سؤاااال لاتردوني,,

[**أزاهير**]

السلام عليكم ورحمة الله وبركاته..
أخواتي الغاليات..

ياليت اللي تعرف طريقة المثلوثة تقولي عليها..

أنا ذقتها يوم كنا في السعودية.. ومن هذاك اليوم وأنا خاطري فيها..

لاتردوني بلييييييييييييز

أنا في الإنتظار..
أختكم
أزاهيييير

[ام نونـا]

ابشري حبيبتي اتفضلي طريقة ام دحومي للمثلوثه


المثلوثة

أولاً:
المثلوثة عبارة عن 3 × 1

يعني 3 طبخات في طبق واحد

اللي هي

[رز, جريش, قرصان]

ثانياً الطريقة:

يعني معروف تبدئين بطبخ الجريش أولاً ثم الرز والدجاج ثم القرصان

الجريش

طريقة الجريش النجدي الأصلي

لذيـــــــــــــــــــذ جداً جداً جداً وسهل جداً جداً

لكن جريشنا بدون طماط !!!

أبعطيك مقادير لشخصين تقريباً ... وانت زيدي حسب حاجتك

كأسين جريش

صدر دجاجة

نصف بصلة متوسطة الحجم

نص ملعقة شاي ثوم مهروس

ملعقة صغيرة كمون مطحون+ ملح + ماجي أبيض ( أجينوموتو) الماجي حسب الرغبة

6 كاسات ماء

كأسين لبن

قليل من الزبدة أو الزيت

فلفل حار حسب الرغبة

** عموماً مقابل كل كأس جريش 4 كاسات سوائل , 3 منها ماء مغلي , وكأس لبن


الطريقة :

اسلقي الدجاجة ثم نتفيها وضعيها جانباً

احمسي البصل والثوم في الزبدة أو الزيت

وأضيفي له الكمون والملح والماجي الأبيض

وتضيفين الجريش والماء المغلي وتخلين اللبن على جنب بحيث ماتحطينه الا في آخر الوقت مثلاً آخر ساعة

وتضيفين الدجاج والفلفل الحار (غير مقطع)

وتكون النار عالية

وبعد مايغلي الجريش تقصرين على النار حتى تكون هاااادئة

وكل ماحسيتي ان الماء قل .... تضيفين من اللبن


وتتركينه على النار لمدة ساعتين إلى أربع ساعات أو أكثر



للكشنة اللي على الوجه :

نصف بصلة متوسطة الحجم مقطعة قطع صغيرة
زيت أو زبدة
بهارات مشكلة + صلصة طماط ( بدون تكثير) + ملح

الطريقة:

تحمسين البصل في الزيت حتى يشقر لونه
وتضيفين البهارات والصلصة والملح ,,, مع التحريك المستمر حتى تتسبك



ولما تجين تقدمين الطبق تضعين الجريش في صحن التقديم وفوقه هذه الكشنة
--------------------

لكن في المثلوثة تعملينه بدون دجاج وبدون كشنة الوجه

ولأفضل النتائج بعد ساعتين إلى ثلالث ساعات من تركه على نار هادئة
أدخليه الفرن على نار هادئة أيضاً ...
الأفضل ساعة أو أكثر إلى وقت التقديم

هذا بالنسبة للجريش

بالنسبة للرز
فهذي هي طريقتي:

راح أكتب لكم أدق التفاصيل حتى لو كنتوا تعرفونها ..... للتذكير فقط

الرز بمرقة الدجاج


أولاً :تحمسين لك شوي بصل في شوي زيت تقطعينه بأي شكل تريدين ان بغيتي أرباع موب مشكلة , وحتى مو ضروري تحمسينه أهم شي وجود البصل

المهم بعد ماتحمسينه تحطين الدجاجة وتصبين الموية , وتضيفين الملح و البهارات العدلة هي : [ هيل, قرفة (دراسين) , فلفل أسود, مسمار(قرنفل) ] .... وإذا عندك ورق غار حطيه يعطي طعم ممتاز وبعد فيه الكزبرة الناشفة الغير مطحونة جداً ممتازة

بعدين خلي الدجاجة على النارساعة إلا ثلث
في هالأثناء خذي مقدار الرز واغسليه ونقعيه شوي

طلعي الدجاجة و إذا بغيتي تحمرينها بتتبيلة معينة حطي في فنجال شوي زيت وشوي صلصة طماط وشوي بهارات مطحونة وصبي عليها شوي من مرقة الدجاجة وصبي هالخلطة على الدجاجة

وحطيها في صينية فرن ودخليها الفرن ... خليه على الوارم يعني لا تحمرينها الحين وبعدين إذا بغيتي تحمرينها بس شغلي الفرن من فوق
ترا موب ضروري هالخلطة يعني ممكن تحمرين الدجاجة بدون شي
أفضل وقت للتحمير قبل ما تقدمين الأكل بعشر دقايق لأن تحميرها ياخذ أقل من 10 أحياناً


خلاص؟؟


المهم صفي مرقة الدجاج وكبيها على الرز


مقابل كل كاس رز كاس ونص ماء


طبعاً أنتِ الحين معليه على النار بحيث تشوفين الرز قاعد يغلي ,وإذا شفتي الرز تخفس بعدها قصري على النار حطيه على (low) وأنا أحيانا أحطه على الـ mid low عشان يستوي بسرعة في ربع ساعة بس على شرط ماتنسينه وهو على الميد لو لأنه يحترق

المهم فيما الرز قاعد ينطبخ .... حضري الحمسة واللي هي :
بصل مقطع صغار أو شرايح حسب الرغبة
احمسيه في شوي زيت واذا تشقر حطي عليه بهارات مطحونة وملح وزعفران لأن الزعفران يعطي نكهة للحمسة وريحة حلوة. وممكن إذا بغيتي تتميلحين شوي مثل ماأسوي ان كنت رايقة أضيف شوي كمون وشوي قرفة وبس ...بس انتبهي لا تحترق الحمسة لأنه بسرعة يتغير لونها إذا ماحركتيها حركيها باستمرار وحطيها على طول على الرز وصكي القدر عشان يتشرب الرز الطعم والريحة.
وإذا كنتي تحبين الصنوبر تراه لذيذ فقط ماعليك إلا انك تحمسينه قبل بدون زيت وإذا تشقر طلعيه في صحن وإذا خلصتي من حمسة البصل اخلطيه معه, وإذا كنتي تحبين الحبحر (الفلفل الحار) حطي بعد بس موب مقطع

صدقوني ترا مايبيله شي أبد بس الكلام كثير والا هي ماتسوى

بالنسبة للقرصان

في غاية السهووووولة

احمسي لك بصل مقطع صغار جداً وبعد أن يذبل أضيفي له طماطم مقطعة صغار
و غطيه على نار هادئة قليلاً ثم أضيفي صلصة الطماطم كثري منها
وأضيفي الملح والبهارات
وأضيفي ماء بحيث يكون لدينا مرق
وإذا حبيتي تضعين فاصوليا خضراء مقطع قصع صغيرة وجزر مقطع قطع صغيرة ... فأنت حرة يعني على حسب رغبتك

بعدين أضيفي القرصان وغمسيه في المرق حتى يتشرب المرق

وبس طبعاً مايكون المرق كثير

طريقة تقديم المثلوثة

ضعي في الطبق .. "الأفضل أن يكون له عمق " مو بادية لا صحن

الطبقة 1:
قليل من الرز حتى يغطي أرضية الطبق
الطبقة 2:
الجريش
الطبقة 3:
القرصان
الطبقة الرابعه
الأرز ثم ضعي الدجاجة فوقه وزينيه بالكشنة اللي سويتيها مع الرز

الله يعينك على شغلها "R:

[**أزاهير**]

السلام عليكم ورحمة الله وبركاته
هلا وغلا بمشرفتنا الغاااااااااليه ..
مشكورة على الطريقة ..وبسويها بسويها
طويلة ولا قصيرة..
لأني حبيت طعمها وااااايد..
وتسلمين لنا حبيبتي ..

[ام نونـا]

قولي ان شاء الله حبيبتي

وبالعافيه مقدما وان شاء الله تزبط معاك وتعجبك