الفول المدمس بالبيت بالصور
السلام عليكم و رحمة الله و بركاته
بسم الله الرحمن الرحيم
طريقة تدميس الفول بالبيت امممم
المقادير و الطريقه معا
نجيب الفول الكميه اللي عايزاها ( انا بعمل نصف كيس الفول تقريبا 400 جرام )
ننقيه كويس من القش او اي شوائب و الفول الغير صالح ( الفول اللي فيه نقط سوداء )
و نغسل الفول بالماء و نصفيه من ماء الغسل و ينقع بالماء لمده لا تقل عن 12 ساعه
مثلا من بالليل لتاني يوم و نراعي كمية الماء علشان الفول هيشرب الميه و يتضاعف حجمه
هنا غسلت الفول و نقعته في الميه
تاني يوم ده كان شكله
شوفي حجمه بقي ازاي
هنصفيه من ماء النقع
و نحطه في الدماسه المخصصه لتدميس الفول و نضيف الماء لغاية ما يغمر الفول و يزيد ب 2 سم
و يرفع عالنار حتي يغلي
بعد الغليان تهدئ النار عالآخر و تغطي الدماسه و يترك عالنار الهادئه جداااااا
بعد نص ساعه نضع 1 ملعقة صغيره بيكنج بودر و تقلبي علي طول
( تلاحظي فوران الفول و ده دليل علي صلاحية البيكنج بودر و تقلبي من تحت لفوق حتي يتوزع البيكنج بودر في الفول كله و تغطي الدماسه و يترك علي نار هادئه جداااا
هنا اول ما حطيت البيكنج بودر شوفي الفوران ازاي
نغطي الدماسه و يترك عالنار الهادئه و كل ربع ساعه تقلبيه كويس من تحت لفوق و تلاحظي كمية الماء و اذا احتاج زودي ميه مغليه
و يترك عالنار لمدة ساعتين و نص
و ده شكله بعد ساعتين و نص ناضج كويس و القشره مستويه عالاخر
اول ما يستوي و تطفي النار تكوني محضره ليمون كتير مثلا علي الكميه اللي عملتها بحط 4 ليمونات وسط و نعصر نص كمية الليمون و تقلبي الفول كله و تعصري الباقي عالوش و ده هيحفظ لك الفول دون تغيير لونه طول فترة استخدامه
هنا حطيت الليمون
ممكن تحتفظي بيه زي ما هو بالثلاجه و تطلعي الكميه اللي عايزاها و تستخدميها و ممكن توزعي الفول باكياس التلاجه و تحطيها بالفريزر
هنا الفول تاني يوم أخذت منه كميه أعمل بيها طبق فول بالطماطم
شوفي لونه ازاي فاتح و متغيرش و لا أغمق
سخنت الفول بالمايكرويف لمدة دقيقتين بس و هرسته بالشوكه
و حطيت شوية زيت بالطاسه التيفال و حطيت طماطم مقطعه صغير و ملح و كمون و قلبت الطماطم شويه و حطيت عليها الفول المدمس و قلبت الخليط و حطيته في طبق التقديم
و ممكن تعملي الفول بالطريقه اللي تعجبك
و بالهنا و العافيه
مواقع النشر