[OVERLINE][OVERLINE][/OVERLINE][/OVERLINE]السلام عليكم ورحمة الله وبركاته
حبيت أشارككم تجربتي في التخلص من الفئران والحمام
أول شيء عن الفئران أنا ساكنة ببيت ملك وجنبنا أرض خلاء ، سكنا بالبيت وهو ماخلص تشطيب الدور الثاني وكل ما نشطب نرمي المخلفات بالأرض الخلاء وهي أصلا ملكنا لكنها مرهونة فما قدرنا نبني عليها المهم كل ما نشطب تدخل الجرذان البيت ، استخدمنا الغراء اللي يكون على شكل لوح مربع ونضع عليه جبنة تشدر بوسطها وعلى طول تمسك الفئران الصغيرة أما الكبيرة فما نفعت أبدا ، استخدمنا السم اللي لونه وردي أكل منه ولا مات ولا شيء وصار ما يقرب منه ، وفي الأخير اشترينا مصيدة حديد من محل الأدوات الصحية للحمامات ب 15 ريال ووضعنا جبن ولا في فايدة وبعد كذا قرأت بالنت إنه نضع خيار طازج ووضعناه وماشاء الله ساعة والفار في المصيدة بعد معاناة أسابيع ، ومسكنا بالمصيدة جرذ حجمه كبير جدا كأنه قطة كان شكله مخيف جدا بس الحمد لله مسكناه ، حاولت أستخدم الجهاز اللي يصدر ذبذبات بس سمعت وقرأت إته ما ينفع إلا لشهور بعد كذا يفقد فعاليته والله أعلم .
ثاني شيء الحمام وقصتي معاه قصة ، الحمام كان يبني عشه على شباك حمامي وفتحة المروحة فوق الشباك يعني عشين غير العش اللي فوق المروحة على حافة جبس بارزة غير العش اللي على شباك حمام زوجة أخويا وهي ساكنة فوقي يعني أربع أعشاش فوق بعض وهذا كله فوق مدخل جانبي للبيت بالحوش ، وهذا المدخل صار كله وسخ حمام على الدرج وتحته وحواليه والجدار كله من السطح للأرض وسخ حمام ، يعني معاناة بجد ، وأولاد اخويا يصابو بأمراض غريبة أنا متأكدة إنها من الحمام ، حاولت مرة أطير الحمام من شباك حمامي فطار الحمام وترك فرخين صراحة حسيت بالذنب فأخذتهم وربيتهم حتى كبروا وطاروا ، وبعد كذا وضعت خشب بمسامير رجعوا الفرخين وعششوا بالمكان على المسامير ولا كأنه في شيء فتركتهم وما أدري باللي حيصير ، بعد سنين من تعششهم عند شباكي زادوا حتى صاروا أربع أعشاش وتجمع الوسخ على الشباك حتى وصل النص غير الحشرات فقلت خلاص لازم أطردهم والله يغفر لي ، قعدت أنا والشغالة يوم كامل وأنا أنظف فيه هو والمروحة فكيتها قطعة قطعة ونظفتها بعدين بخيت المكان يالديزل ونظفت الشباك بعد كذا رشيته بالكحول للتعقيم وبخيت الجدار خارج الشباك بالديزل وكل كم يوم أبخه بالديزل وما شاء الله العشش الثلاثة كلها تدمرت وراح الحمام كان يحوم حواليها لكن أول مايشم الديزل يهرب وصرت حاسة بالنظافة لأول مرة ، واليوم لقيت قمري بيبني عش عند شباك غرفة أخوي رميت العش وبخيت المكان بالديزل ولا أظنه بيرجع إن شاء الله ، الحين أفكر أجمع علب ببسي وأنزلها بحبل يخوف الحمام حتى أتاكد مايرجع.
آسفة على الإطالة وأتمنى تستفيدوا من تجربتي وهذه الافكار كلها أخذتها من تجارب ناس بالنت ، وهدفي إنه أبين إنه مو لازم أتخلص منهم بوسائل غالية ومكلفة إنما ممكن بوسائل رخيصة والله يوفق الجمبع
رد مع اقتباس
مواقع النشر