(يكرهك نصفي-- ونصفي فيك ذايب)........

**رجوع وردة سلام** · 04-11-2010, 03:13 AM

على احد البحيرات ...وعلى أنهار لندن ... المليااانه وز وبط ....المكان راائع ...أخضر الورد الأحمر يملا المكان .. الجو المنعش ...الهدوء ...المكان كان قمه في الروعه
كانو تركي وزايد دايم يروحون لنفس المكان ... يتفرجون ...ويعلقون مثل العاده
زايد: اقول تركي
تركي: هلا؟
زايد: التفت على ورا
تركي: ليييه؟
زايد: شي انت كذا تحبه ومستحيل تتخلا عنه
تركي: وشو؟
زايد وهو يغمز: التفت وانت بتعرف
تركي: لااول قل لي ايش
زايد: لاحووول ... اسأل نفسك شي انت تححبه وودك انه هو بدالي جنبك الحين
تركي((مين غيرها ؟))تظاهر بالغباء: وش؟؟
زايد: يابن الحلال التفت
تركي لف على ورا وشافها ماسكه كاميرافيدو تصور منظر الوز على البحيره
زايد: ههههههههههههههههه اقطع ابو القز اللي كذا ...
تركي وهو يطالع في ديما: الله ياخذ ابليسك ماتفوت شي
زايد وهو ميت ضحك : الله يرحم ايامك يالسعوديه كنت بس على كم من قززه ويتفل في وجهك أخوها ...ههههههههههههه بس الحين فاال الحجاج
تركي: ايه وانت الصادق تعذيب اول حتى المغازل ومحرومين منه
زايد: بدوي الله يهداك وش يجيبك فيذا
تركي: اقول اسكت وخلك عاقل ...من زينك الحين
زايد: ههههههههههههههههه اقول طالع طالع لاافوت لك لقطه
ومن غير شعور اتجه لمكانها ...
تركي: هاااااااي ديما
ديما وهي ماسكه الكاميرا: هلااترووووك انت هنا؟
طبعا زايد لايمكن يفوت لقطات واهم مع بعض جاهم ونط في وجيههم
تركي: ياااحوووول وانت ماترتاح؟؟ لازم تحارش؟
ديما: هههههههه خله ترووك
زايد : شفت الذوق ...مو انت طرده من اولها
تركي: اقول منقهر منني ليش ان ولاوحده اعجبتها انت وخشتك
زايد: ..هههههه شف شكلك اول وبعدين تكلم
تركي: أيــه احسن منك ..(وبحركه مقصوده) .ول لا ياديما
ديما هنا تلعثمت: هاه...! ايه ايه ...لالا كلكم زي بعض
زايد: أيـــه علينا هالكلام هههههههههههه
تركي: يالله اذلف من غيرمطرود منااااك بس مناااك
زايد: وان قلت لك مارح اروح
ديما: ههههههههههههههههههههههههههه تركي خله عشاني
تركي خق معاها: خلاص اخليه واخلي اللي جابه ..
والتفت على زايد: تراه مب عشان عيونك ..
زايد: هههههههههههههه اجل عشان شنو
تركي تجاهله ولف على ديما اللي ماتت ضحك اصلن تعودت على حركاتهم
تركي: اقول ديما اعطيني الكاميرا ابصورك
ديما باستغراب: طيب وليه؟
تركي: بس كذا جيبيها
ديما: اوكي خذها
زايد طول الوقت يغمز لتركي ..وديما عاجبها الوضع
تركي كان يصورها واهي تأكل الوز ...شكلها طالع مرره كيووت ... كان المكان مليان ...وبعد شوي على وقت الغروب فضى .... ومابقى غيرهم الثلاثه
تركي وهو يصور وقباله على طول ديما تطالع الوز ولاحست بتركي
تركي: اقوول ديما
ديما: هلا
تركي: سوي لنا حركات سعوديين عند الوز
ديما: هههههههههههههههههههههههه
تركي: يالله حركات سعوديين يالله
ديما مسكت الوزه مع ذيلها وقامت تسحبها
زايد وتركي ماتو ضحك واصواتهم كلها بالكاميرا
زايد: ايه والله مايمدي المكان يفضى اللا وقمنا نستلعن على هالحيوانات
ديما: ههههههههههههههه
تركي: اجل وشلون بنصير سعوديين هذي علامة الجوده
وقامو يلعبون بالوز وكنهم ألعاب عندهم .... الا ان جا المسؤول عن الحديقه وطردهم لأنه من تعذيب الحيوان وممنوع عندهم ... انطردو برا ...والوجيه مليانه دموع من الضحك
ديما وهي تضحك : شفت كله منك
.................................................. .........

زايد وهو يضحك: هذي نهاية السعودين
تركي: كذا الفله ول شلون بنوسع صدورنا
ديما: ههههههههه لازم نذاله
تركي: بالله عليك لو اننا نأكل وز متعه ذي؟ لازم أكشن وطردات
ديما: هههههههههههههههه الله يرجك يالخبل
بعدو بعييييييييييد يضحكون ويسولفون ويعلقون ....وزايد مسكين جنبوه وراحو
زايد((يالله ياتركي جاينا مثل التنكه ماتدبر شي بالحب والحين طلعت اشطرنا ... الله يهنيهم ان شالله))
ديما وهي تطالع ساعتها: اووووف تروك
تركي: وشفيك
ديما: تأخرت على ابوي يقول لي على المغرب ارجعي
تركي: افاا يالله روحي لاتتأخرين ...
ديما برباشه جالسه تحط كاميرتها بالشنطه :ايه ايه هذيني
تركي ساعدها وحطها بدالها ....
تركي: اوصلك؟
ديما بحيا: ايييه ياليت الشوارع تخوف الليل
تركي: ابشري
زايد: اييييه ايييه طبعا ...رح وياها
تركي:هههههههههه تعال زايد حبيبي والله
ززايد: بس يوم شافها بتروح ...قام يتمسكن
ديما: هههههههههههههههههههههه

.................................................. ....................

نرجع للسعوديه وعند غلا اللي قعدت عند مرت ابوها...وتعودت على البيت ...الوضع صحيح صعب عليها..لكنها تحاول تخفي انها متضايقه وبالأخص من بعد موقف محمد اخوها اللي لايمكن تنساه له . ...تكفي ظروفها وابوها اللي تركها وراح ينام في العسل ...
كانت جالسه في غرفتها ووراها متحان تذاكر له .... كانت متحمسه وتحفظ ...ويوم قلبت الصفحه لقت سواليفها اللي بينها وبين البتول في الحصه
يوم تكتب غلا للبتول نكته والبتول ضحكت ووقفتها المعلمه ...والبتول تتوعدها من بعد الحصه.. قامت تضحك بشكل هستيري طولت واهي تضحك .. اكثر مايصيرفي المدرسه .مقالبها على البتول وشوي وجاها اتصال
البتول: هاااااااااااااااااي غلوو
غلا: هلا وغلاااااااا البتول
البتول: ذاكرتي؟
غلا لاباقي لي شوي هههههههههه
البتول: ليه تضحكين ؟
غلا بضحك: البتول فيه ولد تطاق مع امه جاب لها حليب السعوديه وقال هذا اللي بيني وبينك
البتول: ههههههههههههههههههههههههه اييييييييه الله يقطع شرك ..ضحكي انا اللي تعاقبت مو انتي ...
غلا: بس وربي مت ضحك .. يوم قريتها
البتول: ايه هذي عوايدك
غلا: المهم...بكره متا بتستأذنون ؟
البتول: على الساعه 9ونصف ابستأذن
غلا: وكل البنات بيروحون؟
البتول: ايه انا وروان ورنا والجازي
غلا: ومن جدك أهلك راضين ؟ تطلعين مع صديقاتك؟
البتول: قدرت اقلب راسهم ابشرك
غلا: هههههههههه منتب بسهله
البتول: وش الحين؟ كلها روحت كوفي وش فيها ...الصراحه ملينا من هالإمتحانات الدوريه خلينا نوسع صدورنا ووش ورانا
غلا: طيب ابي اروح
البتول: حاولي في محمد اخوك وان شالله بيرضى .
غلا باحباط: مدري مااتوقع
البتول: لالاحاولي روحي له باسلوب اخدعيه بالكلام
غلا: امممم مدري عن محمد ووش بيقنعه
البتول: ههههههههههه مو تقولين يحب الفلوس؟
غلا: وطيب؟
البتول: ايه خلاص سكتيه بكم من قرش وبيرضى من غير مايحس
غلا: طيب وان رحت وش بيجيبني للبيت ؟
البتول: انا ابوصلك افا عليك
غلا: اووكي احاول
البتول: واعطيني خبران وافق اوكي؟
غلا: طيب
البتول: باي
غلا: سلام
البتول : لححظه غلا
غلا: هلا؟
البتول: ترا نزلت قصايد جديده للعضو اللي معانا
غلا : كذااابه؟
البتول: والله ...تجنن قصايده لاتفوتك
غلا: ياااقلبي على هالعضو وياحلو كلامه
البتول: ايه قصديته الأخير لاتفوتك قويييه مرره
غلا: طيب اقريها لي
البتول:
عفا الله عن خطا غدرالخناجر والدروع ابطال
بسامح واتركك تحت الظلام الحالك الحالك
دخيلك وفر دموعك ترا هدر الدموع اذلال
وترا مافيه أحد يصبر مثل صبري بغربالك
أنا عيبن علي أنقض كلامي والرجال أفعال
واذا قلت أقطع حبالك تراني باقطع حبالك
علشان أكسب هدب عينك تجرعت العذاب أشكال
وليتك ترأف بحالي علشان أرأف بحالك
مسوي في حياتي شي مايذكر ولاينقال
حشى حتى العدو وهو العدو مايعمل اعمالك
تمسيني على الهم وتصبحني على الغربال
تقلطني فناجيلك وتقصر عني أدلالك
تحملت التعب لأجلك وانا حملي يهد جبال
رحلت من العذا بوماوقفت اللا على جالك
علامك كل مااجيك متواضع جيتني تختال
معاك ليامتى بأصبر وصبري معك يحلالك
مثل مااقبلت لعيونك لزوم تلد لي باقبال
ومثل ماقد حشمتك حس واحشم عنني أشوالك
أنا محدن بجابرني أساير معك هالمنوال
ترا لاني تبيع لك ولاني أصغر عيالك
أنا جيت أعشقك نبض ومشاعر معشقك تمثال
أنا جيت أسكنك وابقاك وأحيافيك وأبقا لك
أنا جيتك بظمى عاشق تعب يطرد سراب اللال
أناجيت أستفز رضاك من فرقاك والجالك
أنا ماهنت بك عاقل أنا كنت اعشقك بخبال
أنا ماعشقتك حي أنا كنت أعشقك هالك
تخيل من كثر مااخاف تلقى للزعل مدخال
أخاف اخطى على طيفك وادوس برجلي اظلالك
تبعتك والعرب تتبع رعود البارق الهمال
وانا شفت المطر يتبعك في حللك وترحالك
كأن اللي خلق حسنك خلقني مع جسدك اظلال
وصرت أقرب جسد يمشي معك بقفاك ولا تهيا لك
أبي قلبك يحس انه فقد بمحبته رجال
ملكته من هدب عين وخسرت رضاه بهمالك
صحيح الفراق أقسى ولكن الوصال محال
وانا صعبن علي أرضي غرورك واضعف قبالك
بعد ماحققت عيني فبعدك للرقاد مال
أعود للسهر ياخوي فال الله ولافالك
ببدل نظرتك فيني وأجيلك كل يوم بحال
بكون أقرب من ثيابك عليك ولاتهيالك
بلمك وانثرك واجمعك وارجع انثرك
بهمال بخونك وازعلك وارضي منك وارضى لك
ابرسم بالثرى وجهك وأبدفن صورتك برمال
ابسوي مثل مااشوفك تسوي وافعل افعالك
علشان تعرف من فينا الزعول ومن وسيع البال
ابيك تذوق فنجالي وانا بذوق فنجالك
نصيحه واحتفظ فيها قصر معك الزمن أو طال
أبي تسمع كلامي زين وتحطه على بالك
اذا حبك هبال أطفال لك عندي هبال أطفال
ولا وابشر بعد بهبال حبن ماهو بهبالك
واذا كان قصدك تهين اسمي علشان تشمت العذال
حشى لا انته ولاغيرك ولاعشره من اشكالك

وشرايك؟
غلا: يجنن يانااااااااس فديته هالعضو ..مدري من هالحقيره اللي معذذبته واضح عليه عزت نفس مب طبيعيه
البتول: ايه والله انه خطير
غلا: ياحبي له ابحفظ قصيدته بس خليني افضى
البتول: ايه ولو اسمع لك الأدب مادبرتي شي ...هذا اللي فالحه فيه
غلا: هههههههههههههه مشكله وربي اذا فيه شاعر مثل هالعضو
البتول: خخخخخخ يالله اجل كلمي اخووك واعطيني خبر وش بيقول
غلا: اووكي بااي
البتول: سلام
.................................................. ...........
دخلت على محمد اللي قاعد يكوي شماغه ..((مايحب أحد يلمس الشماغ غيره))
غلا فتحت الباب ودخلت عليه
غلا: اهليييييييين حمود
محمد مسوي نفسه فاهم: جبلي مانيب جايب روحات الحين مانيب مودي وراي زواج
غلا ارتاعت: ههههههههههههههههه لالا مارح اطلبك الحين لاتخاف ..مارح اطلبك
محمد اهو يكوي: اجل وش عندك؟
غلا: اللا لحظه ماقلت لي زواج مين هذا؟
محمد: زواج نايف
غلا ارتكبكت وتغير لون وجهها:.........
محمد رفع راسه: وشفيك؟
غلا: محمد مين نايف؟
محمد: وانتي وش دخلك؟
غلا حست ان سؤالها غلط : لالا بس اسأل يمه منك اكلتني
محمد بابتسامه: هذا خويي مسكين ماصدق يتزوج من زمان واهو يدور
غلا: اييه الله يوفقه عالبركه
محمد: االله يبارك فيك
غلا : وليه انت اللي تكوي الشماغ خلني بدالك
محمد: لالا ماحد يعرف لها غيري
غلا: جربني ماجربتني
محمد: البنات مايضبطونها
غلا بثقه: لالا اللا انا تركي وخالد مايكوي شماغهم غيري
محمد: وان ماعجبتني؟
غلا: سو فيني اللي تبي
محمد بخبث: اللي أبي طيب؟
غلا واهي تكوي الشماغ: كل شي منك حلو تسوي اللي تبي انا راضيه فيه
محمد شك بالموضوع :اقول غلا وش تبين توصلين له
غلا: لالا ابد ماابي اللا راحتك حموود
محمد صدقها من حسن نياته: اها
غلا: ههههههههه وليه ؟
محمد: مدري يقولون ان كيدهن عظيم وانا اول مره اشوفك تغازلين والنفسيه تووب اليوم
غلا: هههههههه لالا كلهم اللا غلا حليووه مره انا ماعرفتني
محمد: أي أي طيب خلصينا
غلا: هاه وشرايك؟ مب حلوه؟
محمد: اوووف غلبتيني وشلون
غلا واهي تغمز: افا عليك بس كل مابغيت تكوي عطني اياها
محمد وهو يلبس شماغه: طيب كذا شكلي زين؟
غلا: تجنن البنات بيخطبونك بدل ماتخطبهم
محمد: احم حمم اجل ابدخل معا المعرس
غلا واهي تضحك في نفسها((من جد بسرعه ينلعب عليكم )): ان دخلت معاه بترزه بس اخاف تغطي عليه ول تنظل
محمد بابتسامه: حبيبتي غلا
غلا: عيوني
محمد: ترضينها لأخوك ؟ يروح زواج واهو مفلس
غلا: ههههههههه لاطبعا
محمد باستغراب: يعني بتعطيني ؟
غلا واهي تطلع الفلوس من جيبها: افاا عليك تفضل
محمد: اخس والله صايره حركات اليوم
غلا بخبث: تستاهل كل خير
محمد: الله بس ياحلو الفلوس وياحلو ريحتها
غلا((الله لايبلاني مابتلاه)): تهنافيها ان شالله
محمد: يالله تامريني بشي؟
غلا: ايه قبل لاانسى
محمد: امري
غلا(والله مايجيكم اللا الكلام ):مايامر عليك عدو... بكره البنات بيطلعون لكوفي خلني اطلع معاهم
محمد عقد حواجبه : ومتى؟
غلا: بيستأذنون من المدرسه
محمد: وتبين تروحين؟
غلا: تكفى
محمد: ومن بيجيبك؟
غلا: البتول خويتي
محمد:..............
غلا: تكفى محمد ماقد طلبتك لاتردني دايم تطلبني ومااقول لك لا تكفى محمد
محمد مع انه مو مقتنع لكنه استسلم: ايه طيب بس لاتطولون
غلا: مشكوور أحلى اخو والله
محمد: بس لاتطولون
غلا بابتسامه: ان شااااااااااالله
طلع من غرفته
على طول اتصلت على البتول
غلا: ههههههههههههههههههههههههههههه
البتول: راضي؟
غلا: واقسم بالله اني سحبته مع خشته من يصدق ان محمد يرضى
البتول: انا ماقلت لك هذا اللي يجيبهم
غلا: ههههههه ايه وانتي الصادقه خلاني اكوي شماغه
البتول: خخخخخخخخ المهم انه وافق
غلا: ايه اشوا
البتول: يالله اجل امي تبيني
غلا: بااي

**رجوع وردة سلام** · 04-11-2010, 03:15 AM

خالد وتركي أخوه كانو مع بعض بنفس البيت ...خالد كان عنده بحث ومشغول مع أوراقه ...
وتركي ساكت بس يطالع في خالد ......لكن باله بعيد ..........
خالد انتبه له : تركي بلاك؟ وشفيك؟
تركي: .............
خالد: الوووو تركي وين وصلت ؟
تركي من غير شعوره وبنفعال: اقطع ابو العذاب اللي كذا
خالد استغرب وترك اللي بيده: تركي وشفيك؟ واي عذاب تقصده
تركي جلس ساكت فتره بسيطه
تركي: خالد خلاص ابي اتزوج
خالد: تغيرت ملامحه من شدة الاستغراب الى وجه فاطس ضحك :ههههههههههههههههههههههه لايكون فيك شي
تركي: من جدي اتكلم
خالد:اخاف انك مقرقع لك كاسين من هنا وجاي تبي تتزوج
عصب تركي: خالد انا اكلمك من جدي
خالد: متأكد انك بكامل قواك العقليه؟
تركي: خالد والله انا خلاص اخترتها وابيها
خالد: اوووخس اختارها ويبيها الرجال من جد يتكلم هههههههههه
تركي: انا اكلمك جد وانت تتهزا فيني
خالد: لالا خلاص ..(ببروووووود)..تركي حبيبي اذا انا ماتزوجت مع وييييين انت تتزوج حبيبي الزواج مب لعبه ...كون نفسك .. ......وشلون بتصرف على نفسك بالله؟ ابوي بيصرف عليك؟..ومنهي اللي تبي واحد أهله يصرفون عليه ؟...ومن زين تخصصك ول كن فيك مميزات عن الناس .. تركي انسى الموضوع ...و ترى المسأله مب سهله
تركي: الخير كثير ياخالد وانا ماابيها تضيع منني
خالد(والله وصار يقول كلام اكبر منه): مدري كلم ابوي بالموضوع لأنني مب معاك مدري ماخشت بالي الفكره
تركي بنفعال: طول عمرك تحسبني صغير وماافهم ولااعرف اتصرف ....خالد اللي طحت فيه شي مايرحم خلاني احبها وماابيها تضيع من يدي
خالد ببرود اعصابه المعتاد: طيب خلاص قلت لك قل لأبوي
تركي: تهقا انه بيرضى؟
خالد: ماتوقع بس انشالله
تركي: وان قلت لك اني سألته وماعنده مانع
خالد باهتمام: تركي من جدك؟
تركي: لي ساعه اقول لك جد
خالد وهو يحاول يستوعب: يعني بتاخذ اللي معاك في المدرسه؟
تركي: ماغيرها ....اخ لوتدري كيف تعذبني
خالد: هههههههه ...
تركي: ابي اخطبها من أبوها
خالد: والله شف رايها قبل ...عشان ماتتفشل بعدين...مع اني داري انك فكل الحالات مفشل روحك
تركي: مدري كيف اقول لها
خالد: عاد انت لازم بتقول لها ماحد بيقدر غيرك
تركي: ماتعودت افاتحها بمواضيع مثل كذا ...بالعاده تنكيت وضحك بس
خالد: سو نفسك جاااد ومن قلبك تبيها .
تركي: برايك؟
خالد: ايه ومبرووك مقدما
تركي بابتسامة فرح: يبارك فيك
وعلى طول يبي ينسي نفسه التفكير دخل على الماسنجر حقه ...
.................................................

ولقى ديما موجوده
تركي: هلاوالله
ديما: اهلييييييييين
تركي: ابوك قال لك شي؟
ديما: هههههههههه لالا شافك بس قال من هذا...قلت له سعودي معانا ...وصلني لأني خايفه
تركي: زين اللي ماقال لك شي
دخل خالد على تركي وشاف محادثتهم
خالد: اقول تركي قل لها الحين وشف وشرايها
تركي: ابسألها اصبر
تركي: ديما أبيك في موضوع بس ان كنتي فاضيه كلميني
ديما: الحين انا فاضيه
تركي: ابدخل في الموضوع على طول ...انا ناوي اخطبك من أبوك وابي اشوف رايك أول
ديما بقت ساكته ..استحت وماعرفت تتكلم فرحت فرحت من قلبها ...هذا يدل انه يحبها ...وقامت تذكر مواقفهم مع بعض وأول ماتعرفو على بعض واللي صار في الحديقه معاه ...كل كلامه كان من وراه قلب يحبها؟ معقوله
تعودت على تركي ...مايفتح معاها هالمواضيع ....أخر شي يجي على بالها انها ممكن بتصير له واهو لها ...أو انه يحبها ...تمنت تقول له انا موااافقه وتعال اليوم قبل بكره لكنها ماقدرت
ديماظلت سااكته ,...وتركي على اعصابه
خالد وهو طالع: هههههههههه اقووول شكلها ماتبيك لاتحرجهابس
تركي: اسكت عارفها اكيد مستحيه ماتعرف للبنات انت
ديما كل اللي قدرت تقوله:مادري
تركي:يعني انتي مخطوبه من قبل
ديما: لا
تركي:طيب فكري واستخيري وخذي راحتك ..وردي لي خير بعدين
ديما: ..............
تركي: انتظرك انا يالله فمان الله
ديما: مع السلامه
....
ديما اللي جلست تفكر وتفكر ...استخارت ....واهي على السجاده الضحكه شاقه فمها ....من قدها حلم كان والحين يحطها تركي على ارض الواقع على طوول
((بس ...أخا ف يحسبني ماابيه ...انا غبيه ليه اقول له مدري؟.........الولد يبي ياخذ كلمه وانا مدري....من جد أفشل .....اخاف يدور غيري شكله يبي يتزوج....... لالاماابي اخذ احد غير تركي لا....بس والله احراج ماعرف اقول له ......لاياديما بيطير عنك وانتي مستحيه......طيب اهو سألني وأكيد حط فباله اني ممكن أوافق ...ومب بعيده .....ليه؟.,,,,مين المجنونه اللي ترفض واحد مثل تركي......؟؟.......صحيح مايحب الجد ....لكن اخلاقه اخلاق.....مين يحصل مثله من عيال اليوم ....أقول ديما توكلي وووافقي له احسن ....))

ومن جهه ثانيه خالد ماصدق يمسكها على تركي
خالد: هههههههههههه خووووش تفشيله شكلها ماتبيك ليه تفشل نفسك ابي ادري
تركي: لالامتأكد انها موافقه بس مستحيه
خالد: لوهي موافقه يالذكي بتقول لك مدري وش مدري ذي مع وين أصرفها بالله؟
تركي: بالله عليك فيه بنت بتقول ايه ؟؟بتحطيح من عيني حلاتها تستحي ...وأنا عارف ديما اكيد مستحيه
خالد: هههههههههههههههه ياشين الثقه بعد
تركي واهو يفتح الماسنجر مره ثانيه:اقول انقلع انت
دخل ولقاها موجوده ماتكلمت ولا كلمه ...مابدت معاه بشئ
ظل فتره ينتظرها وطلعت له
ديما: تركي
تركي: لبيه
ديما: انا استخرت وفكرت وانتهيت
تركي: ووش وصلتي له؟
ديما: ماقدر ارفضك
تركي :يعني موافقه؟
ديما: ايه
تركي: اذا منتي موافقه عادي مارح يتغير شي ..الراي في الأخير لك
ديما: درست قراري
تركي: زواج ياديما مب لعب
ديما: الله الموفق وانا فكرت وهذا قراري
تركي: الله يكتب اللي فيه الخير
ديما: ان شالله
.................................................. ..........

كان منشغل في الأوراق والمعاملات اللي بيده .. وراسه يووجعه مب عارف حتى يقرا الحروف
نواف: فيصل .. سلامات وشفيك
فيصل وهو ماسك راسه: مصدع يافارس صدااع مايرحم
نواف حط بجنبه علبة البندول: خذ هذا بيريحك ان شالله
فيصل واهو معقد حواجبه : لالا توني ماخذه
نواف: فيصل ..شف شكلك لازم تريح
فيصل: اخخ راسي
نواف وهو يقوم: اقول قم ابطلع وياك
فيصل: لالا ابخلص هاللي فيدي اول
نواف: ياشيخ مب نافعك هاللي فيدك ان تعبت ول صار فيك شي هذا راس مايرحم
فيصل: امري لله
طلع معاه وركبو السياره
جلس شوي ريح ...مارضى يروح للمستشفى .. لأن هالحاله دايم تجيه
نواف: فيصل لك كم من يوم وانت مريض لازم تشوف نفسك
فيصل: لالا صداع دايم يجيني من الشغل
نواف: بس انت اول ماكنت كذا
فيصل: مدري
نواف: فيصل صار شي جديد؟
فيصل: ااااااخ يانواف لو تدري ..تعبت واتعبتني معاها
نواف: خلاص ياخي شف حياتك .. ماعليك منها ..بكره بتاخذ غيرك وتنساك ماتسوى تتعب نفسك
فيصل: اللي ابي اعرفه ليه ترفضني منهو اللي مشغلها
نواف: خلهم عنك بنات هاليومين ماعندهم سالفه ول انت مافيك عيب والكل يتمناك
فيصل زادت عليه حدت الألم
نواف شغل السياره
فيصل : لاتوديني نواف مايحتاج
نواف: أنا متأكد ان فيك بلا يافيصل لازم تروح
فيصل: لابس ودني للبيت
نواف:فيصل عرفتك قوي وينشد بك الظهر لاتخلي وحده ترفضك تاثر عليك
فيصل واهو معقد حواجبه من الألم: كل شي ماضعفت منه اللا سااره سااره عذبتني
نواف : تزوج وانساها
فيصل: ماقدر مقدر
نواف: الله يهداك بس
فيصل: مستشفى منيب رايح وصلني للبيت الله يعافيك
نواف بغير اقتناع: ان شالله
وقفو عند الباب واهو ماسك راسه ومب حاس بشي
نواف: فيصل ؟..وصلنا
فيصل واهو يفتح الباب: أي أي ان شالله
نواف: فيصل خلني أوديك للمستشفى شف وجهك
فيصل: لاماله داعي
طلع من السياره وحالته تكسر الخاطر... مكسوووف .. مثل المكسور ظهره .. يرتجي ويتمنا شئ لايمكن يصير
واهو يطلع مفتاحه ماقدر يتماسك مسك يد الباب ..عشان يساعد نفسه لايطيح ..وماحس اللا بنواف ماسكه يساعده يوقف ..
نوف واهو ماسكه: سلامتك يافيصل
فيصل خلاااااص فقد الوعي ماحس باللي حوله
وداه نواف للمستشفى ...
كشفو على فيصل وظل على السرير بالمغذي
نواف: دكتور وشفيه؟
د: اتوقع انه يفكر كثير انكتم تنفسه والسبب التفكير كثير تصير هالحالات بالذات للي يدرسون او يشيلون هم شي حطينا له مغذي .......وبعد اشوي ان شالله بيقوم ..
نواف واهو يفكر ((ياخسارتك يافيصل تربط مصيرك بوحده ماتبيك؟...وتتأذى ماحست فيك ...ياطول صبرك وياكبر بلواك ليتني اخذ همك واخفف عنك ياصديقي))
شوي ودق جوال فيصل المتصل (الوالده)
مسك جواله ..مابغى يرد اكيد انها بتقول ليه متأخر يقول لها ولدك طايح بالمستشفى؟ مب حلوه حطه على الصامت ..
وبعد ربع ساعه
(ياسر يتصل بكـ ) ياسر يصير أخو فيصل
نواف: السلام عليكم
ياسر: وعليكم السلام ..هلانواف
نواف: ياهلابك
ياسر: وين فيصل ؟ تأخر اليوم
نواف: فيصل تعبان وأخذته للمستشفى
ياسر: سلامات وشفيه؟
نواف: لابس مكتوم .. وحطو له مغذي وان شالله مافيه اللا العافيه
ياسر: أي مستشفى؟
نواف: لالاماله داعي ابجيبه لكم شوي وبيقوم
ياسر: وينه طيب ابي اكلمه
نواف: نايم الحين
ياسر: لاخلني اجي عالأقل ابطمن الوالده
نواف: اوكي هذا المستشفى........ وهذي غرفته......
ياسر: الله يجزاك الخير
نواف: الله يعافيك
بعد دقايق
فيصل قام واهو معقد حواجبه ووجهه أصفر
نواف: الحمدلله على السلامه
فيصل: الله يسلمك ...نواف عطني المويه اللي جنبك
نواف: تفضل
فيصل شرب المويه وقام يفكر
نواف: فيصل الدكتور يقول كله من التفكير..... يافيصل لاتتعب نفسك
فيصل: ماقدر انسى صدقني
نواف: لاتفكر كلها اشيا سلبيه بترجع لك
فيصل: ايه ان شالله ..وبعدين وراك جايبني ؟ مو انا قلت لك لاتاخذني للمستشفى؟
نواف: لو مااخذتك كان طحت على اهلك .. بعد زين اللي جبتك لايصير فيك شي
فيصل بقهر: ابي اعرف اللي فبالها عشان اذبحهه
نواف يبي يغير عليه الجو: هههههههه اخس ياروميو زمانه
فيصل: ههههههههههههه بلاك ماجربت
نواف: ابستثمر طاقاتي لزوجتي
دخل ياسر
ياسر: سلامات فيصل
فيصل وهو يطالع نواف: الله يسلمك
ياسر: وشفيك؟
فيصل: كتمه مثل العاده ...
ياسر: من ايش طيب انت لازم تعرف
نواف وعينه على فيصل: من التفكير والهموم
ياسر: افااا ..وش تفكر فيه ؟
فيصل: ابد الشغل تعرف
ياسر: الله يسهل لك ..الزم ماعليك صحتك
نواف: اجل انا ابستاذن برخصتكم
فيصل: بدري
نواف: والله طولت على الوالده اخاف تنشغل علي
فيصل: اجل الله معاك ويعطيك العافيه
نواف: ماسوينا شي .. سلام
ياسر وفيصل: مع السلامه
طلع من المستشفى واهو مهموووم ...ياليتها تدري باللي يصير فيني كل مره وكل يوم ومع كل عذاب ...عشان تعرف كيف يعاني بسببها ....

**رجوع وردة سلام** · 04-11-2010, 09:33 AM

الســــــاعه 9 الصبح في المدرسه
استأذنو البنات من المدرسه (روان ورنا وغلا والبتول والجازي)
في السياره...
البتول: بنات وين تبوننا نروح مطعم ول كوفي
الجازي: وش كوفي تكفين خلينا نروح مطعم
روان: الريف اللبناني
غلا: لالاتشيليز
البتول: ايه تشيليز أحسن
روان: لالا بتلقونه زحمه هالوقت
الجازي: مب شرط
البتول وهي تكلم السواق: روح عند تشيليز
وقفو عند المطعم صار زحمه ولازم ينتظرون ساعه ..
غلا: لالامارح ننتظر بنات بنطول على اهلنا أي مكان مب لازم تشيليز
الجازي: والله بتروحون ول تجون مالكم اللا مااااااك ههههههه
البتول: لاوالله طالعين نروح ماك؟ لالا تشيليز يعني تشيليز
غلا : عاجبك مكاننا هنا؟ اللي حولنا كلهم شباب هذا وقتهم والله مب حلوه
البتول : بكيفهم ووش علينا منهم
وشوي اللا ويجيهم واحد من جنب السياره.(فهد).. يطالعهم مع ربعه البنات مانتبهو له ..
رنا: بنات ترا فيه واحد من زماااااان له موقف هنا ..خلونا نمشي
روان بخوف: هذا اللي خايفه منه
.....فهد.......: أفااا ليه الحلــــــــو مايعطيني وجه
ويرمي عليهم من نافذة السياره خمسمية ريال ويضحك
البنات كلهم خايفين ... ماغير البتول اهي الجريئه
البتول: قليل أدب
....فهد.....: انا مثل ماتبين قليل أدب وماعندي دم وحركاتي ماصخه هههههههههههههه كل شي منك حلووو
كانت خمسمية ريال وعليها رقمه المميز ...
الجازي: البتول خلاص خلينا نمشي
اسمعوها الشباب وقامو يضحكون ...
.....فهد...: أفاا تخافين؟ والله مارح ناكلك
غلا قالت للسواق يرجعهم للبيت ...
تحركت السياره والشباب قامو يلحقونهم بسرعه وتفحيييط... شوي وقامو يتحادون السياره تقرب وسيارة البنات تبعد عنهم
الولد فنان وضابط الشغله لكن السواق يادوب يعرف يسوق عشان يحاد له واحد ول يفحط
كل البنات خايفين .. الولد يفتح النافذه ويرمي عليهم كلام استمرو على هالحاله دقايق متواصله ..يحدهم بسياره ويفحط وشوي بتطيح سيارتهم وبتنقلب
غلا بخوف: بنات ابتصل باخوي محمد
البتول: اخاف يقول لك شي
غلا بربكه: البتول ولايصير فينا شي مع هذا
الجازي: يمه ابوي بيذبحني الحين ...اتصلي على اخوك وخليه يتصرف
روان: بناااات شوفو شكل الولد شكله مب صاحي
غلا: اجل فيه واحد صاحي يدور بالسياره كذا؟
وشوي ويفقد السيطره على سيارته ... صدم في سيارة البنات وصارت السيارتين تمشي في يمين ويسار الطريق..من غير سيطره ...الشكل يخووف ومرووع مره
البنات خااافو وقامو يصيحون ... خلاص الكل يفكر انها اخر لحظات عمره الموت قبالهم الحين ... ماحد بيقدر يتحكم بالسياره ... السواق حاول وحاول وفي وقت متأخر قدر يبعد عن سيارة الولد ... اما فهد دارت دااااااااارت فيه السياره وانفقع الكفر ...وانقلبت

كان اودي أسود وراهم وشاف كل اللي صار .....
الأول وهو حاط يده على راسه : اوووف اووف تشوف اللي اشوفه
الثاني: خل نلحق عليهم اكيد صار شي الحين اتصل بالمرور والاسعاف
الأول: لامايحتاج اسعاف
الثاني: اللا شف السياره اللي انقلبت
الاول: طيب اسرع خل نشوف
وقفت سيارتهم ..............

البنات طلعومن السياره ... والسواق جلس يحاول يصلح في السياره ...
روان: ياربييي شوفو الولد مسكين لازم نتصرف بنات
البتول من غير اهتمام: ايه احسن ماحد قال له يلاحق بنات ويحادهم
رنا قلبها رهيف وعلى طول تتأثر واهي تبكي: لابنات وربي ينرحم عالأقل نتصل بالاسعاف
غلا واهي ماسكه الجوال: ابدق على الاسعاف لاكن احنا لايمكن نسوي له شي
وقفت الأودي في مكانهم
الجازي: بناااااااااااات قولو علي السلام
روان: ليه؟
الجازي: شوفي هذاك اللي جا عندنا
روان: يمه بننخطف الحين
اقبلو الاثنين
الثاني: وش صاير؟
البتول: سيارتنا تعطلت بس الله يعافيك شف اللي هناك
الأول: تعرفونه؟
الكل سكت
البتول: لاكان يحادنا بالسياره
الأول: لاحول ولاقوة اللا بالله ...
راحو ركض عند سيارة الولد
كانت سيارته منقلبه واللي داخلها فاقد الوعي ... ووجهه وجسمه كله دم ... طلعوه بمساعدة الاسعاف
واخذو جواله وعلمو اهله ... وراح للمستشفى مع الاسعاف.

البتول: والله انهم نشامى
الجازي: ايه والله اول ماشفتهم خفت على بالي بيسون فينا شي
غلا بخوف: بنااااااااااات!!
الكل: وش؟
غلا: الولد اللي قبل شوي يكلمنا أعرفه
رنا: بالله عليك؟
غلا طاحت دمعتها: والله
روان: وش يصير لكم؟
غلا: ولد اخت مرت أبوي
البتول باستغراب : نااااااااااااااايف؟؟؟؟؟؟
غلا: ايه هذا نايف
.................................................

روان: وانا اللي اقول شكله يجنن من قبل
رنا: والله انك فاضيه
البتول: ايه والله اعترفو حلو .. بس والله انه ولد ناس لولا الله ثم اهو كان متورطين الحين
رنا: طيب تتوقعين عرفك؟
غلا: لالامايعرفني
البتول واهي تغمز: غلا عرفتي تختارين
غلا بخوف: وانا بوادي وانتم بوادي
وصل نايف وجلوي اللي معاه هذا يصير أخوه
فكو السياره وقامو يحاولون يصلحون فيها ... والبنات دخلو داخل السياره
رنا: ياربي تعبناااهم معنا
غلا: ايه والله
البتول: فشيله
وقف قبال شباك السواق واهو لابس نظارته الشمسيه ...يده كلها متوسخه من التصليح
نايف واهو ينفض يده ويطالع بالأرض: السياره مطوله تاخذون سيارتنا؟
البتول: لاياخوي مانبي نتعبك معنا
الجازي واهي تهمس: لاوش يوصلوننا؟
نايف: سواقكم بيوصلكم واحنا نشوف هالسياره
االبنات استحو من طيبته ماحد تكلم
جلوي اعطى السواق المفتاح وركبو البنات سيارة نايف ... والسواق بيمشيهم وبعدين بيرجعها لهم
نايف سأل السواق عن عوايلهم ... وعرف منه انها غلا بنت سلطان بن ........
ويوم راحت سيارتهم
نايف باستغراب: اقول جلوي...تدري ان بنت خالتي ام محمد موجوده معاهم
جلوي مستغرب : بالله عليك؟
نايف: نفس الاسم ياجلوي
جلوي: ووشلون ؟ ماعرفتك؟
نايف بتفكير: لاهذي اختهم من ابوهم
جلوي: وغريبه محمد مطلعها مع خوياتها
نايف :مدري والله غريبه

في سيارة نايف
الجازي: سيااره مرتبه البتول علمي اخوانك شوفي سيارتكم وشلون حالتها حاله
البتول بضيق: اقول انطمي انتي
الجازي: هههههههههه
غلا: بنات تتوقعون انه عرفني ؟
روان: ترى قريبكم سأل السواق عن أسمائنا
غلا بخوف: قولي والله ؟
روان: ايه شفتهم
غلا: ياربي بيدري محمد الحين الله يعينني
روان: لاانشالله مايقول له
البتول: بس من جد تفشلنا مع الرجال اشغلناهم
الجازي: عاد اشكريه ياغلا قولي له شي تعبناه
غلا: ايه عشان يكفخني محمد
الجازي: تووووبه والله ماروح ويااكم .
البتول: اقول انطمي انتي الشرهه على اللي يطلعك
رنا: احلى شي هالنايف والله انه نشمي
الجازي: ايه والله
روان: ههههههههههههه بنات شوفو الخمسميه عندي للحين ..
غلا: اللي فيها الرقم؟
روان: بس والله حركات تطور الترقيم ...خخخخخخ
البتول:يحسبوننا مخفه بالله ابضيع نفسي على رقم مميز ول خمسميه
رنا: بس رحمته الولد وشتتوقعون بيصير له الحين ؟
الجازي: الله يعييييييينه
وقفو عند بيت غلا
ندى كانت توها بتدخل للبيت مع زوجها بندر
تفاجأت غلا ودخلت على طول ... ندى كانت تطالعها بنظرات غريبه غلا عجزت تفهمها
دخلو للبيت
ندى: غلا
غلا بخوف: نعم؟
ندى: مع مين جايه؟
غلا: مع البتوول
ندى: لابس هذي سيارة نايف ولد خالتي
غلا: ماحد عنده اودي اللا نايف؟
ندى: لابس نفس سيارته غلا اعترفي
غلا: والله انا وحده جايه مع خويتي عندك ماانع؟
ندى خزتها من فووق لتحت :سويتيها ياغلا؟؟
غلا: كلن يطالع الناس بعين طبعه
ندى: قلة حيا وطوالت لسان
غلا تركتها ومشت

دخلت ندى على طووول عند أمها
ندى: اهلللللللين يمه
ام محمد: هلا بنتي هلا وشخبارك ؟
ندى: والله تمام .وشخبارك انتي..ترى بندر بيجي يسلم عليك
ام محمد: حياه الله خليه يدخل بس لحظه ألبس شيلتي
ندى: اووكي
بندر: السلام عليكم
ام محمد: وعليكم السلام ووشلونك ولدي يابندر ؟
بندر:والله الحمد لله
ام محمد: وشلون امك واهلك كلهم طيبين؟
بندر: ابد الستر الحمدلله بصحه وعافيه
ام محمد: وعساك مرتاح مع ندى؟
ندى: يمه وشها الكلام؟
بندر: هههههههههه الحمدلله
ندى: بندر وانت جاي جيب معاك خبز للبيت
بندر: ان شالله
ام محمد بابتسامه: ومتى ابشوف عيالكم ان شالله؟
بندر بخبث: قريب ان شالله قريب
ندى استحت: خلاص غيرو السالفه ماعندكم غيرها ؟
بندر: خخخخخخخخخ
ام محمد واهي تلتفت: أبد اللا مب كنها غلا جات؟
ندى بقرف: ايه توها داخله معي
بندر: اجل برخصتكم
ام محمد: والغدا؟
بندر: المره الجايه خالتي وراي ارتباطات
ام محمد: وعد يابندر
بندر وهو يوقف: ان شالله
ندى وصلت بندر عند الباب وجت ركض لأمها
ندى: يمه ابي افهم وشلون متحملينها كل هالوقت؟
ام محمد: بنت الجوهره؟
ندى: ماغيرها
ام محمد: وش اسوي بها ماتجلس عندنا طول الوقت بغرفتها
ندى واهي ماده يدها: موت ياخذها ... مثل مااخذ امها
ام محمد : اللا وينها مالها حس ؟
ندى: قبل شوي هزأتها...مالها وجه
ام محمد: ليه؟
ندى: يمه عارفه اليوم وش شفتها تسوي؟
ام محمد: وش؟
ندى: جايه بسيارة نايف ولد خالتي
ام محمد: لااهي ناويه تجي مع صديقتها اليوم
ندى شكت بنفسها لكنها تبي تفتح امها: لااااااايمه سيارة نايف نفسها متاكده
ام محمد: مااسبعد بس ولد خالتك مايسويها
ندى: وشدراك ؟ يمكن واحد من اخوياه
ام محمد: مدري عنك انتي لاتتكلمين في الولد كذا
ندى: يمه مااقصد نايف اعني غلا ... ياليتكم تزوجونها ونفتك منها ومن مشاكلها ... الحين فاقده حنان بتشوه سمعتنا عند العالم
ام محمد: والله مدري كل اللي يجونها عيال حلال ياعزتي لساره بنتي مايجيها كثر اللي يجون لغلا
ندى بضيق: اعوذ بالله منها ...حتى في الخطاطيب
غلا دخلت عليهم بتاخذ كتاب من مكتبة الصاله وندى وام محمد على طول سكتو أول مادخلت واهم مكشرات بوجهها
غلا بعجله : السلام عليكم
ام محمد: ومع مين جايه ؟
غلا وجهت نظراتها لندى وظلت تطالعها الا ان طاح الكتاب من يدها..شالت الكتاب وراحت تركض
ندى: شفتي يمه انا ماقلت لك؟
ام محمد بعصبيه مالها داعي: انا لازم اشوف وش تحت راس هالبنت (وهي تنادي)ياغلاااااا
نزلت واهي موقفه على الدرج
غلا: هلا خالتي
ام محمد: علميني وش مسويه مع ولد اختي
غلا:لو اني مسويه شي كان ماجيت بكل ثقه عند الباب ...وبعدين بأي حق تشكون فيني على طول ؟ انا محترمه ابوي واخواني واعرف من الصح ومن الخطأ أنا بنت الجوهره الكريمه العفيفه ولايمكن أخرب سمعة أهلي ..معليش مب على الطالعه والنازله تخلونني انا الخطا

ندى: اجل ووش تفسرين وجودك في سيارت ولد خالتي؟
غلا: سيارة صديقتي اختربت في الطريق وجا واحد وصلحها قال لنا روحو مع السواق وانا ابكمل تصليح السياره ......... عاد مدري اذا هذا ولد خالتك ول لا مااعرفه انا
طلعت لفوق على طول من غير ماتسمع كلمه منهم
هالمره مااهدرت دمعتها صحيح الموقف يضيق الصدر .... لكنها مابغت تنزل دموعها هالمره يمكن ببتتضايق لأن مافيه شي بيخفف عنها لاكن لازم تصير قويه ودنياها شدت عودها
اتصلت في البتول على طول تبي تنسي نفسها
غلا: هلا البتول وش صار عليكم؟
البتول: لاخلاص وصلت البنات ... وأبوي راح عند سيارتنا يقولون تصليحها مره غالي.... عاد ابوي يقول لازم اشكر هالرجال والنعم فيه وطبعا طبعا قال مافيه طلعات مره ثانيه
غلا: ايه الحمد لله ...تدرين ان ندى اختي شافت السياره وقالت لأمها ا
البتول: يؤيؤؤؤؤ ودرت انها لنايف؟
غلا: ايه تقولي اني طالعه معاه تخيلي خربت ولد خالتها على قولهم
البتول: لاكلشي ولافي هذي ...وريهم منهي غلا
غلا: والله انا ابسكت ...الحقران يقطع المصران
البتول: تغلط عليك طيب؟
غلا: واثقه من نفسي ماسويت شي وبعدين .. علمتهم عن كل اللي صار مايقدرون يقولون شي
البتول: الله يعينك اشين شي الحرب مع الأقارب
غلا: ايه طبعا وبالذات ان اجتمعت ندى وخالتي ام محمد
البتول: الله يصبرك
غلا: شكل عذابي توه في البدايه مب بينتهي مثل ماتوقعت
البتول: وش عذاب غلا وكليها تبن ...مو تتعذبين عشان ام محمد
غلا: مااقول اللا الله يعييييينني بس
................................................
في الصالهـ
ام محمد سكتت ماقدرت تتكلم .... اما ندى مازالت منقهره من غلا وتبي تركبها ذنب ماسوته
ام محمد: ماوقفت ياندى انا اوريها
ندى: ووش بتسوين ؟
ام محمد: مب البنت تبي تطلع مع شباب وتفلها ؟
ندى: اكيد
ام محمد: وش رايك نزوجها؟
ندى: ياليت اليوم قبل بكره
ام محمد بخبث: قريب يومك يابنت الجوهره
ندى: ههههههههه يمه وش بتسوين ..ان قلتي كذا احس انك بتقتلينها
ام محمد: ابقتلها قهر وحسره
ندى: طيب ومين بتزوجيها ؟
ام محمد:أنا عارفه لها بس خليها علي
في هالوقت دخل محمد واسكتو الثنتين
محمد بابتسامه: هللااايمه هلا
ام محمد: هلافيك ولدي وشاخبارك؟
محمد: الحمدلله وشلونك ندى؟ وشخبار بندر؟
ندى: والله كلنا بخير
محمد واهو يدورها: اللا غلا وصلت؟
ام محمد بقهر: وليه محترق عليها ؟
محمد: لأنها امس قالت لي انها بترجع مع صديقتها جت ول لا؟
ندى بقهر: اييه ايييه جت تطمن
محمد: وورا ماتجلس معاكم؟بالعاده هالوقت اللي اجي فيه الاقيها موجوده
ام محمد: فكنا منها بس اكيد تبي تريح فوق
محمد واهو معقد حواجبه: يمه غلا فيها شي؟ متضايقه؟
ام محمد: لالا ابد بس يمكن تعبانه
محمد: ابروح اشوفها
ندى: محمد ياشينك وش اللي تشوفها وانا ماكنني موجوده
محمد واهو يرقى الدرج: لابس دقايق واجيك
محمد كان يحس بفرق بين أخواته وغلا ... غلا فيها نوع من العاطفه ...انوثه ...حنان ...أخلاق عقل وتربيه ..مب مثل خواته ...يحس معاها انها اخته واهو اخوها ... ويحب يجلس معاها ويسمع رايها ويشاورها أكثر من غيرها
وصل لغرفتها.. ابتسم وطق الباب
محمد: ادخل؟
غلا واهي تفتح الباب : هلا محمد تفضل
محمد: اهليين غلا وشخبارك؟
غلا: الحمدلله
محمد: هاه كيف اختبارك؟
غلا: كويس
محمد: وشصار على طلعتكم ووين رحتو
هنا غلا تلعثمت وماتدري وش بتقول ان كذبت اكيد بيعلمه نايف وان صدقت ماتدري وش ردة فعل محمد
محمد: ماقلتي لي وش سويتو ؟
غلا: مارحنا مكان اختربت السياره في الطريق
محمد واهو عاقد حواجبه: اختربت السياره؟!!!! وكيف جيتي ؟
غلا: وقفو اثنين وصلحو سيارتنا وخلونا ...نروح بسيارتهم
محمد بانفعال: وانا وين رحت؟ وراك ماكلمتيني ؟
غلا: جوالك مغلق
سحب جواله بسرعه من ثوبه وشافه
محمد واهو ماسك راسه: اوووف نسيته ناوي افتحه
غلا: اتصل فيك يطلع لي مغلق
محمد: ومن وصلكم ؟
غلا: سواق صديقتي وصلنا كلنا والولد صلح السياره .. وبعدين ابو البتول راح عنده وشكره واعطاه سيارته
محمدبتفكير: والله اني قايل مايصلح تروحون
غلا : حرام عليك ماسوينا شي
محمد: وطيب منهو هالولد ابي احبه على راسه
غلا: ليه؟
محمد: لو انه ماجاكم كان الحين ماندري عنك
غلا: ايه والله باين عليه رجاااال
محمد: الله يعافيه
.................................................. ..........
أبو البتول: الله يعافيك ياخوي والله ماقصرت يا؟
نايف: نايف ياعمي
ابو البتول: والنعم والله رجال ومن ظهر رجال
نايف: لاابد ماسوينا شي كلنا لبعض
ابو البتول: معليش تعبناك معاهم السموحه منك يانايف
نايف: لاابد ماسوينا اللا الواجب وهذي سيارتكم
ابو البتول: الله يعافيك ياولدي
نايف: الله يبقيك عمي
اخذ سيارته اهو مع جلوي وركبو بيروحون لبيتهم
جلوي: والله شي مدري وشلون هالناس تخلي بناتها تطلع
نايف: ايه والله صعبه اطلع اختي هالوقت
جلوي: هذا غير اللي يحادهم بسيارته بعد
نايف احترقت اعصابه ... اكره ماعنده يسمع قصص مثل كذا عن شباب يتحرشون ببنات
نايف: ايه والله مشوهين سمعت البلد هالاشكال
نايف بقهر: من جد شي يقهر
جلوي: مدري متى بتنقرض هالأشكال
نايف: لو انه في وعيه كان علمت عليه الهيئه
جلوي: همج وحطيت عندهم سيارة بنات توقع كلشي
نايف: والله شرهتي على هالأهل كيف يطلعون بناتهم بلحالهم
جلوي: دنياك عجايب
نايف : بس كلشي بكووم وبنت خالتي اللي معاهم بكوم
جلوي: متأكد ؟
نايف: اقول لك نفس الاسم غلا بنت سلطان بن ........
جلوي: غريبه واهي ماتكلمت
نايف: ماتوقع عرفتنا

نتظر ردودكم ان شالله ماتندمون عليها وتعجبكم بس انتم اعطوني وجه شوي عشان اكملها

**دمعه حزن 22** · 04-11-2010, 04:08 PM

هلا ورده يسرني ان اكون اول من يرد عليك روايه بدايتها روعه وباقي اجزاءها ان شاء الله اروع تقبلي مررررررررررررروري
كملللللللللللللللللللللللللللللللللللللللللللللللل لللللللي