السلام عليكم ورحمة الله وبركااته ...
كل البااارح وانا اتقلب بفراشي ما جاني النوووووووووووووم .. الموهم لا تسألوني عن السبب
موصيني نااس ما اقووووووول لأحد >>> احلفي
الموهم يووووووووم جت الساعة 2 ونصف بالليل وشفت النوووم ميؤووس منه
واتذكر ان عندي بالفريزر فيليه سمك ومن زمان بسويه وراح اليوم تلوى اليوم الآخر ودارت الأيام وكاد أن ينقضي الشهر
واتذكره قلت يابنت قومي طلعي السمك خلي الثلج يذووووب عشان الفجر تقومين بالمهمة الصعبة
وطلعتها ويوم أذن الفجر بشرنا الآذان ببزوغ يوم جديد >>>اخلصي
واقووووووووووم وأسوي لي خلطة عشان أتبل فيها السمك
المقادير :
3 بيضاااات
علبة زبادي
بيالة زيت
بيالة خل أبيض
ثوم مطحون
فلفل وملح وبهارات وكمووون وزنجبيل كذا صارت التتبيلة جااهزة
وأتبل فيها سمك الفيليه
بعدين دخلت السمك المتبل في الثلاجة من الساعة 6 الصباح إلى الساعة 12 ونصف الظهر تقريبااا ...
الساعة 6 وشوي ولعت على القهوووه لأبوا الشباب وفطّرت الولد اللي بيروح للمدرسه
قعدت اتقهوى انا وابو العيال >>كأننا شايب وعجوز متقابلين قهوه على الصبح وانا النوم بدا يداهمني
لكن ما نمت طلع أبو الشباب هو وولدي يشفون أشغالهم قالي أبو الشباب أنا راجع
جهزي الفطوووووووووور وكمان أنا عندي مشوار الصبح يعني النوووم بالمشمش يصير
قعدت الساعة سبعة على النت وصحوا عيالي الصغار تضاربت شوي أنا وياهم يبغون فطور
الموهم قمت وسكتهم بساندوتش جبنة وعصير ... ورجعت للنت وبعدين
رحت أسوي لي كم شغلة في البيت ويتخللها مضاربه ومصافقه بيني أنا وبزاريني
رجع (أبونا) >>قصدي ابو الشبااب الساعة 9 وحطيت الفطووووووووووووووور ..
وقالي ترااني ما أبغى غداا اليوووووووووووووم >> أول مره يقولها وفرحت إلا شوي
بس لقافتي قلت له تبلت السمك سكت ما رد >>>يشاور نفسه
الموهم ضفيت فطوري ورحت أتجهز للمشوااار اللي بروح له ..
بعدين رحناااا ووصلنا >>>>ما صارت طبخه
الموهم رجعت لبيتي في تمام الساعة الـ 12 والنصف تقريبا الظهر عاد ما ادري يمكن قبلها بشوي
أو بعدهاا بشوي >>>طيب وش نسوي لك >>كأني داخله أقص احداث جريمة
الموهم واقووووووووووووم وادهر بهالمطبخ وبخاطري ونفسي يقول لي أبو الشباب كلام قطعي
وأكيد انه ما يبغى غدااااا لكن ما قالها ودامه ما قالها فأنا اخاف من المقالب ..
ورحت طلعت السمك المتبل >>>أخيرا دخلنا في الطبخة وصلنا لذروة الموضوع استعدوا واربطو الأحزمة
كنت أبغى أرشه بقسماط بس ما عندي وبالمشمش اقعد أطحن خبز فغطيتها بالدقيق
بعدين دخلتها الفريزر عشان يتماسك الدقيق وفرصة أشوف أشغالي الشاقة الثانية ..
ورحت وطلعت خضار اللي يبغى تقشير قشرناه الموهم وغسلناها >>معلومة جديده خخخ
قطعتها حلقاات عاد مزاجي كان مع الحلقاات كل واحد وضميره اللي يبغى حلقات أو طولية أو مكعبات
كلش على المزاااج .. >>>اخلصي علينا ياحرمة
بعدين حطيتها في صينية مدهونة بشوية زيت طبعا مسكت معي اني اضيف شبت
بس قلت في نفسي إيه هين أفرمه بحطه على اللي يقدرّني ربي >>الوقت يداهمني
الموهم وأضفت البهارات والملح والفلفل وكل اللي قدرني عليه ربي من منكهات للأكل
وكمان قطرات من الخل الأبيض >>>والظاهر اني خلصت كل القارورة >>قال قطرات قال
بعدين غطيتها بقصدير ودخلتها الفرن تقريبا لمدة ربع ساعة بعدين ولعت عليها من فوووووق >>كذا من فوق موضة
لحظة فاصل إعلاني فيه واحد غاثني كأنه ذبانه يزن على راسي بشوف وش عنده وان طلع ما عنده إلا
الدلع تفاهمت معه مثل ما تتفاهم أي أم مع ولدها بكل رقة وحنية ملحوقة بكم طراق ..
..............................................
جيت >>بشري أمك ..
وين وصلنا؟؟؟ ايووووووووووه
نروح لفيليه السمك اللي بالفرن ونقليه بالزيت وكمان نقلي معه بطاطس بس أنا والله ما لي خلق
أقطع بطااطس >>>إلا وش لك خلق فيه ؟؟
قليت بدل البطاطس (سمايل ) أسرررررررررررررع ...
وصفيناه في صحن التقديم
بعدين نجي للخضار اللي بالفرن وش أخبارهاااا ؟؟؟
وهذي السلطه قطعتها في وقت الفواصل الإعلانية ...
وهذا الرز كنت مسويته أمس وبقى منه كمية حليوه عقدت العزم بيني وبين نفسي
اني ما اسوي رز جديد لليوم الثاني فدخلت هذا سيدا للفريزر وحميته اليووووووووم خخخ >>كيد عظيم
أجل تبوني ارمي النعمة
وهاذا كل غداناااااااا
وااااااااااااااااااااااااااااااااااااااه أخيرااا ما بغيتي تخلصين ياجويده ...
استروا على ما واجهتوا ..
وسلامتكم ...
رد مع اقتباس
مواقع النشر