ناقشيني ....... اذا ما عندك مانع

[وهج شبوة]

بسم الله الرحمن الرحيم السلام عليكم ورحمة الله وبركاته

بنات ابغاكم تناقشوني بذات المتزوجات

هل حياة الزوجية افضل من حياة العزوبيه للبنت

انا ما احب الزواج ابد احس انه سجن المراة

بتقولون كيف ؟؟؟؟
انا اقول لكم كيف

اول حاجة اذا انا بنت كيفي اتغسل ما اتغسل كيفي امشط شعري البس لبس حلو كيفي

انام اصحا كمان كيفي

يعني حرة

اما اذا كنت متزوجه لازم اقوم بدري عشان اسوي الفطور لرجال

لازم اكوي ملابسه وقت كذا كذا

لازم اكون متغسله لابسه متشيكه والبيت نظيف وقت كذا كذا يعني لو تاخرتي انخبص جدولي

لازم اهتم بالعيال والزوج .......وما الى ذلك من الامور

فعشان كذا انا قررت اني اشتري حريتي بعدم زواجي وهذا راي في الحياة الزوجية


انه الحرمة تتعب لما تتزوج والرجال يتمتع

انا نفسي بس لو كان عندي صديق فقط ما تربطني به علاقة رسمية
بس هذا حرام وما يجوز

وانا عارفة ان هذي فكرتي قد تكون فيها شي من الخطاء لكن اغلبها صح

ابغى احد يناقشني وبذات المتزوجات

على فكرة انا عمري 18 سنه


::::.. سلام ...::::

[حبيبتي مكة]

انا بناقشك ما عندي مانع
انا اقولك بالعكس الحياة الزوجية راحة وسعادة واستقرار خاصة يوم تكوني مرتبطة بزوج تحبيه ويحبك
لأنك مستحيل تفكري في احد غيره غير كذه هو بيكون بمثابة الاب والام والاخ والصديق......
صحيح انا معاك في ان البنت تنام وتصحى وقت ما تبغى وعلى قولك تمشط شعرها في اي وقت هههههه
لكن انتي لا يكون تفكيرك في هذي الامور البسيطة ؟؟خلي تفكيرك يكون ابعد من كذه
فكري في النتائج الايجابية في الحياة الزوجية وقارنيها بأمورك البسيطة اللي تفكري فيها ؟؟ راح تكون الامور الايجابية بالتاكيد اكثر
وراح امثل لك مثال بسيط
تخيلي لو تقدم لك شخص او اكثر وكلما طلبوك رفضتي علشان تفكيرك هذا وعلشان تتمتعي بالحرية........الخ
طيب وبعد هذا كله يصير عمرك وصل لفوق الثلاثين وما احد جاك وراح تجلسين متحسرة متندمة...
خاصة يوم تكوني بصفتك هذي الحلوة انك عارفة ان اتخاذك لصديق حراااااااااام وحتى لو فكرت لا سمح الله...
في النهاية انتي الخسرانة
مرة اخرىا قولك ان الزواج بالعكس يعودك ع النظام والاهتمام بنفسك اكثر,,وليس تقيييييد للحرية
والله يسعدك يارب...اتمنى تكوني اقتنعتي بكلامي...

[طالبة الحياة]

ريحتيني لما قلتي عمرك ...افكر اتعقدتي وخلاص مافي حل

طبيعي عند بعض البنات في هذا العمر يمرو بمرحلة تردد عن الزواج حتى جاتني دي الحاله
وكلامك الي قلتيه كله صح .... بس تفضل نقطة ضعف الانسان في وجود شريك بحياته
وهذا الي انتي وضحتيه لما قلتي نفسك بصديق ..
عشان كدا صعب انك تفضلي من غير زواج وتضربي عنه ...زي مو للزواج مسؤوليات بايخه ..بالمقابل في امور حلوه والموضوع مفتوح وعريض ما نقدري نحصره ولكن مثال بسيط ...لما تجي خارجه من البيت تاخدي اذن مين ؟ امك وابوكي وبعض الناس اخوانها ...ودوري اخ تاني يوصلك ويوووووووووه هذا اذا رضيووو انك تخرجي

زوجك وبسسسس الي تاخدي الاذن منه وافق او لا وانتهى الموضوع

هذا مثال تافه وبسيط عن روعة الحياة الزوجية بعيدا عن التفكير بالمسؤولية ...
وفي النهاية جملتي الي دايما اقولها للبنات والحريم ...الحرمه هي الي تخلي حياتها جنه او جحيم
انتي الي تقدري تنظمي جدول رائع فيه نشاط للبيت وللاسرة وتسعدي نفسك قبل زوجك ...او العكس لما تكوني ما تبغي دي المسؤولية تقومي تطفشي منها وتطفشي الاسرة بالروتين بالتالي تسير حياة ممله مافيها الا اللي انتي ذكرتيه
ومجرد الشعور بروعة الانجاز بعد اي شي صغير في الحياة الزوجية ...يخليكي تحبيها

اتمنى اكون وصلت الفكرة وناقشت بشي مو بعيد ومفهوم

تقبلي ردي

[**عقد الجُمان**]

بسم الله الرحمن الرحيم السلام عليكم ورحمة الله وبركاته

وعليكم السلام والرحمة ..


بنات ابغاكم تناقشوني بذات المتزوجات

أبشري أنا متزوجة وعندي طفلين ربي يحفظهم ..



هل حياة الزوجية افضل من حياة العزوبيه للبنت

أفضل بكثيييير !!!


انا ما احب الزواج ابد احس انه سجن المراة

لا أبداً بالعكس الزواج جنة الدنيا بس أهم شي الوحدة تحسن الاختيار يعني مو كل الرجال كفو


بتقولون كيف ؟؟؟؟
انا اقول لكم كيف

اول حاجة اذا انا بنت كيفي اتغسل ما اتغسل كيفي امشط شعري البس لبس حلو كيفي

انام اصحا كمان كيفي

يعني حرة

طبيعي لأنك في بيت أهلك مانتي متحملة مسؤولية وفي الغالب مخدومة


اما اذا كنت متزوجه لازم اقوم بدري عشان اسوي الفطور لرجال

لازم اكوي ملابسه وقت كذا كذا

لازم اكون متغسله لابسه متشيكه والبيت نظيف وقت كذا كذا يعني لو تاخرتي انخبص جدولي

لازم اهتم بالعيال والزوج .......وما الى ذلك من الامور


يحليلك ياقلبي طبعاً لازم بس صدقيني الزوجة إذا حبت زوجها تخدمه بعيونها وخدمته بالنسبة لها متعة مابعدها متعة
والعيال ما يحتاج أوضحلك شوفي أمك الله يحفظها كيف ودها تشيلك على رموشها وعمرها ما تتضايق من هالشي ... صح؟؟


فعشان كذا انا قررت اني اشتري حريتي بعدم زواجي وهذا راي في الحياة الزوجية

أحترم رأيك حبيبتي بس أنا متأكدة إنك ما فتحتي هالموضوع إلا لأنك مو مقتنعة بهذا القرار ...


انه الحرمة تتعب لما تتزوج والرجال يتمتع
كل واحد يتعب عشان الثاني يرتاح


انا نفسي بس لو كان عندي صديق فقط ما تربطني به علاقة رسمية
بس هذا حرام وما يجوز

ما أقول غير الله يرزقك بالزوج الصالح اللي يسعدك وتعيشي معاه أحلى عيشه ياعمري

وانا عارفة ان هذي فكرتي قد تكون فيها شي من الخطاء لكن اغلبها صح

لو كانت صح ماكان تزوج أحد وماكنتي انولدتي ولاطلعتي عالدنيا


ابغى احد يناقشني وبذات المتزوجات

وأنا أبغى أعرف رأيك بعد اللي قريتيه


على فكرة انا عمري 18 سنه

يعني عروسة ماشاء الله

::::.. سلام ...::::