تارت الجناش والكراميل من مطبخ الشيف مونى بالصور
السلام عليكم ورحمة الله
مقادير عجينة التارت:
2 كوب دقيق
قطعة زبدة هتبقى 100 جرام(بحرارة الغرفة)
بيضة
ربع كوب سكر
رشة فانيليا
ذرة ملح
مقادير صوص الكراميل:
كوب سكر
ربع كوب مياه
كوب كريمة لبانى
قطعة زبدة
مقادير الجناش:
2 كوب شيكولاته مبشورة
كوب كريمة لبانى
للتزيين:كريم شانتيه او حسب الرغبة
اول حاجة هنعمل العجينة
هنجيب بولا نحط فيها السكر والزبدة
هنضربهم بالمضرب لغاية مايبقى القوام كريمى والزبدة مع السكر حجمهم يتضاعف
هنحط عليهم بقية المكونات البيضة والدقيق والفانيليا والملح
هنضربهم بالمضرب هتكون العجينة زى حبات الرمل
هنلم العجينة بايدينا ونحاول نخليها كورة واحدة
هنغلفها ونحطها فى التلاجة لمدة ساعة
ولما نطلعها الطريقة الوحيدة لفردها بين ورقتين زبدة لأن طبيعة العجينة مفرولة
ونحاول نحطها فى صينية التارت من غير ماتتكسر
ونشكلها فى الصينية كويس ونشيل الزيادات
جبت ورق زبدة وورق فويل وحطيت جواه حبوب وحطيته فوق العجينة عشان العجينة مترتفعش فى الفرن وهقولكم ملاحظاتى ع الموضوع ده
دخلتها فرن الكهربا على حرارة 200
الحواف احمرت فطلعت الصينية بس لقيت العجينة تحت الفويل مستوتش كويس
فخرمتها بالشوكة ودخلتها تانى وطلعتها لقتها استوت بالكامل
ومتخافوش مطلعتش لفوق
سبتها تبرد وابتديت اعمل صوص الكراميل
حطيت كوباية السكر على النار لغاية ماساح حطيت عليه المياه بسرعة قبل ماالسكر يتكتل
بعد كده حطيت عليهم قطعة الزبدة
ولما الزبدة ساحت بالكامل حطيت عليهم الكريمة اللبانى
قلبتهم وسبتهم يغلو على النار عشان الصوص يتقل
سبتهم يبردو شوية وبعد كده حطتهم على التارت
دخلته التلاجة لمدة ساعة وابتديت اعمل الجناش
بشرت شيكولاته خام وحطيت عليها الكريمة
شغلت عليهم النار لغاية مالشيكولاته ساحت
ملحوظة:يستحسن تحطى الشيكولاته بالتدريج
وطبعا الجناش كان بيلمع وقوامه كويس مكانش محتاج زبدة او اى مادة دهنية
طلعت التارت من التلاجة وحطيت الجناش على الكراميل
قلبت الجناش مع الكراميل
ودخلته الفريزر عشان كنت مستعجلة وعايزة ازينه بس طبعا العادى انه يتحط فى التلاجة
وطلعته وعملت وردات بسيطة بالكريم شانتيه
وبالهنا والشفا عليكم
رد مع اقتباس
مواقع النشر