المساعد الشخصي الرقمي

مشاهدة النسخة كاملة : قصه من تأليفي.:العــايــلــه:.



بنت الامارات
24-06-2004, 08:26 AM
السلام عليكم ورحمة الله وبركاته

اشحالكم؟؟

حبيت اكتب في المنتدى قصتى الى لحد الان ما خلصيتها لكن باذن الله في القريب العاجل راح تخلص ..وحبيت اخذ رايكم فيها

القصه عباره عن عايله وفيها شوى من الرومانسيه:o لحد الحين كتبت 3 اجزاء منها والجزء الرابع في الطريج..بس المشكله انى كاتبتنها بالعاميه..بلغة هل الامارات..فحبيت اقولكم اذا كان عندكم قبول بانى اكتب قصتى اتمنى اذا صعب عليكم معنى او ما فهمتو شئ قولولي :cool:

وانا انتظر قبولكم ;)

ترف
27-06-2004, 04:52 PM
الله يحيك انتي وقصتك
مرحبا بك وباهل الامارات
ولا يهمك الهه عندنا خبره

bosy98
27-06-2004, 06:10 PM
وعليكم السلام ورحمة الله وبركاته

أهـــــلاً بك أختنا الغالية

و أن شاء الله الكلمات الصعبة نسألك فيها وفرصة تعلمينا اللهجة الأماراتى

خصوصا أنى مقيمة فى الأمارات 4 سنوات ولا عندى خبره فى اللهجة

منتــــــــــظرينك :)

مراحب
27-06-2004, 06:20 PM
انا ممن يشجعون اللغة العربية لأن فيها أحياء للغة القرآن وأعتزاز من الله بهذه اللغة ,,,,,,,,,,,
ولكن لابئس من قرأة قصة باللغة العامية خاصة اني من الخليج ولن اجد صعوبة في الفهم أنشاء الله
ونحن بنتظارك أختي ....

بنت الامارات
27-06-2004, 08:59 PM
هلا والله


تسلموون والله


وان شاء الله بعد شوى بنزل الجزء الاول


واسمحولي ع التأخير لاني شوى محمومه ..ومزجمه

bosy98
27-06-2004, 09:13 PM
محمومه ========== عندك برد



مزجمة ========== زكام


صـــــ http://users.pandora.be/eforum/emoticons4u/crazy/686.gifـــــــــــــح

على كل الأحـــــــوال سلامتك ومنتـــــــظرين :D

المجـــــــاهدة
27-06-2004, 09:17 PM
اهلا اختي اكيييييييد

عادي انا من اهل الامارات :)

بنت الامارات
29-06-2004, 04:40 PM
لالالا والله

صح الى قلتيه بوسي

وهلا فيكم

واسمحوولي ع التأخير ما نزلة الجزء..بسبب ضروف شوى

.:العايــــــله:.
الجزء الاول
تاريخ كتابة القصه:19-6-2004
تاريخ احداث القصه :غير محدد
القصه:

عايلة بو حمدان تتكون من حمدان الولد العود وعمره 19 سنه وهو انسان جدي ويحب القراءه والدراسه وعقبه سلطان 15 سنه انسان رومانسي وحبوب والضحكه ما تفارق ويهه وكله يحب ينكت وعقبه ميثا 10 سنوات الى اللسانها اطول عنها وفكاهة البيت..
بوحمدان تم 4 سنوات الله ما رزقه اعيال اتوفت حرمته الاولي بسبب مرض خبيث والعياذ بالله..عقبها بـسنه تزوج عاليه الى يابتله حمدان وسلطان وميثا ..عاشت هالعايله سعيده..واسره كامله متكامله بجوها الاسري اللطيف وخصه بعد ما يت ميثا وملت عليهم البيت بدلعها وبحكم انها البنت الوحيده ..وفي ضل هذا الجو وفي عز القيض والرطوبه كانت العايله متجمعه كالعاده عقب الغدا ويدردشون مع بعض
بوحمدان: وانته يا حمدان شو مسوى في الدراسه ؟ امشي ويا الاساتذه ولا والله انك؟؟ شوف هذى كليه مب لعب انته ما بغيت كلية الشرطه وبشورك بس انا ما خليتك ع شورك الا عشان اشوفك يايب اعلي الشهادات واعلي الدرجات
حمدان:افا عليه ابويه ان شاء الله بنبيض الويه بس الحين خلصنا الكورس الاول ..وبعد انته الله يهداك من متى وتقول انك بطلع السياره من الوكاله ولا شفت شئ؟؟
بوحمدان:هههههااا الله يقطع ابليسك انزين اصبر عليه تراه لين ما اسوى القرض وعقب اعطي الوكاله الجيك الاسبوع الياي السياره عندك وانته شو عليك اقصيره..ادريول ايبك ويوديك
حمدان:لا ابويه انا ريال شو طولي وشو عرضي دريول يوصلنى جيه انا بنيه..ايك شور رد الدريول وانا بسوق السياره بدال هالخساير
(وتعفد من بينهم ميثا):لا شو خلو عبدالغفور هو يوم اقوله ودني الدكان يوديني ولا يوم ابغي اسير الحديقه ما يقولي شئ هذا دريول مالنا مب ع كيفك
ويضحكون كلهم ع رمست ميثا واللسانها الطويل
وتدخل ام حمدان وياها الفاله ووراها ميري شاله دلة الجاهي والقهوه
ام حمدان:وااابويه عليكم شوو هالحشره صوتكم واصل لين اخر الفريج
بوحمدان: انتى ما تعرفين تيلسين استريحي اشوي الا يايبه الجاهي الا يايبه الفاله جيه نحن ضيوف يوم نبغي نعرف نيب حق عمارنا ولا ترانا بنقولج سيري يب
ام حمدان:لا افا عليك تعبكم راحه وبعدين اذا انتو ما بتاكلون انا باكل
سلطان: اوووب اووب شو هالرومانسيه عداال ...اقول اميه اسمحيليه بقطع عليج الجو بس قصيلي فنخ من هالهمباه
ام حمدان: عجب ما تستحى شو هاى الرمسه اللسانك يباله قص
ميثا: ماما ايب المقص ؟؟
ويضحكون عليها كلهم
(عقب ما كلة العايله الفاله وكملو سوالفهم وضحكهم )
بوحمدان:يالله انا بسير ارقد عاليه وعيني قبل صلاة العصر ابغي اصلي العصر في المسيد وعندى كم شغله بقضيها
ام حمدان:ان شاء الله
ميثا: بابا ايي ارقد عدالك؟؟
بوحمدان: تعالي بس لا تحشريني انا تعباان وابغي ارقد وارتاح شويه
ام حمدان : ايلسي واستقري انا مرته ما سرت وياه انتى العنفوصه شو تبغين تسيرين يالله قري واستقري
ميثا بدلع: مااابا ماابا ..باباه اطالعها
بو حمدان :خليها شو عليج ولا تغااارين ..ها اعترفي
سلطان: هيه وانا اقول شو السالفه اثاريها تغار ..عيل تعرفلها ابويه
بوحمدان: عشره هذى مب يوم ولا يومين..وبعدين انته تعال اعرفلها ولا ما اعرفلها مرتى هذى شو هالرمسه المخبقه
سلطان: هيه انا كله رمستى مخبقه جنها مشخله مب رمسه وهذى المفعوصه ما تقولون لها شئ اطول اللسانها ع راحتها
ام حمدان: عن الحشره يالله ابوكم يبغي يرقد ..يالله كل واحد حجرته
(تسير ام حمدان ويا بوحمدان حجرتهم ويا ميثا..ويسير حمدان حجرته...وسلطان يركب البلي استيشن ويلعب فيها )
(اذن العصر وسارو اعيال بوحمدان وبوحمدان المسيد وعقب الصلاه)...
حمدان: ابويه خلني انا اسوق هات السويج
سلطان: لا انا بسوق
ابو حمدان: لا انته ولا هو انا اليوم مب فاضي ان شاء الله يوم السبت بوديكم الشارع اليديد الى مسوينه اطويل ومافيه سياير وايد وكل واحد ربع ساعه زين جذه
سلطان: وهذى بوسه ع الخشم
بوحمدان: تسلم الغالي..يالله انزلو وصلنا البيت انا بقضي كم شغله وبرجع
حمدان: لا تنسي سالفة السياره
بوحمدان: لا خلاص المغرب برمس الريال لا تخاف
وينزلون ويدخلون البيت بس سلطان يشوف ربعه محمد وضاحي وخلفان طالعين من السكه الى عدال بيتهم فيسير صوبهم
سلطان: هلااااااا بالشباب الطيبين
محمد وضاحي وخلفان: هلا والله خشمك
ويتوايهون ويلسهم سلطان في ميلس الريايل لان برع واايد حر ..ويتمون يسولفون لين اذان المغرب
قبل ما يطلعون من الميلس ضاحي يهمس ع اذن سلطان من ورا الشباب: سلطون ابغيك في رمسه عقب
سلطان: وهو موطى صوته.: شووه؟؟
ضاحي إيأشر له بعدين
محمد: الله وكبر علينا هالحركات شو من بينكم انا من بداية الفصل الثاني وانا شاك فيكم كل ما يدخل استاذ لازم يفرقكم عن بعض وكله تهذربون واذا ينا صوبكم اتمون ساكتين
ضاحي يضحك: افا عليك ماشئ بس نحش فيك
ويضحكون كلهم ويعفد محمد ع ضاحي(بس سوالف) تحشون فيني ها ما عليه يا الهرم ...
عقب ما صلو الشباب في المسيد وكل واحد سار بيته ...وفي بيت بوحمدان وبالضبط في الصاله كانت ام حمدان تكلم عمتها(ام ريلها)..
ام حمدان: هيه وحليلها يقولون عقب ماخذ فلوسها طلقها
........: ...............................
ام حمدان:هيه والله الله يعين حالها المسكينه
.......: .................................
ام حمدان:لا بوحمدان ما ادرى طالع من العصر يقول عنده شغل ع ما ظنتيه بيي عقب صلاة العشا
.......: .......................................
ام حمدان: خلاص عيل عموه ان شاء الله باجر انشوفكم..فمان الله
.............: ....................

وتسير ام حمدان المطبخ عشان تشوف ميري شو مزهبه حق العشا ..وفي حجرة سلطان كان يرمس ضاحي عن الشئ الى كان يبغيه فيه
سلطان: ضحوووى والله انك مب ريال شو هالرمسه
ضاحي:.........................
سلطان: لا يا اخي ما اقدر ..اسمحلي
ضاحي:.............
سلطان:لا ما اخاف من اهلي ولابني ردي ..بس هذى مب مريله عيل تبغيني.............(وقبل ما يكمل كلامه يدقون عليه الباب)
سلطان: لحظه..منوه؟؟
ميري:سولتان يالله مدام كلام قول عشا خلاص تعالي ياكل قبل اكل يستوى بارد
سلطان: انزين اذلفي ..(ويرد يرمس ضاحي).ضحووي انا بتفاهم وياك بعدين الحين بخليك
ويصكر عن ضاحي ويسير يتعشا ويا اهله



واتمنى ان يعجبكم الجزء الاول:)

المجـــــــاهدة
30-06-2004, 07:02 PM
هههه:)

ماشاءالله وااايد حلو

تسلمين .....

بنت الامارات
30-06-2004, 10:26 PM
الله يسلمج


وين الباقين:(

الشهد
01-07-2004, 09:09 AM
:( :o



بقولك شي بس لا ضحكي علي:o










نص الكلام ماني فاهمته

ليتك خلتيها بالفصحى :(

بنت الامارات
02-07-2004, 12:43 AM
انزين الغاليه انا واصله الحين الجزء الخامس شوى صعبه اغير الكلام اخاف تخترب القصه...لو تحطين الكلام الى ما فهمتيه انا من اعيوني بقولج شو معناته:cool:


وبعطيكم بعض الكلمات عشان يسهل عليكم

غبنه=يوم تكون العيون مليانه دموع لكن الدموع بعدها ما نزلة يقول عنها غبنه
هرم=هذى كلمه تقال لشخص بمعنى يا الجبان وبعض الاحيان تقال في وقت المزاح يعنى كلمه عاديه محد يزعل منها
متروسه=مليانه
ردي=نفس معنى هرم بس اكثر معنى لكلمة جبان او خواف


واذا فيه شئ ما فهمتوه انا حاااضر وفي الخدمه

ترف
02-07-2004, 10:56 PM
حلوووووووووووووو
وبنتظار الباقي
واللهجه بسيطه كملي يا عسل

بنت الامارات
02-07-2004, 11:10 PM
تسلموووووووون والله


وهذا الجزء الثاني

(الجزء الثاني)

سلطان ما كان له خاطر ياكل بس عشان اهله مايحسون بشئ كان يدز الاكل غصبا عنه..ولانه جبر عمره ياكل والاكل كان شوى دسم رجع الاكل
ام حمدان: بسم الله ولدى بلاك؟؟ شو يعورك؟؟ بتسير الدختر ؟؟
بوحمدان: شوى شوى عليه عطيه ماي
سلطان: ماشئ مابغي ماي بسير ارقد
ام حمدان: شو يعورك؟؟
سلطان: لا اميه لا تخافين ما يعورني شئ بس انا كثرة من الاكل وانا لايعه جبدي
بوحمدان: الله يهداك بس..سير ارتاح في حجرتك

سار سلطان الحجره وبند الليت..وطاح ع الشبريه بس ماياه الرقاد من كلام اربيعه ضاحي...يفكر ليش جذه استوى ضاحي (ضاحي كبر حمدان اخو سلطان بس عايد السنه كم مره)
سلطان يدور هالكلام بينه وبين نفسه:والله ضاحي ريال زين بس لو مب ها الى مخرب مخه..معقول جذه الحب يسوى..انزين مافكر في بنت الناس حتى لو خانته ليش يبغي يوزع صورتها ..وانا اشلي في الموضوع..البنت حلوه وبنت ناس ما تستاهل..يا ربي شو اسوى؟؟..ليش اختارني انا بالذات ..ليش ضحوى ما حصلت غيري..صح انى رومانسي ودمي خفيف بس مايخصنى بهذى السوالف...
تم يفكر وفكر وااايد لين ماتعب وخذاه الرقاد
اليوم الثاني يوم الجمعه الكل ناش من الصبح وام حمدان اتزهب اثياب اعيالها وريلها وادخنهم حق صلاة الجمعه
ام حمدان:بوحمدان اثيابك معلقه ورا الباب
بوحمدان:دخنتي غترتي والثياب دخنتيهم
ام حمدان: هيه دخنتهم وزهبتلك الغتره ع الشبريه بتحصلها
سلطان: اميييييييييييييييييه شو هاااااا كندورتي مستويه صفرا من الدخوون
ام حمدان: لاه ويين اشوف...اويه يالله الحين بيقيمون الصلاه طلعلك كندوره ثانيه وبدخنها بالدخون مال ابوك
سلطان: اطلعو هذى جيه ابويه بعد دخون اسبشل حقه ..هيه نحن اعيال البطه السودا ترانا
ام حمدان: سلطون بلا هذربان زايد وسير خذلك كندوره غيرها
سلطان: مقيوله اعيال البطه السودا ..خلاص مابغي دخون بلبس الكندوره وبتعطر
ام حمدان وهيه طالعه من حجرة سلطان: يكون احسن
يسيرون اعيال بوحمدان المسيد ..عقبهم تزهب ام حمدان عشان يسيرون البيت العود بيت اهل ريلها ..هم متعودين كل جمعه لازم يتيمعون كلهم مناك ع الغدا
اهل بوحمدان..والد بو حمدان ما عنده غير 3 اولاد حمدان الولد العود الى مات في حادث سير ...وغانم الى عنده بنتين العنود عمرها17 وشيما عمرها 15 وحرمة ماتت يوم كانت بتيب البيبي الثالث ومات البيبي وياها ...وناصر الى هو بوحمدان
كالعاده كلهم تيمعو في الميلس العود ع الغدا البنات في جهه والريايل مجابلينهم ع الجهه الثانيه ...
شيما الى محد حاس فيها ومتقطعه من حب سلطان..الى يبادلها نفس الشعور بس مايحب يقول ولا يفشي الى في قلبه
يدهم العود:شيما فديتج بلاج ماتاكلين غاديه شرات العوده امتنى شوى حلو يوم البنت يكون فيها صحه مب جذه عظم ع يلد
العنود :لا يدي العود شو تبغي هيه بالمتن خلها جذه عقب ما بيونها المعاريس
يدهم العود: وابويه غانم شوف بناتك باعوه الحيا اشوف اللسانهم انطلق
غانم: ماعليه بنات صغار مايفتهمن الرمسه ويطالع العنود بنص عينه بس هو مايقدر يحرج عليهم خصه العنود لانها طبق الاصل عن امها
سلطان يحاول يغير الجو ومايدري انه بدال ما يجحلها عماها: يديه خاطرنا نسير العزبه من زمان ما سرناها من ايام عمى حمدان الله يرحمه
ام حمدان تغمز حق سلطان بانه يسكت...لان ويه يدهم تغير من ذكرو حمدان..اغلي ولد عنده ولان كان فراقه غير ..لانه قبل ما يسوى الحادث قال ابويه اخاف يستويبي شئ واموت فأبوه تأثر بهذا الحادث
يدهم وهو ياحول يبلع الغبنه ويا الاكل:افا عليك الاسبوع الياي يوم بتون بنوديكم العصر بتصل في محي الدين بشوف شو اخبار المزرعه لانى انا بعد ما قمت اسير مناك كثر ايام المرحوم رحمة الله عليه..وهو بعد كان قايم ابها الله يرحمه ويغمد روحه الجنه
اتغدو وخلصو ويدهم العود ويدتهم سارو يرقدون شوى..وبوحمدان وام حمدان فيه غرفه سارو يتمتحون فيها شوى وبعد غانم سار حجرته الى ماتغيرت من ايام شبابه والشباب تمو يلعبون ورقه فريق البنات وفريق الشباب وميثا كانت تشوفهم وما تعلب لانهم ما خلوها تلعب وياهم
شيما:شو هاا عافانيا الله ماتعرفون تلعبون كله تخلوني اسحب
حمدان:والله محد قالج تلعبين ويانا
العنود:ايه شوي شوى ع اختي والله صدق ليش كله تفرون عليها الجوكر؟؟
سلطان:عااش محامي الدفاع
شيما (زعلت) : خلاص ما ابغي العب ..(وتفر الاوراق)
حمدان: اوووه شو ها انا قايلك سلطون مانبغي نلعب بنات شوف خربوها الحين
سلطان: انزين خلاص خلاص بنبدا من اول
العنود: عيل انا بنسحب
حمدان: احسن
العنود: تعالي شيموه بنشوف التيلفزيون ابركلنا من مجابل ويوهم
ميثا: انا بيي وياكم
سلطان:افاااااااا

في الصاله الثانيه شيما والعنود وميثا يشوفون التيلفزيون والشباب عقب ما خلصو وشبعو لعب بالورقه طلعو برع عند الزراعه شوى
سلطان يرمس ضاحي:ضحوى ماحصلة غيري
ضاحي:................
سلطان:وكيف تهون عليك العشره
ضاحي:.......................
سلطان:انزين ليش ما رمست خلفان ولا محمد ليش انا بالذات
ضاحي:.................
سلطان: ياسلالالام والله انا ما اقدر اسويلك هالشئ اسمحلي مع انك اول مره تطلبنى بس اسف طلبك صعب
ضاحي:...
سلطان: الوووووو..الوووو ...صكر الهرم
شيما وهيه كانت وراه ولا بحاس فيها :امنوه هالهرم الى صك في ويهك
سلطان: عوذ بالله من الشيطان ..انتى من متى منه؟؟
شيما: انا شيطان؟؟!!!!!
سلطان: .........................
سلطان: ليش يايه ادخلي داخل بتسودين من الشمس
شيما: لا حبيت اتمشي شوى( وتسير صوب النخل واعيون سلطان وراها)
وتقطع عليه العنود: سلطان...سلطاااان وصمخ
سلطان:هااااااا شو تبيييين
العنود: وين اختى ازقرها قولا بدا الفلم
سلطان وهو متشقق لانه بيقدر ع الاقل يرمسها وبدال مايزقرها سار صوبها
سلطان: شيما
شيما: نعم
سلطان:اختج العنود اتقول بدا الفلم
شيما: اويه صح نسيت (ويايه بتسير ويرد يوقفها سلطان وهو حاط ايده ع خاصرته والايد الثانيه ع ويهه عن الشمس)
سلطان: يعنى مايعزمونا!!!
شيما: وهيه تبتسم له:..مايبغيلها عزيمه تبغي تعال وتسير عنه ..وهو يلحقها ويسيرون يشوفون الفلم..لين ما اذن المغرب ويسيرون الشباب والشواب عشان يصلون المغرب


حبيت اقولكم ملاحظه:اذا كان عندكم تعليق ع شئ او ملاحظه ع القصه قوللي انا اتقبل النقد البناء


واتمنى ان يعجبكم الجزء الثاني :o

تم التعديل بوسطة المراقبة العامة

ترف
02-07-2004, 11:41 PM
القصه حلوووووووه
بس مدام الموضوع بداء في الحب والتلفزيون والافلام
مدري احس المشرفات بيقولون شيء
علشان هذا حرااااام
لا يزعل الغالي .........
:o :o

بنت الامارات
05-07-2004, 10:06 PM
هلا الغاليه

مشكوره الغاليه عيونج الاحلي

والله ما ادرى بس ما اظن الحب حرام ولا الاسلام حرمه والاسلام حرم الحب عن طريق الحرام والى في القصه اهل والنهايه ان شاء الله تكون كلها بالحلال



ع العموم

انا ان شاء الله بالاربعا القادم بسافر بسير العمره ((يعنى بيي عندكم:D )) وان شاء الله برجع تاريخ 21-7

والحين اسمحولي ما اقدر انزللكم القصه لين ما ارجع:(


لاني ضيعة الدسك الي فيه القصص وانا افتر راسي وانا ادوره وان شاء الله بحصله لان اكيد ما بيضيع :cool:


اصبرو شويه لين ما ارجع:p

*نسمـة الصبـاح*
02-08-2008, 03:11 AM
ككككككككككككككككككككمممممممممممممممممممممممممملللل لللللللللللللللللللللليييييييييييييييييييي


ييييييييييياحيييييييييياااااااااااااااتتتتتتتتتتتت تتتتتتي

أحلام الليل
02-08-2008, 06:10 PM
اهلا اختي اكيييييييد

عادي انا من اهل الامارات

زاوية الحق
04-08-2008, 08:23 AM
مشكووووووووووووووورة بنت الإمارات على القصة


بس عندي سؤال ممكن

اش معنى كلمة ( رمسة )

وجدوحنين
05-08-2008, 05:52 PM
روعه ماشاء الله

ندى الطفوله
07-08-2008, 11:23 PM
رووووووووووووووعه ماشالله
بس ايش الرمسه
مشكوووووره احب هدا النوع من القصص
كملي