ديك رومى وحمام محشى وسلطات ومقبلات وحلويات اتفضلوا (ذو القعدة )
ماشاء الله ولا قوة الا بالله
ان شاء الله السفرة تعجبكم
ودى اول مشاركة ليه فى شهر ذو القعدة ايه رايكم
كانت عزومة عند اخت جوزى وانا عملت كل انواع السلطات الحلويات الكيك المقبلات والديك الرومى اما بقى الحمام عملته اخت جوزى وكمان صينية المكرونة بالبشاميل وانا قلتلها على باقى طرق ووصفات الاطباق وساعدتها فى تجهيزهم
الاطباق الرئيسية
اولا الديك الرومى
تبلت الديك الرومى بعصير البرتقال والملح والفلفل والزعتر وده من برد ومن جوه تبلنا بنفس التتبيلة وحطينا قشر البرتقال وقطع من التفاح الاخضر وقطع البصل
يفضل التتبيلة قبلها بيوم وتانى يوم ندهن الديك زبده ويدخل الفرن يحمر من جميع الجهات ثم نحط من تحته بصل جزر كرفس كرات ونغطى بالفويل وندخله الفرن تانى لحد نايستوى كل فترة ممكن ندهن قطعة زبده صغيرة
ثانيا الحمام المحشى
نغسل الفريك وننقعه شوية وبعدين نصفيه
وفى حلة نحط بصلة وشوية زبدة لحد ماتصفر نحط الفريك وملح وفلفل الاسود ونحط ماية لحد مايدخل الفريك فى السوا نحط كبد والقوانص بيكونوا مسلوقين ونحط زبيب ونخليه يبرد ثم نحشى الحمام ونسلقه فى ماية فيها ورق لورا وحبهان وبصل وجزر وكرفس
ولما يستوى نطلعها من الشوربة ونحمرها والطبق ده عملته اخت جوزى
ثالثا صينية المكرونة بالبشاميل
نسلق المكرونة ونجهز العصاج وانا بحط فى العصاج ماشروم
ونجهز البشاميل ونخلط اللحمة مع المكرونة ونحط شوية بشاميل وجبنة موزريلا ونحطه فى الصينية ونحط باقى البشاميل فوق المكرونة ونحط الجبنة فوق الوش ويدخل الفرن
يمكن اللى بيحب اللحمة عليها صلصة وتكون مكرونة بالبشاميل حمرا يضيف الصلصة مع اللحمة
ودى طريقتى فى المكرونة بالبشاميل لكن الطبق ده اخت جوزى اللى عملته
رابعا اللحمة الباردة
نتبل عرق اللحمة بالبصل المفروم وملح وفلفل اسود وبهارات لحمة ونعمل شقوق فى اللحمة نحط فيها فصوص ثوم وممكن جزر وممكن فلفل اسود حب
بعد كده نجيب صينية ونحط فيها زيت او زبدة ولما تسخن نطلع العرق من الخلطة ونحمره كويس على النار لحد مايكون لونه بنى وبعد كده نغطيه وندخله الفرن لحد مايستوى ويترك ليبرد علشان نعرف نقطعه
خامسا صينية البطاطس بشرايح اللحمة بالبشاميل
نسلق البطاطس ونهرسها
ونحط عليها ملح وفلفل اسود ونحط جبن موزريلا وزبدة ويمكن نحط ثوم بودر وبقدونس مفروم وحوالى ربع كوب لبن حسب كمية البطاطس اللى عملتيها
نقطع اللحمة شرايح بالطول ونحطها فى طاسة فيها شوية زيت ونقلبها لحد ماتتحمر وتدخل فى السوا
نحطها فى طبق جانبى ونحط فى نفس الطاسة بصل شرايح وتوم مفروم ونقلب ونحط ونحط فلفل اخضر ونقلب ونحط اللحمة تانى ونتبل بالملح والفلفل والبهارات
نجهز البشاميل ونبدأ نحضر الصينية
نحط فى الصينية رشه بقسماط ونحط اللحمة ونكور البطاطس ونرصها على اللحمة ونصب فوقها البشاميل ونرش الجبنة وندخلها الفرن
المقبلات
اولا كفته البطاطس البانيه
نسلق البطاطس ونهرسها ونحط عليها ملح وفلفل اسود وبقدونس مفروم ونشكلها اقراص ونحطها فى الدقيق والبيض والبقسماط تدخل الفريزر شوية وتقلى فى زيت سخن
ثانيا السمبوسك
شرايح جاهزة من السمبوسك نحشيها خليط من الجبنات عليهم زعتر وبقدونس وتقلى فى زيت ساخن
ثالثا شيش الخضروات المشوية
فى الاسياخ الخشب نحط مكعبات من البطاطس الكوسة الجزر الفلفل الالوان ونتبلها ملح وفلفل اسود وزعتر وزيت زيتون ونشويهم
السلطات
اولا سلطة البطاطس بالمايونيز
نسلق البطاطس ونتبرد ونقطعها مكعبات
نحط 1 م ك مايونيز على علبة زبادى وفص ثوم مهروس ونقلب ونحطها على البطاطس ونخلط كله مع بعض
ثانيا سلطة البنجر
نسلق البنجر ونقطعه مكعبات ونتبله بالملح والشطة وعصير الليمون وشوية زيت
ثالثا سلطة حمص الشام
نسلق حمص الشام ونحط عليه فلفل احمر مكعبات وملح وفلفل اسود وا م خل وعصير نص ليمونة وزيت زيتون وبقدونس وشبت مفرومين ونخلط كله مع بعض
رابعا سلطة يونانى
نقطع مكعبات فلفل الوان وخيار مكعبات وطماطم مكعبات
وزيتون شرايح ونتبل بعصير الليمون وملح وزيت زيتون ونحط فوق الوش مكعبات الجبن ونرش سماق
خامسا سلطة الفاصوليا البيضا
نسلق الفاصوليا ونصفيها ونحط عليها فلفل اخضر مكعبات وبقدونس مفروم وشبت وبصل اخضر مكعبات صغيرة ونتبل بعصير الليمون وملح وفلفل اسود ورشة كمون 1 م ص خل ونخلط كله مع بعض
الشوربة
شوربة الحمام بعد ماحمرنا مكرونة لسان العصفور وحطناها على الشوربة وقدمناها
الحلويات
اولا فاكهة طازجة
ثانيا موس الفراولة وطريقته كنت منزلاها قبل كده فى المنتدى
ثالثا فروت سلاد
مكعبات من التفاح الموز الكانتالوب وحطينا سكر وعصير البرتقال وعلى الوش كريم شانتيه
رابعا كيكة الشيكولاته
المكونات
نحط فى الخلاط
كوب سكر + كوب لبن + كوب زيت او اقل + 4 ملاعق كبيرة كاكاو خام
نخلط كل المكونات كويس جداااا ثم نحط حوالى 4\3
المقدار فى كوب بره
باقى الخليط نحط عليه 2 بيضة وفانيليا ونخلط
نضيف الخليط على كوب دقيق والبيكنج بودر ونقلب من تحت لفوق وتوضع فى صينية مبطنه وتدخل 180 درجة لمدة 30 دقيقة
لما تخرج من الفرن نصب عليها الصوص ونرش فوق الوش شيكولاته مبشورة او جوز هند او فسدق مفروم
وبالهنا والشفا
واى اسئلة او استفسار ان شاء الله اقدر اجوب عليه
رد مع اقتباس
المشاركة الأصلية كتبت بواسطة تعبت أشتاق
مواقع النشر