غلطة الشاطر
جيت سابح ياحبيبي في بحر سورك وقدك
كل خطوة تقترب بي منك ماعني وعنها
مانقلت الا غلاك ولاذبحني غير ودك
أتخيل صورتك قدام عيني واحتضنها
كن نور الشمس لامنه صفق في نور خدك
تستمد النور منه ويستمد النور منها
والشعر يانعنبوه ان كان ماهزك وشدك
لين تطرب له حنايا القلب وتهيجن لحنها
والله ان أطوّعه لرضاك وافخر بك واعدك
القصايد مهرة الافكار وبكفي رسنها
كل ما قفيت عني قلت جعل الله يردك
للعروق وللضلوع العوج يا أغلى من سكنها
وكل ماوجهت يمي ضعت في جزرك ومدك
السلامه منك مكسب بس قلبي ماضمنها
والتهاون غلطتي يوم افرك يديني بيدك
غلطة الشاطر بعشر وغلطتي بدفع ثمنها
منقــــــــــــــــــــــــــــــــــــــول
مواقع النشر