السلام عليكم و رحمة الله و بركاته
ابغى أحكيلكم عن معاناتي مع سلفتي...انا متزوجه ليه 5 سنين و احنا ساكنين في نفس العماره أنا و أهل زوجي و سلفاتي...و من يوم ما تزوجت كنت أشعر بأن سلفتي هادي ما تحبني..بس في نفسي ما شلت في خاطري...لأن الحب مش بالغصب.كان تعاملي معاها محترم جداً مع انها كانت تتجاهلني كثير وأشعر انها تغار مني كثير..يعني لو شافتني لابسه لبس حلو أو أحد مدح أكله سويتها وجهها يتغير
بعد فتره 3 سنين تقريبا صارت تسويلي حركات بايخه...يعني تتعمد تآذيني
مثال..لو ركبت في السياره معايا و كان في زوجي تضحك بصوت مايع وعالى و تستخف بدمها كثير يعني تتعمد تثير غيرتي
أو تمشي في العماره منغير لا عبايه و لا طرحه و تقول صادفت زوجك و تتسطح من الضحك...تبغى تنرفزني..مع انها لما تخرج تظهر انها ملتزمه عبايه على الراس و جونتيات..
أو تقوللي في اذني شفت زوجك و هو يسبح ههههههههه...
أو إذا عزمتها هي و أهل زوجي في بيتي تقوللي ..يعني ايش المناسبه؟؟ أو حتى إذا وزعت هدايا أو حلاوه للأطفال تقوللي أبغى أتأكد انتي وزعتي الشي الفلاني ..طيب ايش المناسبه؟؟؟ تنرفززززززز
طبعا هادي الحركات تسويها عندي بس مو قدام ام زوجي أو أحد تاني
للعلم أم زوجي خطبتها لزوجي زمان بس زوجي ما وافق لأنه كان يدرس فخطبتها لأخوه الصغير..وهي سلفتي تدري انهم كانو يبغوها لزوجي بس ما حصل نصيب
زوجي مرح و دمه خفيف بس زوجها انطوائي و جدي زياده عن اللزوم...استغفر الله بس أحس انه لو جات سيرة زوجي أحسها تفرح فمها بينشق من السعاده و أحس انه تحسدني على زوجي و كأنها تتمناه لها استغفر الله
أنا و الله ما تعودت أتعامل مع ناس بالشكل ده
ثم أحسنت النيه فيها و قلت لا يا شيخه مو قصدها بس أنا فاهمتها غلط
و صرت أحاول أتكلم معاها بود و الله تجاوبني بكلمه و رد غطاها وتديني ظهرها تطنشني طبعا هادا بس عندي..لكن لو في ام زوجي تقعد سلفتي هادي ترحب فيه و تاخد ولدي مني تلعبه و تغرفلي أكل يعني انها تحبني و أنا استغرب من تصرفاتها منافقه جدا
صارتلي مشكله معاها قبل عدة أشهر و تصالحنا لكني و الله تأكدت انها أنانيه..و ما تحب الخير لغيرها
كرهتها و أنا و الله ما أحب أكره أحد و كل ما أشوفها اتضايق
تعبت مني عارفه كيف أتعامل معاها...احس اني عملت عليها اكس هل أنا حقوده وللا يحقللي أكرهها...و اللي عندها أسلوب يفيدني في التعامل معاها يا ريت تفيدني..لأن نحنا نتقابل أكثر من مره في الأسبوع عند أم زوجي...آسفه طولت عليكم بس ادعولي الله يفرج همي و يصرف اذاها عني
مواقع النشر