يوميات مواطن سعودي متزوج
دخل احمد البيت وهو جاي من الدوام وكاره الرياض باللي فيه .. دخل المطبخ ومالقى لا قدور ولا ريحة طبخ .. تفاجأ وراح بسرعة لغرفته لقى زوجته قدام المراية وحاطه على وجهها بيض وعسل وعيونها عليها دواوير من الخيار .. ارتاع يوم شافها .. نوف وش ذا اللي في وجهك ما نقصك الا فستق ويطلع وجهك مزة شراب .. طبعا هي شاد البيض والعسل على وجهها وما تقدر تتكلم بسهولة وتأشر له باقي خمس دقايق وتشيل كل شي .. انتظر خمس دقايق وبعدها راحت وغسلت وجهها ثم رجعت عليه .. انت ناسي ان اليوم زواج نادية بنت خالتي .. احمد تذكر الموعد وقال ايييييييييه صح والله ناسي .. طيب وين غدانا .. ناظرته نوف وهي تاخذ تلفون البيت .. صدز انك فاضي الحين هذا وقت غداء رح جب لك من المطعم والا نم الحين وابقومك بعد ما اجهز لك سندوتش اذا فضيت .. ناظرها احمد وهو متجه يفصخ ثوبه .. لو اني داري كان اكلت ذا البيض وذا الخيار اللي في وجهك قبل تغسلينه .. راح ونام ونوف اخذت التلفون اللاسلكي وطلعت تكلم في الصالة :
اهلين كرستي .. اليوم عصر انا يجي سوي بروفة على فستان .. لان بعد المغرب انا فيه روح كوافيره .. الحين انا روح جيب باقي كلف وبعد العصر عندك .. بس اهم شي المخمل اذا ما فيه يعرف ركب ما فيه انتي خرب فستان .. خليه انا انا يتصرف .. يالله باي
قفلت السماعة نوف واتجهت لغرفة نومها ووجدت زوجها الضعيف توه بينوم .. دخلت الغرفة كالعادة مستعجلة ونصت التسريحة لفت شعرها على فوق واقرب شباصه مسكت بها شعرها ثم لقطت عبايتها ولبستها على قميص البيت واتجهت لثوب احمد وتاخذ البوك وبصوت خالي من الرومنسية احمد قم اسحب لي فلوس لان بوكك مافيه الا 200 ريال .. و بعدها بتوديني لشارع العطايف ابي محل زمزمي ابشتري كلف .. ثم ابروح للمشغل اسوي بروفة للفستان وبعدين توديني للكوافيره .
رد ابو حميد من تحت اللحاف .. نوف لو طلقتك تهقين بيجي في خاطر ابوك .. سحبت نوف اللحاف من فوق احمد وقالت له اكيد ما راح يجي في خاطره بعد ما يعرف ان بنته صارت ارمله .
طمر احمد من سريره خائف فعلا من هالمهبوله تذبحه واتجه لها بكل هدوء .. حبيبتي المفروض انك تقوميني بصوت ناعم وتكونين محضره القهوة واقوم اتقهوى انا واياك وبعدها نروح للمكان اللي تبين .. عدم رد نوف على احمد لم يكن الا بسبب انشغالها بتدوير مفاتيح السيارة في مخابي ثوبه ويوم لقتها التفت عليه وقالت وش عند مهند ابو الرومنسية .. تراني قدامك في السيارة .. وهي طالعه زعقت على الشغاله بان تنتبه لبناتها لطيفة ورند (( صورة واحد يقول الله من تناسق الاسماء )) .
قام احمد من نومه وغسل ولبس ثوبه وهو متجه لسيارته ولقى كاس شاهي على الانتريه .. اخذ الكاس ونزل ولقى نوف مشغله السيارة وتنتظره في السور وفاتحه باب الكراج .
ركب احمد السيارة ونوف منهمكه بجوالها تكلم اختها نورة .. نورة تسريحة حليمة بولند اللي شفتها عندك البارح بتناسبني << تلتفت على احمد وتأشر باصابعها بعد الفلوس يعني اسحب فلوس لاتنسى .. ايوه يانورة والله انا محتارة مدري اسوي هالتسريحة والا اقص شعري واخصله .. والا تدرين اذا وصلت الكوافيره كلمتك يالله باي .
يناظرها احمد ويضحك حليمة بولند مره وحده .. يابنت الحلال سوي تسريحتها مع العلم اني واثق انك بعدها بتشبهين لابوها بولند اما حليمة كثري منها .
ردت نوف بعصبية .. احمد ربك اني خذتك والا انت من يبيك .. اما انا على الاقل كل من شافني خطبني إلى الحين يحسبوني مابعد اعرست (( خشة خطابة معها ست الاف رقم وتقول الله من الصدز )) .
وهم منشغلين بالهواش رن جوال احمد رنة وحده وقفل .. تلخبط احمد وطلع جواله وشاف الرقم وبعدها تمتم بكلمات ( اما اكلمك ياصالح وانا معي حبيبة قلبي تبطي ) << ياشينا يالسعوديين ما نعرف نتصرف ابد .
سحب لها فلوس وكانت طالبة خمس ميه وعطاها بس ثلاث ميه بحكم ان عنده هالشهر مصاريف اجار ورمضان على الابواب .. وراحوا لمحل الكلف وبعدها وقف عند باب المشغل ونزلت نوف وجلس ينتظرها بالسيارة .. تأكد من دخول نوف المشغل ثم طلع جواله وبدأ يكلم اللي دقت عليه .. هلا عمري .. هلا بكلي .. كيفك وكيف نومتك البارح بعد المكالمة .. يالبى قلبك بعد وبحة صوتك .. وشو مافهمت .. يعني بنت خالتك شاريه جوال n96 طيب وشفيها .. اهاااا تبين تقهرينها .. ولا يهمك اشتري لك ولمندوبك .. ما قلتي لي ياعمري متى اشوفك .. وبعدين ترى مليت من كثر تصريفاتك .. قلبي هذه ( ام المعارك ) رجعت .. اذا رحت للاستراحة كلمتك يالله باي .
ركبت نوف وهي تلعن وتسب .. شفت ياحمد هالفلبينيه مضوقة الفستان من هنا << وتأشر على ابطها .. وموسعته من تحت خربت موديل السمكه الله ياخذها .. رد احمد بكل برود .. طيب وش سويتي .. طلعت نوف جوالها وكلمت اختها نورة .. نورة حبيبتي وصفي لي مشغل سارة وينه فيه .. ايوه اعرفه وبعدين .. ثاني شارع حلو يالله باي . التفت على احمد وتوها ترد على سؤاله .. قلت لها بالعكس توسعه من فوق شوي وتضوقه من تحت .. المهم الحين رح للخالدية لمشغل سارة .. عصب ابو حميد وناظرها وشو مشغله الله ياخذ عدوك متى بنروح للبيت ونشوف بناتنا ونجلس شوي قبل موعد العرس .. طلعت نوف تلفونها وكلمت الشغالة .. الو سونيا جهزي لبابا قهوة وعطي رند حليب الصافي بالفانيلا وغيري لها بجامتها .. يالله باي .. احمد حطني في المشغل ورح للبيت تقهو وشفني طاحه البسكوت في غرفتنا لان ذا الشغالة لعبت فيهم عط لطوفي بسكوت والا ودهم للبقالة ووسع صدورهم شوي .
فكر احمد بخبث وقال فرصه الحرمه بتلهى في ذا المشغل والبزارين ابصرفهم بالبقالة والا بشراب ابو ورده وبيفضى لي الجو مع الشغالة .
نزل احمد نوف بالمشغل وراح بسرعة للبيت وتصادفه زحمات الرياض اللي كنها صيدليات مناوبة اربعة وعشرين ساعة .. وصل البيت بعد ساعة وخذ بنياته للبقالة .. وبزران وراحوا للبقالة يبي لهم نص ساعة ما خلصوا وبالاخير اخذوا كل وحده فشفاش وعلك وببسي .. طبعا ما همه اللي شروا هو يضرهم والا لا .. بس يبي يروح للبيت بسرعة .. توه واصل البيت ومصرف البزران في غرفتهم وما بعد رقى الا اربع درجات للسطح الا جواله يرن ويشوفه الا هو جوال نوف قال اكيد انها بتسأل عن بناتها .. رد ايوه يانوف انا بالبقالة الحين والبنات مبسوطين ونايمين << ما قلت لكم ما نعرف نصرف . ردت نوف احمد خذ سيارة اخوك خالد وتعال لي بسرعة .. استغرب احمد من كلام سارة .. ليه سيارة خالد بالذات .. ردت وهي معصبة لان مكيفها براده زين واخاف يخرب مكياجي وغير كذا فيها فتحة وتسريحتي بالمره رفيعه .
نزل احمد وهو يجر اذيال الهزيمه على تخطيطاته اللي ما اثمر منها شي .. يوم ركب السيارة وراح ياخذ سيارة اخوه وهدأ شوي قال الحمد لله اني ما سويت شي كان اببلش بذا الضمير << وين هالضمير وانت تخم لعيالك أي شي وما ردك الا رابع درجه .
خذ سيارة اخوه وراح وجاب زوجته ومروا المشغل وخذوا الفستان وراح بها للبيت .. طبعا جلست لها كم ساعة الين جهزت وودى عياله والشغالة لبيت اهلها وراح وداها للصالة .. وراهم وجهه في الصالة وعلى طول لاقرب محل اتصالات وشرى الجوال لعشيقته وراح للاستراحة .
اليوم الثاني كان يوم خميس قومته زوجته الساعة 3 بعد الظهر ولقاها مزينه له خبز توست وكابة عليه بيض وكاس شاهي وقالت بسرعة ياحمد تغد ويالله يمديك تصلي الظهر ثم اكيد بيذن العصر رح صل في المسجد وتعال ودنا لبيت اهلى لان امي صايمه الخميس وبنفطر معها علشان كذا ما سويت غداء لانه حرام يكب .. ابلبس البنات يالله يمديني .. كان احمد مبسوط انه بيفتك منهم من العصر علشان يخلى له الجو في الاستراحة ويعسل له كم راس ويمخمخ مع حبيبته .. تقبل الامر وقام يدفدف هالخبر بالشاهي الين خلص ثم قام وصلى الظهر وطلع يصلي العصر .. رجع لقى زوجته وبناته والشغالة في السيارة راكبين ومحمينها .. ركب وحطهم عند اهلهم وراح للاستراحة .. توه مضبط له راس معسل وخاش جو مع العشيقه الا مكالمة انتظار من نوف على شاشته .. تعذر من حبيبته واخذ مكالمة نوف .. هلا حبيبتي .. نوف ترد اهلين احمد تعال نودي رند للاسعاف حرارتها مرتفعة .. طيب خلي سواق اهلك يوديك للمستوصف اللي جنبكم .. ردت نوف بعصبيه لا ما ابيه هذا ما عنده الا المضاد ابو ثلاثة ايام وفيفادول .. اسعاف الشميسي احسن .. قام احمد وهو يناظر راس هالمعسل بالم وراح ببنته للاسعاف .
طبعا ما يجهلكم كم مره طلبت منه تتعشى برا او يطلعون يتمشون في الاسواق . << وانا عندنا في الرياض مكان ينراح له غير هالشيئين
بعد ثلاثة ايام .. احمد يكلم نوف وهو يشخص امام المرايه .. انا ابروح للاستراحة الحين .. ترد نوف وهي منتفخه وزعلانه .. طيب متى بنتقضى لرمضان اليوم 29 شعبان وبعدين تونا المغرب المفروض تتقهوى معي وبعدين تطلع .. ناظرها احمد بزعل وقال رمضان جاي وقهوة عقب المغرب بتملين مني .. اليوم العشاء بالاستراحة عليّ انا وصالح .. ولازم اروح اجهزه من الحين . ولا تكلميني الا اذا اعلنوا ان بكره رمضان .
طلع احمد وتقضى للعشاء وراح للاستراحة مبسوط ونفس برنامج كل يوم جهز المعسل وشغل اللاب توب ومر على النت لوق وشيك على الاضافات ثم راح للفيس بوك واضاف كم وحده وبعدها اخذ جواله بيكلم الجو خصوصا انه لحاله بالاستراحة .. شوي الا نوف تكلمه قبل يتصل بالعشيقه وقالت الحق ياحمد اعلنوا ان بكره رمضان .. قفلت معه وقال طيب خلاص ابجي الحين .. دق على العيال وكلهم قالوا ما راح نجي اليوم لان يالله يمدينا نتقضى .
مر احمد زوجته وبناته وراحوا لجيان اللي في الرياض غالوري ويالله وصلوا له الساعة 11 من زحمة الناس اللي ما يتقضون الا اذا اعلنوا ان بكره رمضان .. اخذ عربية وزوجته عربيه وركزوا كل بنت في عربية .. شروا من المقاضي اللي ملت العربيتين ويالله امداهم يحاسبون قبل يقفل السوق .. رجعوا للبيت واحمد يفكر وش بينزل هالمقاضي خصوصا ان الشغالة نايمة .. وصلوا لبيتهم الساعة 3.5 وقالت له زوجته نزلنا وانت رح جب سحور لان ما يمديني اطبخ شي الحين بيذن .
من ثاني ايام رمضان والحرمه تلمح تبي السوق علشان مقاضي العيد .. وداهم رابع يوم من رمضان بعد التراويح مباشرة وعند الساعة 3 الفجر تدق عليه تعال خذنا .. راح احمد لهم بالسوق ويوم اقبلت نوف الا هي تسحب رجليها وما شرت أي شي .. احمد بعصبية .. الحين لك حوالي خمس ساعات وفي الاخير ما شريتي أي شي .. نوف تفتح شنطتها وتقول حرام عليك كل وقتي راح وانا ادورهالشراريب ( الجوارب ) الفوستقيه لاني ناويه اشتري لها جزمه ورديه وهيلاهوب وردي وعاد ابنسق التنورة والبلوزه بين فستقي ووردي .. هذا بالنسبة لملابس اول يوم العيد لرند وباقي ملابس ثاني يوم للعيد لرند اكيد ابلقاها في العثيم مول اللي بنروح له بكره .
جن جنون احمد وعصب عليها .. الحين اذا الشراريب جالسه فيه خمس ساعات اجل باقي الاغراض كم يبي لها .. وبعدين وش سالفة ملابس اول يوم وملابس ثاني يوم .. وحتى لطوفي ما جبتي سيرتها يعني يبي لها هي الثانية كم يوم علشان تشترين لها .. ردت نوف بانفعال شديد اخاف اشتري الحين ثم ينزلون المحلات بضاعة جديدة اخر الايام واتحسف .. طيب وانتي متى بتشترين لنفسك .. هيّن انا حاطه عيني على قماش في المتنبي ابيك توديني له بعد بكره .. ومعجبني موديل شفته على نجوى كرم وصورته وبطبقه في المشغل مع بعض التعديلات .. بس الحين مر خذ سحور لان ما يمديني اسوي سحور .
سادس ايام رمضان .. نوف جايبه الشاهي واحمد يتابع عيال قريه .. ما شاء الله عليك ياحمد وش ذا الحلاقه طالع تهبل .. احمد وهو يطول على التلفزيون هالحلاقة من ثلاثة ايام توك تنتبهين لها .. اخلصي علميني وش تبين .. ردت نوف بحياء .. تذكر ياحمد يوم اشتري الشراريب حقت رند طلع لونها ما يناسب لون الهيلاهوب اللي ناويه اشتريه فياليت توديني للسوق ارجعها واخذ بدالها .. رمى الريموت واخذ شماغه وطلع من البيت .
9 رمضان نوف تروح للمتنبي تشتري القماش .. ويالله خياطة المشغل وافقت تسويه لها وبتسلمه لها ليلة العيد .
10 رمضان .. نوف تقول لاحمد وهو رايح يصلي العصر .. احمد اليوم ابفكك من روحة السوق ابروح مع اختي بس لازم انت اللي تجيبنا .. لان زوجها عنده دوام وبيسلم الفجر .. رد احد بنفسية صائم وهو يهز راسه بالموافقة .
12 رمضان نوف ترجع التنورة حقت رند اللي شرتها قبل امس لان مقاسها طلع كبير ولقت لها مقاس مناسب في فرع ثاني لنفس المحل في مول اخر .
14 رمضان تشتري نوف فستان للطيفة وما لقت لرند شنطه ومرت مول اخر تشتري شنطه علما بان عمر رند 4 سنوات .
17 رمضان نوف تطلب من احمد انه يروح بها يدورن استراحة علشان يستاجرونها اهلها في اول ايام العيد .
20 رمضان نوف تروح لمول حياة بلازا بعد ما مرت صحاري وصحاري بلازا تدور ربطه لشعر رند .. ومحل اكسسواريز بتشتري منه تعليقه لشنطة رند .
22 رمضان نوف تشتري جزمه للطيفة من غرناطه مول .. ولرند جزمة من البديعة مول .
24 رمضان احمد يفصل له ثوب في خياط بالبطحاء ويشتري له غتره وطاقيه وجزمه وملابس داخليه كلها في نفس اليوم .
26 رمضان نوف تاخذ احمد لاحد الاسواق الشعبية لشراء غيارات للعيد .. ( بجايم .. وقمصان ) .
27 رمضان يروحون يتقضون لان اهل احمد بيفطرون عنده بكره .
28 رمضان وبعد عشاء اهله نوف تروح للسوق مع اختها تشتري ساعه لرند تمشي مع الشنطه .
29 رمضان نوف تروح تسوي بروفه لفستان العيد وتلقاه يبي عدة تعديلات .. واحمد يشتري زكاة الفطر
اول ايام العيد نوف تروح تسلم على اهل احمد وبعدين لازم ياخذها لاستراحة اهلها اللي استاجرتها لهم في العيد ولازم يقعد معهم ويتغدى معهم .
ثاني ايام العيد نوف ملبسه عيالها ومعها بروشور احتفالات الرياض وتدور وين العاب النارية القريبة من بيتهم علشان يوديها احمد لها وبعدها يشوفون فعاليات العيد .
ثالث ايام العيد نوف معزومه في الثمامه لان اهلها طالعين لمنتزه الهدا .
وبعدها بكم يوم بدت مشاوير العودة للمدارس وتفصيل مريول للطيفة وشراء شنطه لها واحياجاتها من دفاتر واقلام وخلافه .. ورند بتدخل روضه ونفس الشي تحتاج لعدة اغراض .. ولكم انتم اعزائي الاعضاء تتخيلون وش يصير فيها من بهذله بعد
بعد هاليوميات تعالوا نتناقش في امور مهمة في حياتنا :
1- ليه ما يكون عندنا تخصيص للوقت .. ليه ما نتقضى الا في اخر الايام .. ليه ما يكون عندنا وقت نقضيه مع عائلتنا الصغيرة .. ووقت نروح فيه للاستراحة .
2- اختيار الوقت المناسب لطلب الزوج تلبية حاجات البيت له له دور في تنفيذ هالطلب ؟
2- ظاهرة الخيانة الزوجية هل لاسلوب نوف وطلباتها ووجودها كزوجة تقليدية تنظر لبيتها وعيالها بغض النظر عن اهتمامها بزوجها مبرر لاحمد ؟
3- هل معقول ان فيه ناس تبخل على عيالها وتنفق باسراف على العشيقه ؟
واذا فيه امور ثانيه ياليت نستأنس باراكم واقتراحاتكم حولها .
لكم كل الحب
ملطوووووووش
رد مع اقتباس
مواقع النشر