نصيحة من رجل إلى المقبلات على الزواج؟؟

[القران كتابي]

ثانيا : اسأل الله لك التوفيق في الدنيا والآخرة .. والمسألة سهلة وبسيطة وكل تجربه زوجية مختلفة فلا يوجد تجارب متطابقة لكن توجد نفسيات متقاربة فالرجال للرجال اقرب والنساء لأخواتهن اقرب .. ولايعني فشل شخص ما في حياته انه قد فشل للأبد وانما قد تكون انطلاقه له او لها نحو نجاحات اكبر وذلك كله من تقدير الله سبحانه وتعالى . وقبل كل شي .. لازم المسلم والمسلمة يربطون حياتهم بالله سبحانه وتعالى حتى يوفقهم وييسر امورهم .. والله كريم

أولا .. وقبل كل شيء الرجل يتصور ان الحرمة راح تكون زى ما يبى هو وليس كما تريد هى ..



1- لاللدخول بنفسية المحارب التي فيها منتصر ومهزوم .. فكما للرجل سلاحة وأمره ونهيه في بيته فان سلاح المرأة هو اقوى وهو انوثتها وتقديم العمل الطيب منها ..
والكلام اللين يغلب الحق البين .. وشبابنا الغالب فيهم مخالطة الشباب امثاله والتعامل بينهم قاسي كما هي حال الشباب مع بعض ولازم له فتره يتعلم كيف يتعامل .. فالله يكون بالعون

2- اذا رجع من عمله او من أي مكان يتمنى مايسمع كلمه وين كنت او نظرة عتاب على تأخره واذا تم الترحيب به واستراح ..
مباشرة يبدا يتكلم بكل شي الى حتى يصل مرحله الهذر لانه يتكلم من تلقاء نفسه بدون تحقيق وتقصي .. لانه غالبا تكون الشمس حارقته وتعبان وسايق تحت الشمس فالنفسية زفت .

3- سؤال تسئله أي زوجه لزوجها "هل تحبني" هو كسؤال حلو لكن الاكثار منه يتعب ..
وهو يحبك فلو كان مايحبك لما تزوجك والزوج دائما يظهر حبه بتقديم الاشياء والشراء والرجل بشكل عام ضعيف من ناحية بناء الكلام لكن اذا استراح بدا يتكلم ويتلكم ويقول كل شي ..
وبشكل عام الرجال بسييييييييييط بس يبي له فهم

4- المقارنات .. هذي سالفتها سالفه فكما تكرهين ان يقارنك باخواته او قريباته فانه يكره تجيبين له طاري فلان زوج فلانه اللي سوا وسوا لانه راح يعتبر هذا استنقاص من قدره وان تظاهر بالسكوت لانه احيانا مايقدر يصير زيهم مثل اللي تقارن زوج حديث الزواج والوظيفة بواحد ثري مليونير وهذي مقارنة مجحفة .

5- الوالدة لها قدرها ومقامها لكن نظرة الرجل تختلف بشكل كامل عن نظرتك لأمك .. ولااااااازم يفلتر كل كلام يجي من الام او احد الاخوات صح يبون مصلحتك لكن انتي اعرف بالرجال منهم كلهم وتجربة امك لاتعني انه لازم تعيشينها تماما لان العمر والوقت غير والتفكير مختلف ..

6- لاتطلعين عن بيتك الا كل خير وقولي دايم الحمد لله ولاتدخلين بتفاصيل واستري على مشاكلكم لان اذان الناس تحفظ المشاكل وبس ..
ولو قلتي لاهلك كل مشاكلك توقعوا ان حياتك سيئة والكلام هذا غير صحيح .. لان فيه ساعات حلوة بس الواحد مايعلم بهن احد .

7- في حال وجود مشكلة لاقدر الله لاتحرصين على التصعيد وان تصعدت دخلي فيها الرجال العااااااااقل لان غالبا تعامل الحريم مع رجال البنات يؤدي لمشكلة كبيرة والكلام هذا اقوله من واقع تجربتي

8- امه امه امه .. تراها ام وانتي زوجة .. واي معركة معها انتي الخسرانة .. لاوبعد قولي امك احسن شي ولاتجيبين سيرتها الا بالزين واذا كسبتيها تراك كسبتي الولد اكثر واكثر لانه اذا فكر يزعلك قالت له امه اعقل ترا البنت عاقله وماشفنا منها الا الخير فتكون لك صمام امان ,,

9- الحرص على ماله لان رجال هالوقت مايدري من ويجيه الطق .. من قسط السيارة ولا ايجار البيت ولا من المصاريف والغلا الفاحش بكل شيء واخيرا همه الكبير ببناء بيت يأويه مع اسرته وظروف اليوم غير اول بكثيييير

10- تذكرى انك داخله على رجل له حياة حرة قبلك لذا كنى حذرة فى فرض نفسك عليه بفرض الواقع لكن افرضى نفسك بحسن تعاملك معها فى كل احواله اتركيه حتى يصل مرحلة انه مايستغني عنك ابد ويعتمد عليك بعد الله في كل حياته وقديما وحديثا قيل ورا كلللللللللل رجل عظيم امراة ..

11- اخيرا .. لاتنصرفي عن هواياتك وصديقاتك وتتركينهن بالكلية وتعودي تكوني لوحدك في حال خروجه حتى ماتتعلقين فيه كثير فيتعب اذا رجع وتصير نفسيتك مشحونه عليه لانك تحسين انه تركك وهو قد يكون مشغول او رايح يجيب اغراض لبيته وكل رجل يضع بيته في قمة اولوياته

وقبل كل شي التوفيق من الله سبحانه وتعالى .. وكل ماازدادت ثقة المسلم بربه حقق له مراده ووفقه لكل خير .. وتفائلوا بالخير تجدوه

م/ن

[قلب راض]

نصائح راقية وفي قمة التوعية
وكل النقاط فيه من الأهمية بمكان رغم بساطتها وسهولة الإلتزام بها,
نأمل أن تثمر تجاوبا لدى البنات المقبلات على الزواج (والنساء المتزوجات),,
لك كل الشكر على هذا الموضوع النصوح التربوي
جزاك الله خيرا

[&شمـــوووـــخ&]

نصائح رائعه بارك الله فييييييك على النقل

[دموع التوبة]

- المقارنات .. هذي سالفتها سالفه فكما تكرهين ان يقارنك باخواته او قريباته فانه يكره تجيبين له طاري فلان زوج فلانه اللي سوا وسوا لانه راح يعتبر هذا استنقاص من قدره وان تظاهر بالسكوت لانه احيانا مايقدر يصير زيهم مثل اللي تقارن زوج حديث الزواج والوظيفة بواحد ثري مليونير وهذي مقارنة مجحفة .


اما هذه فمن اكبر المصائب و التى تجلب في كثير من الاحيان هدم الحياة الزوجية بين الاثنين و ذلك بان تصف المرأة حسنات رجل اخر سواء بالخلق او المال او اي شيئ اخر مما يجعل الشك يدخل لقلب الرجل و يشعر بالنقص تجاه نفسه و طبعا التوفيق اولا و اخرا من الله سبحانه و تعالى و من ثم بحكمة المرأة على تداري الكثير من الامور و تعاون زوجها معها جزاك الله خير اختي الغالية في الله على النصائح و قد تم التقييم غاليتي