جولة مصورة لمدينة أورلاندو, فلوريدا "مدينتي في غربتي"
السلام عليكم ورحمة الله وبركاته
اليوم انشالله قررت اخدكم جولة في مدينتي اورلاندو في ولاية فلوريدا الأمريكية,, فأهلا وسهلا بكم
هدا اول موضوع لي في المنتدى العزيز على قلبي..
حياكم الله جميعا في جولتنا أتمنى تنال اعجابكم وتسفيدوا انشالله..
نبدأ اول شي بالمساجد اللي في اورلاندو..
طبعا زي ما انتوا عارفين امس كان الجمعة بارك الله لكم فيها وفكل ايامكم,, رحنا الصلاة وقلت لازم اوريكم اعز مسجد على قلبي في البلد.. اللي هو "مـــســـجـــــد الــــحـق"..
يعتبر مسجد الحق انه مسجد الداون تاون
دا المسجد رغم بعده عن بيتنا وكمان رغم وجود مساجد تانية اقرب لنا الا اننا مره نحب نروح نصلي فيه الجمعة..
اللي يعجبني في انه كله امريكان واكتر شي طبعا الإمام واسلوبه في الخطبه أكـــــتـــــــر من رآآآئع ماشالله عليه.. اسلوبه زي اسلوب الشيخ حمزة يوسف ماشالله..
و هذه صورة له..
وايضا في مساجد كتير ولله الحمد عندنا,, منها مسجد الرحمن, مسجد الرحيم, مسجد النور, مسجد العزيز, مسجد القدوس, مسجد السلام, مسجد الملك, مسجد الجبار ومسجد الحكيم.. انشالله ما اكون نسيت شي..
تاني شي المطاعم الحلال..
نسبة المطاعم الحلال ولله الحمد تعتبر كبيرة,, في منها العربية والهندية والباكستانية والتركية..
من افضل المطاعم الهندية مطعم اسمه مغل Moghul ..
أكلاته مره لزيزه واسعاره كمان مره حلوة..
واحلى شي عندهم وقت الغدا يكون بوفيه مفتوح وممكن كمان تطلبي من المنيو لو تحبي.. لكن اصناف الغدا من افضل اصناف المنيو.. من جد مكان ولا اروع.. يم يم مره اشتهيته..
وهدي صورة اكلاته...
للأسف كانت عندي صورة له من خارج المطعم لكن ما حصلتها..
ومن المطاعم العربية,, في مطعم اسمه القدس في منطقة كيسيمي.. برضه من افضل المطاعم العربية..
ايضا اسعاره حلوه واكلاته مره لزيزة..
عندهم يوم الجمعة بعد الصلاة بوفيه مفتوح مررررره لزيزه اصنافه ماشالله وسعره كمان مره حلو,, وممكن كمان تطلبي من المنيو لو بدك شي غير..
ومن المطاعم التركية في مطعم البسفور في منطقة وينتر بارك .. دا المطعم مستواه ارقى من المطاعم اللي اتكلمت عنها توي..
اسعاره عالية شويه,, لكن اكلاته لايعلى عليها من ناحية الاكل التركي ماشالله..
دا كان طبقي اللزيز,, كباب دجاج و رز بالشعيرية.. يمممم
وفي كمان مطاعم كباب وفلافل وشورما << كدا اساميها.. وفي تلاتة مطاعم مختلفه عن بعض اسمهم حبيبي...!!
هذه كانت المطاعم مع نبذة بسيطة عنها..
***
دحين البقالات والمخابز العربية..
المخابز هوا مخبز واحد رئيسي يخبز يوميا ويوزع عالبقالات.. اسمه "مخبز علاء الدين"..
والبقالات برضه في الهندية والعربيه,, في منهم تجي البقالة مع المطعم زي مطعم القدس اللي ذكرتلكم هو في كمان بقالة..
وفي ايضا بقالة اسمها " ابو ماهر " هدي اللي نلاقي عندها دايما اي شي عربي حلال نحتاجة.. حتى عندهم دجاج ولحم فريش ومفرزن حلال..
وفي كم بقالة كمان منهم مع المطاعم ومنهم لا.. وهما "ميديل ايست", و بقالة "سوق القاهرة"..
وانشالله ما اكون نسيت شي...
*******
نجي دحين لأحلى شي عند كل نساء الكون.. الـــــتـــــــسوق....!!
طبعا في مولات مره حلوة منهم ميلينيا مول
ومن الداخل في النهار..
..
وفلوريدا مول طبعا اللي يميزه انه فيه عالم ام اند امز.. وحأتكلم عنه بعد شويه..
و اورلاندو فاشن سكوير,,و ألتمونت مول وكمان كتير مولات تانية..
هدي كلها مولات حلوة مره ومحلاتها حلوة,, لكن زي المولات عندنا كلهم نفس المحلات تقريبا..
الفود كورت في كل واحد منهم مررره حلوة ومطاعمهم جدا متنوعة وفي منهم فيها مطاعم حلال سواء هندية او عربية..
وفي كمان مطاعم اسيويه هدول لمن نجي من جمبهم ولأني لابسة حجابي يقولولنا انه حلال!!
لكن ما اصدق,, لانه لمن نسألهم ايش يعني انه يكون حلال,, ما يعرفوا يجاوبونا...!! وفكرتهم انهم يسوقوا لبضاعتهم..!
لـــــكـــــــــن نجي لأفضل مكان تسوق.. وللعائلة كلها..
اللي هو اورلاندو بريميوم آوتليت و اورلاندو برايم آوتليت..
هدا عندي افضل مكان للتسوق وبدون منازع..
لأنه في ماركات عالمية كلنا نحبها وبأسعار مخفضة جدا جدا جدا..
في الويك اند يجوا الناس من كل العالم عشان يقضوا مقاضي السنه كلللللها...!!
اسعارهم جدا حلوة,, والاهم انه مو زي باقي محلات التخفيضات,,, انه تكون خلصت موضة الكوليكشن فيبيعوها برخيص,, لأ.. كلو جديد وكلو بيكون موضته طالعة قريب وخاماته ولا احلى..
وبأسعار احلى واحلى.. فنصيحة لكل اللي يجوا ويبغوا يتسوقوا... الآوتليت خليه اول نقطة تسوق وان ما لقيتوا كل اللي تحتاجوه روحوا بعدها المولات...
وعلى فكرة صح في منه فرعين,,, لكن محلات كتييييييير منها متكرره.. يعني لازم تروحوا الاتنين..
ودا كان تقرير الشوبينق,, انشالله تكونوا انبسطتوا..
*******
دحين نجي للترفيه في اورلاندو...
طبعا ما يحتاج نقول,, لكن للتذكير اولاندو اول وجهة عالمية للسياح من ناحية الترفيه...!!
ومعلومة كمان: ان من الـ 15 منتزة الأكثر زيارة في العالم 7 منها في اورلاندو.. والباقي 8 موزعة على عدة دول في العالم..!!
ففيها ديزني وورلد,, و يونيفيرسال ستوديوز,, والـ سي وورلد,, وعالم ام اند امز..
وكمان اشياء كتير تانية حأكلمكم عنها..
اول شي عالم ديزني..
لكن خليني اوضح نقطة في البداية..
اللي هيا انه اورلاندو فيها ديزني وورلد,, اللي هوا عالم ديزني.. ولــــيـــــســــت ديزني لاند..
لأنه عالم ديزني يتكون من اربعة باركات مختلفة..
اللي هما..
مملكة السحر.. Magic Kingdom
اجمل الباركات.. وفعلا ســــــــاااااحرة..
ما يميزها وجود قصر سيندريلا الرآآآئع.. ويعتبر من اكتر الباركات اللي ممكن تتصور في مع الشخصيات.. لانهم اكتر شي يتواجدوا هنا..
استوديوهات هوليوود.. Disney's Hollywood Studios
هنا في كتير من الاستوديوهات يوضحولنا الطرق التصوير.. بعضها اماكن فلا اتصورت فيها اشهر افلام ديزني..
وتعتبر اكتر بارك للألعاب ايضا,, ومن اشهر هدي الالعاب هوليوود تاور.. <<< مرررررره حلوة..!!
وفي عروض مره حلوة لبعض الافلام.. وعموما هدي العروض متوزعة على جميع الباركات...
منها عرض مسرحي لفيلم نيمو.. وسيمبا.. وعلاء الدين.. وعروض اخرى جددددا رآئعة ولا تفوت..
و مملكة حيوانات ديزني.. Disney's Animal Kingdom
هدي عالم حيوانات رآئع,, تعتبر حديقة حيوانات لكن بطابع ديزني..
من احلى ما فيها الرحلات البرية اللي تاخدنا في بيئة زي وسط براري افريقيا ونكون فعلا في وسط الغابات والحيوانات من حوليننا كأنها في بيئتها الاصلية.. دا مكان من جد نمشي ونقول سبحان الله...!!
لعبة قطار الموت.. قمة ايفريست..
صورة من احد الرحلات..
ايبكوت.. Epcot
دا البارك عبارة عن جولة حول اشهر مدن العالم,, وابراز اجمل ما يميز كل مدينة منها..
هو في وسطه يوجد بحيره جدا كبيرة حولينها المدن..
مثلا في ناحية فرنسا,, كان في مخبز لجميع انواع المخبوزات الفرنسية الشهيرة وطبعا ريحته قاااتلة مررررره حلوة وجدا مشهية..
وكمان طبعا في تمثال لبرج ايفل, ومحلات تبيع اشهر العطور الفرنسية...
ومن احلى ما فيها انه المباني على الطراز الفرنسي الاوروبي القديم... << من احلى المدن في ايبكوت..
وكل مدينة زي كدا تكون مبنية بطابع بلدها,, وفيها محلات تبيع اشهر ما عندهم..
وكمان في كل مدينة في مطعم او محل حلويات او مخبز للي تتميز به هدي المدينة.. حسب ما تشتهر به,, لكن الكل فيهم مطاعم..
..
وفي كل الباركات -ما عدا مملكة حيوانات ديزني- كل ليلة عرض ألعاب نارية ساحر ويستمر من 15 دقيقة إلى 30..
وهدي كانت جولتنا في عالم ديزني..
****
يتبع...
رد مع اقتباس
مواقع النشر