ام سعد: يابو سعد اختي مضاوي حاكتني تبي عبير لولدها مشعل
ابو سعد:وين مشعل!! مامعه الا الثانوية ومتوظف بها جندي
ام سعد: وش يسوي بحظه دار دار بملفه مالقى الا الجندية
ابو سعد: اعرف وضعه والاف زيه بس عبير جامعية وناوية تسجل للماجستير
ام سعد:تسجل ماقلنا شي بس تعرس وتكمل براحتها
ابو سعد: اشوفك مايلتن لولد اختك
ام سعد: مانلام انت شايف كل ام تبي الولد اللي يتزوج بنتها يكون عاقل ولا هنا عليه ملاحظات مثل مشعل
ابو سعد: بس مؤهله اقل من عبير ووظيفته ضعيفه يعني ظنك دخله يغطي مصاريف دلوعتنا
ام سعد:انت اللي مخربها كل طلباتها مجابه أي زوج بيتعب يرضيها
ابو سعد: تستاهل عبورة لاتقولين فيها شي ربي يحرسها
ام سعد: وش قلت في كلام اختي و ش ارد عليها
ابو سعد:شاورتي بنتك
ام سعد:قلت اشاورك اول اخبرها بترفضه عشانه جندي
ابو سعد:دامك خابره تبيني اغصبها
ام سعد: لامب غصب بس هذا عمرها 23 ولا تزوجت انا متزوجة ماكملت الثانوي
ابو سعد: انتي غير لو مازوجوني كان اخطفك
ام سعد: خلك من المساحل هالحين مشعل يصلح ولا لا تراي احترت
ابو سعد:مشعل معجبني باخلاقه ومسؤليته شاب يملأ العين بس مؤهله ودخله هو عذروبه
ام سعد:الايام تعدل دخله وبتقنعه عبير يكمل جامعه وبيتحسن وضعه
ابو سعد: اها شكلك متكلمتن مع عبير ورافضه
ام سعد: ايه مكلمتها وتقول مابه عذروب الا مؤهله ورتبته وزميلاتها تقدم لهن جامعيين ومراتبهم زينه
ابو سعد:كثير شباب ماكملوا تعليمهم الجامعي ولا حصلوا الا رتبة جندي بالثانوي مايعرسون اجل
ام سعد:يعرسون وبيلقون نصيبهم
ابو سعد:خلي باجلس مع عبورة وربي يكتب اللي فيه الصالح
ام سعد: بس بنتك ومدلعها لاتقوم تصير بصفها ونخسر مشعل
ابو سعد:اللي ربي كاتبه لها بتحصله
ام سعد:مشعل مب عشان ولد اختي بس عاقل ورجال بسم الله عليه
ابو سعد:قامت تمدح ولد اختها
ام سعد:ماقلت الا الصدق
ابو سعد:وعبير كل يتمناها يكفي انها بنتي
ام سعد: تكفى ترى اكبر عذروب فيها انك ابوها
ابو سعد: الله اكبر طلع شيني هالحين
......................
انتهى (القصة فقط منقوله )
هذا نموذج من أحد الأحداث التي تتكرر في مجتمعنا فمن خلال حديث أم سعد وأبو سعد
هل تعتقدون أن انخفاض مستوى الزوج التعليمي والمعبشي يؤثر سلبا على الحياة الزوجية ؟؟
وهل ممكن أن تكون الزوجة قادرة على دفع الزوج في اتمام تعليمه والرقي في مستواه المعيشي ؟؟
أم أن الرجولة والأخلاق الحسنة كافية لإنجاح الحياة الزوجية
رغم انخفاض المستوى التعليمي والمعيشي لدى الزوج ؟
شاركونا النقاش الهادف البناء
ودمتم بود ..
مواقع النشر