المساعد الشخصي الرقمي

مشاهدة النسخة كاملة : وماتت خوله ( قصه من واقع حياتي )



"شمعه وتضوي"
25-10-2008, 02:40 AM
وماتت خوله
( قصه من واقع حياتي )





"خوله عمرها 10 سنوات تدرس في الصف الرابع"
رجعت خوله في يوم من الأيام من المدرسة مبسوطة لأنها في ذاك
اليوم بتروح لبيت أختها هديل
(دخلت بيت أختها تلعب في المجلس)
قالت أختها: غيري ملابسك
(لكن خوله ما سمعت الكلام وجلست تلعب في المجلس وتجلس
على الكنبة وتنقز من كنبه للثانية ،
وطاحت على طاوله من زجاج دخلت قطعه منها في
الطرف اليمين من رقبتها جلست تنادي أختها وهي تشوف الدم بس
ما حست بأي ألم جت هديل تبي تشوف وش عندها خوله
دخلت عليها )
قالت : وش فيك؟ (لقت خوله تمسك رقبتها)
وش صار؟ ( شافت الدم يسيل من رقبتها شالتها من الخوف
ونزلت من الدور الثاني)
نادت أخوها خالد علشان يوديها للمستشفى وهي في الطريق
للسيارة شافت الدم يسيل من مرفق خوله على الأرض وبشكل
كبير مو معقولة كميه الدم هذي مره كثيرة
( إذا بأوعية الدم اللي في الرقبة انفجرت )
الله المستعان
أسرعوا بها لقسم الطوارئ
أخذها الدكتور المعالج وهو يقول : البنت هذي راح من دمها كثير
الأمل في إنها تبقى حيه مره ضعيف ادعوا لها
سألها : ليه ما حطيتي إصبعك على رقبتها؟
يمكن يوقف النزيف شوي،
و يكون الأمل كبير في نجاتها.
سوى الطبيب كل الإسعافات اللي قدر عليها
جت أم خوله وقلبها يتقطع لما عرفت وش صار لخوله
وهي تشوفها ممدده على السرير الأبيض وما بقى جهاز إلا
وموصل فيها تخطيط قلب تنفس صناعي نسبة الضغط والسكر
ودكتور داخل ودكتور طالع .
الكل خايف من فقدان خوله وفي اليوم الرابع لها في العناية المركزة
جت صديقه للام ،
قالت لها: تصدقوا عنها يمكن إنها بحاجه للصدقة وادعي لها إن الله يشفيها .
في ذاك اليوم كان الجو بارد لأنه كان يوم من أيام الشتاء
راحت هي ووالد خوله اشتروا ملابس شتوية وتصدقوا بها على المحتاجين
ومدت أم خوله يدينها للسماء تدعي وصورة خوله ما تفارقها ( وهي على
السرير الأبيض ممدده بدون ملابس )
دعت وقالت " اللهم إن كان في شفاء خوله خير لها فعجل به واشفها
وان كان في الموت راحة ورحمه لها فارحمها واقبضها إليك انك غفور رحيم .
فسبحان الله في الوقت الذي خلصت فيه من توزيع الصدقة .......

ماتت خوله .........
وصلها خبر وفاتها بعد خلصت من توزيع الصدقة .
ماتت خوله وتركت ورآها عيون دامعة وقلوب ما تصبر على فراقها .
ماتت وماتت الفرحة في قلوب اللي يحبونها كانت هذي اقوي صدمه
في حياة أهلها وخاصة هديل لان خوله طاحت في بيتها .

هديل ما صدقت اللي سمعته " خوله ما ماتت خوله حيه انتم تكذبون
كان ذاك اليوم من أصعب الأيام حتى انه مر كأنه سنه ولما وصل الخبر
لام خوله احتسبتها عند الله .
(وبعد عزاء ذاك اليوم نامت هديل وشافت في المنام خوله لابسه فستان
سكري وشعرها على كتفها تطل عليها من جنب النخلة)

قالت هديل : خوله هذا أنت ؟
خوله : إيه هذا أنا هديل أنا ما مت .
قالت خوله: والطعنه وش صار عليها؟
(قربت تشوفها و وخرت شعرها من على كتفها وما شافت مكان
الطعنه شي نادت زوجها ناصر)
ناصر تعال شفها ناصر خوله هنا خوله ما ماتت
قالت خوله: لا تنادين احد ما حد يشوفني غيرك لا تنادينه
(وهديل من الفرحة في الحلم تبي احد يصدق إنها شافت خوله نادت ناصر)
جاء وقالت له: تعال شف خوله
(التفت وما لقي احد)
قال : وين ؟
قالت : من لم النخلة.
قال :ما فيه احد!!
(التفتت هديل للنخلة وما شافتها استغربت وين راحت مشت
هي وزوجها وهي تمشي التفتت وشافت خوله تطل عليها
جنب النخلة ) قالت لها: ليش ما طلعتي يشوفك ناصر.
قالت : أنا قايله لك لا تقولين لأحد.
قامت هديل وهي مستغربه من الحلم
تقول يمكن من كثر ما أفكر فيها شفتها في حلمي وضاق صدر هديل
لان خوله طايحه في بيتها وكل اللي صار هذا لان خوله جت لأختها .
ومرت الأيام وخوله ما تفارق تفكير هديل وكل الوقت المسكينة سرحانة
(ونامت في يوم وشافت أخوها إبراهيم يناديها )
قالت : وش فيك
قال :تعالى شوفي (وهو يأشر على مرايه معلقه في الجدار وشافت
خوله لابسه فستان سكري وشعرها مرفوع وشايلها رجال كبير في
السن وفي سيماه الصلاح وكانت في ارض خضراء)
قامت وقالت : لازم أفسره .
اتصلت على شيخ مفسر أحلام وسألته عن الحلمين وعن تفسيرها
بعد ما قالت الحلم الأول ،
الشيخ كل الوقت وهو يسمعها يقول الله اكبر الله اكبر الله اكبر
قال :أختك هذي مطعونة؟؟
استغربت هديل قالت في نفسها وش كيف عرف ؟
ردت: إيه يا شيخ طاعنتها قطعة قزاز كانت طايحه عليها .
قال : أختك شهيدة لان المطعون شهيد ،
وش كانت لابسه كلميني عنها .
قالت : كانت لابسه مريول المدرسة جايه من التحفيظ
الشيخ: الله اكبر الله اكبر.
هديل وكانت في ذاك اليوم مأخذه شهادة أفضل قارئه.
(والشيخ يكبر ويههل )
وكانت من الفرحة تطمر من كنبه لكنبه لان معها شهادة وطاحت
والشهادة بين يدينها.
ولما قالت له عن الحلم الثاني ،
قال لها الله اكبر الله اكبر
اللي شايلها يا انه ملك أو احد من أقاربكم متوفى ابشري ابشري
وسكر الشيخ السماعة وهو يكبر.

(وبعد هالحلم خف وقع موت خوله على أهلها عرفوا إنها راحت
لمكان أحسن من ها لدنيا وارتاحت راحت للرحمن اللي رحمته وسعت كل شي)

"فلعلها أحبت حفظ القرآن ولكن منزل القران أحبها
لعلها أحبت كلام الرحمن فأحبها الرحمن فأستعجل بلقائها
وأراد لها أن تكون بين جنانه تتمتع بالنعيم المقيم لتكون ميتتها
كشهيدة وتدخل الجنة لتكون لأهلها شفيعه)


قد يكون هناك بعض التفاصيل التي قد أغفلتها لأني لم استطع
التحدث مع والده خوله وأخواتها خوفا من أن اذكرهم بها
فهذا ما جمعت من أقارب خوله مما حدث في ذلك اليوم
اللهم اغفر لها وارحمها واجمعنا بها ومن أحبها في مستقر
رحمتك إنك سميع مجيب
لكل مجتهد نصيب فارجوا أن يكون لي من قراءتكم ما كتبت
أوفر النصيب


"اللهم إن كان في فوزي خير لي فاقدره لي وان كان في
فوزي شر لي فاصرفه عني واكتب لي الخير حيث شئت ثم أرضني فيه"

شاكره لكم الوقت الذي أمضيتموه في قراءة ما كتبته راجيه
من الله العلي القدير أن يمن علينا بعفوه وتوفيقه.

والله ولي التوفيق

قلب راض
30-09-2012, 03:18 PM
أسكن الله خولة الفردوس

وجعلها شفيعة لوالديها

وشكرا لك على القصة المؤثرة

طالة الخير
02-10-2012, 07:39 AM
بارك الله فيك غاليتي ...
وأسأل الله الفردوس الأعلى لخولة

أم جنافارووق
02-10-2012, 10:52 AM
جزاكي الله كل خير وأسكن الله خولة فسيح جناته

الصبر زادي
02-10-2012, 11:16 AM
جزاك الله كل خير وأسكن الله خولة فسيح جناته.......ورحم الله امواتنا واموات جميع المسلمين

ونا111سه
11-10-2012, 02:00 PM
الله يرحمها ويحسن خواتمنا