أحلى حويرنه .. طبق من فلسطين الحبيبة
السلام عليكم
كيفكن صبايا
اليوم جايبيتلكم طريقة عمل عشبة كتيييييييييييير بنشوفها بس معظمنا ما بيعرف إنها تؤكل
وهادا ههو طبق المقبلات الأول عنا بالأردن وفلسطين بفصل الربيع
مفيدة جدا الحويرنه خصوصا إنها لا تزرع زراعة بل تعتبر مما ينبت بعلي يعني بدون بذور سبحان الله وتنمو مباشرة بعد هطول المطر وتستمر في النمو حتى أوائل الصيف يعني مجرد ما تحمى الشمس بتنشف وبتموت
موجودة بكثرة في بلاد الشام ، والسعودية ولما كنت عند أهلي بإجازة بين الفصلين قبل شهرين بابا قطفها من على جنب الطريق و هي موجودة بكثرة في الرياض والنعيرية والمنطقة الشمالية والشرقية وأكيد بالجنوبية والغربية بس أنا إلي شفتها بعيني كانت بالرياض والشرقية
كتير ناس بشوفها وما بدير إلها بال ، لكن حقيقة نحنا بنعملها كطبق مقبلات شهي جدا جدا ومفيد جدا جدا ، وهادي صورتها :
طبعا ممكن تلاقيها بالمحلات الكبيرة مثل الكارفور ، بتجيبي ضمه وبتلقطي الورق وبتغسليه وأنا طريقتي المعتادة لتنظيف الخضار الورقية صارت معروفة ، بحوض المجلى المخصص للخضار :
بعدين بتصفيها شوي ، وتفرميها فرم ناعم :
بعدين بتجيبي مصفايه وبتحطي تحتها صحن ، وبتحطي شويه من الحويرنه ورشي عليها ملح ، بعدين طبقة ثانيه ورشي ملح ، وثالثة ورشي ملح وخليها شي ربع ساعه :
شوفي كيف عم بتنقط من ماءها ، وهادي الخطوة بتشيل مرار الحويرنه وتخفف من حدتها :
بعد ربع ساعة بتمسكيها وبتعصريها طبعا على دفعات ، يعني خدي منها حفنه واعصريها ، بعدين حفنة ثانية واعصريها وهكذا شوفي كمية الماء إللي نزلت منها :
هلأ بصحن كبير غميق ، حطي لبن زبادي و حطي الحويرنه المعصورة :
حركيهم منيح ورشي ملح وذوقيها والملح حسب الذوق كل شوي حطي ملح وذوقي لحد ما توصلي للطعم المرغوب :
من قريب :
بعدين عبيها بمطربان و حطي على وجهها زيت زيتون بمقدار نص سم بحيث يغطي السطح بشكل منيح ، أنا مرة أشتريتها جاهزة من ماركة عنا إسمها الجنيدي ، كتير طيبة بس لا يمكن شيء جاهز يضاهي شغل البيت ونظافته ، فلما خلصت استغليت المطربان وصرت مخصصته للحويرنه :
وهي صورة الزيت على الوجه :
وهي صورة المرطبان لفيته عشان تبين الحويرنه جواته :
سكريها منيح وخليها يومين أو ثلاثه بالثلاجة بعدين افتحيه وصيري حطي منه صحن زغير كمقبلات على المائدة وتؤكل بالخبز وممكن تقعد عندك بالثلاجة من أسبوعين ونص لغاية ثلاث.
وهادا أحلى صحن حويرنه لأحلى حوائيات بالدنيا
يم يم يميييييييييييييييي
وما بدي كالعادة إلا دعوة بظهر الغيب إنه ربنا يوفقني لكل ما فيه رضاه وصلاحي
[/justify]
رد مع اقتباس
مواقع النشر