شوفو تجربة وحده

**أم غلا راشد** · 04-06-2009, 10:50 PM

السلام عليكم
هالموضوع مهم لكل حامل ..
وحده تكتب عن قصة اختها
وامانة تقرون الموضوع للاخير

تزوجت اختي من مطوع بس الله يهديه متشدد بدرجة ماتتخيلوها ..

ممنوع التلفزيون بالبيت.. ممنوع المجلات والجرائد.. ممنوع تطلعين السوق.. >_<

حتى الاتصال بالبقالة (الدكان) ممنوع >_<

عاشت اختي اول سنواتها مع ريلها بصبر واحترام لرغبته وقوانينه الخاصه

حملت اختي في اول سنة زواج .. وربت بولد .. وبعد 5 شهور من الولادة حملت مرة ثانية وربت بالسلامة ..

بعد ما ربت باول طفلين مرت تقريبا سنتين وشوي..

في هذي الفترة ريلها تغير عليها وصار يضربها على اشياء ماتسوى! ..
على اي اختلاف بسيط يقسي عليها بالكلام او الضرب..!

ينازعها جدام عيالها .. ابدا ماكان يحن على زوجته ..

كل ليلة اختي تنام ودموعها على خدها .. ماتشتكي إلا لرب العالمين

كل هذا يصير ونحن اهلها ماندري !!!! ماكانت تخبرنا باي شي ..

والله كتب انها تحمل بالطفل الثالث .. وعاد شوفو نفسيتها كيف كانت .. منهارة وللاسف كانت تكتم كل شي بداخلها
9 شهور حمل كلها عذاب .. تتمنى انها ماتزوجت .. تتمنى ترجع للبيت ..

ماكان يراعي انها حامل حتى ..

ربت اختي ببنت جميلة ماشالله .. مرت اول 5 شهور من الولادة وبدت اختي تلاحظ ان البنت ماتستجيب لاي مداعبة
بعد سنة .. في هذا السن الطفل يوم تناديه باسمه يلتفت لج ..
بنت اختي مرت 3 سنوات وماتسوي سالفة لاي حد.. اذا تميتي تزقرينها من اليوم لاسبوع ما تلتفت لج ..!!!
كله مع نفسها .. حاولو يعالجون البنت في المستشفيات .. الدكاترة يقولون البنت طبيعية !!!

البنت لين كبرت ما تقول حتى ماما !!.. ماتتكلم.. كله خرابيط .. !
اول اثنينه من عيال اختي كانو طبيعيين ومافيهم شي فكان ابوهم يوديهم بالسيارة لدكان وبنته كانت تصيح عند الباب كإشارة انها تبغي تروح وياهم..
حاولت اختي تقنعه انه يوديها .. واحيانا يطلعها بس تعفس له السيارة فوق تحت ومايعرف يسوق منها
لهالسبب يخلها فالبيت .. وهالشي زاد واثر على نفسية البنت اكثر
اختي ماكانت تدري ليش هذي طلعت غير عن اخوانها
ولا كنا نحن ندري .. استغربنا ليش بنتج مب طبيعية؟ محد من عيالنا جيه!!
قلنا يمكن وراثة من صوب ريلها! بس بعدين عرفنا انه محد من عيالهم نفس حالة بنت اختي!
حملت اختي بالطفل الرابع.. هذي الفترة ريلها خلاص قام يفكر يتزوج علي اختي وخبرها .. وفعلا تم الزواج!
اختي تعبت وانهارت .. وكرهته .. في فترة حملها

ربت اختي بولد .. وطلع نفس اخته واشد بعد!!
تعقدت اختي وريلها واتفقو انهم ما اييبو عيال خلاص

اختي يوم تشوف اول اثنين من عيالها متفوقين بالمدرسة وتشوف بنتها وولدها الاخير مثل الميانين .. تحزن .. وايقنت بداخلها ان نفسيتها اثرت على عيالها وايد اثناء فترة الحمل ..

تمت تقري قرآن على طول على عيالها .. وتدعي الله انهم يرجعون طبيعيين
وبعدها .. وحدة مدرسة في مدرسة ولدها البكر جزاها الله خير نصحت اختي تروح لدكتورة متخصصة في اطفال مرض التوحد بعد ماعرفت عن بنت اختي واخوها الصغير

مسكينة اختي وين توصل لهالدكتورة وهي مسجونة في البيت .. !! فراحت اختي وصورت فيديو لتصرفات بنتها وولدها في البيت.. مدته تقريبا ربع ساعة
وطرشت الفيديو للمدرسة عشان توصله للدكتورة

الدكتورة يوم شافت الفيديو قالت لهم ان عيالكم فيهم شوي من مرض التوحد .. ومايحتاجون علاج
..بروحهم مع مرور السنوات بيرجعون طبيعيين بإذن الله

ماتتخيليون اختي كيف فرحت .. يعني في امل يرجعون عادي.. تتخيل بنتها تقول لها ماما !!

تمت تقرى عليهم الرقية الشرعيةوتشربهم زمزم مقري عليه المعوذات وسورة البقرة على الدوام ..
واليوم ولله الحمد..
البنت عمرها 7 سنوات وصارت طبيعية مرة وتشارك اخوانها الالعاب وبالعكس.. صارت حبوبة واجتماعية .. وماتستحي تحب تسلم وتتعرف على اي حد بالرغم انه عمرها 7 سنوات بس! .. ماقول غير هذا من الدعاء والقران سبحان الله

اما اخر العنقود تحسن وايد لكن للحين لسانه ثقيل وايد وعصبي ويضرب اخوانه وحتى يضرب اختي
ويوم يتكلم مانفهم شو يقول بس اختي تعرف واترجم لنا لوول

اختي تعلمت درس.. وتنصحني وتنصح اي وحدة مقبلة على زواج اواي وحدة متزوجة وتعاني من ريلها
انها تحافظ على نفسيتها وتحافظ على اعصابها اثناء فترة الحمل.اهم شي راحة البال

وحبيت اقول معلومة.ان ريل اختي تغير للاحسن .. عشان نفسية عياله لان سبحان الله الولد الاخير مايتحمل اي عنف جدامه اذا اخوانه تضاربو.. ينفعل ويقوم يضرب اي حد جدامه!! ويكسر اثاث البيت ويصرخ !! مايتحمل!