ما عنوان القصة



النتائج 1 إلى 3 من 3

الموضوع: ما عنوان القصة

  1. #1
    الصورة الرمزية شجون حائرة
    تاريخ التسجيل
    Nov 2007
    الدولة
    في متاهات الحياة
    المشاركات
    2,606
    معدل تقييم المستوى
    0

    ما عنوان القصة

    حوارفي ثلاجة !




    صباحاً : تنازعتا على سندويشة "الزعتر"، وتضاحكتا، ووخزت إحداهما الثانية في خاصرتها !



    ظهراً : تقرآن درس "الحساب" معاً، وتتراشقان بوسادتين !



    عصراً : تنامان كأي حمامتين ذبيحتين على وسادة معدنية في ثلاجة الموتى !!



    .. لم يصل بهما الحمار إلى أي مرفأ،


    ولم تمدّ المذيعة الحزينة كفــّها من الشاشة لتنتشلهما من فم الموت،.


    تقول الصغيرة للشقيقة : برد كتييييير يا هيا !!


    لماذا القبر هكذا بارد ويلمع مثل الحديد ؟



    - "لما": هذا ليس القبر يا حبيبتي ..


    هذه ثلاجة المستشفى ، التي كنا نراها على التلفزيون !!



    - هل سترانا "بنات صفــنا" اليوم على التلفزيون ؟!



    - طبعا ، نحن الآن شهيدتان !!



    - معقول ؟ انا شهيدة ؟ أنا لسه صغيرة هيا !! كنت حابة أصير دكتورة مو شهيدة !!



    - نامي الآن ، غدا سنذهب الى الله ، لازم نصحى بكير!!



    - هيا ..بتعتقدي مات الحمار؟



    - بيجوز.. بس بتعرفي؟


    انا كنت حابّة أكمل المسلسل قبل ما أموت ،


    نيّالهم سماح وعلا رح يعرفوا شو رح يصير بالآخر!



    - ما في تلفزيون بالجنة ؟؟ بنشوفه هناك !



    - شفتي شو حلوة طاقية "احمد قريع" امبارح ع التلفزيون ؟



    - ههههههه... اه بس ما بتدّفـي كتير



    - تعالي لصّقي فيّ .. قرّبي أكتر حبيبتي..



    - هيا.. ليه بيظلــّوا يفتحوا علينا باب الثلاجة ؟



    - عشان المصورين بيصوروا الشهدا



    - طيب هلأ بكرة عند الله رح يحطّوني بالنار؟



    - ليه انتي شو عاملة "لما" ؟



    - بتعرفي الاسبوع الماضي أخذت قلم اياد وما رجعته ،


    خايفة الله يكون زعلان مني



    - لا حبيبتي ما تخافي .. اياد أخوكي وهلأ بيكون يدعيلك ويقرئلك الفاتحة والله رح يسامحك



    - بكرة اي ساعة رح نطلع؟



    - ما بعرف بالزبط لأنه في شهدا كتير كان اليوم ، ورح يكون زحمة كتير



    - صحيح هيا صحيح !!


    ممكن بكرة نسأل عن الشيخ احمد ياسين ونسلم عليه هناك



    - آه طبعا، وانا بدي أروح أسلم على "أبو عمار" كمان



    - آه أنا بعرفك طول عمرك بتحبي جماعة فتح أكتر



    - لأ مو هيك بس إنتي بتحبي حماس كتير.. مستغربة ليه!



    - مو بابا كان بيحبهم انا كمان بحبهم



    - بس ماما كانت بتحب فتح أكتر



    - هيا .. ليه ما بيجبولنا أكل هون؟؟



    - شو أكل ؟؟ إحنا ميتات يا حبيبتي !! مالك إنت؟



    - ميتات ؟؟؟ مو حكيتيلي قبل شوي شهيدات؟؟ انا جعانة ؟



    - اصبري للصبح بتاكلي بالجنة



    - ما بدي خلص بطلت أستشهد !! بدّي أروّح !! افتحيلي بدي أطلع ..



    - وين بدك ترجعي يا مسكينة ؟



    - على بيتنا !!



    - بيتنا تهدم حبيبتي وما ظل منو اي حجر



    - بنتخبى بالجامع



    - الجامع هدموه كمان



    - طيب وين راح "الحمار" ؟؟ وين تخبّى ؟!



    - "الحمار"بيدبر حاله !! ما تخافي عليه



    - يعني خلص ما رح نرجع ع البيت ؟



    - لأ ! هلّا بيتنا عند الله !!



    - أحسن ... في هناك مدارس؟؟



    - لأ .. ما تخافي ياكسوولة



    - طيب في حرب ؟؟



    - ما بعرف !! يمكن !!



    - بتعرفي انا خايفة كتير على بابا



    - ليه؟؟



    - امبارح كان يحكي انو العرببدهم ايانا نعملانتفاضة تالتة .. وخايفة يموت فيها...



    - شو يعني انتفاضة ؟



    - يعني فلسطينية كتيييييير يموتوا



    - وشو بيصير بعدها ؟



    - ولا شي !!



    - كيف ولا شي يعني ؟؟



    - ولا شي !!



    - طيب ليه العرب بدهم ايانا ننتفض من جديد ؟



    - عشان يحسوا انو احنا بنموتواحنا بنقاوم مو احنا نايمين



    - وهم شو بيفرق معهم ؟



    - بيكونوا مرتاحين اكتر !!



    - يا حرام العرب كتييير بتعبوا وهم يصرخوا ع التلفزيون ..


    أنا بحزن عليهم !!


    شفتي لؤي كيف حكالهم وشكراً إلكوو؟؟!!!



    - طيب احنا ليش اسرائيل بتكرهنا ؟



    - اووف ... انت ليه اليوم اسئلتك كتيرة ؟؟



    - زهقانة !!! ما في تلفزيون ولا أكل .. وبرد كتييير



    - خلينا بحالنا هلأ وقت تلفزيون يعني....



    - شفتي خطيب الجامع ع التلفزيون؟ كان يدعيلنا كتير



    - ولك هاد مو خطيب الجامع هاد رئيس حماس !!



    - طيب شو يعني المقاومة اللي كان يحكي عنها ؟



    - يعني انو ما تهربي من الصاروخ زي ما كنتي بدك تعملي



    - يعني هلأ هو ما بيحب اياد لأنو هرب من الصاروخ؟!!



    - ما بعرف بس اياد ما بيعرف يقاوم



    - طيب هو الشيخ كيف بيقاوم ؟؟



    - اوووف !! شو بعرفني اسأليه !!



    - بيرموا صواريخ على اسرائيل .. صح؟؟



    - اه ..



    - طيب هاي ما بتنفع.. ما بتصيب حدا



    - شو رايك انتي يعني ؟؟



    - ما عندو صواريخ كبيرة تقتل كل اسرائيل ؟



    - لأ ما عندو



    - طيب كيف عرف يطرد جماعة امك الفتحاوية من غزة ؟



    - هاد موضوع تاني .. انتي ما بتفهمي فيه اسكتي احسن



    - ما بدي اسكت .. بدي افهم انا ليش متت ؟؟



    - عادي يعني .. مو احنا دايما بنموت ؟



    - بس الحمار هرب .. ما مات ..


    - لأنه حمار !!


    - بتعرفي امبارح شفت "شناتي الملابس" اللي بعثوها العرب .. حلوة كتيييييير... لو ما متنا كان طلعلي فستانولا لعبة



    - شو هالصوت ؟؟؟ سامعة الضجة ؟



    - شكله الممرض فاتح التلفزيون .. هاي مظاهرات عشان احنا متنا..



    - يعني هلا بيكتبوا عنا شعر زي محمد الدرة ؟



    - اه بس يا خسارة" درويش"مات .. مين رح يكتب ؟



    - عندي فكرة !!


    بكرة بشوف درويش عند ربنا وبخلــّيه يكتب قصيدة النا لحالنا


    ما حدا يقرأها غير انا وانتي...



    - فكرة حلوة



    - طيب احكي للممرض يحط ع المسلسل !!



    - كيف احكي ؟انا ميتة مثلك !!



    - طيب هلا بس ينام الممرض رح انزل من هاد الجارور


    شوي شوي .. ع السُكــّيت .. وأهرب ع البيت



    - لأ .. اوعي .. بيشوفوكي وبيطخوكي كمان مرة



    - ليه ؟؟


    ما تخافي بشوف الحمار وين إتخبىوبتخبىمثله !!



    - بيزعل منك شيخ الجامع ؟



    - طيب هو شيخ الجامع ليه قاعد جوا التلفزيون ؟ ليه مو معانا ؟



    - اوووف .. انتي بدك تخربي بيتنا بكلامك ؟؟



    - انتي مو حكيتي بيتنا تهدم ؟؟



    - اه بس قصدي .. خلص اسكتي..



    - يا اللّه يا اللّه لو اني هلأ بالبيت كنت عملت سندويشة لبنة ...



    - شو بالك فاضي !!



    - طيب خطيب الجامع بيحب سندويشة اللبنة ؟؟



    - لأ هو ما بيحب غير الصمود .. بس



    - يا اللللله .. يعني شو أعمل حاسّة حاليبدي أموت


    ع سندويشة لبنة !!!!


    ولو معها كم حبة زيتووون...




    ***************




    ** اللهّمّ إني أستودعك قلبي فلا تجعل فيه سـواك**

  2. #2
    نجمة بيت حواء الصورة الرمزية ضجيج النبض
    تاريخ التسجيل
    Nov 2008
    الدولة
    الأردن
    المشاركات
    726
    معدل تقييم المستوى
    12
    حوار ساخن في موطن بارد
    سلمت أناملك على ما سطرت

  3. #3
    الصورة الرمزية شجون حائرة
    تاريخ التسجيل
    Nov 2007
    الدولة
    في متاهات الحياة
    المشاركات
    2,606
    معدل تقييم المستوى
    0
    اقتباس المشاركة الأصلية كتبت بواسطة ضجيج النبض مشاهدة المشاركة
    حوار ساخن في موطن بارد
    سلمت أناملك على ما سطرت
    حقا أنه عنوان رائع للقصة سلمت انامللك

المواضيع المتشابهه

  1. من غير عنوان لان الموضوع بكبرة عنوان
    بواسطة Miss-in97 في المنتدى الترحيب بالأعضاء المستجدين
    مشاركات: 13
    آخر مشاركة: 18-04-2011, 12:12 AM
  2. ما صحة هذه القصة؟
    بواسطة حلوى بحرينية في المنتدى الركن الاسلامي,6
    مشاركات: 0
    آخر مشاركة: 19-10-2009, 02:23 PM
  3. فيه حمل ولا إيش القصة ؟؟؟؟؟؟؟؟
    بواسطة همي في قلبي في المنتدى الحمل والولادة
    مشاركات: 14
    آخر مشاركة: 03-07-2009, 09:47 PM
  4. هل هذه القصة صحيحة !!!!!!!!
    بواسطة الشركسية في المنتدى الركن الاسلامي,6
    مشاركات: 2
    آخر مشاركة: 13-06-2007, 02:56 PM
  5. **لا يوجد عنوان انت عنوان الموضوع**
    بواسطة الريتــــاج في المنتدى المجلس العام
    مشاركات: 15
    آخر مشاركة: 02-05-2006, 12:20 AM

الكلمات الدلالية لهذا الموضوع

مواقع النشر

مواقع النشر

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

أهم المواضيع

المطبخ

من مواقعنا

صفحاتنا الاجتماعية

المنتديات

ازياء | العناية بالبشرة | رجيم | فساتين زفاف 2017 | سوق نسائي | طريقة عمل البيتزا | غرف نوم 2017 | ازياء محجبات | العناية بالشعر | انقاص الوزن | فساتين سهرة | اجهزة منزلية | غرف نوم اطفال | صور ورد | ازياء اطفال | شتاء | زيادة الوزن | جمالك | كروشيه | رسائل حب 2017 | صور مساء الخير | رسائل مساء الخير | لانجري | تمارين | وظائف نسائية | اكسسوارات | جمعة مباركة | مكياج | تسريحات | عروس | تفسير الاحلام | مطبخ | رسائل صباح الخير | صور صباح الخير | اسماء بنات | اسماء اولاد | اتيكيت | اشغال يدوية | الحياة الزوجية | العناية بالطفل | الحمل والولادة | ديكورات | صور حب | طريقة عمل القرصان | طريقة عمل الكريب | طريقة عمل المندي |