طاجن بطاطس فى الفرن مصرى اصلى ورز حبه وحبة

[وصفات غادة]

النهاردة وصفتنا مصرية اصيلة

طاجن بطاطس باللحمة فى الفرن ومعاه رز حباية وحباية يمييييييي


مقاديير البطاطس
===========

3 حبات بطاطس متوسطين مقطعة حلقات

1 حبة بصل صغيرة مفرومة

2 معلقة كبيرة توم مفروم

لحمة مسلوقة

2 كوب شوربة

1 كوب طماطم بيوريه

1 مكعب مرقة دجاج

2 معلقة كبيرة زيت ذرة

هنجيب الحلة ونحطها على النار

حطى الزيت وسخنيه

هنضيف البصل ونشوحه شوية لحد مايدبل

بعد كده هنضيف التوم ونشوحه مع البصل لحد ماريحة لتوم الجميلة تظهر وتبان

بعد كده هتضيفي حلقات البطاطس بعد ماتصفيهم كويس من الميه وتشوحيهم مع البصل والتوم كويس
ليه بقى الخطوة دى لو تاخدو بالكو فى برامج الطبخ بيقلو الخضار او البطاطس نص قليه قبل مايضيفوها للصلصة عشان البطاطس متنشيش فى الطبيخ وكمان تفضل محتفظة بقوامها

وانا مش بحب اقلي بصراحة بس لما بتشوحيها مع البصل والتوم بتتشمع من المادة الدهنية الى بتطبخى بيها وبتأدى نفس الغرض

بعد كده هنضيف اللحمة المسلوقة
خدى بلك من لون البطاطس بقى بعد ماضفنا اللحمة

بعد كده هنضيف الطماطم والشوربة ومكعب مرقة الدجاج وقلبي كله مع بعض
وضبطى الملح بتاعك وتسبيهم على النار يدوبك غلوة واحدة بس لاننا هنكمل التسوية فى الفرن

وده الطاجن الجميل بتاعنا

حطى البطاطس فى الطاجن
وعلى الفرن علطووووووووووول

تابعونى

[وصفات غادة]

نيجي بقى للزز


مقاديير الارز
========

3 كوب رز مصرى مغسول ومنقوع

2 معلقة كبيرة زيت ذرة

شوربة على حسب مالرز يحتاج

هنحط الحلة على النار

حطى الزيت وسخنيه

حطى كبشة رز على قد قبضة ايدك كده وشوحيهم لحد مايبقى لونهم دهبي جميل

بعد كده ضيفي بافقى الرز بعد ماتصفيه كويس من الميه وقلبيهم مع الرز المحمر

بعد كده اسقيه بالشوربة لحد مايدوبك تغطى الرز بس ولازك الشوربة تكون سخنة

هنغطى الحلة ونسيبهم على نار عالية لحد مالرز يشرب كل الشوربة

بعد كده وطى النار خالص وحطى الشياطة تحت الرز وسيبيه يستوى براحته

وده الرز بعد ماستوى ما شاء الله مفلفل وزى الفل

ودى البطاطس بعد ماطلععت من الفرن

وصحتين على قلوبكم يااااااااارب

[لؤلؤة2005]

ما شاء الله وجبة مشهية غادتنا الحلوة
وحشتنا اطباقك ياقمر
تسلم ايدبك الطاجن طريقته سهلة وشكله شهي والارز مممم
هنا وعافية عليكم ولا تغيبي علينا

[وصفات غادة]

ما شاء الله وجبة مشهية غادتنا الحلوة
وحشتنا اطباقك ياقمر
تسلم ايدبك الطاجن طريقته سهلة وشكله شهي والارز مممم
هنا وعافية عليكم ولا تغيبي علينا

الله يسلمك حبيبتي
انا والله مدخلتش المطبخ من رمضان ماما هى اللى استلمته بقى هههههههه