قصة حاكم جلّاد
النتائج 1 إلى 2 من 2

الموضوع: قصة حاكم جلّاد

  1. #1
    مشرفة
    تاريخ التسجيل
    Nov 2015
    المشاركات
    30,305
    معدل تقييم المستوى
    33

    قصة حاكم جلّاد

    ايه هون دخيل عينك حط الاغراض ايه
    لا لا اوعى هي الكرتونة فيها اشيا بتنكسر ايه ايه يسلمو ايديك

    ميرفت ( ايه وبعدين يعني بدك تبقي قالبة بوزك هيك لمتى )
    تاليا( ممكن تسكتي وتريحيني من صوتك اصلا كل شي وصلناله بسبب زوجك انحرمت من جامعتي بسببه وبسببك الله ينتقم منك يا رب )
    ميرفت ( ووليه انتي راسك صار بده تكسير ولسانك بده ستين قص يا اما بتضبي لسانك بحلقك يا اما انا بجي بربيكي )
    سوزان ( لك تركيها بحالها للمخلوقة لسا لاحقتيها عكل كلمة خلص يا اختي حلي عنها مبوزة او لا شو فارقة معك )

    ميرفت ( مرت عمو تعي تعي شوفي بناتك المربين شو عم يحكو ويدعو على اخوهن لا وحاطين الحق علي انا بلي صار مع مروان بالله تقوليلن يحترمو حالن اصلا انا بلا شي عم خانق دبان وشي وقعدتي انا واياهن بنفس البيت غصب عني قبل ما يكون غصب عنهن ايوا )

    في غرفة تاليا
    قربت سوزان لعند تاليا وضمتها لصدرها ( خلص اختي حاج تبكي صدقيني بكرة لتروق الامور شوي انا رح اقنعها لامك ترجعي عالجامعة )
    تاليا ( محروق قلبي يا اختي انتي بتعرفي قديه انا تعبت لفتت جامعة ودرست وهي اخر سنة الي بالجامعة حرام عليهن )
    سوزان( يا اختي شو طالع بايدنا يعني اخوكي قتل واحد انتي عارفة شو يعني موت واهله للشب الي انقتل قايمين القيامة امي خافت علينا لانه احنا بنات وما النا سند خافت حدا يتعرضلنا خلص اختي الله يرضى عليكي تهدي بكرة بتاخدي عالجو هون وبتنقلي كل وراقك عشي جامعة هون ايه وهي ميرفت لا بقى تحكي معا والله احنا مو ناقصينا )
    هزت تاليا براسا انه ايه

    تاليا صبية بعمر ال21 من عمرا يتيمة الاب من لما كانت عمرا خمس سنين بتمتلك شخصية قوية ومرحة وهادية وبنفس الوقت بتمتلك جمال عربي بشرة قمحية وعيون سود وساع وشعر اسود طويل حلوة كتير وحبتا قليلة عندا اخ واحد اسمه مروان شغيل تعيب ولقمته مغمسة بدم متل ما بقولو تزوج بنت تعرف عليها وحبا اسما ميرفت
    ميرفت البنت الكاسرة القوية كانت تتطلب من مروان اشيا فوق طاقته يحاول ويجبلها بس ما كان يرضيها شي حتى بيوم من الايام اقنعته انه يشتغل بالمخدارت وانه هاي هي الطريق الوحيدة لحتى الواحد يجيب مصاري اقتنع بكلامها وبلشت المصاري تهل عليه لكن مال الحرام ما بدوم وبياكل صاحبه بدون ما يحس
    بلش يفلس شوي شوي رجعت تكبر المشاكل بينه وبين ميرفت وصار يتخانق هو وكل شخص اله عليه فلوس او بيوم اخد منه مخدارت وما حاسبه
    لحتى بيوم تخانق هو ومعاذ كان معاذ ماخد كمية محرزة من مروان ومو دافع وكلمة من هاد وكلمة من هاد تخانقو وما لقي حاله مروان الا ماسك مقص كان بحده ضرب فيه معاذ ضربة عالمقتل
    لهيك امه قررت انه تاخد بناتها وكنتها وتطلع من المكان الي كانو عايشين فيه اما سوزان هي الاخت الاكبر لتاليا عندا تشوه برجلها وما تزوجت
    مرق شهرين عحالتهم ومروان رح ينحكم عن قريب

    في الليل وفي غرفة تاليا وسوزان
    تاليا( حكيتي مع امي بخصوص دراستي الله يوفقك يا سوزان )
    سوزان ( ممممممممم)
    لفت سوزان وشا لناحية التانية مسكتا تاليا ولفتا لعندا
    تاليا( ما وافقت ما خلص اختي لا تزعلي ولا على بالك اصلا عادي )
    سوزان بتضحك ( ليك لا هاتي البشارة امي وافقت تخليكي تداومي ومن بكرة بدي روح انا وانتي عالجامعة لتسجلي بس عندا شرط انه دوامك كله يكون بالنهار ويخلص قبل التلاتة العصر شو اتفقنا )
    تاليا( الله يخليلي اياكي يا احلى اخت بالكون مووواه لك انتي اختي وروحي وعمري )
    سوزان ( لك حاج حاج رح تموتني من كتر التبويس )
    فجأة انفتح الباب عليهم كانت ميرفت
    ميرفت ( ايه شو المناسبة لكل هاد الفرح سمعونا الاخبار الطيبة )
    تاليا( ااااف يا ربي اجت حشورة )
    ميرفت ( شو قلتي تاليا خانوم ما سمعت )
    تاليا( اولا في شي اسمه ادب وفي شي اسمه تدقي عالباب قبل ما تفوتي فهمتي )
    ميرفت ( لا والله ماني فهمانة والبيت هاد الي فيه متل ما حضرتك الك فيه بفوت عالغرفة الي بدي اياها وباي وقت بدي اياه )
    سوزان ( امنت بالله على هاليلة لك اختي اعتقينا لوجه الله ليكنا ما بنقرب ناحك حلي عنا )
    ميرفت ( انتي اسكتي ام عرجة ما عم احكي معك عم احكي مع اختك الصغيرة الي شايفة حالا ومو مصدقة )
    تاليا( ميرفت احترمي حالك وانتي بتحكي مع اختي احسن ما عرفك قيمتك وابتلى فيكي )
    ميرفت ( يا امي خوفتيني )
    اجت امهن عالصوت
    ام مروان( شو في لك ليش صواتكن طالعة حتلمو الجيران علينا )
    ميرفت ( اسالي بناتك والله الي مو عاملات حساب لحدا وجيت على صوتهن وهن عم يضحكو ويتصهونو وناسينين اخوهن الي بالحبس العما شو قليلات زوق )
    تاليا ( ما حدا قليل زوق غيرك )
    اطلعت ام مروان ببنتها تاليا وزورتها لحتى سكتت
    ام مروان (وهلا شو )
    سوزان ( امي ما في شي كمت عم خبر تاليا انك وافقتي ترجع عالجامعة هي كل القصة )
    ميرفت ( شو رح ترجع تاليا عالجامعة هيك بهالسهوله هي كلكن رجعتو لحياتكن الطبيعية وانا ومروان الي راحت علينا بس بسيطة يا دار القادري انا بفرجيكن )
    راحت ودخلت عغرفتا وسكرت الباب باحمى ما عندا
    تاليا( ان شاء الله درب الي يسد ما يرد )
    ام مروان ( لك امي برضاي عليكن فكونا منها خلص لا تحكو معا وهي ان حكتكن طنشوا كرمال اخوكن المرمي بالحبوس )
    تاليا( مو هي السبب لحتى ارتمى بالحبوس طول عمره ماشي الحيط الحيط وهلا بسببا صار بالحبس )
    سوزان ( خلص تاليا بكفي )
    ام مروان ( تاليا برضاي عليكي قبل الساعة تلاتة بتكوني بالبيت مو ناقصني تعتير وهم جديد لك امي)
    قربت تاليا لعند اما وباست ايدا وراسا ( ربي يخليلي اياكي يا ست الكل)

    في الجامعة
    تاليا( تعبتي اختي صح رجلك بتوجعك)
    سوزان( لا اختي عادي المهم انتي تكوني مبسوطة )
    تاليا( والله يا اختي الوراق معركسين بدن شغل كتير لانه الدوام صرله حصة مبلش وانا جيت متأخرة يا ربي ليه هيك حظي )
    سوزان ( اختي توكلي عالله صدقيني الا ما تنحل تعي خلينا نقعد بالكفتيريا نشرب شي والله نشف ريقي )

    مجهول ( مرحبا انا من شوي شفتكن كنتو بالتسجيل عم تسالو لتسجل الصبية وكأنه امورك مو زابطة بالتسجيل انا اذا بتحبي فيني ساعدك )
    تاليا(جد بكون ممنونة الك )
    سوزان ( كيف )
    مجهول ( انا اسمي ياسين طالب هون بالجامعة سنة رابعة يعني خريج هلا مو انا الي رح اساعدك لكن في دكتور هون بالجامعة اسمه الدكتور مراد هو كتير منيح وطيب وبحب يساعد الجميع حتى فيكي تسالي كل الطلاب هون بقولك انه الدكتور مراد شخص بينشرب مع المي العكرة قد ماهو طيب تمام شو قلتي)
    تاليا( موافقة بس كيف فيني شوفه واحكيله مشكلتي )
    ياسين(ممممممم خليني فكر هلا هو على ما ما اظن بكون بالقاعة الرياضية فينا نروحلو هنيك )
    تاليا( بس ما بدي تقل عليه ،،،، شو اختي بنروح )
    سوزان ( ما في مشكلة بنروح نشوفه )
    مشيت تاليا وسوزان وياسين للقاعة الرياضية وسأل ياسين رئيس القاعة عن الدكتور مراد وخبرهن انه جوا عم يحضر مباراة كرة قدم لطلاب كلية الهندسة ضد طلاب كلية الاقتصاد دخل ياسين لجوا وناداه وطلع الدكتور مراد شاف تاليا وسوزان واقفين عجنب
    مراد كان شب تاليا كانت مفكرة انه رح يكون رجل كبير بالعمر واستغربت لما شافت قداما شب وسيم
    مراد ( تفضلو كيف بقدر اساعدكن )
    تاليا( دكتور بعتذر اني قطعت عليك وقتك بس انه انا كنت بالتسجيل وما قبلو يسجلولي والاخ ياسين شافنا هنيك وقلنا انه انت فيك تساعدنا انا جيت بعد ما بدا الفصل الدراسي يعني جيت متاخرة وانا هاد الفصل خريجة وهيك رح اتأخر فصل )
    مراد ( طيب انتي ليش تأخرتي لحتى جيتي تسجلي يعني خريجة لازم تكوني متحمسة للتسجيل )
    اطلعت تاليا بسوزان (
    تاليا( ظروف دكتور منعتني سجل بوقتا )
    مراد( طيب ولا يهمك انا رح اساعدك تعي معي
    واختك اذا تعبتي انا فيني احجزلك مكان بالمباراة تحضريها)
    سوزان ( لا معلش بروح معها )
    راحت سوزان وتاليا ومراد عالتسجيل وتشكرو لياسين وهو راح عمحاضرته
    مراد اله كلمة بالتسجيل ووبلش يدخل من مكتب ويطلع من مكتب ويشوف واسطة هون وواسطة هون لحتى قدر يسجل لتاليا هالفصل وما يروح عليها
    تاليا( بتشكرك كتير دكتور عن جد شكرا من قلبي لولاك ما بعرف شو كان صار فينا
    مراد ( لا ولو ما تقولي هيك هاد واجبي ساعد كل طالب وطالبة محتاجين مساعدة وليكي هاد كرتي بامكانك ترني علي باي وقت بتحبيه اذا احتجتي لاي مساعدة)
    تاليا( مرة تانية دكتور شكرا )

    روحت تاليا وسوزان عالبيت والفرحة مو واسعتيهم وكالعادة اول ما وصلو تناقرو مع ميرفت الي واقفتلهم عالدقرةوبلشت تاليا بدوامها بالجامعة وام مروان وسوزان بلشو شغل عمكينة الخياطة وبلشو يتعرفو عالجيران الموجودين وامورهن تزبط والشغل يتحسن يوم عن يوم
    وميرفت كل ما بصحلها زيارة لمروان زوجها تقضيها حكي عن تاليا وعن طلعاتا ونزلاتا وانا دايرة على حل شعرا بالجامعة ومروان ينجن وينقهر ويتحلف لتاليا وبعت اكتر من مرة لامه انه تقعد تاليا من الجامعة بس امه ما ردت عليه وما قبلت توقف بوش مستقبل بنتا

    في الجامعة
    تاليا ( يا ربي شو بدي اعمل هلا المواصلات كتير ازمة والساعة رح تصير تلاتة وانا لسا ما روحت وهلا امي بيغلى قلبا علي وعم دقلا رقما غير متاح
    سمعت صوت حدا عم بزمرلا التفت لقت الدكتور مراد بسيارته ترددت كتير قبل ما تركب بس بعدين حست انه رح تحرجه اذا بقي يزمرلها قدام الطلاب وما تركب
    تاليا( ما كان في داعي والله انا برجع لحالي)
    مراد( لا ولو لهلا بتذكر اول مرة شفتك فيها لما قلتيلي انه امك بتنجن اذا رجعتي عالبيت لبعد الساعة تلاتة )
    تاليا( استغربت انه بعدك متذكرني ما توقعت والله )
    مراد( في ناس بيدخلو قلبك بطريقة جنونية بتخليك دايما متذكر تفاصيل حكين وضحكتن حتى لو ما شفتن )
    تاليا( يعني انا منن )
    مراد( بتعرفي تاليا انا دايما بشوف بنات وبحكي مع بنات بس بحياتي ما لفتت انتباهي اي بنت لانه انا داخل الجامعة لحتى اقوم بوظيفتي واقدم رسالة التعليم بس انتي في بعيونك حزن فرح خوف براءة خلتني ظل متذكرك من اول مرة شفتك فيها لهلا )
    تاليا( ها نزلني هون اذا سمحت )
    مراد(ليش هون ساكنة )
    تاليا( لا ساكنة بالشارع الي قدام بس بلا ما حدا يشوفك معي وشكرا كتير عكل شي )
    مراد( رح ظل شوفك )
    تاليا( ان شاء الله )
    دخلت تاليا عالبيت الفرح متملكها نظراته طريقة حكيه هي اصلا اعجبت فيه من اول لحظة ساعدها فيها حست قديش هو انسان طيب وحنون وبيساعد كل الناس
    تغدت وغيرت تيابا وقعدت عالتخت تدرس بس ما فهمت ولا كلمة ولا ركزت بشي عقلا كله بمراد وبكلامه مسكت تلفونها حتى ترن عليه بس خافت وتراجعت رجعت حطته عالكومدينة ومسكت كتابا عم بتقلب بورق الكتاب ما عم تقدر تركز باي شي نفخت نفخة طويلة طيرت شعرا عن وشا ورجعت مسكت تلفونا اخدت نفس عميق شربت كاسة مي ودقت عليه
    مراد( الو )
    تاليا( …..)
    مراد( تاليا مو هيك )
    تاليا ( كيف عرفت )
    مراد( مممممممم هلا كوني دكتور عم درس مادة علم نفس رح قلك انه في عنا شي بعلم النفس اسمه تخاطب فكري يعني انا بكون عقلي بشي وكنت فكر فيكي فلما انتي دقيتي عرفت انه انتي وفي شي تاني بعلم الحب اسمه تحس بالشخص وتعرفه من مجرد نفسه لهيك عرفتك عالسريع)
    تاليا( بتعرف يا ريتني مو خريجة كنت اخدت عندك مادة )
    مراد( ايه بحياتك ما كنتي تخرجتي )
    تاليا( اووف لهدرجة اسئلتك صعبة )
    مراد ( لا مو هيك بس كنت دايما رح خليكي ترسبي لحتى ابقى شوفك )
    ضحكت تاليا وقلبا عم يدق بسرعة دخلت ميرفت لعندا
    تاليا( ايه هديل والدكتور حكى انه الفقرة الاخيرة مو داخلة بالفحص تمام ادرسي منيح سلام )

    ميرفت ( مع مين عم تحكي )
    تاليا( سمعتي بادنك مع رفقيتي هديل )
    ميرفت ( وشو بدك منا هلا )
    تاليا ( والله مو شغلك )
    حطت ميرفت ايدا عموبايل تاليا مسكت تاليا ايدا ورفعتها
    تاليا( بكسر ايدك اذا بتمديها على موبايلي وابقي روحي خبريه لاخي اني قلتلك هيك )
    ميرفت ( ايه شو عليه با تاليا بنتواجه )
    بلشت علاقة تاليا ومراد تكبر ضمن نطاق الادب وحدود المجتمع الشرقي الي عايشين فيه

    في البيت رن موبايل تاليا
    تاليا( ايه مراد )
    مراد( بدي شوفك والله اشتقتلك بقالك اسبوع معطلة كرمال الفحوصات والله ما بصير هيك )
    تاليا( ايه شو اعمل امي بتعرف اني معطلة عشر ايام وما عم احسن اطلع ولا احكي معك براحتي مرت اخي قاعدة عقلبي )
    مراد( اااف يا الله طيب وينه اخوكي ياخدا ويروحو عبيتهن )
    تاليا ( ……..)
    مراد( طيب اسمعي عندي خطة شو رأيك تعملي حالك مريضة وبطنك عم يوجعك وتخلي اهلك يجبوكي عالمستوصف ال عندكن بالحارة )
    تاليا( ايه وبعدين )
    مراد( انا رح كون هنيك الدكتور الي بيشتغل هنيك رفيقي وهيك بشوفك )
    تاليا( مراد الله يخليك انت بتعرف انه سوزان اختي بتعرفك ما بدي مشاكل انا )
    مراد( لك مشاكل شو انتي تعبانة وانا عند رفيقي عادي يعني ما فيها شي )
    تاليا ( طيب طيب بس مش رفيقك يفضحنا ويقول ما فيها شي )
    مراد ( لا رح خلي يقول انه معك كل الامراض الي بالدنيا … طبعا بعيد الشر عن قلبك )
    تاليا ( تمام ربع ساعة وبكون هنيك )
    سكرو الخط وتاليا صارت تتلوى وتتوجع وحالتها حالة
    سوزان ( لك اختي شو صرلك من شوي كنتي منيحة )
    تاليا( ما بعرف ما بعرف يااختي بطني بطني عم يوجعني )
    سوزان ( طيب قومي معي اخدك عالمستوصف ليكو قريب من هون قومي اختي )
    ام مروان ( يا ربي شو صرلك ايه ايه يامو خديا نطمن عليها)
    ميرفت( لك ما فيا شي بتكون عم تدلع )
    ام مروان ( انتي اسكتي )
    لبست سوزان عحالا وتاليا طلعت بتياب الدار ما قدرت تغير لانه اهلا وقتا رح يشكو
    وصلو عالمستوصف وكان مراد قاعد مع رفيقه
    سوزان ( دكتور ببوس ايدك اختي بطنا عم يوجعا )
    الدكتور منذر ( طيب طيب حطيا هون عالتخت لافحصا )
    وتاليا عم تطلع بمراد من تحت لتحت
    الدكتور منذر ( الظاهر عندا ضغط دراسة وضغط نفسية كله اثر عليها فصارت تحس انه بطنا بوجعا اختك لازما راحة )
    سوزان ( ايه والله اختي السنة خريجة وفحصا بعد بكرا وخايفة ومتلبكة

    شكرا الك دكتور كم بتأمر
    الدكتور ( الله يسعدك الحساب برا )
    الدكتور منذر قصدا زحلقها لسوزان حتى تعرف تشوف مراد شوي
    مراد( لك اشتقتلك اشتقتلك )
    تاليا( وانا كمان والله )
    مراد ( قلك شي وما تساليني كيف هيك بهالسرعة انا بحبك وانتي )
    تاليا( انا شو )
    مراد ( شو انا شو بتحبيني )
    تاليا( ما بحكي)
    مراد ( والله ما بتحكي اي لكن هلا خليني نادي على اختك وقلا انك كذابة )
    تاليا ( لك لأ لأ وانا بحبك بس لا تفضحنا )
    مراد ( ما في اي فضايح بس لتخلصي فحصك جاية اطلبك رسمي)
    تاليا ( عن جد مراد )
    مراد( وجد الجد كمان )

    حاسبت سوزان ورجعت اطلعت بسوزان وانتبهت لوجود مراد
    سوزان( مو حضرتك الي ساعدتنا مرة بالجامعة )
    مراد ( ايه هو انا كنت جاية عند منذر رفيقي )
    سوزان ( ايه اهلا فيكي يلا امشي تاليا )

    في البيت
    سوزان( وليه تاليا انتي عم تشوفيه لدكتورك هاد بالجامعة )
    تاليا( اه شو قلتي)
    سوزان ( تنقال قوالالك قلت معناتا انتي لا بطنك بوجعك ولا بطيخ لك شايفتيني هبلة كنتي رح تموتي من وجعك وبس شفتيه طبتي فجأة )
    تاليا ( لا اختي والله مو متل ما انا فاهمة )
    سوزان ( برضاي عليكي يا تاليا احنا مو ناقصنا فضايح ديري بالك عحالك )

    مرقو اليومين وتاليا عم تدرس واجا وقت الفحص وحملت حالا وطلعت عالجامعة قدمت فحصها وخطرلا تروح تشوف مراد بمكتبه منه بتشوفه ومنه بتطمن عليه
    وصلت لعنده عالمكتب تنهدت ودقت الباب
    مراد ( ادخل )
    تاليا( مرحبا دكتور )
    مراد ( لك تاليا شو جابك هون كم مرة قلتلك انا ما بحب شوفك عندي بالمكتب ما بدي حدا يحكي شي عليكي )
    تاليا( خلص خلص ما بطول بدي طمنك على فحصي الحمد لله كتير منيح وقلت بشوفك عالسريع وبروح )
    مراد( شدي الهمة بدي اياكي الاولى )
    ضحكت واحمرو خدودا
    تاليا( هي صورتك )
    مراد ( ايه هي انا واخي )
    تاليا( ايه انت احلى من اخوك )
    مراد( الله يرحمه )
    تاليا( انا اسفة ما كنت بعرف يعني لانه لسا صغير بالعمر)
    مراد( ولا يهمك بعدين الموت ما عليه صغير وكبير )
    مسك القلم ورماه من ايده
    مراد ( كنت حبه كتير بس قتلوه )
    تاليا( مات مقتول ؟؟؟)
    مراد ( ايه تخانق مع واحد وقتله )
    تاليا( شو اسمه اخوك )
    مراد( معاذ انا وهو توم حتى اسامينا بتشبه بعض )
    تاليا ما عاد قدرت تتنفس وحست الدنيا عم بتدور فيها وضغطها نزل فجأة وارتمت بالارض وما عاد قدرت تتحرك وما صحيت عحالا الا وهي بالمشفى


    عم تفتح عيونا وفي غباش كتير قداما
    سوزان ( اختي حبيبتي فقتي )
    تاليا( ايه اختي فقت راسي عم بوجعني كتير)
    سوزان ( هاد لانه ضغطك نازل حبيبتي شو صار معك لك اختي طمني قلبي )
    تاليا( بتبكي)
    ميرفت ( شو بده يكون صاير معها يعني من كتر ما هلكت حالا دراسة تقول بدا تجيب العلم من بالونيا )
    سوزان ( اطلعي برا الغرفة ميرفت)
    ميرفت ( عم تقلعيني يا سوزان ايه شو عليه )
    طلعت ميرفت وسكرت الباب وراها
    كان بالغرفة سوزان وتاليا وامهم عم تبكي
    سوزان ( امي اتركيني مع تاليا شوي روحي اقعدي مع مرت ابنك شوي الهيها عنا )
    ام مروان ( ماشي يا بنتي بس طمني قلبي عتاليا)

    سوزان ( وهي بقيت انا وانتي لوحدنا شو صار معك اختي )
    تاليا( مين جابني لهون )
    سوزان ( الي بعرفه انه وقعتي واخدوكي عالمركز الصحي بالجامعة كان ضغطك نازل ومو قادرة تحكي وحكو معنا وجيت انا اخدتك )
    تاليا(تبكي بحرارة )
    سوزان ( وبعدين يا اختي والله انحرق قلبي عليكي )
    تاليا( مراد )
    سوزان( ايه شبو احكي تاليا نفذ صبري)
    تاليا( رحت اليوم عنده عالمكتب )
    سوزان( صار شي)
    تاليا( ايه شفت صورة اله حاططا عمكتبه هو واخوه بتعرفي مين طلع اخوه معاذ الشب الي قتله اخوكي ليش هيك حظي ليش لحتى الشب الي انا حبيته يكون بيني وبينه تار لك ليش ليش )
    شهت سوزان وحطت ايدا عتمها
    سوزان( قلتيله شي)
    تاليا( ما لحقت اغمى علي اول ما عرفت
    انا لازم اطلع من حياته واختفي وما يشوفني ابدا ببقى علي الفحص النهائي ومن هلا لوقتا لازم ما يشوفني لازم ما يعرف بنوب )
    سوزان ( طيب طيب روقي متل ما بدك بصير
    تاليا( وهي الي اسما ميرفت ما بدي شوف خلقتا قوليلا لا تحكي معي ولا تقرب ناحي الله لا يوفقا كل شي صار معي بسببا )

    تاليا اغلقت تلفونا حتى مراد ما يدق عليها ابدا وتجنبت الروحة عالجامعة الا للضرورة وحتى لما كانت تروح عالجامعة تختفي من اي مكان ممكن يتواجد فيه مراد

    في بيت تاليا
    ام مروان ( الباب عم بدق روحي يا امي يا تاليا افتحي الباب )
    تاليا ( حاضر امي )
    فتحت تاليا الباب ولقت مراد بوجهها
    تاليا( هي مراد شو جابك لهون رح تفضحنا هلا )
    مراد( جيت اسال عن بيوت للايجار عندكم بالعمارة )
    تاليا( بالله شو )
    مراد( شو اعمل يعني عم دقلك عتلفونك مغلق حاولت شوفك بالجامعة مختفية طقت روحي بدي شوفك واحكي معك لك اشتقتلك )
    تاليا( ببوس ايدك روح من هون قبل ما حدا يشوفك والله بتبهدل خلص بعدين انا بدقلك )

    صوت ام مروان من جوا
    ( مين يا تاليا الي عالباب)
    ميرفت ( شو بنت حماي مع مين واقفة عالباب )
    تاليا( اااه هاد واحد عم يسأل عن بيوت للايجار عنا بالعمارة )
    ميرفت ( ايه بيت ام مصطفى الي فوقنا فضي من يومين وكانت عم تحكي اذا حدا سال عن بيت ندله عليها )
    تاليا( لك لا ما اتوقع تعجبه )
    ميرفت ( ليش حكمتي بقا خليه يشوف ويقرر شو رأيك اخي تشوفه للبيت )
    مراد ( والله بتكوني فضلتي على راسي )
    ميرفت ( ايه تعا معي لدلك على ام مصطفى حتى تحاكيها )
    تاليا( موبايلك عم يرن مرت اخي خلص روحي شوفي مين انا باخده عند ام مصطفى ولا تخافي رح قلها انه انتي الي بعتيه وبتاخدي حصتك سلام )

    كانو عم يطلعو عالدرج سوا وهو عم يمشي ويطلع فيها وصلو لعند ام مصطفى
    ام مصطفى ( اهلين يا بنتي )
    تاليا( خالتي ميرفت مرت اهي بعتتلك مستأجر للشقة الي فضيت عندك من يومين )
    ام مصطفى ( والله سكرة هالميرفت خدي يا بنتي هي مفتاح البيت فرجيه اياه انتي بتظلي اخف مني )
    نزلت تاليا عالبيت هي ومراد دخلو لجو وتاليا كل قلبها خوف وتردد وحب
    حط مراد ايده على شعرها ومسح عليه ( هيك بقى ما بتسالي فيني )
    لفت وجهاا بسرعة عنه وهو راح ركى راسه عالحيط وقعد عالارض
    مراد ( قال الله تعالى (مَّنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۚ وَلَا تَزِرُ وَازِرَةٌ وِزْرَ أُخْرَىٰ ۗ وَمَا كُنَّا مُعَذِّبِينَ حَتَّىٰ نَبْعَثَ رَسُولًا )

    تاليا( صدق الله العظيم بس شوخلاك تقرا هي الاية )
    مراد ( انا بعرف انك اخته لمروان )
    ما عاد تمالكت اعصابا وقعدت جنبه عالارض
    تاليا( انا انا كنت بدي قلك والله بس خفت تكرهني لقيت احسن وانسب حل اني اهرب بس انت كيف عرفت )
    مراد( لما جيتي تقدمي بالجامعة مو انا الي مسكت الورق تبعك قرأت اسمك وبعرف اسم الي قتل اخي لهيك عرفتك بسرعة )
    تاليا( ما قولتلي ولا حتى بينتلي انك بتعرف )
    مراد ( لانه انتي ما الك اي ذنب بلي عمله اخوكي صحيح بحبه لاخي بس هو كان بمجتمع وسخ ما بدي قول بيستاهل الي صارله لانه بظله اخي بس هو فعلا بيستاهل واخوكي كمان بيستاهل مكانه بالسجن كل واحد عم ياخد جزاته بايده )
    تاليا( بتحبني )
    مراد ( ممممممممم يعني )
    سحبها لعنده ( بموت فيكي )
    مراد( هلا اسمعي جد انا قررت اخد هالبيت واستأجره )
    تاليا(يييييي مراد ماانت عندك بيت )
    مراد(ايه واذاهاد لحتى ابقى دايما حدك من هلا لننخطب )
    تاليا( ننخطب طيب واهلي واهلك شوردة فعلهم لما يعرفو )
    مراد ( راح يمانعو اكيد بس وقت بيعرفو قديه نحنا بنحب بعض اكيد ما رح يزعلو )

    وهيك تأجر مرادعند تاليا بالعمارة وتاليا خبرت اختها سوزان بكل شي صار معها
    سوزان كانت خايفة من النهاية بس لما كانت تشوف لمعة الفرح والحب بعيون تاليا تسكت وتحكي اهم شي تكون مبسوطة )
    لقاءات تاليا ومراد زادت بحكم انهم جيران كانت كل يوم تشوفه بالعمارة وتحكي معه

    مراد( الو شو وينك )
    تاليا( روح ما حنزل اليوم عالجامعة امي مرضانة شوي ومضطرة ابقى جنبا )
    مراد( لا مو خبرية والله اي سلامتا الوالدة بشوفك بس روح اليوم من الشغل)
    تاليا( والله خايفة شي نهار حدا يشوفني معك وننفضح )
    مراد( بقطع لسانه الي بجيب سيرتك بشي بعدين هانت كلها فترة صغيرة وبتقدملك رسمي )

    سكرت تاليا التلفون ووقفت عبرندة البيت تشوف مراد وهو رايح عالشغل طلعت عندا ميرفت
    ميرفت( شو بنت حماي ما الك بالعادة تطلعي عالبلاكين شو بالنسبة )
    تاليا( ايه ما دخلك )
    ميرفت ( محترم هالجار الجديد ما هيك )
    تاليا( ظبي لسانك بحلقك وما بدي اسمع صوتك )
    ميرفت ( ايه بكرة بدوب التلج وببان الي تحته وبنعرف سر هالوقفة العظيمة كل كم يوم عالبرندة )

    تاليا( امي بدك شي بدي روح اشتريلك الدوا من الصيدلية )
    سوزان ( خليكي اختي انا بروح بشتريهم بلا ما تطلعي بهالبرد )
    تاليا( معلش اختي حابة اتمشى شوي لاني انخنقت منها لمرت اخوكي بعدين الصيدلية ليكا مو بعيدة )

    نزلت تاليا من البيت كانت عم تمشي والجو كتير بارد دخلت عالصيدلية
    وصارت تطلع فيها لفت انتباها علب حليب الاطفال وبودرتن واشيا الاطفال وصارت تتخيل حالا هي ومراد واطفالن

    في مخيلة تاليا
    تاليا( حبيبي شوف ابنا ما احلاه بيشبهني ما )
    مراد ( اي انتي احلى ما في حدا بجمالك انتي
    توتو حبيبتي كانه في ريحة طالعة منه لهلولد )
    تاليا( ايه بعده صغير بعدين اليوم الغيار عليك مو علي)
    مراد ( ماحزرتي هي شغلات الاميات مو الاباء )
    وبعدا اتفقو يغيرولو سوا

    في الحقيقة وفي الصيدلية كان الصيدلي علاء وعنده رفيقه وديع
    علاء( وبعدين يعني ايه امك هلكتني قبل ما تهلكك بدا عروس لالك يا اخي خلص تزوج وفكنا بالله قديه صار عمرك )
    وديع( 29 بعدين لك ما لقيت ولا بنت تخرط مشطي )
    علاء ( اي يلا شب بمركزك وبجمالك والبنات عم يتقتلو عليك ما لقيت حدا لهلا)
    وديع( والله متل ما عم حاكيك )
    علاء( لك شبا هي عم تطلع عالاغراض وتصفن

    خير يا اختي بشو فيني اخدمك
    تاليا( بعتذر سرحت شوي لا تواخذني لو سمحت بدي هاد الدوا المكتوب بالورقة )
    اطلع فيها وديع وكانه سنارة تاليا غرزت بقلبه حاول يتطلع على ايدها ما شاف شي ارتاح وتنفس
    اخدت تاليا الدوا وظلت طالعة ووديع وقف وراها اخد مفاتيح سيارته عن الكاونتر ولحقها
    علاء( لك وين لسا ما خلصت قهوتك )
    وديع ( بعدين بعدين)
    مشي وديع ورا تاليا بالسيارة لحتى عرف مكان بيتا
    وديع شب بيشتغل ضابط كبير بالبحث الجنائي وسيم كل البنات متقتلات عليه وهو من وحدة لوحدة وامه جانن جنونا بدا تزوجه
    اخد وديع اسم المنطقة ورقم العمارة واتصل على عنصر عنده بالشغل
    العنصر ( نعم سيدي)
    وديع( بدي معلومات كاملة وكافة عن عمارة 6 بحارة الورد وخلال ساعة )
    العنصر ( حاضر سيدي )

    في منزل تاليا
    عم يرن تلفونا
    تاليا( ايه يا عمري )
    مراد( ليكي انا من شوي فتت عالبيت مشتاقلك والله كتير كيف فيني شوفك )
    تاليا ( والله ما بحسن اطلع هلا برا البيت )
    مراد( دبريها تاليا عم قلك مشتاقلك )
    تاليا( طيب ليك بعد ساعة بدق عليك وبحكي لامي انا رايحة اشتري شوية اشياء من السوبر ماركت وبشوفك هنيك بس ما بطول ايه )
    مراد ( تمام اتفقنا )
    سكرت تاليا التلفون وحطت التلفون ناح قلبا وكانه قلبا عم يحكي مع مراد ويقله قديه هو بحبه )
    فاتت لعندا سوزان وكانت ميرفت ورا الباب عم تسمع شوعم يحكو
    سوزان( شوحبيب القلب)
    تاليا(ايه هو بده يشوفني وانا قلتله انا ما فيني بس هو اصر الله يوفقك الله يخليكي دبريها يا سوسو )
    سوزان ( اخ منك والله لتجيبي اخرتنا طيب طيب رح ساعدك )
    تاليا( بتعرفي سوزان قديه كنت اسمع بحياتي عن الحب والتسامح فيه بس بحياتي ما خطرلي يكون هيك لك اخي قتل اخوه لمراد ومع هيك حبني وما تخلى عني قديشه حامل بقلبه حب وحزن )
    سوزان ( ايه والله ربنا يكملا معكم عخير )


    طبعا ميرفت سمعت كل الحكي ما عملت شي غير انا راحت قعدت مع حماتا
    بعد ساعة غمزت سوزان تاليا
    سوزان ( اختي شو رأيك تروحي تشتريلنا كم شغلة للسهرة )
    ام مروان ( ايه بس هلا عتمت الدنيا )
    سوزان ( لا امي بعدين السوبر ماركت ليكو قريب )
    تاليا ( خلص تمام ماشي)
    لبست تاليا جاكيتا وطلعت من البيت
    ميرفت ( يوووه نسيت انه خالتي ام مصطفى طلبت مني كنزتي الخضرا قال بدا تفصل متلا لبنتا رح روح وديلا اياها )
    مسكت ميرفت الكنزة وراحت تركض ورا تاليا شافتا واقف هي واياه قريب من عمارتن وطبت عليهن متل القضا المستعجل
    ميرفت ( لك الله لا يوفقك ما صدقتي اخوكي ينسجن حتى تحبي وتتمعشقي عكيفك )
    تاليا( اسكتي انتي فاهمة غلط)
    ميرفت ( غلط يا كلبة ومين اخوه لمعاذ للشخص الي بينا وبينه تار والله لافضحك واحكي لمرت عمي كل شي )
    تاليا( لا بترجاكي الا امي )
    مسكتا ميرفت من شعرا وسحبتا ومسكها مراد وحطلا ايدها ورا ظهرا
    مراد( اكسري ايدك قبل لا تمديهن عليها فهمتي وليه )
    ميرفت ( ايه هلا بنشوف )
    تاليا( مراد انت روح من هون ولا تخلي حدا يشوفك بسرعة )
    مراد ( انا مو خايف من حدا ورح ابقى هون )
    سحبتا ميرفت لتاليا وفاتو عالبيت وهي ماسكتا من شعرا
    ام مروان ( شو في لك شو في )
    ميرفت ( اسالي بنتك المحترمة الي عم تعشق وتتمعشق لما اخوها غاب عن البيت )
    سوزان ( بعدي ايدك عنا انتي ما الك حق تحاسبيها )
    ميرفت ( طبعا بدك تحكي هيك ما انتو بتطبوخها سوا
    بتعرفي يا عمتي بنتك مين بتحب اخوه لمعاذ الشب الي قتله مروان بدا تبلينا بمصيبة لا ولو تعرفي مين هو مراد الشب المستأجر عنا )

    ام مروان ما تحملت الحكي وغط عقلبا وغميت فورا ونقلوها للمشفى وهنيك خبروهن الدكاترة انها تعرضت لصدمة نفسية
    وطول الوقت ميرفت تزور بتاليا وتقولها انتي السبب بكل شي
    وتاليا ما في الا حاطة ايدها عوشها وتبكي

    في منزل وديع
    برن تلفونه
    وديع ( ايوا شو طلع معك )
    العنصر ( سيدي بالبيت الاول ساكنة ام مروان وعندا بنتين وولد سوزان وتاليا )
    وديع ( ايوا هدول شو عرفت عنهن )
    العنصر( سكنوجديد بالمنطقة لانه مروان ابنهن قتل واحد التنين بتاجرو بالمخدرات وهلا هو محبوس عنا
    وعندا سوزان وتاليا سوزان كبيرة بالعمر ومو متزوجة وتاليا بتدرس جامعة والمعلومات الي وصلتني انها على علاقة مع جارهم مراد والي هو بكون اخوه للمغدور الي قتله اخوها )
    وديع( العما كيف هيك )
    العنصر ( ايه سيدي واليوم صارت مشكلة بين تاليا ووحدة قدام بيتهن بعدا ام مروان انتقلت للمشفى )
    وديع( ما عرفتو سبب المشكلة )
    العنصر ( لا والله بس حسب التخمينات انهن عرفو انه مراد بكون اخوه للمغدور )
    وديع ( ايوا يعطيك العافية )

    هيك بكون وديع عرف كل شي عن حياة تاليا

    في المشفى فاقت ام مروان وهجمو عليها تاليا وسوزان لكن ام مروان شالت وشها عن تاليا
    تاليا( يا امي والله انا ما بتحمل تعملي فيني هيك انا اسفة والله اسفة )
    ام مروان ( كسرتي ظهري يا تاليا ااااخ الله يسامحك )
    تاليا حطت راسا عصدر امها وصارت تبكي وتقول لاما سامحيني
    تحسنت ام مروان وطلعت عالبيت وميرفت خبرت مروان بكل شي وصار يهدد ويتوعد الا يدبحها لما يطلع فانتهزت الفرصة ميرفت واقترحت عليه انه يزوجو تاليا لاخوها وهو طبعا لبى رغبة ميرفت

    اخوها لميرفت شب عواطلي هامل لا بيشتغل ولا بيعمل شي بالحياة

    ميرفت( مرت عمو كنت اليوم عند مروان )
    ام مروان ( واكيد خبرتيه بكل شي )
    ميرفت ( ايه طبعا مو اخوها ولا زم يعرف بكل شي هلا المهم انا اقترحت عليه انه نلم الفضيحة ونزوج تاليا لاخي فراس بقا فكرو انا اخي بلاقيله احسن بنت بس قلت لحالي خطي خليني نلم الفضيحة )
    تاليا( نجوم السما اقربلك ولا اتزوج هالهامل ) ميرفت ( العما والك عين تحكي )

    دخلت تاليا عغرفتها تبكي ولحقتها سوزان وامها
    تاليا( امي انا ما بدي اياه لفراس انتي بتعرفيه وبتعرفي سمعته العاطلة )
    ام مروان ( رح حاول ما خلي هالزواج يتم بس بدك توعديني مراد ما بقا تشوفيه ولا تحكي معه ابدا ابدا )
    سوزان ( يامو بس لا تنسي انه مروان الوصي عليها دخيلك يامو اوعي توافقي تاليا تتزوج فراس)
    ام مروان ( قلتلكم رح حاول بس شو يا تاليا ما وعدتني)
    تاليا( بوعدك يا امي بوعدك )

    نامت تاليا وهي عم تبكي وقلبها محروق ومقهورة
    صحيت تاني يوم ولبست تيابا وراحت عالجامعة قبل ما تفيق ميرفت وتعلق هي واياها اول ما نزلت شافت ميراد بوشا
    مراد( خفت كتيرعليكي هيك يا تاليا ما بطمنيني عليكي)
    تاليا( ببوس ايدك يا مراد روح من هون انا وعدتا لامي ما شوفك ولا احكي معك )
    مراد( يعني شو )
    تاليا ( يعني انا وانت مو لبعض خلص الي بينا انتهى )
    حاولت تكون قوية لفت وشا وظلت ماشية وتركت وراها قلبها مكسور عم ينزف

    في بيت وديع
    وديع( صباح الخير يا احلى ام اوووه شو هالفطور الطيب يسلمو ايديكي يا ست الكل )
    ام وديع ( ايه ظل كل بعقلي حلاوة وانا بحكي بحكي عالفاضي)
    وديع ( خلص الي بدك اياه رح يصير انا قررت اتزوج )
    ام وديع ( عن حقا عم تحكي مين العروس ووين شفتا حلوة ولا لا)
    وديع ( عمهلك علي هي احلى من القمر بشوي لا تخافي تربياتك انا ما بنقي الا الوردة المفتحة وحضري حالك بكرة نروح نطلبا )


    في بيت ام مروان
    ميرفت ( والله عمتي مروان خبرني انه بده اياكي ضروري ضروري اليوم عنده بالسجن )
    ام مروان ( مع انه قلبي مو رضيان عليه بس بكرة رح روح شوفه وحل موضوع تاليا )

    وتاني نهار راحت ام مروان عالسجن لتشوف ابنها وخبروها انه ما في وقت للزيارة اليوم
    ام مروان ( يا ابني الله يسعدك خليني شوفو لابني بس خمس دقايق والله ما بطول )
    العنصر ( والله يا خالتي ما بقدر هيك الاوامر ممنوع دخل حدا )
    ام مروان تبكي( لك ابني والله قطعت مشوار طويل ولازم شوفه ضروري )
    عليت اصواتهن بالكرديدور ووديع جوا بمكتبه سامع اصواتهن طلع عليهن
    وديع( خير شو في )
    العنصر( سيدي هي الست بدا تشوف ابنا محبوس هون وانا عم قلا انه اليوم مو وقت زيارة بس هي مو مقتنعة )
    ام مروان ( يا ابني والله لو ما في شي ضروري ما بصر عليه )
    وديع ( ما عليه خالتي بس هي الاوامر لهيك هو ما بقدر يخالفا تعي عندي عالمكتب لشوف اذا بقدر ساعدك )

    دخلت ام مروان عمكتب وديع
    وكانت تبكي بطريقة حرقت قلبه لوديع
    وديع ( خالتي روقي بوعدك خليكي تشوفيه لابنك بس الموضوع مو سهل )
    ام مروان ( انا مو سألة عنه ولا مشتاقة شوفه بعد الي عمله بس انا كرمال بنتي)
    وديع ( ليش مالها بنتك )
    مسحت ام مروان دموعا باطراف اصابعها الي مليانين تعب وهم ( ابني قتل واحد اسمه مروان )
    عرفها وديع فورا ( ايه وشبو )
    ام مروان ( بده يزوج بنتي الصغيرة لاخو مرته واخوها لمرت ابني هامل وعاطل وسمعته متل العما وبنتي ححلوة ومتعلمة ومرباية ما بدي اياها تتورط بهالزيجة وخايفة من اخوها يركب راسه فهمت ليش بدي شوفه ضروري )
    وديع ( ايه شو على كيفه الامور )
    ام مروان ( ما فهمت عليك يا ابني اصلا انا وجعتلك راسك بقصتي حتخلوني شوفو لابني الا لا )
    سكت وديع شوي
    وديع ( رح خليكي تشوفيه وبتقوليله لابنك انه في عريس متقدم للبنت ورح زوجها اياه وانه كرمال هيك رفضتي اخو مرته )
    ام مروان( بس بنتي مو متقدملا حدا واذا اكتشف رح يرجع ينق بده يزوجا لفراس)
    وديع( لا فيه انا بشرفني اتقدم لبنتك رسمي وبكرة باذن الله بجيب الوالدة والوالد )
    من الفرحة ام مروان ما عاد قدرت تحكي ( طيب ابني كيف بدك تتزوج بنتي وانت ما بتعرفا )
    وديع ( رح صارحك بكل شي هي صدفة خلتني شوف بنتك تاليا مرة لما اجت تشتري دوا من الصيدلية والصدفة لعبت دورها مرة تانية بانك تيجي لعندي هون وتقوليلي قصتك وانا والله العظيم نيتي سليمة ومو ببالي الا كل خير وكنت ناوي اجي انا واهلي ونتقدم رسمي حتى قبل ما تيجي لعندي هون )

    كتير فرحت ام مروان بكلامه لوديع
    لانه وديع شب حلو ومركز وهيبة والف بنت بتتمناه فاتت خبرت مروان انه في شب متقدم لتاليا وبشتغل بالامن وممكن كتير يساعده لقدام بالسجن ومن هالناح ضغطت عليه ووافق على وديع خاصة انه بيعرفه وكل السجنا بحبوه لوديع لانه بحياته ما عذب حدا فرتاح كتير لزواج اخته من وديع )

    روحت ام مروان عالبيت لقيت تاليا قاعدة بتبكي وسوزان اختها جنبها عم تواسي فيها
    وميرفت حاطة اجر على اجر
    ميرفت( ايه شو مرت عمو ما طلع بايدك عليه بدا تتزوجه لاخي مو هيك )
    ام مروان ( اسكتي انتي سوسة الشرر)
    ميرفت ( هلا انا هيك )
    سوزان ( امي شو صار معك )
    ام مروان ( ما رح تتزوجيه لفراس وبكرة قراية فاتحتك على وديع)
    صفنو التلاتة ببعض وبصوت واحد حكو ( مين وديع )
    ام مروان ( شب طلب ايدك اليوم مني بكون ظابط بالامن )
    تاليا( لك امي كيف هيك من وين طلعلي هاد اكيد بتمزحي ما )
    ام مروان ( لا ما عم بمزح وبكرة هو واهله بكون هون يتقدمولك رسمي)
    تاليا( انا ما بدي اياه ما بدي غير مراد انا بحبه لمراد وهو بحبني ليش لتحرمونا من بعض شو ذنبي انا لادفع ثمن اغلاط غيري )
    ضربتها امها كف ( اخرسي اوعي تجيبي اسم مراد علسانك بعد اليوم فاهمة والا والله بغضب عليكي ليوم الدين انا واجبي كأم عملتو حميتك من انه تتزوجي واحد متل فراس وازوجك شب محترم متل وديع بس لهون وبكفي تاليا )

    دخلت تاليا عالغرفة ولحقتها سوزان وميرفت واقفة مصدومة
    كانت تاليا قاعدة عالسرير عم تضرب حالها وتبكي
    سوزان ( اختي ببوس ايدك حاجتك والله تنهنهتي بكى خلص هاد نصيبك )
    تاليا( ليش يعني مراد مستعد يحط كل شي ورا ظهره ويتقدملي رسمي)
    سوزان ( بدك تجلطيها لامك قومي غسلي وشك وتوضي وصلي ركعتين بترتاحي )

    تاني نهار تاليا كانت متل الي ميتلها حدا طلعت عالبرندة ورنت على مراد
    مراد( تاليا ياعمري كتير فرحت لانك دقيتي علي)
    تالياوبصوت مليان دموع ( دقيت لودعك انا اليوم خطبتي واهلي قرروا وانهو الموضوع كنت اتمنى نكون سوا ونجتمع ببيت واحد تحت سقف واحد بس خلص )
    مراد ( قولي لا وانا مستعد اخطفك واهرب فيكي وين ما بدك )
    تاليا( ما فيني ما فيني والله امي بتروح فيها سلام )

    في المسا
    سوزان ( لسا ما لبستي ما بقا الا يوصلو الجماعة قومي قومي البسي وغسليلي وشك وحطي شوية مكياج ولا بدك تشمتيها لمرت اخوكي فينا


    قامت تاليا غيرت تيابها ولبست طقم زيتي ونفلت شعرا وحطت كحلة ومسكارة وقعدت عالسرير تنطر
    سمعت الباب عم يندق برا وامها واختها عم يرحبو ويسهلو
    شوي ودخلت لعندا سوزان
    سوزان ( ووووليه وليه يا اختي عحظك شو شب شو شبوبية شي بطير العقل طول بعرض سبحان الي خلقه على هالخلقة وضابط وابوه لوا متقاعد يعني وقعة محرزة لك مبسوطة مبسوطة كتير الك )
    طبعا كل هاد الكلام كانت عم تسمعه تاليا من دان وتطيره من التانية مو ببالها حدا غير مراد
    طلعت تاليا وقدمت القهوة وما طلعت بحدا
    ام وديع كانت كتير مبسوطة بتاليا برغم بساطة حياتهم وبيت اهلها الا انها فرحت انه واخيرا ابنها استقر وحب وحدة رفعت تاليا نظرها شوي شافته لوديع عم يطلع فيها
    خجلت ونزلت راسا بالارض
    اتفقو عالمهر وعكل شي وابوه لوديع وعدهم الا بعمللها كل شي بتتمناه اي بنت وكانها بنته وزيادة وكانو عم بقرأو الفاتحة لحتى سمعو صوت تخبيط قوي عالباب قامت سوزان فتحت كان مراد بحال هيسترية عم بصرخ وبسب
    ( تاليا مستحيل تكون الا الي فهمتو فهمتو )
    قام ابوه لوديع
    وديع( بابا اتركلي اياه )
    رفع المسدس من جنبه وراح مسك مراد من بلوزته
    وديع( اسمع ولاه كلب لهون ان بتقرب رح فضي هالفرد براسك فهمت ولا عيدا )
    مراد ( لا ما فهمت وتاليا الي وهي بدا اياني)
    قربت تاليا لعند وديع وحطت ايدها على ايده ( الله يخليك تتركه انا رح اتزوجك الك يا وديع بس اتركه )
    وديع ( والله فضلتي عراسي)
    تركه وديع وتاليا قلعته لمراد وسكرت الباب وهي بتبكي وراحت عغرفتها بسرعة
    وميرفت قاعدة وشمتانة ومقهورة من هالنصيب الي صحلها
    اقترحت ام مروان انه ما يطولو فترة الخطبة وانه العرس يتم بسرعة بلا ما يصير مشاكل وتم تحديد العرس بعد اسبوع
    بلشو يحضرو للعرس ويجهزوللحفلة وتاليا بالها عند مراد وكل ما وديع بحاول يتقرب منها تبعده اكتر

    يوم العرس
    لبست تاليا بدلتها وتجهزت وكانت من اجمل العرايس ووديع تجهز وتزبط واجا اخدها لتاليا وراحو لقاعة الفندق
    حفلة ما بيعملوها الا ولاد الاكابر شي بطير العقل سوزان وامها كتير فرحانين بنصيب تاليا بنفس الوقت خايفين من اي ردة فعل مو محسوبة من مراد بس وليد ماخد كل احتياطته وزارع عناصر بكل مكان
    وميرفت رح تطق من قهرها هي وامها وخواتها من هالنصيب الي صرلا لتاليا
    تاليا كانت عم تحاول تبين طبيعية بس دموعا عم يخونها
    قرب وديع لعندا ومسكا من ايدا ( جامليني عالاقل قدام العالم الكل عم يشتلقو علينا افرديها هلا )
    وانتهت الحفلة وطلعت تاليا ووديع عالجناح الي حجزوا وديع
    كانت تاليا عم تفك بشعرا قرب وديع لعندا ووقف وراها وحط ايديه عخصرا ( بتحبي ساعدك )
    بعدت عنه بسرعة ( ليك اوعى تفكر تقرب مني انا تزوجتك كرمال سكت امي وما اغضبها بس انا ما بحبك ولا بحب شوفك ما بحب اسمع صوتك )
    وديع ( رح طول بالي عليكي يا تاليا وكأني ما سمعت شي )
    تاليا( ما رح تطول مني شي لا هلا ولا بعدين )
    وديع( كله كرمال الكلب الي اجا يوم قراية الفاتحة صح )
    تاليا( احترم حالك ولا تجيب سيرته )
    وديع ( بتعرفي اني هلا بقدر امسكه وزته بالحبس متل الكلب)
    تاليا( مفكر حالك بتكون رجال لما تستغل شغلك ومنصبك لتأذي الناس)
    وديع ( اللهم طولك يا روح )

    اخد بيجامته من الخزانة وظل طالع وتاليا غيرت تيابا ولبست بيجاما واسعة وفضفاضة ورفعت شعرا وصفنت بالسقف مسكت موبايلها وفتحته عرسائل مراد وصوره وهي عم تبكي وظلت تبكي لحتى غفيت
    تاني نهار دقت امه عليه تطمن عليهن وخبرهن وديع انه اموره تمام وكل شي بخير ونفس الشي قال لامها
    قعدو تلت ايام بالفندق وتاليا حتى الحكي ما عم تحكيه مع وديع

    وديع ( قومي ظبي تيابك بدنا نرجع عالبيت بكفينا قعدة هون )
    هزت راسا
    قامت غيرت تيابا وظبت اغراضهن بالشنتة وراحو عليت اهله

    ام وديع ( اهلا وسهلا فيكن نورتو البيت بس ليش ما خبرتوني انكن جايين كنت عملت اكل واحلى وليمة لعيونكن )
    وديع ( ما في داعي امي اصلا كنتك بلا شي ما بتاكل )
    ام وديع ( له لك بنتي هيك بينزل دمك يلا اطلعو عشقتكن غيرو وغسلو وانا رح حضر الغدا )
    وديع ( تسلمي يا امي عم تتعبي كتير بس لو تقبلي جبلك شي وحدة تساعدك بشغل البيت )
    ام وديع ( لك امي والله ما بحبن لهلخدامات بعدين انا لسا صحتي فيني)
    وديع ( الله يعطيكي الصحة وطولة العمر )

    طلعو تاليا ووديع عالبيت
    غيرو تيابهن وبعد شوي طلعت ام وديع وجابتلهن الغدا
    وديع ( يسلمو يا احلى واغلى ام )

    قفل الباب ورجع لعند تاليا
    ( تعي تغدي )
    تاليا ( مو جوعانة كل لوحدك )
    وديع( تصطفلي)
    تاليا( انت كيف قبلان عحالك تعيش هيك مع وحدة ما بدا اياك )
    وديع ( لاني بحبك )
    تاليا( وانا ما بحبك )
    وديع ( بدك اياني طلقك حتى تروحي تتزوجيه لهاد شو كان اسمه ايه مراد
    كيف بدك تتزوجي واحد اخوكي قتل اخوه امك بتقبل )
    تاليا( يعني انت بتعرف بكل شي )
    وديع ( نسيتي بشو بشتغل انا )
    تاليا( انا بقرف منك )

    مسك وديع كاسة المي ورماها باحمى ما عنده عالحيط مقابيله
    وديع ( بلش صبري ينفذ يا تاليا خلي عندك علم )

    المسا اجتمعو اخواته لوديع واقرايبه بدهم يشوفو هو وعروسته خبرا وديع لتاليا انه الجميع تحت ناطرنا ونزل لحتى هي تلحقه
    مسكت موبايلا وبلا ما تحس عحالا دقت عمراد

    مراد ( تاليا لك والله ما عم صدق انه انتي الي عالخط يا الله قديش اشتقتلك واشتقت لصوتك )
    تاليا( ما بعرف ليش دقيت عليك بس انا والله عم اختنق هون يا ريتك جنبي ومعي يا ريت بقدر كون معك )
    مراد( بعدك بتحبيني)
    تاليا( واكتر من قبل)
    سمعت تاليا صوت باب البيت خبط سكرت الخط بسرعة ونزلت الموبايل دخل لعندا وديع كانت متلبكة وخايفة

    وديع( شو بك ليه هيك انخطف لونك )
    تاليا( ولا شي بس كنت بدي غير تيابي ولما شفتك جيت خفت )
    وديع ( اه لانه انا حدا غريب تمام ناطرك بالصالة لحتى تجهزي وننزل تحت سوا )

    جهزت ونزلت هي ووديع سوا لتحت حاولت عقد ما بتقدر تكون طبيعية وتحكي وتمزح مع الجميع كانت من جوا مبسوطة انها سمعت صوت مراد وانه بعده بحبها وما نسيها

    وبعد ما روحو خبرها وديع تجهز حالا تاني نهار لحتى ياخدا تقضي اليوم عند امها واختا لانه هو مضطر يقطع اجازة عرسه ويدوام فرحت كتير انها بدا تشوف امها واختا ومتل العادة نامو كل واحد بمطرح هي نامت بالغرفة ووديع نام بالغرفة التانية وهن نايمين بالليل سمع وديع صوت شي خبط قام بسرعة لغرفة تاليا لقي تاليا واقعة عن السرير حملا ليرجعا عتختا وفاقت عليه
    تاليا( انت شو جابك لعندي لغرفتي )
    وديع ( وقعتي عن السرير وانا حملتك لرجعك تنامي عالسرير منيح )
    تاليا ( انت عم تكذب انا ما وقعت انت عم تحاول تتقرب مني باي طريقة )
    ورفعت اصبعها لتهدده وكملت كلاما ( واوعى ثم اوعى يخطرلك تقرب هون مرة تانية
    قرب لعندا ومسك اصبعتا ونزلها وهو عم يشد على ايدها
    ( مو انا الي بتهدد تاليا خانوم ولما بدي شي باخده وقت ما بدي )
    وطلع من الغرفة وطبق الباب وراه ولما طلع الضو تجهز وديع ولبس لبسه العسكري ودق عالباب ليصحي تاليا
    تاليا( شو في لسا الوقت عالفجر )
    وديع ( ايه طبعا نسيت قلهن يأخرولي شغلي للظهر حتى تكملي نومتك يلا فوتي غيري ما بدك تروحي عند اهلك )
    تاليا( يعني هلا )
    وديع ( ما بقدر الا هلا ما معي وقت وبكرة الصبح برجع باخدك )
    سكرت تاليا الباب وحكت لحالا ( ما احلاه وهو باللبس العسكري )
    هزت راسا ( شو عم قول انا شكلي بعدني نايمة ومو مصحصحة )
    غيرت تيابا وجهزت وطلعت هي ووديع وصلا عند اهلها وهو طلع عدوامه
    كانت قاعدة مع امها واختها عم يضحك ويمزحو وتاليا عم توصلها مسجات من مراد
    ( اشتقتلك )
    تاليا( وانا كمان )
    مراد ( بدي اسمع صوتك )
    تاليا ( ما بقدر هلا اهلي جنبي لروق شوي بحاكيك )

    سوزان ( هييي تاليا وين سرحانة )
    ام مروان ( امي تركيها اكيد زوجها بكون براسلها وبطمنها عنه )
    ميرفت ( هو عم يشتغل ولا عم يبعت مسجات )
    تاليا ( انتي ارتاحي ما خصك ست ميرفت )
    بعد شوي رن تلفون البيت واجاهن خبر انه مروان اخوها لتاليا انقتل جوا الحبس
    ام مروان لما سمعت هالحكي اغمى عليه ونقلوها عالمشفى بس للاسف ما قدرو يسعفوها لانه الصدمة كانت قوية على قلبها لحد ما قدرت تستحمله
    وديع اعتذر من الشغل وراح ليشوف تاليا ويوقف معها
    لكن تاليا اول ما شافته صارت تصرخ عليه واتهمته بقتل اخوها لانه هو الوحيد الي ممكن يوصل لجوا السجن

    …… يتبع في الجزء الرابع والاخير

    #حاكم_جلاد_بقلم_حنين_طه
    الجزء الرابع والاخير

    كل الحواجز القديمة الي كانت بين تاليا ووديع زاداات اكتر واكتر والمشاكل كل مالها عم تزيد وتكبر اكتر تاليا بقيت عند بيت اهلها بعد وفاة امها وكل يوم على طوش وخناق بينا هي ومرت اخوها لانه متهميتها انه هي السبب بموت مروان كونه وديع السبب

    سوزان ( لك اختي يعني ولمتى هالحالة هي امك رح يصيرلا شهر ميتة وانتي هون كل يوم مشاكل مع مرت اخوكي روحي اختي الله يرضى عليكي ارجعي لبيتك ولزوجك )
    تاليا( لك اختي هاد قتل مروان كيف بدك اياني ارجعله )
    سوزان ( شو مصلحته شو غايته ليقتل مروان حطي عقلك براسك يا تاليا زوجك منيح وما في منه لا تخربي بيتك بايدك الله يرضى عليكي )
    تاليا( ما رح ارجعله ما بدي اياه )
    سوزان ( مو عكيفك وقعدة الك هون ما في العما لسا امي ما نشفو ترابا صرتي بدك تمشي كل شي عكيفك )

    تاليا حست انه قعدتا عند بيت اهلها عم تزيد المشاكل قررت ترجع للبيت وهي اساسا مو طايقته لوديع بس كمان خايفة ينفذ صبره ويبهدلها هي واختها لانه واصل وايده طايلة
    وصلت عبيتا لقيت حماتا هنيك سلمت عليها وقعدت شوي
    ام وديع ( كتير فرحت برجعتك بنتي كلنا على هالطريق لا تزعلي ادعيلن بالرحمة وربي بفرج همك )
    تاليا( شكرا الك مرت عمو )
    تركتا ام وديع ترتاح وراحت عبيتا وتاليا قعدت تنطر وديع ليرجع خايفة من ردة فعله لما يشوفا
    كانت قاعدة عالارض وغفيت وهي عالارض لما رجع وديع خبرته امه انه تاليا بالبيت طلع لفوق ولاقاها نايمة عالارض بدون غطا خاف يحملا ويحطها عااسرير تفيق لهيك جاب غطا وحطه عليها ونام جنبا عالارض وهو عم يحسس على راسا ويمسح على شعرا رن فجاأة تلفون تاليا صاريهز كانت حاطته صامت سحبه من عند راسا حتى ما تفيق عهزته واول ما سحبه لقي مسج من سوزان 2
    استغرب انه سوزان شو بدا من تاليا بهالوقت فتح المسجات ليكتشف انه الرقم هاد لمراد وتاليا مسجلته سوزان 2 وعرف انه تاليا ما قطعت علاقتا مع مراد ابدا رمى التلفون بقفى ايده وصار يصرخ على تاليا قامت من نومها خايفة ومرعوبة
    وديع ( لك دخلتك عبيتي واحتويتك ما تركتك تحتاجي انسان وبالاخر جزاتي شو لسا عم تحكي معه لهالكلب والله لربيكي انتي واياه )
    مسكا من شعرا وصار يضرب فيها حتى كانت رح تموت بين ايديه تركها وقعد على جنب
    تاليا( الله لا يوفقك لك انا بكرهك بكرهك انت قتلتني وقتلت اخي وقتلت امي لك والله بكره شوفك )
    وديع ( ورح تبقي عندي هون بالبيت تموتي عالبطيء تتمني الموت وما تلاقيه يا تاليا )
    طلع وديع من عندها وقفل عليها الباب بالمفتاح وهي تخبط عالباب وتنادي بس هو حس متل كانه كرامته انكسرت تركها لتاليا بتبكي وراح قعد بالصالة
    كان عم يحكي مع حاله ( شو عملت انا لك انا تزوجتها وانا بعرف انها بدها واحد تاني ليش هيك قسيت عليها اووف يا ربي لازم صحح غلطي )
    راح عالمطبخ جاب شاش وقطن ودهون وفتح الباب عتاليا كانت قاعدة عند الباب وصار يمسحلها بنقط الدم عن وشا
    وهي تصرخ فيه وتقول بعد عني وهو رافض
    تاليا( بتقتل القتيل وبتمشي بجنازته )
    وديع ( ما رح رد عليكي لاني مو جاي لحتى نتخانق )
    هديك الليلة ما تركا وديع ولا لحظة لتاليا وهو يداوي ويطبب فيها حتى لما نامت بقي سهران طول الوقت جنبا

    تاني نهار كان وديع عم بحضر الفطور فاقت تاليا وراحت تعمل فطور الها
    وديع ( رح اعمل فطور النا تنيناتنا )
    تاليا ( شكرا انا بعمل لحالي)
    وديع( ام راس يابس كيف صرتي هلا)
    تاليا( طوال ما بتبقى بعيد عني انا رح كون منيحة)
    وهي عم تحكي جرحت حالا بالسكين وصرخت اي
    قرب وديع لعندا لفلا اصبعتا بايده وغسلها وراح ليجيب لزقات وعم يضحك
    تاليا( ليش عم تضحك )
    وديع ( هلا كل هالصوت الي صرختيه كرمال هي )
    تاليا( طبعا ما انت متعود عالجروح والقتل فجرح متل هاد اكيد رح تشوفه صغير )
    وديع( ما رح جاوبك صحيح خدي هي موبايلك صلحتلك اياه )
    تااليا( مو خايف احكي مع مراد )
    وديع ( هاد شي بيرجع لضميرك )

    مرق اسبوع على رجعة تاليا عالبيت وكل يوم عن يوم بتتعقد الامور اكتر واكتر بينها وبين وديع

    في منزل وديع
    وديع راح عداومه وتاليا عم تحكي مع مراد
    مراد( لما تروحي عند اهلك لازم شوفك )
    تاليا( ما عم يخليني اطلع من البيت لك ما عم اقدر اتنفس )
    مراد( تاليا اطلبي الطلاق ما بقي حدا يمنع زواجنا انتي بتعرفي قديه زعلت على موت امك واخوكي بس والله فرحان انه اذا اطلقتي ما حدا رح يقلنا لا شو قلتي والله مشتاقلك عم موت بالنهار الف موتة وانا بعرف انك مع وديع )
    تاليا( ماشي رح حاول وهلا لازم سكر ما بقى الا شوي وبيوصل وديع سلام )

    دخل وديع عالبيت
    تاليا( تتغدى؟؟)
    وديع( لا شكرا مو جوعان بدي احكي معك شوي )
    قعد وديع مقابيل تاليا وحط ايديه على راسه
    (انا رح طلقك يا تاليا حاولت حاولت قد ما بقدر نكون سوا نبقى سوا بس انا وانتي مو راكبين مع بعض كنت مفكر اني رح خليكي تحبيني بس طلعت غلطان كل شي بيجي بالغصب الا الحب روحي ورح اعطيكي متاخرك كامل بتبدي مشروع صغير فيه تامني مستقبلك فيه وبدي اياكي تعرفي شغلة مهمة انا والله ما قتلته لاخوكي مو انا الي بخون مهنتي وبقتل حدا بسبب مركزي وهلا قومي غيري تيابك حتى اخدك عند اهلك )

    قامت تاليا وقلبا عم يرقص فرح الي بدا اياه صار ومن دون ما هي تطلب ضبت كل اغراضا وطلعت وصلا وديع لعند اهلها وطول الطريق ما حكو ولا شي
    وقبل ما تنزل من السيارة
    تاليا ( بتمنى تسامحني وبتشكرك عكل شي ومتل ما قلت كل شي بصير بالغصب الا الحب دير بالك عحالك )
    وديع ( انا رح سافر مدة اسبوع عندي شغل وبس ارجع بمشي باجراءات الطلاق )
    تاليا( متل ما بدك )

    رجعت تاليا عبيت اهلها ومن اول ما وصلت تناقرت هي وميرفت مرت اخوها بعدا تناقرت مع سوزان وحلفت الف يمين انه وديع هو الي طلقها من حاله مو هي الي طلبت الطلاق كان وضعها بالبيت كتير مكركب وخاصة انه حتى سوزان زعلانة منها على طلاقها

    دخلت تاليا عغرفتها ودقت على مراد
    مراد( نطرتك كتير امبارح لتدقي بس ما رنيتي )
    تاليا( ايه لاني محضرتلك مفاجأة ولازم شوفلك لحتى قلك اياها)
    مراد( خلص بعد نص ساعة بشوفك بالحديقة الي كنا نلتقي فيها )

    سكرت الخط وبدلت تيابا وجهزت حالا و راحت لتشوف مراد
    مراد( يا الله قديش اشتقتلك )
    تاليا( وانا كمان لهيك عندي الك خبر حلو وديع قرر يطلقني )
    مراد( عم تحكي جد الحمد لله وكيف هيك لوافق)
    تاليا( هو لحاله هيك طلب )
    مراد( بالله وانتي صدقتيه لك هاد اكذب شخص بالحياة واحد قتل اخوكي بتتوقعي منه يتركك بسهولة اكيد بده يأذينا تاليا انا بحبك ولازم تساعديني حتى نخلص منه ويصفالنا الجو ونعيش انا واياكي بحب وهدوء )
    كان مراد ماسك ايدين تاليا سحبت ايديها من ايديه
    تاليا( بس انا بخاف شو بدنا نعمل )
    مراد ( مو انتي بتثقي فيني لا تخافي انا معك رح نقتله بدون ما يحس وبدون جريمة قتل )
    تاليا( شلون )
    مراد( بترجعي لعنده عاساس انه ما بدك تطلقي منه وبتكوني طبيعية معه ورح اعطيكي مادة سامة بتحطيها بالاكل تبعه هي المادة بعد ربع ساعة من لما ياخدها الانسان بموت وبعد بساعتين من موته بتتحلل وما بتعود بتبين بالدم وهيك لو تحلل دمه ما بيبين سبب موته
    تاليا( ما عم صدق والله بخاف ما فيني اعمل هيك شي )
    مراد( انتي ما بدك نكون سوا )
    تاليا( امبلى )
    مراد ( ها هاد حكينا )
    تاليا( وديع بده اسبوع ليرجع من سفره )
    مراد( اسبوع اسبوع ولازم بعدا تتحركي )
    تاليا( تمام ماشي)

    رجعت تاليا عاالبيت والافكار تاخدا وتجيبا بس هي بتحبه وبتثق فيه لمراد
    اتفقت عالخطة مزبوط هي ومراد واخدت منه المادة السامة
    وعم ينقضي الاسبوع وتاليا عم تخاف اكتر واكتر

    تاليا( سوزان انا رايحة مشوار صغير ما بطول )
    راحت تاليا لعند وديع عالمركز الامني
    تاليا( لو سمحت بدي اسال عن وديع بيك رجع من سفرته)
    العنصر( وديع بيك ما كان مسافر وهو حاليا بمكتبه )
    مشيت لعنده بخطوات كلهم خوف دقت عالباب ودخلت
    كانو رفقاته عنده
    وديع( تاليا شو جابك لهون )
    تاليا( بدي بلغ عن جريمة قتل )
    وديع ( جريمة وين صارت )
    تاليا( ما صارت رح تصير مراد بده اياني اقتلك وانا ما بدي والله ما بدي وانهارات بكي )

    اخد وديع اقوالها وبعت عنصرين ليلقو القبض على مراد بس مراد مو غبي وفهم انه تاليا مبلغة عنه لهيك حاول يقاوم العناصر وصار في اطلاق نار بين الطرفين وقتل مراد واحد من العناصر قبل ما ينمسك

    في المركز الامني
    وديع( وقعت وما حدا سمى عليك هالمرة يا خسيس )
    مراد( جيت وانا رافع راسي وماخد حقي وزيادة )
    وديع( طول عمري ضد ضرب السجنا بس هالمرة ولانك قتلت عنصر من عناصري بوعدك الا تتمنى الموت وما تلاقيه يا مراد
    خدوووه وشوفو شغلكن معه لحتى يعترف بكل شي )

    تاليا كانت خايفة وعم ترجف طرل الوقت وسوزان عم تحاول تفهم شو بها وهي مو قبلانة تحكي شي لتاني نهار بعتو وراها بالمركز وراحت وهي ميتة رعبة

    تاليا( اعترف )
    وديع ( هلا رح جيبو لهون وبتسمعي منه )

    جابو مراد من السجن وكان مبين على وشو اثار الضرب
    تااليا بتبكي( ليش عاملين فيه هيك ليش )
    وديع( هلا صرت بتقدر تحكي كل شي )
    اطلع مراد بتااليا ( ايه انا انا حاولت اقتله لوديع وكنت رح خليكي تسميه وما في سم ما ببين بالتشريح كنت رح ابليكي وحطا فيكي
    وانا الي تواصلت مع واحد مسجون هون وطلبت منه يقتل اخوكي
    كل شي كنت برتبله بالنتفة لما دخلتي عالجامعة بعتت ياسين عندك عالكافتيريا حتى يدلك علي وصرت حاول اتقرب منك وانا ااي ضحكت عليكي وعلقتك فيني وانا الي اتفقت مع مرت اخوكي لتزوجك اخوها وخليه يفرجيكي نجوم الليل بعز الظهر بس حظك كان قوي طلعلك وديع بالصدفة قدر ينقذك مني لك اخوكي قتل اخي وبتقلي حبك لو بايدي بحرقك وبحرق كل عيلتك )
    تاليا( العماااااا قديش طلعت واحد واطي وحقير انت واحد مريض نفسي الله لا يوفقك الله ينتقم منك )

    وهيك بتكون تاليا صحيت من كابوس مراد عرفت انه لا حبها ولا سامحها وانه انتقامه وكرهه اكبر بكتير من انه يكون انسان طبيعي يحب وينحب
    تاليا قلعت مرت اخوها من البيت ورجعتا عبيت اهلها بعد ما خبرتهن بعمايل بنتهن
    ورجعت لتعبش هي وسوزان مع بعضهن اما مراد انحكم مؤبد دفع تمن كرهو وحقدو كتير خسر وظيفته وعيلته ومستقبله لانه اخد حقه بايده وما ترك للقانون شي

    ……. بعد مرور ست شهور

    تاليا عند قبر امها بتحط ورد عالقبر وبتبكي اطلعت عاليمين لقت وديع عم يقرا الفاتحة على قبر العنصر الي قتله مراد
    تااليا( وديع )
    رفع وديع راسه ( تاليا انتي هون )
    تاليا( الله يرحمه يا رب
    كتير كان نفسي شوفك واطمن عليك )
    وديع( معقول صرت همك )
    تاليا( ليه قلتلي انك مسافر وانت بالبلد)
    وديع ( كنت بدي اياكي تراجعي حالك بموضوع الطلاق
    وانتي ليش ما مشيتي متل طلب منك مراد وقتلتيني ليه جيتي بلغتي عنه )
    تااليا( ما بدي اياك تموت)
    قام وديع عحيله ورح يشمي
    تاليا( وديع لا تمشي انا كتير محتاجك )
    وركضت لعنده وضمته

    تاليا ( احيانا الانسان بيحتاج يبعد ليعرف قيمة الشخص ليعرف قديه بحبه انا بعتذر منك عكل غلطة غلطتها بحقك )

    بعد شهرين
    وديع( كيفو ابني )
    تاليا( كتير غلبة متل ابوه هو صحيح لساته صغير بس والله طلعو الامهات بتعبو متت من الوحام )
    وديع( بدي اياه يطلع متلي ضابط كبير بالامن )
    تاليا( بالله شو لا ابني رح يكون طيار حتى يظل ياخدني معه مشاوير وسفرات )
    وديع( انا ما رح استناه لابني حتى ياخدك انا رح اخدك )
    وحجز وديع عتركيا سافرو وغيرو جو واخدو سوزان معهم حتى انه وديع خصصلها غرفة عندهم بالبيت حتى ما تبقى لوحدا
    تنيناتهن رموا الماضي ورا ظهرهن وبلشو حياة نظيفة كلها حب وامل وتسامح


  2. #2
    مساعدة ادارية الصورة الرمزية Miss.Reem
    تاريخ التسجيل
    Sep 2007
    الدولة
    حضرموت نبض قلبي و جدة أنفاس صدري
    المشاركات
    40,537
    معدل تقييم المستوى
    10

    Awards Showcase

    مزاج Miss.Reem: 68

    تسلمى يالغلا ماننحرم


المواضيع المتشابهه

  1. جاكم ضيف 00 يا الاجواد
    بواسطة ام هنوووووودي في المنتدى الترحيب بالأعضاء المستجدين
    مشاركات: 8
    آخر مشاركة: 22-10-2008, 10:44 AM
  2. شوفوا من جاكم
    بواسطة جمانه** في المنتدى الترحيب بالأعضاء المستجدين
    مشاركات: 7
    آخر مشاركة: 14-06-2007, 05:38 PM
  3. مقابله حاكم
    بواسطة aljasmi في المنتدى تأويل,(لكل عضوة رؤيا واحدة في كل اسبوع)
    مشاركات: 1
    آخر مشاركة: 12-01-2007, 01:30 AM
  4. قرد ياكل قطة
    بواسطة عالية الهمة في المنتدى صورXصور
    مشاركات: 5
    آخر مشاركة: 19-12-2005, 05:21 PM
  5. جاكم ريح الجوري جاكم
    بواسطة ريح الجوري في المنتدى الترحيب بالأعضاء المستجدين
    مشاركات: 10
    آخر مشاركة: 08-07-2005, 08:57 PM

مواقع النشر

مواقع النشر

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

أهم المواضيع

المطبخ

من مواقعنا

صفحاتنا الاجتماعية

المنتديات

ازياء | العناية بالبشرة | رجيم | فساتين زفاف 2017 | سوق نسائي | طريقة عمل البيتزا | غرف نوم 2017 | ازياء محجبات | العناية بالشعر | انقاص الوزن | فساتين سهرة | اجهزة منزلية | غرف نوم اطفال | صور ورد | ازياء اطفال | شتاء | زيادة الوزن | جمالك | كروشيه | رسائل حب 2017 | صور مساء الخير | رسائل مساء الخير | لانجري | تمارين | وظائف نسائية | اكسسوارات | جمعة مباركة | مكياج | تسريحات | عروس | تفسير الاحلام | مطبخ | رسائل صباح الخير | صور صباح الخير | اسماء بنات | اسماء اولاد | اتيكيت | اشغال يدوية | الحياة الزوجية | العناية بالطفل | الحمل والولادة | ديكورات | صور حب | طريقة عمل القرصان | طريقة عمل الكريب | طريقة عمل المندي |