أهمية دعوة الجاليات .. بقلمي المتواضع ..
راح أقول لكم انجازاتي المتواضعه ..
وراح أكتبها بالعاميه لتكون أقرب الى القلوب أكثر ..
الحمدلله بالامس رحت لمكتب الدعوة والارشاد وتوعية الجاليات بسلطانه ( قريب من بيتنا ) في الرياض طبعا ..
وشريت منهم أشرطه والكتب عندهم مجانيه والاشرطه الواحد بريالين ...
أخذت لخدامتنا ولسواق أبوي و .. الخ الحمدلله أخذت مجموعه فيها البركه ان شاء الله ..
وأنا ما قلت لكم الا ان شاءالله أبيكم تستفيدون وتحرصون على الخدم والسواقين وكل الجاليات انكم تعطونهم كتب وأشرطه والخدامه اللي تكون عندكم في البيت تعطونها مسجل عشان تسمع هم والله يفرحون مرة والحمدلله يقرون الكتب ويسمعون الاشرطه لأنهم هم في بلدهم يقولون الكتب والاشرطه الدينيه اللي عندهم كلها غاليه وما عندهم شي مجاني .. ومرة شفت برنامج في قناة المجد يتكلم عن الجاليات الأندونيسيه بالذات يقول انهم عندهم الكتب والاشرطه غاليه وصعب انهم يحصلون عليها ,, وأيضا النصارى اللي عندهم دائما يدعونهم لدين النصرانيه ويحرصون على أطفال المسلمين ,, حتى أنهم يوزعون الاشرطه والكتب اللي تدعو لدين النصرانيه .. حتى أنهم يدخلونها عليهم من أسفل باب بيوت المسلمين ,, لا حول ولا قوة الا بالله ... الله يكفينا شرهم ...
لذلك علينا أن نحرص على تزويدهم بالكتب والاشرطه و أيضا المصاحف المترجمه الى لغتهم لا ننسى أهميتها ,,
لان الدعوة الى الدين واجب الجميع واحتسبوا بذلك الاجر من الله قال صلى الله عليه وسلم : ( من دعا الى هدى كان له من الأجر مثل أجور من تبعه لا ينقص ذلك من أجورهم شيئا ومن دعا الى ضلاله كان عليه من الاثم مثل آثام من تبعه لا ينقص ذلك من آثامهم شيئا ) ..
أتمنى أن يكون موضوعي نافعا
واللي عندها اضافه أوفائده لا تبخل علينا .