الملفوف على الطريقة الفلسطينية
السلام عليكم
اليكن عزيزاتي طبق الملفوف اللذيذ على طريقتنا الفلسطينية:
اولا منجيب ملفوفة كبيرة او ملفوفتين صغار
منسخن ماء بطنجرة كبيرة
منجيب سكين كبير ومنقوّر داخل الملفوفة يعني منشيل الجزء اللي بالنص اللي هو الجزء اللي ماسك اوراق الملفوف منشيله حتى اوراق الملفوف تتفكك
بس يبدا الماء يغلي منحط الملفوفة داخل الماء حتى تصير طريّة وتتفكك اوراقها
وانت بتسيري تفكيها وهي داخل الماء
بس تصير الاوراق طرية بتشيليها من الماء وبتشيلي باقي الملفوفة اللي ما تفككت بتفكيها على سدر كبيير
منحضر الاوراق للف يعني منقيم من الاوراق الاضلاع القاسية ومنرتبهن للف في منهن بكونو جاهزات للف يعني ما رح تتغلبي
بعد ما جهزنا اوراق الملفوف للف منحضر التتبيلة يعني الرز والبهارات واللحمة
وانتم ما شاء الله ما في حاجة ادلكو على البهارات لانكم فنانين ببهارات الرز
بس احنا منحط مرق الدجاج و ملح وقرفة وبهار طعام ولحمة مفرومة وزيت ذرة منخلطهن مع الرز اللي كنا متبلينو بالماء يعني ناقعينو بالماء الساخن
وهيك منبلش نلف الملفوف ومنشدو شوي حتى يتماسك وما يفرفط عالطبخ يعني كأنك بتعصريه بس بلطف
بعدين منقشر 2 ثوم راسين مو فصين ومنحطهن بين الملفوفات للطعمة
وبعد ما انرتب اوراق الملفوف بالطنجرة منحط عليهم ماء وملح ومنغطيهم بصحن احسن ليطوشو لفوق ومنغطي الطنجرة ومنعاليها على نار هادية
ملاحظة: بتقدري تعصري حامض قبل ما تطفي النار على الطبخة او بعد ما تحطيها صحون حسب رغبتك
وكمان اذا بدك معها جاج بتغدري تحطي بقاع الطنجرة شقف جاج
وصحة وعافية
[/IMG]
رد مع اقتباس
مواقع النشر