أختي ماوضحتي هل بتسويها بنفسك أم تريدين فكرة من الافكار التي تحتاج إلى عمال مختصين
عموما/
فكرة الرفوف حلوة وإذا كانت أرضيتك سيراميك سوي الرفوف من الزجاج << تعطي فخامة للمكان
وممكن تسويلها دهان حلو تعتيق خفيف أو لمعاع أو شي يكون بسيط وبعدين بين كل عمود والثاني تحطي لوحة (بألوان متناسقة مع الديكور) وتكون كبيرة تغطي اغلب المساحة << يسير زي المعرض
وإذا كنتي تحبي الرسم (ارسمي اللوح على ذوقك)
وممكن ترسمي رفوف (عامل البويا) يسويها لك وتخليها مثلا ست رفوف,,, رف يكون مرسوم فيه كتب ورف فاضي
وبعدين تركبي رفوف في الاماكن اللي فيها ارفف فاضية وتحطي فيها كتب حقيقية << يسير زي الخداع البصري
فكرة الاخت (يارب اكرمني) اللي بالمرايا مرة حلوة وشكلها تقصد مرايا كبيرة علشان تشوفي فيها ,, وأضيف عليها أنك ممكن تسويها مرايا صغيرة أو تسويها كريستال من نفس كريستال الثريات والاكسسوار
مرة شفت وحدة مسوية مجلسها شعبي والاعمدة ملبستها بقماش أحمر (زي قماش بيت الشعر)
فيه فكرة في بالي بس ماتنفع إلا إذا كانت الأرفف ناعمة (وليست منقوشة) وهي إنك تجيبي المشمع (اللي يباع في محلات المفروشات وتختاري شكل يناسب صالتك وتثبتيه بالصمغ على اللعمود (تلبسيه) وبعدين تاخذي خامة جليتر أو كريستال وتظيفيها في أماكن معينة (إذا كان الشكل عشواءي) وممكن تنثريها بشكل عشواءي
وممكن تجيبي الستائر الخيوط اللي تنحط على الباب وتلفيها داير مايدور على العمود
أو تخيها تتدلى بشكل طولي من الاعلى وتكون حرة في الاسفل
أو إنك تفصلي رفوف دائرية تكون محيط بالاعمدة يعني يكون العمود في المنتصف والرف يحيط به دائريا وتكون مجموعة فوق بعضها
ممكن تسوي لها (ديكوباج) ابخثي عنه وشوفي الافكار اللي تتسوى فيه
وإذا كنتي مبدعة في اعمال الجبس (أو ممكن تخلي عامل يسويها لك) يسوي مجسم أشجار بحيث تكون الاعمده هي الجذع ويطلع منها اغصان بحيث يسير المنظر كانها حديقة او غابة (هذه الفكرة تعتمد على حجم الأعمدة ومالمكان لازم يسير واسع
وإذا حبيتي تلبسيها الخامات كثير وفي كل مكان
وإذا حبيتي تاخذي أفكار اتفرجي في النت على كوش العرايس فيها أفكار كثير حلوة للأعمد
أتمنى أكون أفدتك
مواقع النشر