السلام عليكم ورحمة الله وبركاته
عزيزاتي أعضاء وزوار منتدى بيت حواء
قرأت هذا الموضوع في منتدى واحببت ان اطلعكن عليه
لتعم الفائده
ويزيد التعاون
ربما انتم لا تدركون ماذا يعني شخصك للمجتمع
وربما يتفوه البعض بكلمة (ماحد درا عنا) حينما نطالبكم بأخذ حقوقكم وعدم مساومتكم في ابسط الأمور الحياتيه كالطعام والذي يعد اهم مصدر للطاقة بجسم الإنسان ومن دونها يفنى
عزيزي القارئ,عزيزتي القارئه
أقدم هنا رساله لكل من هو يحمل الجنسيه السعوديه او يكن الولاء لأرض الحرمين او هو مقيم على ثراها الغالي
قد نرى في الآونة الأخيره من ارتفاع الأسعار في كل مكان حولنا وأخص بالذكر "المراكز التجاريه الغذائيه"
حينما ترى حليب النيدو الذي وصل سعره 58 ريال وعلبة القشطة الذي وصل سعرها 4ريال والسكر والكوفي مايت ومنتجات الألبان والعصيرات وأنواع العجائن الجاهزه والمعكرونه"اسباغيتي" وعلى قولتهم كله كوم والرز والتمر كوم ثاني
حنا شعب ولو ان الحضاره الغربيه غزت بعض المنازل وأصبحوا يعتمدون في طعامهم على ما يعتمده الغرب من الوجبات السريعه تظل الأغلبية الساحقه لمن يفطرون على التمر ويتغدون على الرز واللحم ويتعشون على الإيدامات
خلونا نتكلم بالعامي
التجار يسرقون فلوسنا بدون وجه حق وحنا ساكتين لهم
مو معقوله هالوضع
رمضان عالأبواب ويقولون متوسط إنفاق الأسره لشراء مقاضي رمضان يتراوح بين 2000 الى 5000 الاف ريال
طيب اللي راتبه 4000 في افضل الأحوال(مارح اتكلم عن اللي رواتبهم 1500 ريال) يصرفها كلها عشان يشتري خروف بألفين ريال والباقي مكرونه وشربة شوفان يعني ما يجهز عياله للمدرسه (أزمه ثانيه) ولا يسدد فواتير الجولات والكهرباء ولا يسدد أجار البيت (75% من السعوديين بيوتهم أجار) ولا يسدد قرض البنك (مستحيل سعودي مو مقترض) ولا يعبي سيارته بنزين مع افتراض انه ما يسدد اقساطها ولا يمشي هالبزران المساكين ولا يقضي لهم كم بدله
اذا استمر وضع جشع التجار من عند المواد الغذائيه للمراكز التجاريه النسائيه للمطاعم للخياطين والكوفيرات والمستشفيات والسيارات بالصوره هذي لعشره سنين قدام
صدقوني بنصير مثل الهند
إما ثراء فاحش او فقر مدقع
وراح ينتشر السلب والنهب والسرقه والشباب الحين اللي مولاقين لهم وظايف بنلاقي اندادهم ذاك الوقت سافروا يشتغلون سواويق ومزارعين ورعاة غنم
أنا بقولكم شي شافته عيني ورب الكعبه ما هو بكذب
مره رحت مع الوالد الله يحفظه السوبر ماركت اللي عندنا بالحي بس اني جلست بالسياره انتظره
وشوي اشوف ولد عمره تقريبا 14 سنه شارد يجري بسرعه خارج من البقاله وبيده علبة لبن والهنود يطامرون ويجرون وراه
عرفت انه سرقها
بس السؤال وش اللي حد ولد ليس بصغير ولا جاهل ان يسرق لبن
اليس الجوع؟؟
انا ما اقول سرق حلاوه ولا بسكوت لأنه بيكون يسرق من فراغ
هو ما أخذ لبن عشان يشربه هو وأخوياه في الشارع
هو سرقه عشان وراه ام عجوز وخوات ويمكن اب عاجز بعد
عاد كله كوم وكلام وزير التجاره كوووووووووووووم ثاني
يقولون له الرز صار غالي قال غيروا عاداتكم الغذائيه ولا تاكلون رز
بالله هذا حل؟؟؟؟
ومن يسمع معاليه وهو يطالب الناس بتغيير عاداتهم الغذائية للتأقلم مع ارتفاع الأسعار يظن أن الناس لا تأكل يوميا غير الكافيار والسوشي والسلمون المدخن وشرائح لحم التندرليون المشوية أو الخراف النجدية المحشية ولا تطيب لهم التحلية إلا بالسوفليه والتيراميسيو!!
إلا أن قمة السخرية أن يطل عليك أحد من برج عال ليقول لك « مد لحافك على قد رجليك « وهو يدرك أن العظام قد تداخلت في بعضها ليتلاءم اللحاف القصير مع الجسد الطويل، ولكن أن يُطلب من المرء أن يكف عن الحلم حتى بوجبة أرز مطبوخ لا تكلف في مطاعم البخاري أكثر من ثلاثة ريالات فهذا غير مقبول!!..إن الناس لا تشكو يا معالي الوزير من ارتفاع أسعار الأطباق الايطالية والفرنسية واليابانية في المطاعم الفاخرة حتى تطالبهم بالبحث عن البدائل الأقل سعرا أو تغيير عاداتهم الغذائية بل هم يشكون من ارتفاع سعر غذائهم الشعبي الأرخص سعرا، والأرز بالنسبة لهم في كفة رغيف الخبز في مجتمعات أخرى!!
تذكرون العام يوم فرنسا سوت مظاهره؟
تدرون ليش؟
لأن السعر اللي كان يشترون به 4 ارغفة خبز صاروا يشترون به 3 ارغفه
وحنا يا غافلين لكم الله
يرفعون يرفعون بالأسعار وحنا ساكتين ونشتري بعد عن طيب خاطر
اين هم من قوله تعالى
وَيْلٌ لِلْمُطَفِّفِينَ (1) الَّذِينَ إِذَا اكْتَالُوا عَلَى النَّاسِ يَسْتَوْفُونَ (2) وَإِذَا كَالُوهُمْ أَوْ وَزَنُوهُمْ يُخْسِرُونَ (3) أَلاَ يَظُنُّ أُولَئِكَ أَنَّهُمْ مَبْعُوثُونَ (4)
تفسير الآيات
قوله تعالى: وَيْلٌ لِلْمُطَفِّفِينَ: أي: ويلٌ لهم من عذابِ ودمارالله غدًا، أو وادي في جهنم
يا جماعه لا تتساهلون بالريال والريالين
يقول الشاعر لا تحقرن صغيرة ان الجبال من الحصى
ولو تتخيل انك تاخذ ريال واحد لكل بقاله في المملكه
كان تنافس الوليد بن طلال
يا جماعه حنا لازم يكون لنا صوت ورأي مسموع
يعني اول شي الحلاوه الطحينيه المسرطنه وبعدين المكسرات وبعدين طيحة الأسهم لين انجلطوا الناس ولو تروح مستشفى تلاقي اهل العناية المشدده ممن كانوا بالأسهم والعقارات صار من أكبر المستحيل ان المواطن الضعيف يشتري ارض مو بيت والأصعب ان الشاب ما يقدر يعف نفسه بالزواج لان الزواج يبغاله ميزانيه تعادل اللي بيصرفه على عمره طول حياته والجامعات ماعاد تستوعب والمدارس مستأجره
والطامه اننا اكبر دوله في العالم تصدر النفط
ملخص موضوعي...........
1_ اذا رحت البقاله وشفت شي سعره مو معقول لا تشتريه لانك مارح تموت بدونه تكفون خلوا بضايعهم تخيس وتعفن عندهم
2_ تذكر إن لك أخوه في الله بمقاطعتك للبضائع ينزل سعرها وتكون ساعدتهم في معيشتهم ولك أجر بأذن الله
3_ حاول تتكلم مع اصحاب البقايل عن مقاطعة الناس يمكن يعيدون التفكير
3_ الهدف من موضوعي توعية المستهلك وإعادة الأسعار القديمه وعدم الجشع
4- اهم شي تقاطعون منتجات نستله ومنتجات المراعي ومراكز كارفور وجيان والعثيم وهايبر بنده
لأن هم اكثر ناس ينصبون على المستهلكين
وشركة المراعي ناويه ترفع اسعارها 10% وفوق في مطلع 2008 على الأسعار الغاليه الحين
ياليت نرسل مسجات بالجوال وبالإيميل لبدئ المقاطعه الجماعيه لتعم المصلحة العامة
الموضوع لي انا .................
واتمنى نشره لتعم الفائده
دمتم بود عزيزاتي
مواقع النشر