في بيتنا مراهقة .

[قطرة ندى]

في بيتنا مراهقة ..عاوزة بنتك تبقى صديقتك وتحكيلك كل أسرارها وتعدي مرحلة المراهقة بهدوووء وسلام عليكِ بالآتي .. * بلاش تظهري أمامها بصورة الملاك البريء وأنك عمرك ما بتخطئي لان ده اهم سبب يخليها تخجل من انها تحكيلك عن أخطائها وأسرارها ..* لا تستخدمي العنف معها بالتهديد أو العقاب بالضرب لان مع الوقت كل ده بيفقد تأثيره ويمكن يكون سبب لتماديها في الخطأ و الكذب عليكِ وكتمان أسرارها عنكِ خوفا منكِ ..* استشريها وخدي رأيها في بعض أمورك البسيطة واحكيلها عن أسرارك وخاصة وأنتِ في سنها لكن ازاي حافظتي على نفسك وقيمك وأخلاقك .* احسن طريقة تنصحي وتوجهي بيها المراهقة انك تحكيلها قصص من الواقع و تضربي لها أمثلة حية ومواقف حقيقية تتعلم منها وتقلد الجيد وتتجنب السيء .* اتعرفي على صديقاتها واعزميهم عندك في البيت وكوني لطيفة جدا معاهم هتشعر بالثقة والفخر بيك وهتبقى فرصة تتعرفي على سلوكهم وبيفكروا ازاي ؟! وتوجهي بنتك بأسلوب غير مباشر تحافظ على صداقة مين وتبعد عن مين !!* إوعي بنتك تشعر انك بتراقبيها ( رغم انك بتراقبيها فعلا ) لان المراهقة لو شعرت انها تحت الأنظار والمراقبة بتضعف ثقتها بنفسها وربما يكون دافع انها تاخد حذرها وتخفي أمورها عنك ، لكن لو شعرت انك تثقي فيها فلن تخون ثقتك أبدا وهتبذل كل جهدها انها تكون عند حسن ظنك ..* اعملي لها مفاجأة كل فترة بهدية بتحبها أو محتاجاها ( في شنطة المدرسة ، دولاب ملابسها ، درج مكتبها )* لا تكلفيها بأعباء كتيييرة تفوق قدرتها لان فترة البلوغ بتبقى فترة نمو جسدي سريعة جدا فبتستهلك معظم طاقتها عشان كده بتلاقيها غالبا كسلانة وبتنام كتير ومش قادرة تعمل حاجة .* قوليلها كل يوم كلمة حلوة مثلا أمدحي خُلق أو صفة جيدة فيها ، حاجة في شكلها اهتمامها بنظافتها ، تسريحة شعرها ، ابتسامتها ، قوامها ، اي حاجة تكون حقيقية ولا تبالغي .* صلوا مع بعض جماعة ولو صلاة واحدة في اليوم وشجعيها على المواظبة على الصلاة دائماً ، و عليّ عندها المراقبة و حب ربنا لان الدين هو اللي هيحميها من أي خطأ أو خطر في الوقت اللي ممكن تنشغلي أو تهملي فيه متابعتها .* اوعي يفوت يوم من غير ما تاخديها في حضنك وتطبطبي عليها وتقبليها على جبينها مهما كبرت وطولت هي في حاجة نفسية شديدة لحبك وحنانك .

د. فاتن عمارة