بسم الله الرحمن الرحيم
السلام عليكم ورحمة الله وبركاته
راح أقولكم قصة ولادتي من طق طق لسلام عليكم
بعد دخولي الشهر التاسع بكم يوم كان مخلص الغاز وراح زوجي يجيب غاز وتعرفون الغاز إذا جاء يبي له تنظيف بعد ماجابه زوجي وأبدأ أنظفه بمنظف 101وكان يجيني قبل طلق خفيف وإختكم تنظف والوجع كل شوي يزيد
بعده ماتحملت الوجع وتركت الغاز وكلمت أمي قالت تبخري (بهدب الأثل)يمكن فيك شمم وأتبخر وأشرب حلتيته ولاخف الوجع قالي زوجي امشي للمستشفى رحت وأخذت أشعه وقالت سليم واطلع من المستشفى اصيح بي وجع مرره قوي وأهلي بمدينه وأنا بمدينه
بعده قالي زوج تولمي بكرا بوديك لأهلك ماصدقت خبر وأجهز أغراضي ويوم صار العصر ونمشي لأهلي وكانوا بإستراحه في الهدا
وصلنا لمهم يمكن12باليل ومثلت لأمي إني مابي شي ويوم صار الفجر كنت قلقانه مره وتقوم أختي ونجلس نتقهوى وأنا معي المغص ماراح على الساعه ثمان بدأ الوجع مررره وتقوم أختي تنادي أمي ويقولون امشي للمستشفى قلت لا ابولد بالبيت
واجلس يوم كامل الطلق كل دقيقه كل دقيقتين واتبخر واشرب حلتيته واشرب زيت الخروع وابوي واخوي وزوجي كلهم يقرون علي وانا من الوجع اصيح
يوم صار باليل رجعنا لمكه وانا مع زوجي فارشين لي فراش بالسياره ومعي اوجججاااع وصلنا بيت اهلي وامي نامت معي
الفجر بدأ الطلق يجي كل خمس دقايق
جلست كم يوم على هالحال
زوجي رجع لأن عنده دراسه
وجلست أنتظر فرج ربي وكم يوم أروح أطوف وكل مارحت أقول إن شاء الله مايجي بكرا إلا وأنا والده
وتمر الأيام والطلق مستمر بس على فترات
قبل ماأتم التاسع بثلاث أيام جاء مطر قوي على مكه وكان يوم الخميس وطلعت للمطر
يوم صار باليل بديت أكح وجتني حراره تعبت مره ومعي طلق
يوم السبت رحت للمستشفى بعد إلحاح زوجي
قالت لي الدكتوره معك طلق إذا استمر كل خمس دقايق تعالي للمستشفى
يوم الأحد من الفجر ومعي طلق قوي الظهر قمت من النوم معي مويه خضراء أكرمكم الله خفيف ناديت أمي وكنت ملزمه إني أولد بالبيت
سوت لي أمي فراش
وجلست عندي العصر بدأ الطلق كل دقيقه مستمر وتخيلوا معي حراره وكحه ومزكومه
يوم صار العشاء قلت لأمي خلاص إنتهى حيلي جيبوا لي دكتوره بالبيت تشوف كم انفتح الرحم وتحط لي مغذي
جت الدكتوره وقالت الرحم مفتوح 3سم وخطر لازم تروح للمستشفى علشان الحراره
ونروح أنا وأمي والدكتوره للمستشفى وأنا أتألم مررره
ونزلنا للمستشفى وشافوا الرحم صار 4سم وعطون الحقنه وشافوا تخطيط لقلب الجنين قالوا لازم عمليه الجنين ماتحمل بدأت تتوقف نبضات قلبه
وأقول لأمي يمه وش اسوي قالت كلمي زوجك اساليه وأكلم زوجي ويرتاع ياعمري قال وش تقول أمك قلت بسرعه أمي تقول أسألك قال خلاص توكلي على الله قلت بس اللي بيخدرن رجل قال الشكوى لله
ويودونن لغرفة العمليات وأنا خايفه مررره بعده دخل الرجل وأغمض عيوني وقبل مايحط الكمامه على وجهى رحت عن الدنيا ولا حسيت إلا بأمي عندي ويوم صحيت عطون إبره مسكن وأقول لأمي أبي ماء تقول مو اللحين
وأنا مثل الصغير ويكلمن زوجي يقول وش لونك أقول طيبه بسي أبي ماء
وكل شوي أقول لأمي أبي ماء آخر شي رحمتن وبللت شفايفي بالماء ولانمت باليل من الكحه
تعرفون صعبه كحه وعمليه
بس ياربي لك الحمد عدت على خير وجبت بنوته حلوه
وتوته توته
مواقع النشر