي رقم 2 معايا واخوي قالت انو في الطريق وامي والبشكة البقية سالمة
وجدتي مصرة تبي نظارة تقولها انا ...ومادري اش قامت عطتها قطرة للعيون.. وعاد انا واختي متشققين من الوناسة وعلى الطول قصينا النظارات ومر اول اسبوع وحنا فرحانات من قدنا.. بعدين طفشنا لانو تعب وحوسة.. تجي امي تلاقي كل وحدة نايمة اهي ونظارتها.. ويوم ماشاءالله نسيت اختي نظارتها في جيب المريول وتتغسل في الغسالة..
وكل يوم قصة مع النظارة.. بعدين بعد شهرين رجعت مرة ثانية واقول لصاحبتي في المدرسة اشفي الابلات مايكتوب زي الناس ماني
شايفة زين..قالت لي بلاش تريقة لابسة النظارات وتقولي كذا..قلتلها من جد..قالت الله يخلف عليك..
رجعت البيت وقلت لابوي قال نروح للدكتورة قالت نزل كثير من نظرك لازم تنتبهي لنفسك ولا تقربي من الشاشات.....المهم جبت نظارة ثانية..وبعدها توالت المراجعات والنظارات والمعانات الى ان ذهب نصف النظر والله المستعان ...
والواحد لازم يشكر ربه على نعمة البصر ويستغلها في الحلال...
سلامة النظر تاج على روؤس الأصحاء مايشوفه الا اللي لابسين النظارات >>>> احلى حكمة..
المهم حأقولكم بعض المواقف اللي صارت لي.. واللي عندها مواقف تكتبها...
الموقف الاول..
مرة كنت رايحة للتحفيظ وانا هناك طاحت النظارة وانكسرت عدسة اللي في اليمين.. فاضطريت ارجع للبيت بدونها وكنت ارجع مشي لانو قريب للبيت و كان الشارع عام.. جيت قطعت السكة وماادري الا سيارة تمسك الفرامل بقوة.. تريني قاطعة وبكل ثقة انو الشارع فاضي والا الرجال المسكين راح فيها..
الموقف الثاني..
صار لقريبي ومرة تهاوش اهو مع شلة ثانية..وضاربوه قام راح نادى شلته للهجوم المتفق مع الشلة اللي ضربته ولما تلاقوا بدا الهواش والطقاق
ومع الضرب انكسرت نظارته وصار يضرب في اصحابه فاكرهم الشلة الثانية..وهم يخاصموه يقولوا جايبنا نساعدك تقوم تضربنا....
الموقف الثالث ..
مرة نسيت نظارتي في البيت مع السرعة وجاء الباص نزلت اجري لاني متأخرة ويوم نزلت الا الاقي باصين نفس الشكل وكلهم ماعليهم اسم اللي خاص فيهم.. احترت واش اركب المشكلة انو كلهم الشبابيك فيها مظللة ومافي حل الا اني اشوف السواق وانا ماني لابسة نظارة يعني مستحيل اشوف السواق.. احترت اش اسوي اروح لهذا الباص ولا الثاني وبعدين توكلت على الله فتحت الباص وحسيت انو هذا باصي.. رحت جلست جنب بنت وسالتها هذا باص حق ....؟ هيّا حست اني مترددة قالت ...لا اش تقصدي انتي؟ انا قلت لنفسي الحقي عمرك وقولي للسواق يوقف وانزلي.. بس قلت خليني اسالها وين رايحين؟ الا تجاوبني وفيها نبرة ضحكة...قلتها نورة كدا تسوين فيّ وتخوفيني، قالت لي حسيتك حيرانة من قبل ماتركبين قلت افتح الباب واناديك..بعدين غيرت رايي وقلت اسوي فيك مقلب وربي ستر والحمدالله..
وهناك مواقف كثيييرة الحلوة والمحزنة صارت لي وصارت لقرايبي...
اذا شفت ردودكم ان شاء الله كملت ..
[/ALIGN]
اللهم ارزقنا قوة في البصر والبصيرة...
مواقع النشر