سنة أولى تدريس ..مواقف .. تجارب ..خبرات
[ALIGN=CENTER][TABLETEXT="width:100%;background-image:url('http://up.hawahome.com/uploads/13385390081.gif');"][CELL="filter:;"][ALIGN=center][/ALIGN][/CELL][/TABLETEXT][/ALIGN]
بعد مرور سنة تدريس بكل مافيها من مصاعب و مواقف جميلة لقيت انه في أشياء كثيرة فينى اتغيرت شخصيتى .. تفكيري .. نظرتى للأمور
أذكر أيام الثانوي وأيام الجامعة كنت أقوم مستحييييييل أصير مدرسة لو هموت من الجوع ومابقى شغل غير في التدريس مارح اخذه
وكانت حجتى إنه يماما دعينا على مدرستنا وقد ايش كنا نكرههم كانو ينعدو عالأصابع المعلمات الى حبيناهم او تركو بصمة في حياتنا
ليش أصير مدرسة وأخلى الناس تدعي عليا؟
و اليوم لو يعطونى وظيفه خارج نطاق التربية والتعليم مستحيل أقبلها
أستغرب كيف كنت أطالع للفئة الى (ندعى عليها) وماكنت اطالع للفئة الى حبيناها؟
وأستغرب كيف ولا مره سئلت نفسي طيب ليش دعينا عليهم؟ولو صرت مدرسة ليش راح يدعو عليا؟
أذكر مدرسة كانت تجينا عالفصل وهي مالها نفس تطالع فينا ولالها نفس تشرح الدرس تجى تخاصم وتتنفخ علينا ومستنية أى غلطة اتفه حركة عشان تنفس عن غضبها فينا
ومدرسة ثانية ايوة تشرح بس مايهمها كم وحدة فهمت وياويلها الى ترفع إيدها وتقول مافهمت النقطة الفلانية تكون ليلتها سوده
ومعلمة ثانية متعصبه لمادتها والى ماتحل ولا تجاوب على أسئلتها فتكون أسفل سافلين وبالأخير نطلع معقدين من مادتها
ومدرسات الإنجليزي وما أدراك مامدرسات الإنجليزي
بعضهم ما أدرى من فين جابت شهادتها أخطاء في النطق وأخطاء في القواعد وكله على راسنا نحنا المساكين
او تجى وحدة العكس بلبل انجليزي نطق وجرامر رائع لكن ...
لو فى وحدة في الفصل مستواها أحسن من الباقيين وتتكلم انجليزي بطلاقة إما لأنها بنت عز وكل صيف بلندن وباريس
أو إنها عندها إمكانية تدخل دورات انجليزي تلاقي المدرسة وكأن الفصل مافيه غير هالطالبة
الشرح يكون لها والباقيين كلووو هوا
أو تلاقيها مايهمها حد جايه تستعرض عضلاتها اللغوية وكم الكلمات الى حافظتها ومن ساعة ماتدخل لين تخرج وهى بس تتكلم انجليزي
وملعمة ماشرحت نقطة بالدرس وجابت سؤال عنها بالاختبار ونقصتنا لأننا أخفقنا بالإجابة و السبب تقصيرها
ومعلمة تضغط علينا بالحفظ ومايهمها الفهم مجرد حشو معلومات ونجحت بالحشو لكن اول مانطلع من باب قاعة الإمتحان تطير المعلومات
أول يوم دخلت فيه الفصل بصفتى معلمة كنت خايفه كثير ومرعوبه خايفه الطلاب يكرهونى أو يجى يوم ويدعو عليا وخفت انى في يوم أظلمهم أو أقصر في حقهم
بس في نفس الوقت كنت فرحانه وكنت مستغربه من الفرح دا لأنى ماكنت حابه وظيفة التدريس
أول فصل دخلت له كان صف ثانية ابتدائي وكان الصف أولاد وبنات وكنت جاتنى معلومة انه الطلاب معقدين من مادة الإنجليزي وقد جات قبلى 3 مدرسات ومشيو وأنا الرابعه خلال نصف فصل
عرفتهم عن نفسي وكنت أحاول قد ما اكون أحسسهم إنى مش مدرسة داخله الصف انا مجرد وحدة جاية تتعرف عليهم وخارجه
واتعرفت علي أسمائهم وبعدين رجعت أسئلهم واحد واحد تحب الإنجليزي؟لا طيب ليش؟
الى ضحكنى انهم خافو من السؤال صارو يقولو ايوة نحب الإنجليزي عشان مايطيحو في مطب طيب ليش؟
بس أنا كنت محتاجة أعرف ليش مايحبو الإنجليزي عشان ما أطيح في مطب المعلمات الى قبلي يمكن نيتى في السؤال كانت اول مره مصلحة لكن لما سمعت إجاباتهم انقهرت يعنى كلنا نردد شعارات الثورة هالأيام ونازلين الساحات طيب نحنا من غير ماننزل الساحات نقدر نبدء نغير من الجذور يعنى هالأطفال لو لقو تعليم صح التعليم الى نحنا ماحصلناه اكيد راح يتغيرو وراح يكون مجتمعهم غير مجتمعنا
قبل ما أجرجر الأجوبة من حناجرهم هديت أعصابهم قلت لهم لاتخافو مارح أضرب ولا رح أعصب أنا جايه هنا عشان نوصل لآخر السنه وانتو تحبو الإنجليزي حتى لو جلسنا عشر حصص في درس واحد مساكين كلمة صغيره شجعتهم واحد منهم قالى ياأبله انا ما أحب الانجليزي لانه الأبله الى قبلك كانت كلامها كله انجليزي مانفهم منها شي و وحده ثانيه قالت الأبله الأولى الى درستنا كانت لو غلطنا تخاصم و واحد ثاني قال أبلتى الى درستنى انجليزي في سنة أولى كنت لما أكتب الحروف غلط ترجعلى الدفتر وتخاصمنى قدام الفصل كل
لاحضتو؟ كلهم قالو الأبله الأبله الأبله
يعنى المشكلة عند الطالب هى الأبله مش المنهج!
وحطيت الشي دا قدامي لازم أخليهم يحبونى عشان لما أبدء أشرح هيسمعو كل كلمة منى لأنهم يحبوني
وفعلاً بديت أركز كل جهودي انهم يحبونى بعدين راح أبدء أشرح لهم الدروس
صرت أول ما أجى الصباح ما أجلس أطلع فصول سنة ثانيه اشوف مين الى باصه قد جا واسلم عليهم واجلس اتكلم معاهم وفى الطابور ادور جمبهم وأنا أبتسم لهم وأمسح على راسهم وبينى وبينكم كنت أستمتع بنظرة الخجل الى أشوفها في عيون الأولاد لو مسحت على راسهم خخخخخخ
وفى الفسحة لو عندي نوبة الساحة انزل متحمسه واتكلم معاهم وأحضنهم وألعب معاهم
كنت محط سخرية من باقى المدرسات وحسسونى كأنى هبله ما أنكر الشي دا أثر علي بس بعدين طنشت والشي دا أبداً ماكان في شخصيتى كنت من النوع الى بسرعه ينحبط من أراء الغير لكن مع التدريس صار آخر شي عندي التحطيم والى يحطمنى أصلاً ما أعيره أى اهتمام
وفعلاً الخطة نجحت
صرت لما أجى الصباح ما عاد أطلع وأدور على فصولهم ألاقيهم هما الى مستنينى وأول ما أدخل المدرسة يجون يجرون يحضنونى وكل واحد يجرنى يبغانى أجى فصلهم وفى الطابور كل فصل يأشرلي تعالى اوقفى عند طابورنا وفاجئونى انهم حفظو جدول النوبة حقي يوم يجونى يوم السبت يا أبله عندك حصة مارح تنزلى معانا صح؟
الأحد و الثلاثاء يا أبله عندك المقصف يلا تعالى نبغاكى انتى تبعيلنا
الإثنين و الخميس يجونى جرى يلا يا أبله نبغى نلعب شجرة نملة واحلى شي لما يكونو جايبين الحبل وتعالى نلعب شبرا أمرا
ويوم الأربعاء أنزل عند البوابة الاقي الشعب العربي كله مستني ليش هنا؟عشان انتى اليوم تجلسي هنا نبغى نجلس معاكي
وفي الفصل صارت الحصه تمشي زي الألف وكلهم منسجمين ويسمعو وياشركو ومتحمسين يحفظ الكلمات واتميزت بعقاب مختلف كل المدرسات لو احد سوا فوضى او ماشارك او ماحل الواجب يا إما ينحرم من الفسحة او حصة البدنية يا إما يتعاقب عند الوكيلة أنا كان عقابي (راح أزعل منك ولا رح أكلمك) والله ماتتصور كيف العقاب دا كان يقهرهم والله يجونى يترجونى يا أبله احرمينى من الفسحة احرمينى من حصة البدنية بس لا تزعلى منى
بعد ماكسبت قلوبهم جيت بكسب عقولهم بديت معاهم الشرح بالقصص بالألعاب بعدين بدئنا نشد شوية شوية وفعلاً لما شدينا ما حسيتهم تمللو ولا حسيتهم كرهو المادة لازالو أول مايرن جرس حصتى يجرو يدورون عليا يبغونى أدخل الحصة
بعد فترة لابأس بها جاتنى الوكيلة لمكتب المدرسات وقالت لى ريم برافو عليكي الأمهات كلهم يشكرو فيكي يقولو بعد ماكنا نتضارب مع العيال عشان يدرسو الإنجليزي صرنا نتضارب معاهم عشان يمسكو مادة تانية
ماتتصورو قد إيش فرحت لأنى عمرى ما اتوقعت إنى هبدع في المجال دا والى فرحنى أكثر انه الحمدلله ماحد رح يدعى عليا الكل راح يدعيلي
وطبعاً بدء التحطيم يشتغل مره ثانيه وصرت أسمع الإحباط مرات يأثر ومرات أطنش بس حسيت أسلوب التطنيش مايجيب نتيجة أعطاهم فكرة انه ريم دي غلبانه وحدة نقدر نخليها مصدر تسليتنا نستهبل ونمزح عليها ونمسح بها بالبلاط وراح تسكت وهذى فعلا هي أنا كنت مسالمة ما احب ارد على احد لكن مع سنة اولى تدريس تغيرت صرت لو استهبلو عليا أرد على استهبالهم بنفس الأسلوب هما استهبالهم يقصدو فيه تجريح صرت أرد على استهبالهم باستهبال مو بنية تجريح او إهانه بس عشان أعطيهم إنذار انه كنت ساكته بمزاجي
اتفاجئت انه المدرسات في الطيبة في السوسة الى تضحك لى وتسئلنى اش رايك بالمدرسة اش رايك بالوكيلة بالمديرة وتروح تاخذ كلامي وتبهر وتملح وتنقله بطريقة مختلفه تماما ولقيت فى مدرسة هتسمع كلامك ايوة بس راح تنقله بحذافيره إذا كان يخدم مصلحتها اما لو مايخدم مصلحتها فمارح تتعب نفسها توصله لقيت الى همها في الحياة انها تحفر و تدور لك على أخطاء مع انه مابينك وبينها شي بس خلاص مرض ماتحب الخير للناس
بس بالأخير عرفت أتعامل مع كل وحدة كيف
الموضوع ذو شجون
وللحديث بقية بإذن الله
لكن بترك لكم المكان لتحكو عن تجاربكم
كم معلمة دعيتى عليها؟ وليش؟
ولو انتى معلمة اذكريلنا تجاربك مع التدريس و الطلاب
أكيد لو عودة بإذن المولى
رد مع اقتباس
اللهم صل على سيدنا وحبيبنا محمد وعلى آله وصحبه أجمعين 
مواقع النشر