رسائل جوال أرسلت بالغلط
(1)
بنات كانوا في الجامعة شله وكانت وحده منهم عازمتهم وجت وحده من البنات كتبت
لصاحبة العزيمة (إذا أنتي عازمة نجلاء أنا ما راح أجي ودبري لي أي عذر قوليه للبنات بصراحة أنا استثقل دمها وإذا ناديتيني مره ثانيه لا تنادينها و أوعدك بجي اوكي) وأرسلت الرسالة لنجلاء.....
(2)
مره كنت برسل مسج حق رفيقتي بقول لها تحسب لي طارئ بالدوام لان مالي خلق أداوم المهم أنا حافظة رقم رفيقتي بس كتبته غلط وشوي يدق علي الرقم واستغربت أن طلع رقمها بدون اسمها ورديت على التلفون طلع لي واحد قال( عن الخبال قومي البسي وداومي )طبعا أنا أنصدمت وسكرت الخط على طول من الخوف داومت
(3)
وحده كانوا أهلها عازمينها وزوجها طالع استراحة مع أخوياه وما حضر العزيمة هي بترقع له عند أبوها قالت انه معزوم على العشاء عند عمه وكتبت رسالة لزوجها ترى أهلي سألوا عنك دبرت لك عذر قلت لهم أن عمك عنده عزيمة ... و أرسلت الرسالة لأبوها ...
(4)
مره أنا كنت والده في المستشفى ووحده من صديقاتي الله يصلحها جالسه من العصر عندي يوم جت الساعة 11 مليت مره وهي ما عندها نية جالسه تسولف مع أمي و أخواتي دق علي زوجي قال بمركم شوي وهاذي ما عندها نية تروح و أقوم اكتب رسالة لوحده من أخواتي أقول لها(( ترى فلان بيجي وهالنشبة مستانسه على الجلسة مليت منها الله يصلحها شكلها ودها تتسحر عندنا لا تسولفون معها عشان ما تستانس وتمل وتطلع)) وأرسلتها لصديقتي...
(5)
أرسلت لجارتي وقلت لها تجيني بعد المغرب تتقهوى عندي وأنا متعودة أرسل لها وخلاص تجي يعني مهوب لازم ترد علي ..و أنا اللي عقب ما صليت المغرب أتجهز وأجهز قهوتي واجلس أحتري زوجي يطلع لأنه في ذا الوقت يطلع ..
و إلا هو جااي وجالس يالله وين القهوة ؟: أنا : أي قهوة ؟ هو : تستهبلين يا أم المفاجآت الحلوة ؟ وبعدين استوعبت أني أرسلتها له بالغلط وسكت وما قلت شيء...
(6)
قبل رمضان بيوم جتني رسالة من صديقتي مضمون الرسالة كالأتي ( رمضان بكره والشياطين تنحبس في رمضان ... والله راح نشتاق لك ) عجبتني الرسالة قلت راح أرسلها لزوجي .. و أرسلتها .. ولما جاني تقرير الرسالة وجدت اسم عمي ( أبو زوجي (والله فشلة...
(7)
كنت عند أهلي وقالوا لي خلي زوجك يجي يتغدى عندنا .. رحت أرسلت له رسالة ( أهلي عازمينك على الغداء ) وراحت الرسالة.. وبعد شوي يرسل اخو زوجي رسالة مضمونها ( بأي مناسبة ؟
(8)
مره تخاصمت أنا وزوجي وكتبت رسالة لأخوي اسب زوجي سب واعلمه أني بتثقل عليه ولا راح أعطيه وجه.
تتتتخيلوا ...... الرسالة راحت لزوجي وزعل وأرسل تهديد
و أنا انطميت , والله موقف لن أنساه...
(9)
مره أختي مسافرة برا وهي مديرة مدرسه .....
المهم جاء وقت عودة المدرسات وهي كانت معطيتنا جوالها ....... فأرسلت على جوالها رسالة تقول لأختي الثانية )يا فلانة أرسلي للمدرسات رسايل وقولي لهم يداومون أحسن لهم ....مو إذا غاب القط العب يا فار) قامت أختي من السنع أرسلت نفس الرسالة لجميع المدرساااات ....يعني نفس النص ما غيرته وتعالوا شوفو الضحك و الفشيلة
(10)
أنا مره اتصلت على وحده ما ردت بعد شوي جاني منها مسج كاتبه
(يا فلانة ترى فلانة (إلي هي أنا) أزعجتني بالاتصالات وما رديت عليها))
والمشكلة إني ما دقيت إلا مره وحده ..
عاد تحسبوني سكت أرسلت لها مسج, قلت:
( ربي باغي يفضحك )
(11)
جتني رسالة من رقم ما أعرفه بس تقول :
(مبروك ما جبتي وعساك طيبه وترانا فرحنا لك ودعينا لك ولبنتك وعسى الله يخليها لك وترانا نبي نجيك بكرا)
على طول رديت قلت (تراااااااك غلطانة وعلموا الحرمة إنكم تبي تزورونها ترى الرسالة هذي ما وصلتها)
(12)
أنا مره واحد أرسل لي رسالة بالغلط :
(فلان أنت صاحي ولا نايم) أرسلت له : تراك غلطان رد :
( بلا استهبال جب معك فطور)
(13)
مره في العيد اخوي ما جاء هو وأهله لنا كان عنده شغل ما قدر المهم أختكم في الله فيني رومانسيه زيادة اقعد اكتب رسالة كلها شوق وحب لأخوي .. وان العيد ماله طعم بدونك واشتقنا لك والمشكلة ما كتبت اسمه لا .. كاتبه أبو عبدالعزيز ليتني كتبت اسمه ..وأجي أرسل الرسالة ورقم اخوي مميز يعني ما يبيله حفظ واكتب الرقم وأرسل .. يوم رحت للرسائل المرسلة و القى رقم ما طلع اسم اخوي ..
يافشيلتاااااااه قلت الحين بيتصل علي ويغثني يارب ما يكون واحد لعاب بس شوي واتصل نفس الرقم <<< جاك الموت يا تارك الصلاة أرد ما أرد أرد ما أرد .. ردي يا بنت الناس واعتذري وخليك جادة ورسميه وقولي والله غلطانة يوم رديت طلعت حرمه ..السلام عليكم عليكم السلام أنتِ مرسله رسالة لي ؟؟قلت لها غلطانة واشوا انك حرمه والله اني كنت خايفة انك رجال الحمد لله طلعتي حرمه,,تتوقعون وش قالت ؟ قالت : أنا كنت أتمنى انك تطلعين رجال بس للأسف طلعتي حرمه!!قلت لها ليش؟قالت أنا رقمي رديف لرقم زوجي .. وزوجي اسمه أبو عبدالعزيز قلت يمكنك واحد من اصحابه مرسل له رسالة وغلطان ,, لكن طلعتي حرمه والله لا يوريكم والله سوت لي تحقيق ولا المخابرات
أنت مين ؟ أنت تعرفينا وتسوين فيني مقلب صح؟؟قلت لها والله ما أعرفك..غلطانة والله غلطانة قالت قولي الصراحه تعرفين زوجي ؟؟والله إني قعدت احلف واقسم ساعتين ماصدقتنيا ووووف أعوذ بالله شكلها مرررررره شكاكة حلفت لها مليون يمين إني ما اعرف زوجها,,في الأخير عطيتها رقم اخوي قلت لها شوفي هذا رقم اخوي أبو عبدالعزيز اللي كنت أبرسل له نفس رقمك يا أختي لكن الاختلاف أخر رقمين بس أنا عكستهم صدقيني,, اتصلي عليه واسأليه يا الله بعد طلوع الروح اقتنعت وسكرت ,, لا .. ويوم اقتنعت تقعد تسولف معاي ,, تقول أرسلي رسايل حلوه إن كان عندك ,,<< في المشمش هذا اللي ناقص بعد ,,
(14)
أمي ياحليل أمي وخف دمها .. كنا عند اخوي وكان شديد علينا في الخروج لازم نستأذن منه .. المهم انه مو كل المساييير يوافق عليها
وكنا معزومين عند ناس ما يبينا نروح لهم .. عاد أمي قامت تبي تدق على اخوي الثاني وتقوله بنقول لخوك أنا عندك ونروح للي عازمينا قامت ودقت على اخوي الشديد تظن انه الثاني وقالت له اسمع حنا بنروح لفلانة عازمتنا ، إذا سألك أخوك قل أنا عندك ..
ما درت انه هو الشديد ضحك وقال إن شاء الله يمه دقت عليه مرة ثانية قالت : شف حنا بنروح لخوك فلان حتى دق عليه واسأله ..ضحك .. وقال العبي غيرها يا أم فلان أنا اللي كلمتيه تو , قامت تضحك وقالت : أصلا امزح ماني رايحة لأحد <<<< ترقع
لا تحرموننا من ردودكم
منقووووووووووول
رد مع اقتباس
صلاتي نور حياتي
مواقع النشر