السلام عليكم
شخبااااركم ؟؟
وحشتوني .
حبيت اخبركم وابشركم اني ولله الحمد ولدت بالسلامه
وجبت احلى قمر حبت ( علي ) الله يخليها ويجلعه من المؤمنين الصالحين الحافظين لكتاب الله
ولدت تاريخ 25 / 10 يعني تأخرت عن الموعد الي عاطيني اياه لان كانوا عاطيني تاريخ 21 /10
رحت لهم تاريخ 24 زيارتي المعتادة للفحص وكان عندي الم طلق بتداء بس ما خبرتهم وقالت لي موعدي طاف لازم اجي اترقد من العصر عشان تاريخ 25 بتحط علي طلق صناعي وقلت لها اوكي
كنت خايفه من فحص عنق الرحم من جذي ما خبرتها احس بالم
بس قعد الالم يشتد علي لما رجعت البيت ورحت انظف شقتي وارتبها واجهز اغراضي استعداد اني برجع المستشفى عشان انام هناك وما كان في بالي ان هذي الليله بتكون مرهقه ........
توقعت ان الطلق توه مبدي بياخذ وياي لبكرة وبيحطون طلق الصناعي عشان يسرعون بس كل شي صار غير
قلت بتاخر ما بروح العصر بروح المغرب او الليل
وقعدت امشي على جهاز المشي وسوت لي عمتي ( ام زوجي ) ماء ورد ودارسين وزعفران وشربتهم وسوت لي بخور بن وتبخرت فيه
واشتد الالم اكثر واني صابرة ... الى المغرب حسيت روحي لازم اروح اتطمن على الاقل
والالم ايجي كل خمس داقيق ويروح ورد قبل ما اروح المستشفى عطتني ماء ورد ودارسين وزعفران وشربتهم وسوت لي بخور عود
وبعدها رحت للمستشفى عندي كان ماي زمزم مقراي عليه قعدت اشرب فيه وتعشيت في طريقي قلت لزوجي عشان يصير عندي قوة لطلق
وصلت المستشفى والالم يزيد فحصت علي والحمد لله ما حسيت بوجع الفحص قالت لي 3 سم
وخلتني في الطوارئ كانت تقريبا الساعه 9 وكانت كل مرة تفحص تقول لي زدت 1 سم
فرحت قلت يعني ما بحتاج لطلق الصناعي بكرة وان شاء الله اكون ولدت لبكرة
لكن الساعه والدقايق تمر علي سنين ... والوجع ذبحني وكنت اصبر ولا صرخت كنت كله اقول ياربييييي رحمتك على عبدك الضعيف بصوت انين من الالم
يوم صرت 5 سم رحت على غرفة الولادة يمكن كانت 12
كانت القابلة طيبة كثيييييييييييييير
بعدها جت الدكتورة وجابت التعب النفسي معاهاا
خبرتني الجنين كبير وما بقدر اولد طبيعي وكانت فاحصتني وقالت لي وصلت 7 سم
فيه خطورة لو ولدت قلت لها كل الالم تحملت عشان الحين تقولين لي اولد بعملية ليش ما خبروتني قبل
تقول لي ليش محد خبرك الجنين كبير
قلت لها خبرتني الدكتورة وقالت لي ما خبروكي لازم عملية قلت لها لا
تقول احتمال يطلع الراس ويبقى الكتف ويصير له شي ..
تعبت نفسيتي قلت لها خبري زوجي ورد بعدها قلت لها انه ما بوافق على عملية خلاص
تقول لي الجنين 4 كيلو وشوي
قلت لها على مسؤليتي
طبعا انه فوضت امري لله وخليت كل شي على الله
وجه زوجي وخبرته ونفس الشي قال لها في ولادتها الاولى تبون تسونها عملية والحمد لله تيسرت الامور وولدت طبيعي الحين بعد ان شاء الله كل شي بتيسر وبتولد طبيعي
مشكلتي الثانية اثناء الولادة كانت ان رحمي ما قعد يتوسع تم فترة كله 7 سم وجتني الدفعات وكل يقول لي لا تدفعين اقول لهم والله مو في ايدي كانوا خايفين يتورم عنق الرحم وبعدها ما يتوسع بس ما كنت اقدر تميت تقريبها الى 3 الا واني على 7 سم تقريبا يعني اكثر من ساعه ما في توسع بعدها فحصتني قالت لي 9 سم قلت لها خلاص ما اقدر اتحمل اكثر شقيني وخليها تصير 10 قالت لي ما يصير اول تصيرين 10 والدفع بعده وياي يعدين حسيت ان ولدي طلع واقول لهم طلع طلع تقولي لااا تدفعين بعده الا شافتني تقولي اكو طلع خلاص وكلها ثواني الا ولدي صار على صدري ..
كانت احلى لحظة ..... نسيت الالم نسيت كل شي
طولت عليكم وهذي تفاصيل واجد ما حبيت اعور راسكم فيها
بس حبيت تشاركوني فرحتي مثل ما شاركتوني لحظات فرحتي بحملي ودراسيتي وتخرجي والحين ولادتي
يا ربي تخلي اولادنا وترزق المحرومات يا رب يا كريم
مواقع النشر