للامانه الموضوع منقول لكن استفدت منه كثير فا حبيت تستفيدوا معاي
اختصر الموضوع ...تجنبا للملل
اكثر الأشخاص اللي يغتابوا .... هم اشخاص تعرضوا للاساءة من
الاخرين سواء بقصد او بغير قصد <ولم يستطيعوا الدفاع عن
النفس>
وهذه النقطة المهمة .... انه عدم دفاعك عن النفس او ما قدرتي
تاخذي حقك او ما رديتي عليهم برد شافي ... يخليكي
طووول الوقت ... تشتكي وتتذمري ومقهورة .... وبالتالي تدخلي
في دائرة الغيبة والقيل والقال ونقص الحسنات
مرة اختي الكبيرة نصحتني بنصيحة الله يجزاها كل خير ....
شافتني اتذمر من وحدة مقهورة منها واتكلم فيها واسبها ...
قالت لي عبارة ... غيرت مجرى حياتي .... قالت لي < لو رديتي
عليها ما تحتاجي تغتابيها >
< لو رديتي عليها ما تحتاجي تغتابيها >
< لو رديتي عليها ما تحتاجي تغتابيها >
صارت تدوي العبارة بأذني ... لأني نفسي اتخلص من الغيبة
وصارت تقول لي ... حرام يروح عمرنا نغتاب بالناس وتروح
حسناتنا .... خلاص اللي يضايقك عبري عن اساءتك له
واللي يدقك بالكلام دقيه ... واللي يعاتبك عاتبيه ... واللي يتعدى
عليكي خذي حقك منه
وبالفعل والله العظيم طبقت كلامها ... مع انه انا عادة اذا احد
جرحني او دقني بالكلام .... يوقف الكلام بنص حلقي وابلعه تاني
واصير مقهورة واقول ليتني قلت وليتني فعلت بعد فوات الاوان...
ولأني انا مليت من عتابي لنفسي وكثرة اللوم لنفسي ... قررت اني
ادافع
عن نفسي لو حتى بكلمة بسيطة جدا جدا ... وارتحت من عذاب
الضمير ... وارتحت من الغيبة واكل الحسنات
لانه اكثر اللي يغتابوا ... يكونوا مقهورين انهم ما ردوا او دافعوا
عن نفسهم
في نقطة اهم ... ولازم ابينها لكم .... عشان لا تفهموا كلامي
غلط ...
انا مو قصدي انه تردي الاساءة بالأساءة ... لا لا انتبهي .... انا
اقصد انه اذا احد غلط عليكي لا تسمحي له ... واللي يدقك
بالكلام بيني له انك فاهمة قصدة بس بطريقة الدق كمان .... واللي
يجرحك .... حسسيه بغضبك من تصرفه ...
يعني مثلا جارتك تطلب منك دايم المكوى حقت الكوي .... وانتي
متضايقة من جرأتها وتصرفها ... ويمر شهر او شهرين
على هذا الحاااال .... وطبعا سكوتك يعتبر فوز بالنسبة لها ....
ومع ذلك تروحي تتصلي على اهلك وتقولي شوفوا وقاحة
جارتي شهرين تطلب المكوى ... وتقولي لجارتك التانية ..شوفي
فلانة شهرين ما قدرت تشتري مكوى .. الخ من اساليب
الغيبة والشكاوي والتذمر .... لكن التصرف السليم حتى تسلمي
من الغيبة وايضا حتى تحطي حد من الاستغلال ... ممكن تقولي
لها ... انا
سمعت انه المحل الفلاني ...عامل عروووض على المكاوي بسعر
حلو .... كانوا كاتبين لوحة عرض خاص على المكاوي ..روحي
خذي فكرة
منها اعطيتيها اشارة تنبيه منك لها واكيد بتحس هي ... ومنها ما
جرحتيها ايضا ... ومنها وفرتي على نفسك الغيبة ....
حتى لو حست جارتك وزعلت منك ... خليها تزعل .. يمكن
مصدومة من ردة فعلك .. يعني ما اعتقد انه زعل اكيد..
ومصيرها ترجع لك ... بس طبعا ترجع لك وهي عاملة مية حساب
لك ...
طبعا في ناس كبار في السن ويرموا كلام بدون حساب ... مثلا ام
زوجك .. او أي احد كبير
وصعب انك تردي عليها ... وتضطري تغتابيها ... لكن رد عن رد
يختلف ... مو يعني انك تردي خلاص صرتي قليلة ادب ... بالعكس
ردي عليها رد يعبر عن الشهادة اللي درستيها او عن البيئة اللي
طلعتي منها ... المهم انها ما ترجع تضايقك تاني
مثلا ام زوجك ما تحترمك وتقلل من قيمتك ... اذا جلستي مع أي
شخص اتكلمي عن احترام الذات وعلى مسمع من ام زوجك
<انه اللي يحترم الناس يفرض احترامه لنفسه > خليكي جريئة
حتى لو بكلمة وحدة فقط ... والجرأة مو انك تحقري انسان او
تذميه؟؟ الجراة انك تكوني كبيرة بأفعالك وتصغري افعال الناس ...
وانا قلت افعال النااااس مو الناس بذاتهم .؟؟
في اشخاص .... ييمونوا عليكي جدا جدا .... مثل الام والاب
والاخت والاخ الكبير ... يعني حتى لو غلطوا عليكي
وما اخذتي حقك ... اتوقع المحبة والعشرة بينكم يخليكي تتجنبي
الغيبة فيهم .... يعني في ناس ما تضطري انك تغتابيهم
حتى تاخذي حقك منهم ... ومن ضمنهم ام الزوج < اللي تحبيها
وتعامليها مثل امك > اتوقع انه ما تضطري انه تستائي منها
.. لكن ام الزوج اللي انتي دايم تتذمري منها وتشتكي منها ليل
ونهار وراحت حسناتك على حسابها ... يا اختي وضحيلها
اسلوبك ... او لمحي لها ... او حتى لو تدقيها بالكلام .... او أي
شيء .. يمنعك تغتابي فيها مرة تانية ويمنعها تغلط عليكي
.. اعرف وحدة تقول انه ام زوجها تتكلم في اهلها واخوانها ...
وتقول اخوكي صار عجوز ولسى ما اتوظف .. وتقول الثاني
صار عمره 24 سنة ولسى ما اتخرج من الثانوي .... وهي زي
الهبلة وردها اهبل كمان ...<هذا وصفها لنفسها>
انا قلت لها طيب وش نوع الرد اللي يريحك انتي ؟ قالت نفسي
اقلها مو شغلك ... قلت لها طيب قولي بس بطريقة
الطف لأنها كبيرة بالسن ... <قولي : كلن ينشغل بنفسه الله يشغلنا
بطاعته> او أي رد من هذا النوع او اخف .... المهم
انك ما تضطري بكرة تشتكي منها ومقهورة وتقولي ما عرفت
ارد .. الخ
اختصار كلامي ....
المواجهة او المصارحة او الدفاع عن النفس حتى لو بكلمة
صغيرة جدا ... يوفر عليكي حسناتك ويبعدك عن الغيبة
الكبار بالسن ... لهم اسلوب خاص في الرد ... خاصة لما يتدخلوا
بأهلك .... دافعي عن اهلك او سكتيهم بس بطريقة غير
وقحة ....
جارتك او صديقتك .... اذا اساءت لكي .... لا تردي لها نفس
الاساءة
خلي عقلك اكبر من كذا .... اللي يغلط عليكي لا تسكتي ... ردي
وخذي حقك ...
ترى القوي <وانا اقصد القوي في الحق والناس تهابه> مهما
تعرض لأنتقاد الناااس ... في النهاية بيعملوا له الف حساب
لما يواجهونه
لكن الطيب <الى حد السذاجة>.... يكثر ذكر طيبته ولكن كثير
الاستغلال من الناس
يعني اجمعي بين الحاجتين ... كوني طيبة بس مفتحة عقلك مو
ساذجة ... وكوني شخصيتك قوية محد يقدر عليكي بس بنفس
الوقت ما توقعي بظلم الاخرين ... يعني كوني حذرة بين المزج بين
الشخصيتين ... لانه الجمع بين الصفات الايجابية مهارة
وفن في الشخصية ...
اكرر .... حتى ابرأ ذمتي .... لا تردي الاساءة بالاساءة ولكن
دافعي عن نفسك وقولي كلمة حق ولا تسمحي لأحد انه يستغلك
قال الرسول صلى الله عليه وسلم في ما معناه < “المؤمن القوي
خير وأحب الى الله من المؤمن الضعيف، وفي كل خير، >
وهذا الكلام .... يخص اكثر شيء ... الاشخاص اللذين يكثر معهم
الغيبة ... بسبب ضعفهم
ملاحظة اخيرة ...
يا انك تاخذي حقك وخلاص تسكري فمك من الغيبة ... او انك
تصبري ولا تردي واحتسبيها اجر عن الله ... لكن لا تضيعي
اجرك بالقيل والقال .... يعني يا تردي يا تنسي خلاص
اتمنى انه الموضوع يفيدكم مثل ما انا افادني كثير
يقول احد المشاهير ... ان تقرأ موضوع واحد
خمس مرات ... خير من ان تقرأ خمس مواضيع
والموضوع ... مفتوح لكم
رد مع اقتباس
مواقع النشر