بسم الله الرحمن الرحيم
السلام عليكم ورحمة الله وبركاته..
مساكم الله بالخير حبيباتي ...
حبيت انه احكي لكم معاناتي في تأخر الانجاب وهدفي هو مواساة من هم في نفس قصتي وحياتي..
تزوجت وعمري 16 سنة كنت صغيره مافهم شي من الحياة..
مرت الايام وكنت لحظتها ساكنة مع اهل زوجي مر الشهر والشهرين وكنا نتظر الحمل والسبب اهل زوجي يموتون بالعيال ..
بعد 6 شهور طلبو مني اكشف مع اني كنت صغيره بس رحت وكشفت وقالو سليمه جاء الدور على زوجي..
والله اتذكر رهبته يوم قرر يحلل ويشوف وفعلا راح المستشفى وحلل وانتظرنا النتيجه...راح يراجع الا الطبيب يقول انك عقيم..
رجع بس ماقالي انه صفر قال ضعف واخذ ابر لمدة ستة شهور وبدون نتيجه..
بعد سنة من الكشف قررنا نروح للطب الشعبي ورحنا لواحد بالمدينة سوداني لعب فينا لعب حسبنا الله ونعم الوكيل مانفع ..
وريحنا كم سنة بعد اذكرو لنا وحده طبيبة شعبيه ناس حملو على علاجها بعد الله وفعلا رحنا الرياض وبرضو طلعنا بدون فايده..
ريحنا كم سنة ورحنا لوحده بالاحساء عباره علاجها عن مكسسرات فقط مع الحليب ولا نفع...عقب رحنا للأردن وقرر الدكتور الكيلاني نعمل طفل انبوب بس ماعملنا عنده لأنه ماعند زوجي اجازة كافيه.
قررنا نعملها بالسعوديه وسويناها بمستشفى الاطباء المتحدون بجده...يالله من هنا بديت احس فعلا بالمعاناة..
اللي خبرني عن المستشفى ام ماجد ربي يحفظها وهي كانت مطلقة عندها ماجد بس وتزوجت من رجل عقيم اخبرها اثناء الخطبه واشترط عليها قبل الزواج انها ماتجيب سيرة العيال لأن امره منتهي من الناحية الطبيه..
تقول لي ام ماجد :تزوجته وضليت معاه 15 سنة ماجبت طاري العيال ابد ويوم ربي كتب لنا العمره وانتهينا منها رحنا جده نتمشى الا ونمر على المستشفى قلت يافلان شرايك نجرب الحقن المجهري لاتيأس من رحمة ربي قال لها انا شقلت لك ؟؟
قالت:انا اول مره افتح السيره لك مادام حنا هنا خلينا نكشف ونشوف والحمدالله ربي يسره ووافق يروح يكشف..
كشف زوجها قال الطبيب حقن مجهري كان متردد زوجها بس سوى المطلوب وانجحت الطريقة من اول مره ماشاء الله وجابت بنت وبعدها بسنه سووا حقن مجري ثاني وحملت وكان علمي فيها انهاحامل بالشهر الثامن يوم كانت تخبرني بقصتها..
من هنا خبرت زوجي ورحنا واخذت انا المنشطات علشان الحقن المجهري وبعد تجهيز اسبوعين اخذو زوجي لغرفة العمليات والمفترض انها ماتاخذ ربع ساعه بس تخيلو سااااااااااااعتين وانا انتظر دقات قلبي زادت وخفت عليه ياربي وش سوو فيه؟؟
بعد ساعتين جاء الطبيب بوجه حزين يقول مالقينا اي حيوانات تعبنا وحنا ندور ونظطر انه نعطيك علاج ينزل بويضاتك..
قلت وانا اتلعثم..خزنو البويضات حرام ..
قال ماتخزن مايصلح..طلع الطبيب
ظليت لحالي بالغرفة بعد ماعطوني ابره تخفف الم نزول البويضات اللي طلعت بدون تلقيح
وين اروح ياربي انا بغربه رحت بغرفة زوجي لقيت انه لسى مافاق من البنج يالله ماعرف احد هنا وانا طلبو مني اطلع وطبعا ردو مبلغ عملية الحقن المجهري لأنه من اولها فاشلة ...ربي رحمتك
كنت كل شوي اطل على زوجي وفااااق الحمدالله بس تعبان مره وشاحب وجهه مايقدر يجيب كلمتين على بعضها كسر خاطري احس اني كرهت العيال يوم شفت شكله تعبان كذا..
رحت برهبكيت لين فاض راسي ورحت الشقة لحالي اصيح واصيح الا امي كلمت هاااااا ه بشري!!
ااااه يمه ماسوينا العمليه ..امي:ليييييش؟؟
قلت الطبيب ماجاء قالت أمي:خيره ان شاء الله فيه خيره واا دموعي تصب ماتدري عن حالنا
رجعنا الشرقية وحنا على صمت ساكتين كلن يفكر بعالمة الخاص وخيالاته..
ريحنا كم سنة ورجع زوجي يعالج عند طبيب اسمة حرب وطلعت الحيوانا بس ميته ومع انها ميتة الا زوجي جاني يبكي من الفرح انه طلع منه شي..
ويافرحه ماتمت اختفت وشحت بروحها وماعاد طلعت خلف الله..
لما تزوجت كان خواني وخواتي صغار الان هم امهات واباء وانا مازلت انتظر النونو يفرح قليبي الحزين
وسوينا الحقن المجهري بعد مره ثانية عند عيادات الطبيب\سمير عباس ونفس القصة تكررت اللي بجده
قلت لزوجي يكفي يكفي جرحت روحك بالعمليات والحقن لازم فتح خصية وهو ماقصر شرشحوه الاطباء لدرجه انه اخر مره ملابسه الداخليه الاقي فيها دم عيا الجرح يبرا
في خلال 20 سنة مرت من عمري ماخلينا طب حديث من ابر او عمليات او طب شعبي او شيوخ قراء الا وعملناه والحمدالله عندنا رضا بامرالله وقضاه
كنت قنوعه جدا بس تصرفات اللي حولي خلتني اتحسس من اللي تحمل وتخفي حملها واللي تمشي واذا شافتني فضفضت ثوبها علشان ماشوف بطنها وووووو شي يشيب الراس بس اختصرت لطول المواقف الكئيبه والحمدالله..
اهلي وزميلاتي دايم يقولون ربي يتيم كنت اتمنى بس البيت مايساعد لأنه كنت عند اهل زوجي وانا ماودي الطفل يختلط بالناس كثير لأن اهل زوجي ربعهم كثير ماشاء الله
بعدها استقليت ببيت والحمدالله وبديت افكر بشكل جدي بموضوع احتضان طفل فاتحت اول شي خواتي مين فيكم ترضى ترضع لي يتيم او لقيط والحمد الله تسابقن في حمل شرف ارضاع يتيم..اول نقطه هنا انتهينا منها وهو اني انتظر وحده من خواتي تحمل علشان ترضع لي الطفل اللي ناويه احتضنه ان شاء الله
بقا زوجي..
كان موافق بس متردد وخايف من عايلته ومجتمعة..قلت له شوف حبيبي..
الناس عمرها ماترضى عن احد ولا فيه احد منهم حاس فينا بالله عيالهم بينفعوك؟؟
فكر بعمرك وبس والولد بدخله مدرسه خاصة بعيده عن مدارس عيال اقربائنا وخلني اتشرف بتربية يتيم..
الحمد الله وافق..
وبدت فكرة تبني الطفل بشكل جدي...
كنت اتابع المنتديات الخاصة بالايتام واشوف حماس الاخوات شجعني اكثر واكثر..والله حتى ذيك الليلة مانمت من الفرحه لأني بكره بروح دار الرعاية..
جاء الصبح وبعد دوامي رحت للدار يالله كيف اوصف لكم ممشاي هناك!!
اول مره انزل اقدامي بمكان زي هذا بكيت قبل مادخل لأمرين..
اولها ظرفي وحرماني من الامومه خلاني اجي هنا
والثاني فرحتي اني بضم طفل بصدري منها اطفي نار الشوق ومنها اتشرف بصحبة الحبيب المصطفى صلى الله عليه وسلم..
دخلت وفتحت الباب والله عالم ماكنت يوم اتوقع اني ادخله..
وأنا أمشي تبادر بذهني الم المستشفيات والم الحرمان والم كلام الناس في الماضي فكرت بزوجي كم عانى زوجي لحد درجه انه يغار لما يشوفني اضم عيال اختي لدرجه انه قل خروجه واختلاطه بالناس قررت ادخل الفرحه والصوت بهذا البيت الصامت من 20 سنه
كنت امشي للداخل واحس خطواتي ماتاطا الارض شي غريب علي يارب رحمتك
ماكان يهمني كلام الناس اصلا ماهموني قبل مافكر بموضوع احتضان طفل لما كانو يضايقوني بمسألة الحمل فكيف اهتم بكلامهم وانا نويت افعل خير لديني ودنياي ولنفسي ولزوجي..
اتصلت اول بدار الرعاية وماكنت اعرف انه لازم اروح الاشراف النسائي الاجتماعي اتصلت بالدار وهذا الحوار اللي حصل بيني وبين الموظفه:
بعد السلام عليها سألت:
كم اعمار الاطفال؟
قالت:بعضهم ايام وبعضهم شهور..
قلت: حين وصول الطفل لديكم؟
قالت:ايام معدوده
قلت:هم ايتام؟
قالت:مجهولين الابوين لانعرف ان كانو اطفال غير شرعيين أم ايتام!
قلت:هل اعدادهم كثيره..
قالت:ان قلت لك قد تتعجبين..نحن لانرتاح.. اطفال جدد دوما نستقبل..
قلت :هل هناك من يكفل الاطفال منكم؟
قالت:تقصدين احتضان نعم هناك كثر وسأخبرك بموقفين حصل معنا..
احدهم اسرة لم يكتب لها أن تنجب أطفال وبعد كفالة اليتيم رزقت بأطفال فانظري الاجر الدنيوي قبل الاخره!
وأخرى فقيره احتضنت طفل مع اطفالها لوجه الله فاغتنت بأمر الله..لو أذكر لك مواقف فهي كثيره يقشعر منها البدن بهجة وسرورا.
ياسبحان الله...هذا كان ردي لها
قلت :هل له دعم مادي؟
قالت:1200 مقابل كل طفل يكفل مع الزيادة عند فتح المدارس والاعياد..
تقول هي:بعضهم كفل اليتيم ولم يقبض ريالا واحد بل كان يودعه لليتيم في حساب خاص لليتيم حتى يكبر فوفر له مبلغ ضخم نفع به ذلك اليتيم وهم كثر ولله الحمد.
قاطعت حديثها بقولها:أذكر يوما ما اتت إمرأة تقول سوف أكفل طفل منكم بعد شهر سألتها لماذا التحديد بالضبط؟
قالت :ابنتي سوف تلد وأريدها أن ترضع اليتيم ومن ثم أربيه أريد أن أكون مع الحبيب المصطفى صلى الله عليه وسلم..
سبحان الله ارادت تلك المرأة أن تحضى بصحبة الحبيب المصطفى مع عدم حاجتها للطفل ..لكنها احتاجت رحمة الله وأجره..
دار بيني وبينها حديث مطول لكن تعبت يداي من الكتابه لذا اعتذر منكم..
حسيت بضرور انه احتضن طفل خاصة لما تعديت سن 30 بديت احس الزمن يمشي وانا مادري عن روحي بدى نار وشوق الامومه يغلي بقلبي... يحرقني... يكويني..
انطويت عن الناس وصرت مزاجيه مع اني راضية باللي كاتبه ربي الا ان الوحده اتعبت نفسيتي من غير مادري انا..
وضعي بدا يسوء وحتى اهلي حسو فيني يقولون ضي ايش فيك صايره عصبيه!!
يوه انا عصبيه!
عرفت اثر الوحده بحياتي ونفس الوقت عرفت الحل الوحيد..
ذكرت لكم اني بكيت قبل مادخل الاشراف الاجتماعي لطلب احتضان يتيم..
اولها بكيت لأن الحرمان جرني هناك جر في ذاك المكان اللي اول مره اشوفه وادخله
وثانيها بكيت بكا فرح اني اخيرا تحقق الهدف في ضم طفل واشمه والمه بقلبي ليل نهار مايفارقني
دخلت ورجليني ترتجف خوف مدري ليه حسيت بمغص وكأني بعالم غير عالمي..
كلما فتحت باب دقات قلبي تزيد هي دقات مشتاق عطشان ...هي دقات ولهان محروم من كلمه يمه يماما محروم من طفل يلاحقني ومايبغى غيري انا..
يالله احساس بعض الامهات تفقد الاحساس بها الشي اللي احنا نحس فيه
استقبلني الدار خير استقبال وبدو يسألون..
عندك عيال....ج:لا
وين ساكنه؟.........ج:قريب منكم.
خلصت تجهيز الاوراق المطلوبه وهاأنا انتظر الطفل بشغف..
اشعر براحه اللهم لك الحمد
بس انتظر بنار وشوق يجيني الطفل واضمه ضم السنين لي
بإذن الله إذا تم احتضان الطفل بصوره لكم وبصور غرفته لأنه قريبا ان شاء الله ابدأ اصبغها واشتري غرفة نوم من اغلى وافضل محلات بالشرقية عندنا
اذا نتهيت من كل شي ترقبو موضوعي مصوراً ان شاء الله
اسأل الله العظيم رب العرش الكريم أن ياجرني على صبري وان يرزقني حسن تربية لهذا الطفل ويرزقني بره ويعوض زوجي كل خير يارب
هذا الفلاش من تصميمي يحكي عن غيض من فيض ...
كل أخت محتضنة او تفكر بالاحتضان فلتشارك بالرابط الموجود في توقيعي
تقبلو حبي لكن يالغاليات..
اختكم ام اليتيم
أحبكم 
مواقع النشر