الرقاق باللحمه المفرومه بكل تفاصيله : : مشاركتي في مسابقة " طبق من بلادي "

[om ahmed2010]

احبائي واخواتي الكرام اعضاء منتدانا الكريم

منتدي بيت حواء

بشارك معاكوا النهارده بالرقاق المصري باللحمه المفرومه من الالف للياء

بطريقة عمل الرقاق نفسه " وده الرقاق الطري " .

واليكم التفاصيـــــــــــل 000

* نجهز العجين بتاع الرقاق وهو زي عجينة الفطير المشلتت " عباره عن : 2 2/1ك دقيق ( طحين ) + 3/4 ماء + رشة ملح .

* نعجنهم كويس جدا حوالي 10 دقايق " لحد ما العجينه لونها يبيض " .

* نقطعه ونعمله كور ونغطيه بفوطه ونحطه في مكان دافئ " المقدار ده عملي 7 رقاقات كبار " .

* بعد نصف ساعه ندهن الرخامه زيت ونفرد العجينه عليها " رفيعه جدا " ومش مهم لو ما كانتش متساويه او اتخرمت منك " ما تقلقيش 00 هنعالجها " .

* بعد ما نخلص الكميه نجيب صينيه ونقلبها علي ظهرها ونحطها علي النار ونحط كل رقاقه لوحدها ثواني لحد ما تتشمع بس " علشان ما تنشفش " .

* وبعدين نساوي الاطراف علشان تبقي مدوره " انا قصيته بالمقص اسهل عملته مثلث وقصيت الاطراف اللي ما كانتش مظبوطه 00 بس ما ترميش اللي انتي قصتيه هنستخدمها " .

* دلوقتي هنجهز اللحمه المفرومه المعصجه " عبارة عن : نحمر بصله كبيره ونحط عليها اللحمه المفرومه وعليها الملح والفلفل والبهارات وعليها شوية ماء صغيرين لحد ما تستوي " .

* ونجيب شوية لبن ( حليب ) ومعاهم سمنه بلدي وكمان مكعب مرقه ونحطهم علي النار لحد ما يغلوا " علشان نسقي بيه الرقاق " .

يتبـــــــع
ارجو عدم الرد 000

[om ahmed2010]

* وبعدين نجهز الصينيه ندهنها سمن ونحط اول راقه .

* ونحط شويه من السائل اللي عملناه " اللبن والسمن والمرقه " .

* ونكمل 3 راقات كمان وبين كل راقه والتانيه نحط سائل وبعدين بعد الراقه الرابع نحط اللحمه المعصجه .

* وبعدين الراقه اللي بعد اللحمه انا مش حطيت راقه كامله انا حطيت اللي قصيته من الرقاق " صدقيني مش هيبان كله هيلزق في بعضه بعد كده " .

وكملي باقي الراقات التانيه لحد ما تخلصي كمية الرقاق اللي عندك وطبعا بين كل راقه سائل واخر راقه حطي كل مقدار السائل اللي متبقي .
وبكده هيبقي عندك 8 راقات مش 7 " باضافة الرقاق المقطع في النصف " .

* دخلي الصينيه الفرن لحد ما تتحمر من تحت وبعدين حطيها في الشوايه علشان الوش يتحمر .

* وبعد ما يطلع من الفرن غطية شويه بصينيه تانيه علشان يفضل طري .

* ويقدم بالف هنا وشفا 000

* طبعا احنا عندنا في مصر دايما بنعمل الرقاق مع المحشي .

شوفوا مع جوه شكله ازاي .

اتفضلوا معانا 000

الف هنا وشفا علي قلوبكم الحلوة
ارجو ان تكون طريقتي عجبتكوا

تقبلوا احترامي وتقديري
اختكم // أم أحمــــــد

[المحبة للجنة]

ماااااااااااااااااااشاااء الله

طبق رااااااائع الله يعطيك العافية

[لؤلؤة2005]

ما شاء الله تبارك الله
الاطباق لي لوحدي يا سعادتي
ما شاء الله الطريقة واضحة تسلم ايديك الحلوة وربي يعطيك العافية
موفقة ان شاء الله غاليتي