بسم الله الرحمن الرحيم
قصتي هالمرة طويلة ولا أدري ابدأ بها من أين ولكن والله حرصاً مني على من يقرأها لعله يعتبر
ولا يدخل نفقاً مظلما من القروض و لا يظلم نفسه ولا أولاده وزوجته معه ....
حبيباتي وأخواتي ........ اسمعن واعتبرن
منذ بداية زواجي وإنجابي للأبناء والبنات حمل زوجي على عاتقه توفير المعيشة لنا جميعا أنا والأولاد
فأنا ربة بيت لا أعمل تزوجت صغيرة وأكملت دراستي حتى وصلت بداية دراستي الجامعية وعندها توقفت
عن الدراسة بسبب أبنائي وتربيتهم لأن همي الأكبر والأهم أن لا أدع أبنائي بيد خادمة تربيهم كيفما شاءت
ووضعت نصب عيني الأجر والمثوبة والدين والأخلاق وغرسها فيهم لذلك تنازلت عن مستقبلي مقابل مستقبلهم
.
.
وضعنا أنا زوجي خطة مستقبلية لحياتنا وهي بناء منزل مستقل لنا والتخلص نهائيا من هم وعبء الإيجارات
وتوفير عيشة رغيدة نوعا ما لحياتنا
وبدأنا ذلك مبكرا حتى لا تزيد علينا أعباء الحياة من كبر الأولاد وزيادة متطلباتهم واهتماماتهم
فكنا نوفر ونجمع الألف على الألف والريال على الريال وكان زوجي يعمل عملا إضافيا مع عمله كمدرس
في مجال العقارات وبيع وشراء الأراضي وبدأنا ذلك بقرض من بنك الراجحي بضمان الراتب وهكذا
وظللنا سنينا عدة نناضل ونناضل.....
فكنا نحرم أنفسنا من كل ما هو كماليات و زخرفات تعتبر غير أساسية حتى نستطيع تحقيق حلمنا الكبير
في بناء منزل الأحلام ....
والحمد لله تم ذلك بعد توفيق من الله ثم أيضا بقروض وبيع سيارة وشراء سيارة وهكذا
ولكم كم كانت فرحتنا كبيرة لا توصف عندما اشترينا الأرض وبدأنا نشاهد منزلنا يرتفع طوبة طوبة
وكم كانت سعادتنا غامرة بدخول العفش للبيت و المبيت فيه لأول ليلة كيف لا ونحن من خطط ورسم
ووزع الغرف والحمامات أجلكم الله و أنتقى لون الجدران والرخام ولون النوافذ وشكلها وحتى أدق التفاصيل
من لمبات وأفياش وجبس وكل شيء حتى الأسلاك ...
كل هذا ونحن نسير على الخطة المرسومة التي قدر الله لها الظهور إلى النور بفضله وحده عز وجل
ومرت سنتين على انتقالنا للبيت الجديد وإزدادت أحوالنا في النماء والرخاء ...
حتى بدأ زوجي يدخل في سوق الأسهم ويضارب فيه ويحصل مكاسب لا بأس بها
فكان سعيدا ومسرورا من هذا المكسب السريع والسهل فأخذ يبيع الأراضي التي يملكها ويتشارك فيها
مع والده ويجعلها سيوله يدخل بها السوق ومرة يخسر و عشرة يكسب فكنت أقوله : يكفي هذا المكسب
أخرج من السوق ولا تدخل مرة ثانية وهكذا أخذنا سنة تقريبا
إلى أن جاء يوم النكسة وبدأت الأسهم تتراجع تراجع خطير جعل كل ما يملك زوجي في السوق ينزل وبدل المليون
صار تقريبا 200 ألف وهكذا وكلكم تعرفوا ايش صار في سوق الأسهم قبل خمس سنين تقريبا طلع ونزل وطلع ونزل
ونفض الناس تنفيض ما بقى في جيوبهم إلا رواتبهم وبس
وبدأت تظهر مشاكل جديدة في أسرتي زوجي صار زي المجنون ويبغى يعوض خسارته باي طريقة حتى لو يطلع
قرض جديد ...
ياربييييه ايش العمل
مالي حيلة غير أصبره وأهديه وأنصحه لكن مافي فايدة لأن كان متشارك مع أبوه
في الأسهم و ضاعت فلوسهم كلها فطلع بفكرة جديدة ومتهورة جدا وهي إنه يبيع البيت أو يرهنه عند بنك
هذيك الساعة خلاص حسيت إني في خطر ولو ما وقفت وقفة شديدة بيضيع كل شيء .......... أخذت مساحة
من التفكير وشوي من الجدية ودخلت عليه دخلة قوية وقلت له هذا بيت العمر وبيت أحلامي وتعبي معاك
وأصريت إصرار شديد وتمسكت ببيتي ورفضت التنازل عنه وحاولت طبعا أقنعه بشتى الوسائل والسبل لأني في الأخير
بيقولي هذا تعبي وشقاي ولا لك فيه حتى جدار
فمرة أشد ومرة أرخي مرة أجيب له عبر وقصص من الناس
اللي رفسوا النعمة برجولهم وكيف يتغربلوا في الدنيا بعد ما باعوا بيتهم وراحوا للإيجارات
وحاطة يدي على قلبي من الخوف
إلى أن جاء زبون يبغى يشوف البيت عشان يشتري وكان زوجي واقف معاهم وهم يدوروا من غرفة لغرفة
وانا خلاص بموت من القهر بس أبغاه يقتنع إن حرام يفرط في حلم السنين ........
وكنت أحاول أحتويه هذيك الأيام لأن حالته النفسية بسبب الخسارة تقريبا صفر
وياربي لك الحمد بعد ما خرج الزبون جلس يقولي قلبي يعورني على بيتي لا لا خلاص ما راح أبيعه
وبطلع قرض صغيرون من البنك أضارب فيه في السوق وأرجع خسارتي شوية شوية ومع الراتب يساعدني
في مصاريف البيت وتسديد قسط البنك ,,,,, والحمد لله أقتنع من نفسه
ورجعنا زي أول نجمع الألف على الألف عشان نقدر نسدد القروض اللي علينا و الباقي من الراتب مصروف
الشهر لنا وللعيال والحمد لله على كل حال المهم إن زوجي خرج من هذي الأزمة وهو طيب وسليم
وبيتي كمان سليم والحمد لله لو ما صبرت عليه وحاولت أتمسك في رأي كان الحين مع إرتفاع الأسعار
في الإيجارات وكل شيء حولينا ما قدرنا نعيش أبدا
يعني الواحد مستور في بيته حتى لو يأكلها عيش وملح ولا تميس وفول هي رضي وخير وقناعة
.
.
نسيت أقولكم بعد فترة سنة على هذي الأزمة كان زوجي يصلي في مسجد فقابل واحد من أصحابه
القدامى وكان زيه يضارب في الأسهم وعنده خير ماشاء الله وعمارة يسكنها هو وأهله جديدة توه فرحان فيها
المهم لما اتقابلوا قعد يسأله كيف عدت الأزمة عليه وكيف اتصرف فيها فقاله إنه خسر كل شيء وحتى عمارته
باعها عشان يبغى سيوله في السوق بالأخير ضاعت زي ماضاعت الفلوس والحين لا بيت ولا فلوس مسكين
الله يهون عليه .......
فرجع زوجي لللبيت وهو يقول والله مسكين الرجال مهموم ويحزن فاستغليت الفرصة وقلت له كنا راح نصير زيه
وفي نفس الحال لو بيعنا البيت وعلى قولة المثل موت وخراب ديار .....
فقالي ياربي لك الحمد إنك أصريت وأتمسكت بحقك وحق عيالك و لا الحين كان صرنا لا بيت ولا فلوس
حتى لما ارتفعت الإيجارات والناس صارت تشتكي منها احنا كلنا نقول الحمد لله إننا ما أقدمنا على هذيك
الخطوة المتهورة ولا كان خسرنا كل شيء ....
الشاهد من القصة إن الإنسان يصير قنوع ولا يطمع في كل شيء ويعرف كيف يدير أموره بروية وحسن تصرف
على قولة المثل المشهور لا تضع البيض كله في سلة واحدة
الحمد لله الآن أمورنا مستقرة وماشي الحال
.
.
طولت عليكم بس هذي تجربة عمري ماراح أنساها أبدا
.
.
محبتكم أم معاذ
مواقع النشر