السفر إلى ماليزيا........... *^_^*

[_فراشة_]

هلا ام سيف وسارة

انشاء الله تروحون وترجعون بالسلامة
السنه الماضيه راحوا اهلي وكل الحجوزات سوها من هناك ما واجهوا اي صعوبات

[الطيب طبعي**]

والله قلبي مااااعرف شي
وإن شاء الله سفريه حلوه وسعيده

[محبة الحرمين]

هلا الغاليه ..

ماليزيا حلوة و مناااسبه للعااائلات ...

كم يوم بتمون هناااااك ؟؟؟

شوفي : حج السوق : العاصمه ...
فيها شاارع العرب و مرااكز تسوق وااايد .. و مطااعم عربيه مثل مطعم الناب الإيرااني و الطربوش .
خليها آخر محطه ..

جنتنج : الغاليه منتجع ألعاب ، الله يسلمج مدينه ألعاب صغيرة تبعد نصف ساعه عن العاصمه ، محاطه بمجموعه فنادق ، الجو وااايد باارد للأطفال تحتاجين جااكيتات و انت بعد إذا ما تتحملين برد خذي ويااج جااكيت .
فيه تلفريك .. وناااسه خاصه اليهاال بيستانسون هنااك ..

فيه منطقه إسمها كاميرون هايلاند : تبعد أربع ساعات عن العاصمه .. الجو باارد و حلو فيها ..
تزورون فيها مزارع الشاي و الفراوله و مناطق طبيعيه .. بس لازم ترجعون من وقت لأن الجو يضبب يعني ترجعون 4 عصر . أحسن شئ تسيرون بسيارة تكون عائليه خذوها من الفندق ... عسب أأمن .

يتكلمون عربي .. و دوله إسلاميه و الحمدلله ...

في منطقه ملكا .. ترومون تسيرون لسنغفورة " جزيرة سنتوتزا" مدينه ألعاب رااائعه و تلفريك ... أحلى منطقه في سنغفورة .. ترومون تنامون هناك يومين إذا حبيتوا بس عمله أغلى من عمله الإمارات 1000 درهم تقريبا 400 دولار سنغفوري .

لا تصرفون بالدولار لأنه نازل ... بدلوا عملاتكم باليورو ..

ع فكرة في جزيرتين : بينانج و لانكاوي .
بينانج : أكبر و ناس أكثر و بصراحه أنا ما سرتها بس أهلي ساروها إذا تبين بسأل لج .. و لا يهمج ..

لانكااوي وااايد حلوة من مناطق اللي حبيتها .. جزيرة صغيرة ,, تسيرون بها لرحلات بحريه حلوة . ، ترومين تسيرون لتايلاند و تنامون في بوكيت يومين أو ثلاث إذا بغيتي السوج و المشترى و فيه مكان بين الحدود و بوكيت إسمه هياااتا فيه مركز حلو إسمه سنترال .. بس تايلاند وسخه .. و ناس فيها ما ترتاحين لهم ,,, و تسمعين تعليقاات وسخه ... و حراميه وااايد .. و تحملي يوم تصرفين يصورونج عسب يسرجونج .. بس لا تحااتين .. كوني حريصه و ربي يحفظك أنبهج لأنج تجولين أول مرة تسيرين ...

و بعد في مناطق واايد يمكن تسيرينها من كوالالمبور .. المناطق اللي عدااالها ..

جو عندهم وااحد طول السنه يبالج ملابس قطنيه خفيفه و جوتي ريااضه و عبايات مسكرة أحسن و أستر ...
بس جنتنج و كاميرون بارده و لانكاوي يطيح بها مطر أحياانا ..

إذا بغيت تفاصيل زيااده إسألي .. و إن شاء الله إذا دخلت بذكرج و برد ..

و بعد فيه موقع إسمه زاد المسافرين و العرب المسافرون و موقع السفاري ع ما أعتقد ,,, فيه معلومات بالتفصيل و سجلي وياااهم بيسااعدونج واايد ..

أختي أنتي من دبي سجلي بمكتب سفرياات من الشارجه أحسن أرخص لج .. دبي أغلى ..
و بعد العين أغلى و ع راحتج اللي يريحج ..

و إذا عندنج أي سؤاال حاضرين للطبين ..

و بقولج الرحله طويله تاخذ 6 ساعات من دبي لكوالمبور ...

و خذي طيران داخلي من لانكااوي للعاصمه .. و بجولج شئ لوجه الله ..
تعرفين كيف تشترين من السووج سلمج الله يوم تركبين طيراان داخلى إذا طلع وزن زيااده خلو شنط صغيرة و إسحبوها لداخل مسافه صغيرة .. و عقب تركبون طيارة و كلها فيري سيت يعني تركبين أي مكاان ..

هو مبلغ مب عود .. بس خسارة تدفعين لهم .. بس يسمحون للشخص ب 15 كيلو ..

و سلامنج .. حبيت أسااعد لأن ما أشوف ردود .. غمضتيني ..

و تسلمين .. و لا هنت ..

و سلامات داتنغ ...

إذا تبغين تروحين أندونيسيا ترى وااايد رخيصة و ترومين تسيرين من صباح و سيروااك (مدن ماليزيه ) لأندونيسيا و لا فلبين .. وااايد رخيصه و عندهم سنترات عالميه و مال بلادهم شرات أشيا طبيعيه ..

و السموحه ع الإطاااله

[محبة الحرمين]

لا تنسيني من صااالح الدعااااء ..
إدعيلي الله يوفقني بحياااتي دنيا و آخرة ,,,
محتاجه للدعاااء ..

دعاااء المسلم لأخيه بظهر الغيب مستجااب ...

بس نصيحه .. إنتريوا لا تحجزون إسمعوا عن مرض إنفلونزا الخناازير عسى ربي يسلمكم و يحفظكم يااا رب ..
يمكن المرض ينتشر عندهم .. و الله الواحد يخاااف .. خاصه من تايلاند و كلهم عند بعض ...

فكري بعد بالعمرة ,, وااايد أحسن و يمكن تزورين مناطق بالسعووديه