فطيرة التفاح على طريقة الشيف رمزي من مطبخي بالصور
السلام عليكم احلى منتدى
اليوم حبيت اشارككم في طريقتي اللي بعملها من سنين لفطيرة التفاح
انا طلعتها من كتاب الشيف رمزي وصارت هية المعتمدة عندي من وقتها
هشششة و بتنجح معي كل مرة وكل مين داقها اخد طريقتها
وهي صورتها من مطبخي
المقادير بسيطة ومتوفرة بكل بيت
مقادير العجينة
2 كوب طحين
160 غم زبدة باردة
6 ملاعق كبار ماء بارد
مقادير الحشو
4 تفاحات كبار
ربع كوب طحين
تلت ارباع كوب سكر بودرة ( انا بقللها شوي لما يكون التفاح حلو )
ملعقة صغيرة قرفة
رشة جوز الطيب مبشور
بشر ليمون
2 ملعقة كبيرة عصير ليمون
الطريقة
بنحط الصحين وعليه الزبدة وبنفركهم منيح كتير بالأصابع لحتى يمتزجوا منيح
بعدين بنضيف عليهم الماء البارد وبرضه بنفركهم بالأصابع وبنجمع العجين بسرعة يعني ما نعجنلأنه بتصير العجينة قاسية مو هشة متل ما بدنا اياها تكون وبنحطها بكيس نايلون بالتلاجة على بين ما نحضر الحشوة
للحشوة طبعا بنكون محضرين التفاح ومقشرينه ومقطعينه شرايح رقيقة بأي شكل وبنضيف عليه بقية المواد وبنخلطهم منيح
بنطلع العجينة من التلاجة وبنفرد نصها بالشوبك انا بستعمل كيس نايلون بفرد العجينة بوسطه لحتى ما تلزق معي او ممكن نستعمل ورق الشمع اذا توفر
بننقلها لصينية الفطيرة وبنفردها منيح على كل الجوانب وبنخرمها بشوكة لحتى نمنعها تنتفخ في الخبيز
وبنسكب الحشوة عليها وبنوزعها منيح
هلأ بنفرد النص التاني من العجينة بنفس الطريقة وبنغطي التارت كتير منيح وبنسكرها من كل الجهات لحتى ما تبين الحشوة وبندهن وجهها بحليب سائل لحتى يتحمر وياخد لون حلو
وبندخلها الفرن المتوسط الحرارة وبنطلعها لما يحمر الوجه وياخد لون بني حلو
هي شكلها من الداخل
وهي قطعة لأول رد
بتمنى تجربوها وتستمتعوا فيها مع فنجان قهوة او كاسة شاي
اشي مرتب تمام وبأكدلكم انه مين ما داقها حبها واخد وصفتها
وهي قطعتي مع فنجان القهوة
جربوها ورح تحبوها باذن الله
والى اللقاء في وصفة جديدة
رد مع اقتباس
مواقع النشر