صباح الخير
موضوع حلو كثير
أنا لسى ما عندي أطفال بس قريبا إن شاء الله
بس أنا كنت من قبل معلمة روضة و كنت بستخدم طريقة لعقاب الأطفال عندي .. الصراحة أنا بشوفها طريقة حلوة و الأهم إن فيها احترام للطفل و ما فيها إهانة أو جرح لمشاعره
أنا كنت عندي كرسي في الفصل غير الكراسي اللي بيجلسوا عليها الطلاب .. و كنت حاططته جنب الباب حق الفصل و اللي يعمل أي إزعاج أو غلط بخليه يروح يجلس على الكرسي فترة كذا بس مش طويلة لأن الأطفال اللي عندي كانوا صغار من عمر 3 إلى 4 سنوات
هذي الطريقة مفيدة كثير و علمتها للأمهات و كثير طبقوها و نفعت معاهم
بس أهم شيء في هذي الطريقة إنه قبل ما تحطيه على الكرسي يكون عارف ليش و إيش الغلط اللي عمله .. و بعدين لمن تجين ترجعيه مكانه تروحي لعنده و تنزلي عشان تصيري في مستوى نظره .. يعني لا تكلميه و أنتي واقفة خلي وجهك مقابل وجهه .. و بعدين اسأليه تعرف ليش عاقبتك ؟؟ و إذا قال لك لا أو ما أدري مع إنه يدري ( في أطفال عليهم عناد كبير ههههههه ) .. المهم لو قال لك كذا قولي له لأنك عملت كذا و كذا و هذا غلط أنا برجعك مكانك بس توعدني إنك ما تعمل كذا مرة ثانية
المهم بعد ما يوعدك خلاص رجعيه و إذا سكت و ما رضي يوعدك برضو رجعيه
صدقوني عن تجربة طويلة هذا الطريقة تجيب نتيجة كبيرة مع الأطفال
بس في حاجة أبغى أقولها لكم
هذي الطريقة تحتاج صبر مع بعض الأطفال .. يعني بعضهم مو بالساهل بتقولي له روح اجلس بالكرسي بيقول لك أبشري ههههه
لا في ناس عنيدة ما ترضى .. بس كل اللي عليك إنك تحمليه و تحطيه على الكرسي من غير كلام أو صياح و لو قام رجعيه .. في النهاية صدقيني راح يستسلم و يجلس .. بس يبغالها صبر منك أنتي و بدو ن ما تتكلمي بكلمة و حتى تتطالعي بعيونه .. تجاهليه تماما
شيء ثاني
إذا في عندك أكثر من طفل .. علمي الأطفال الثانيين إنه إذا جلس واحد منهم في الكرسي ما أحد يكلمه أو يطالع فيه أو يحاول يضحكه .. يعني اللي يجلس في هذاك المكان يكون متجاهل من الجميع
أخيرا
مو شرط تستخدمي كرسي عقاب .. ممكن تخليه يوقف في مكان مخصص في البيت للمشاغبين و يعطيكم ظهره مثلا .. أو في زاوية معينة من البيت .. يعني كل وحدة و اللي يناسبها .. في الفصل عندي كنا نسميه كرسي المعاقبين
طولت عليكم بس حبيت الكل يستفيد من هذي الطريقة زي ما أنا استفدت و ناوية أطبقها مع أولادي إن شاء الله
تحياتي
مواقع النشر