السلام عليكم ورحمة الله وبركاته
مشاركة الآخرين أفراحهم أو أحزانهم فن . . و نادر من الناس اللي يجيد هذا الفن .
قبل فترة توفت والدة صديقتي المقربة- الله يرحمهاويرحم موتاكم و موتى المؤمنين
واحترت كيف الأسلوب المناسب أو وش هي العبارات اللي ممكن
أقدر أعزي بها و أخفف عن صديقتي المقربه ..
احيانا يعجز اللسان عن التعبير في مثل هالمواقف و نترك الأمر و ما نسوي شي..
و بحثت و حصلت هالموضوع اللي يطرح فيها نقاط ممكن تساعد في التخفيف عن الآخرين لما يكونوا في مثل هالمحنه الاليمة .
1) لا تحاولي أن " ترفعي المعنويات " :
لأنك بهالشي تزيدي الطين بلة . . و تزيدي من ألم المفجوع لوقلت له :
-خلك أقوى من كذا .. لا تيأس .
مثلا لو أحد فقد ولده طبيعي بيحزن و يتألم و إذا بغيتي " ترفعي معنوياته " فأنتي تخليه يعتقد بأنك مو حاسة بحجم الخسارة اللي صابته . . لكن خليكي صريحة و قولي له مثلا :
- أنا أعرف أنها مصيبة قاسية عليك . .
بهالطريقة تخليه يفضفض عن ألمه و يتغلب عليه . . و كلمة " لا تيأس " تقيده من اطلاق انفعال طبيعي و تسد الطريق على قدرته على التنفيس اللي هي هبة من الله سبحانه .
***
2) لا تحاولي أن " تلهيه " عن مصابه
كثيرمن الناس لما يروحوا يعزوا أحد يتعمدوا – بحسن نية - أنهم ما يجيبوا سيرة الموت أو الميت .. يروحوا يتكلموا عن : المباريات ، آخر الأخبار...الخ. و يتكلموا عن كل شي إلا الشي اللي جوا علشانه.
واجبك كمعزية – و مهما كان مؤلم وثقيل هالواجب - أنك تواجه الموت وجها لوجه و حقيقته الملموسة .
و أنك تسكتي ما تقول شي أفضل من أنك تبذلي جهدك بكل الطرق حتى تلهي صاحب المصيبه عن مصبيته و مسكين لما يكون لحاله يصير تحت ضغط الواقع و يزيد ثقله .
***
3)لا تخشي التحدث عن الفقيد :
يخاف الناس – و بحسن نية بعد – أنهم يجيبوا سيرة الميت ..
يظنوا أنهم راح يزيدوا الهم و يهيجوا الأحزان .
و المفروض أنك ما تترددي في الكلام عن الفقيد و تتذكره لما كان
حي يرزق و بهالطريقة ترسم صورة حية له تخفي صورة الموت . .
مافيها شي مثلا لو جيت و قلت للفاقد و بكل بساطة :
- أنا ما كنت أعرف المرحوم تمام ، كلمني عنه .
و تأكد أنه راح يتكلم و يفضفض و بالتالي أنت خففت عنه كثير .
***
4) لا تخشى أن " تبعث على البكاء"
حتى لو قلت كلام عن الفقيد و شفت صاحبك دمعت عينه لا تفكر أنك أذيته بالعكس أنت عطيته فرصة يخفف عن حزن و ألمه و بالطريقة الطبيعية السليمة ..
لأنه لو حاول يكتم ألمه في وجودك راح يحس به و بصورة أكبر
و يمكن هالنقطة " الخوف من أنك تكون سبب في بكاء صاحبك " هي أكبر نقطة تخلينا نتراجع عن التعزية ، لكن تذكر أنك إذا تلفظت بشي وتسببت في ذرف الدموع أن هالدموع نافعة و مفيدة .
***
5) كوني مُطَمِئنة ، ولا تجادلي
كل الي يفقدوا أعزاء عليهم يحسوا بالذنب و هالشعور طبيعي في الغالب ماله أي مبرر ..
- زوج نادم كان يعامل زوجته معاملة سيئة
- أم تقول : كله مني أن ما حطيت عيني على ولدي .
- زوجة تقول : أنا اللي خليته يطلع ذاك الوقت .
تشوفهم كلهم يرددوا مثل هالأسباب و يتحسروا .. و هالشي من أبلغ مظاهر التعبير عن الألم : " لو أني سويت هالشي " أو " لو أني ما سويت كذا " ، " يا ليت الزمن يرجع " .
مثل هالمشاعر لازم تظهر ، و لو تقدري أنك تطمنيهم و تخليهم يعترفوا بالتدريج بأنهم ماقصروا في واجباتهم كزوج أو والدين أو أخ ...
***
6) لا تدعي شخصا مصابا وحيدا مع نفسه :
لما أحد يفقد له عزيز راح تكون الناس حواليه في " الفاتحة" طول أيام العزا لكن بعد كذا ؟! راح يحيط به الفرااغ و حتى القريبين منه يبتعدوا بحجة أن الحزن يحتاج لوحدة أو نخليه يرتاح . .
و الواقع مافي اسوأ من ( علاج الصمت ) هذا .. لأن راح تكون خسارة أصدقاء زيادة على خسارة الفقيد .
وجود الأصدقاء هنا تطلع أهميتها .. لما أيام العزا تخلص و ترجع الحياة إلى مجراها الطبيعي . . و صاحب العزا الآن يحتاج لك أكثر من أيام العزا .
خلك على اتصالك باللي عندهم حداد . . حاول أنك تكثري من زيارتك لهم ، وعادي لو كان زياراتك أكثر من الأول و تتعذري بأي عذر .
و واجب عليك أنك تُشعري صاحب العزا بكل اللي تبقى له في هالحياة بعد الفراغ الكبير اللي سببه الفقيد ..
***
7) شجعيه على النشاط و العمل :
ادفع صاحب العزا للعمل سواء في وظيفته الطبيعية أو من خلال هواياته .. وبهالشي أنت تدفعيه للمستقبل .
راح يشعر أن الحياة ممكنة من جديد لأن راح يتخلص من الإنعزال اللي سببه الفقد .
***
8) حاولي أن تخرجيه من نفسه :
في اليوم الي تقدري تخلي صاحب العزا المفجوع يهتم باللي يخصه اعرف أن ألمه في طريق الشفاء. .
و في اليوم اللي تقدري تخليه يهتم بالآخرين فتأكد أنه تشافى .
الحزن مثل أي شي في هالحياة مقدر له أنه يزول لكن يحتاج بذل جهد لسد الفراغ اللي خلفه الألم ولا طبعا راح يسد هالفراغ الشكوى و الكآبة ..
و إذا أنت مصممه على الشفاء التام لصاحب العزا وجه اهتمامته في طرق جديدة : أعمال خيرية ، جمعيات، نشاطات دينية و اجتماعية .
المعذرة على الإطالة والله لا يفجعكم بفقد أحبة ..
رد مع اقتباس
مواقع النشر