عملت مبارح كب كيك وطلعت نكهته خرافية
الأناناس مع جوز الهند كتير بيتوافقوا مع بعض
طريقته بسيطة ولزيزة ومنظرها حلو وبيبيض الوجه
نشوف المقادير
كوب طحين منخول
نصف ملعقة صغيرة بيكنج باودر
نصف كوب سكر
2 بيض حجم كبير
112 غم زبدة لينة
تلت كوب اناناس بيوريه ( يعني بتاخدو شرايح الأناناس وبتضربوها بالخلاط لحتى تصير بيوريه ومش مشكلة ازا بقي فيها شوية قطع )
ربع كوب جوز هند المبشور
الطريقة
بنخفق الزبدة اللينة مع السكر لحتى يصير لونهم فاتح وملمسهم كريمي
بعدين بنضيف عليهم البيض بالتدريج مع الفانيللا وبنخفق كتير منيح
هلأ بنضيف المواد الجافة وبنخلط باستخدام الملعقة بخفة
بعدين بنضيف الأناناس المطحون وبيكون شكله متل هيك
هلأ بنسكب المزيج في الصينية الخاصة بالكب كيك بعد ما نكون بطناها بشوية زيت وطحين
باستخدام ملعقتين بنسكب في كل دائرة لنصفها من المزيج وبنلاحظ انه جامد مو سائل
وبندخله الفرن على حرارة منخفضة لمدة 25 دقيقة تقريبا
بس تستوي بنطلعها وبنتركها لتبرد بعدين بنقلبها
هلأ بنكون محضرين للزينة جوز هند مبشور ومربى مشمش واناناس
بنجيب كل حبة وبندهنها بالمربى بعدين بنغلفها بجوز الهند
وعلى الوجه بنحط كم قطعة اناناس بالشكل اللي بتحبوه
وهيك بتطلع معنا بالآخر
وهي شكلها من جوة كتير هشة وطعمها لزيز
بتمنى تجربوها ورح تعجبكم ان شاء الله
والى اللقاء في وصفة جديدة
لكم كل الحب مني
رد مع اقتباس
المشاركة الأصلية كتبت بواسطة ام*عبدالله2006
مواقع النشر