[وداد محمد]

السلام عليكم ورحمة الله وبركاته
خالتكم وداد تسلم عليكم وتبغى تديكم المفيد في هذا الموضوع المهم جدا

شوفوا يابنات قبل ما أتزوج كان وزني دائما 60 كيلو وأنا طولي 165...يعني وزن جيد مع إني كنت كثيرة الحلويات وكثيرة الحركة (طلوع ونزول 4 أدوار كل يوم عدة مرات/كل مايرن جرس الباب أجري افتح/كل ما أمي بغيت شي نطيت وجبتو؟أمشي مشاوير طويلةبدل ركوب السيارة)وطبعا اللي ساعدني كمان إن سرعة الإحراق عندي قوية!!شباب....آه الا ليت الشباب يعود يوما!!

المهم علشان ماأكتر عليكم الكلام..بعد الزواج والإنجاب بدأت الشحوم تتراكم...مازاد أكلي ولاشي زي ما هو بس الحركة؟؟محدودة من المطبخ للنونو ومن الغسالة للكوي!!المهم طبعا واتعديت ال25 سنة يعني خلاص الإحراق صار بطيء جداً........

المشكلة إني ماغيرت اسلوب الأكل خاصة الحلويات مع تغيرالإحراق وقللت من الحرق الخارجي اللي هو المشي والحركة...بدأت الشحوم تتراكم وماخليت بالي إني أخلص من أول 5 كيلو لاء استنيت لما صاروا 10 وبدأت ريجيم!!

[وداد محمد]

لاء ومتحمسة !! ريجيم ورياضة وحماااااااااس......ونقصت خمسة كيلو!!
المشكلة إني استمريت على الريجيم لمدة شهر وبعدين رجعت ريما لعادتها القديمة..فرحت بالكام كيلو اللي نقصتهم والفستان اللي رجع صار مقاسي...لاحظتو هو اللي صار مقاسي مو أنا اللي رجعت كم مقاس لورى...المهم..بدأت الكيلوات تتسرب وتزيد شوية شوية وأختكم في الله ولاتغير في طريقة أكلها برضه شوكلاتات اشكال ألوان وبيبسي وقلة حركة...وي مو كفاية البزورة وغلبهم وشغل البيت؟كمان انحرم من الحلى؟؟
المصيبة يابنات إني أبدعت في عمل الحلويات والطبخات من كل أنحاء العالم وطبعا لما أطبخ أذوق الملح واذوق في نص السوى واذوق لما يستوي خلاص....في حركة زيادة علشان أحرق ده كله؟؟أبدا والله......والمصيبة الأكبر إني كل ما أولادي خلوا أكلهم أكلت الباقي...وي! حرام ينكب!!

[وداد محمد]

صرت كل ما أزيد كم كيلو أعمل ريجيم قصير المدى وأعمل معاه شوية رياضة...وأرجع لعاداتي القديمة....

وكلما أحتست لجأت لوصفة سحرية....كلما سمعت عن وصفة جربتها..... حتى ملعقة خل تفاح في موية كل يوم على الريق إلين اتخرقت معدتي!!

على فكرة ماكان عندي خادمة طول هذه السنين يعني شغل بيتي وأولادي علي لوحدي!!

المهم دخلت العقد الرابع من عمري واصبح عندي اربع أطفال وخبرات طبخية رهيبة ومعاها تذوق أشد رهبة...وزادت الكيلوات وزاد البحث عن الريجيمات السحرية.....
الشوربة السحرية...الخل مع الماء....الليمون والماء...الشمر......الخ

ليش ماودت الكرش؟؟؟؟؟؟؟؟؟؟؟؟؟

لأني أكلي كتير وحركتي(مو الحركة العادية حقت شغل البيت) قليل!!
اللي يدخل لازم يكون أقل من اللي ينحرق علشان ينقص الكرش!!

[وداد محمد]

المهم قعدت اشتري كتب ريجيم بالعربي وكتب ريجيم بالإنجليزي......آخذ وصفات من هنا ووصفات من هناك وصفات سحرية وصفات سريعة.......ريجيم برياضة..ريجيم بدون رياضة..ريجيم الشوكلاتة من جد هناك ريجيم بريطاني اسمه ريجيم البنت الشرهة كل وجبة لكي حبة سنكرز أو مارس أو كادبوري وبس....برضه ينقص كم كيلو ولما أرجع لنظامي العادي وزني يرجع زي ماكان وفوقه هدية اتنين تلاتة كيلو!!

آخر شي زهقت وجبت الفديو حق الرياضة حق جين فوندا واستمريت تلاتة شهور مع ريجيم معتدل راحت الكرش وخسرت 10 كيلو.......
النتيجة اللي داخل للفم لازم يكون أقل من اللي بينحرق(بالرياضة أو المشي)......

أووووووبس!! رجعت ريما لعادتها القديمة.....شوكلاتة وأكل في غير المواعيد والرياضة وقفت ورجع الداخل أكتر بكتير من الخارج ورجع الوزن زي ماكان....لا ولله أكتر واكتر

[وداد محمد]

بنتي الكبرى كبرت وصارت تساعدني في شغل البيت وجبت شغالة لأن ضيوفنا صاروا كتير وطبعا قلّت الحركة بالنسبة لي....يعني قلّ الإحتراق ...بس الحلويات زادت....آه من الحلويات هي سبب البلاء..هذا بالنسبة لي كل واحدة عارفة نقطة ضعفها...في ستات مصيبتهم المعجنات وفي الرز وفي الشيبس والبيبسي....


كل واحدة تراقب نفسها وتشوف كرشها جا من فين؟؟


كوني صادقة مع نفسك وسجلي كل لقمة بتحطيها في فمك كل يوم لمدة أسبوع وبمراجعة سريعة تعرفي كرشك إيش سببها!!
وإذا عرف السبب بطل العجب!!


وللحديث بقية......

[وداد محمد]

عملت حسبة بسيطة واكتشفت إن الحلويات اللي أحبها تحتوي على دهون......همممم يعني دهون وسكر وأحيانا دقيق...يادي المصيبة!!
لذلك قررت أتخلص من سبب بلواي...وبما إن إرادتي ضعيفة جدا أمام الحلويات ......حلفت إني ما آكل حلويات حتى أنقص 10 كيلو


وفعلا هذا اللي حصل وصرت آكل أكلي العادي - أمي لاحظت من زمان إن كمية الأكل عندي مش أكتر من اللازم وتقولي يابنتي بس أكلك مو شي إيش اللي متخنك كدة؟؟

المهم حبيباتي.....استمريت 9 اشهر على الحلف وإذا مرة اشتهيت حلى أكلت حبة تمرة والا زبيبة والا شي بالسكارين...وأكلي عادي رز وسمبوسك ومعجنات...بس زي ماقلتلكم أصلي أنا والموالح مو شي...يعني كمية أكلي منهم فعلا قليل وطبعا كنت أمشي كل يوم ساعة ماعدى يومي الخميس والجمعة!!

نقصت العشرة الكيلو وفرحت


وخلصت من مدة الحلف........ورجعت ريما لعادتها القديمة...أول شيء بس اذوق من دي لقمة ومن دي قطمة...إلين رجعت زي زمان وتركت المشي لأسباب صحية(مو عذر - كان عملت تمارين على السرير...بس كسل يالطيف!!)

النتيجة؟؟

رجع الوزن كله مرة تانية

[وداد محمد]

قصص وعبر وحكم من الذين يحبون الرشاقة:
*شغالة بنت خالي من تايلاند تلبس البنطال تحت الفستان وسالتها ليش؟قالت علشان طول ما الوسط مريحني يعني مازدت ولاكيلو...دا غير الرياضة اليومية اللي تعملها كل صباح.
*جارتي التانية حافظة مقاساتها يعني محيط وسطها و..و...و.....وأول ماتزيد كيلو لايمكن تاكل أي حلويات وتركب الدراجة الثابتة حقتها حتى ينزل الكيلو الزيادة!
*معلمتنا في حلقة تحفيظ القرآن لاتضع شي في فما بعد الساعة السادسة مساء غير في البيت تفاحة أو برتقالة!
*إحدى خالاتي...فنانة في الطبخ وتأكل من كل شيء ولكن فقط لقمة أو اتنين وفي المساء عشاها فاكهة أو لبن أو سلطة!وطول عمرها تحب تخدم نفسها وتخدم الآخرين خاصة بعد الغذاء تحب تتحرك تقولك علشانالأكل يتهضم!وحتى في كبر سنها لاتطلب من أحد يجيب لها كاسة الموية لازم هي بنفسها تروح تجيبها.
*كان عندنا جار كل يوم الصباح تحكي لي زوجته يربط الحزام علي بطنه إذا قفل عادي زي كل يوم يقولها جيبي الفطور إذا لاء.......قالها القهوة تكفي......ماشاء الله وأنا وهي ولا أتعلمنا منه هالحركة بس قلت يمكن واحدة منكم قلبها حي تتعلم من هؤلاء الذين يحبون الرشاقة!!





الخلاصة:

1-الداخل(أكل) لازم يكون أقل من الخارج(حركة) !!
2-الشوربة السحرية فايدتها الوحيدة إنها تحتوي على عناصر وأملاح مفيدة للجسم لكنها ماتنزل الوزن والمفروض إنها تؤخذ مع ريجيم معتدل بين الوجبات,
3-خل التفاح له فوائد عديدة ......بس مش سحر يطير الكرش.
4-الإفراط في أي شيء لابد أن يؤدي لزيادة الوزن.
5-اجعلي الرياضة اليومية عادة ماتتركيها أبدا .....في الحركة بركة!
6-إذا رحتي عزومة وأفرطتي في الطعام على طول أمشي ساعة أو اركبي الدراجة الثابتة 1/2ساعة
7-أول ماتحسي إن وسط التنورة(الجونلة)ضاق معناه قفلي فمك يومين عن الأكل مش الكلام!!
8-الأكل بعد الساعة السابعة مساءممنوع إلا فاكهة أو لبن!
9-الفطور الصباح أهم وجبة ومهما أكلتي فيه عمره مايتحول لشحوم لأن الجسم في عز شغله في الهضم والحرق والهرمونات كلها شغالة!


باقي سر واحد أقولكم هو بس مو دحين بعد مااشوف ردود أفعالكم للكلام اللي كتبته

[hanouf777]

رهيييييييييييييييييييييييييييييييييييييييييييييييي يب اسلوبك ما شاء الله

[وداد محمد]

تسلمي هانوف أخجلتيني