السلام عليكم و رحمة الله و بركاته
انا عروس صارلي شهرين و بعدي بالملجة عند أهلي
مشكلتي اني ما قمت أحس بحب زوجي .. ما أشوفه .. ما يدق علي .. تعبت أتقرب منه لكنه هاملني
ما قمنا نطلع بسبة انشغاله بدوامه و اذا فضى قال بنام تعبان !!!
مليت و زهقت .. سمعت ان هذي حالة طبيعية يعني بأول الزواج يكون الريال متلهف على زوجته و بعدين ينشغل بحياته لكن أنا شنو ذنبي ؟؟؟؟
هاملني وايد و أحسه ناسيني مع انه بالبداية كان مو مقصر معاي بشي
صرت أكلمه بالضحك و الغشمرة .. ما فاد
بالخناق و البجي .. ما فاد
قلتله بس خلاص مابي أتزوج و أفكر بالانفصال .. لكنه حقرني و ما رد علي قال انتي معصبة و ماتدرين شنو تقولين .. بيني و بينكم حسيت روحي هبلة
حياتي مثل ما اهي يوم كنت بنت .. بروحي بالبيت و طلعاتي كلها مع خواتي و اهو غااااايب
وين زهوة العروس ؟ وين فرحتي ؟؟ يقول لما انصير في بيت بروحنا بيتغير الوضع بس مافيني صبر لأن الحين المفروض هذي أحلى فترات حياتنا و اهو دايماً مشغول
للأمانة هو مشغول بدوامه مو بشي ثاني بس بالبداية كان يعطيني أغلب وقته و الحين ما يدري عني ميته حية .. ناسيني
يمكن تقولون عطيتيه على اللي يبيه و خلاص مل .. لا ما عطيته شي بعدنا بالملجة
ساعدوني ترى خايفة على يوم أتهور و أنا الحين ماني مقصرة .. توني متهاوشه معاه و قالبة حياته نكد مع ان هذا أبداً مو طبعي بس و الله وضعي يحز بالخاطر شلون أنا أداريه و أهتم فيه و أكلمه على طول و أدزله من هالمسجات الحلوة و أسويله أفكار رومانسية و حركات .. و أهو مخليني على الهامش زين منه يدق يقولي كلمتين و يسكره
متأكدين ان هذا شي طبيعي ؟؟؟؟ ماعتقد
قولولي شسوي ترى و الله موصلة حدي
رد مع اقتباس
مواقع النشر