ايجبت كافيه....الملتقى السابع لبنات مصر المغتربات

[أم نوران]

ام هاجر
ازيك يا قمر؟ انتى عارفة النهاردة الجمعة وطبعا السباع بيبقوا قاعدين فى البيت فتلاقى معظم البنات الجمعة والسبت وساعات الاحد دخولهم متقطع لحد يومين الويك اند ما يخلصوا

صحيح انتى فين بالظبط فى كندا واخبار التلج عندكم ايه دلوقتى؟

ايوة صح يا كتكوته...النهاردة اجاززززززززززززة ...هيييييييييييه

[أم نوران]

بيب بيب ....بيبوووووو

أخبار البناويت الحلوين ايه؟؟؟

[أم أكرم ومريم]

بيبو اي والله عندك حق....افتكرت اني ماذكرتكيش...وكمان بقلة ادبي نسيت
كنزى......كتكوته......ام عمر......معلش السن له حكم,شوفتي بقى فين هالة القمر وفين اوبيسونه؟؟؟
ام نوران الله يسامحك...الصوره دي زغللت عنيا واثبتت لي اني بقيت شيش بيش.....الا هو لينك المهووسه ده بتاع ايه؟؟؟؟
ام مانو ولا يهمك يا عزيزتي....بس سان فلانتين الله يرحمه ويبشبش الطوبه اللي تحت راسه كان قديس فاضل وعمل للكنيسه خدمات كتير من ضمنها انه عصم الشباب من الوقوع في الرزيله انا اصلي ماحبش اقلد تقليد اعمى...يعني مثل الهالوين عمري ما احتفلت بيه....مع اني ولادي بيرجعوا من المدرسه بمسكات وقرع عسل مقطع اشكال..دون اي تعليق مني...اما في الثانكس جيفن (عيد الشكر) بفكرهم يحمدوا ربنا على كل نعمه انعم بيها علينا وبيني وبينك الواحد بيتلكك على مناسبه يفرح فيها

[أم أكرم ومريم]

ياولاد ولاد.....لسه سمع خبر فرحني قوي قوي....فاكرين العروسه اللي حطيت لكم صورتها السنه اللي فاتت (جارتي القديمه) دي بقى لها اخت كبيره ف السن شويه وحظها فب الجمال مش كبير بس ربنا عوضها عن ذلك بطيبة قلب وشطاره مش معقوله....المهم ام البت كانت حاتتجن وبنتها تتجوز خصوصا ان اصغر بناتها مخلفين....المهم انا السنه اللي فاتت عرضت الفكره على ابن عمي هو لف ودار كتير وبعدين استشيخ ف امها وعاشلي ف دور عمرو خالد
قال عايز واحده بنت ناس ومحجبه وشرط انها ماتشتغلش,البنت قالت لي موافقه ومستعده تعيش في مصر وتلبس الحجاب....ولما وريت لابن عمي صورتها سخر مني وقالي طب كانت تحلق دقنها قبل ما تتصور وماعجبتهوش طبعا انا اتكسفت جدا من الناس وقلت خلاص حرمت اتدخل تاني,بس بصراحه البنت طالعه من عيني,ست بيت ومدبره وشاطره
حتى لما حمدي كان يهزر معايا ويقولي انتي عجزتي دوري لي على عروسه اقول له خد نزهه دي نضيفه وشاطره على الاقل حاتشيل عني شغل البيت.....المهم ما اطولش عليكم هي بتشتغل في صيدليه وبتيجي تديني الابره كل اسبوع وكان فيه الراجل الارمل....(بابا زميلة مريم....اللي توفت في مصر بالكلى السنه اللي فاتت) ما انا حكيت لكم عنه برضه لو فاكري...الراجل ده تحفه في الادب,بيسلم عليا وعينه في الارض لما تكون بنته عندنا ويجي ياخدها وكان نفسي اقول لحمدي يعرض عليه ان يتجوز البنت دي بس قالي مالناش دعوة وكفايه كده...بس انا كنت بقول لمريم تعزم صاحبتها عندنا يوم التلات ,وهو نفس اليوم اللي باخد فيه الحقنه واقول لحمدي يتصل بالراجل يجي ياخد بنته الساعه كذا (واكون انا مرتبه انه يكون نفس الوقت اللي نزهه عندي فيه) وكل مره اقول قدامه دي نضيفه فله دي شاطره حتى حمدي كان بيقولي حركاتك قرعه ومكشوفه.....انا عمري ماشفت مراته الله يرحمها بس رحت عزيت فيها بحكم ان بنتها صاحبة بنتي....بس باين انهم اسره محترمه بس كان عندي احساس ان الراجل ده يلزمه بنت زي دي حتاخد بالها من بناته لان اللي بيربيهم حاليا حماته ما انا حكيت لكم القصه كلها زي اليومين دول شهر فبراير السنه اللي فاتت......المهم حمدي قالي النهارده وهو بيصلي الجمعه الراجل جلس جنبه وبعد خطبة الجمعه وقاله هي الاخت اللي بتعطي الحقنه للمدام مرتبطه قاله لأ,ساله طب ايه رايك فيها,قاله والله احنا عشرة 8 سنين ماشفناش منهم غير كل خير....قاله طب لو مستعده ترتبط بواحد في ظروفي اروح اتقدم لها
وفوران اتصلت بيهم ورحبوا....ورايح يتقدم لها يوم الاحد....انا فرحانه قوي قوي لها ربنا يكمل لها على خير