محتاجه مساعدتكم - افكار لحفل الملكة

[عيون الكون]

السلام عليكم ورحمة الله وبركاته

اخواتي الغاليات محتاجه مساعدتكم ابغى افكار مميزة لحفل الخطوبة ( الشبكة )

اللي ابغاه :

افكار جديده للزفة تكون تصلح للشبكة

واذا عندكم خلفيه عن قاعات حلوه في الرياض واسعارها معقوله ما ابغاها فخمه مره لانها حفلة خطوبة بس نخلي الفخم للزواج خخخخخخخخ المهم تكون حلوه

و بعد محلات تصميم الكوش وكوافيرا بس تكونون مجربينها

ومحلات تصميم فساتين الاعراس طبعا في الرياض

شبكتي باقي عليها شهر تقريبا

انتظر فزعتكم يالغاليات ومانستغني عن افكاركم ونصائحكم

وجزاكم الله خير

اختكم عيون الكون

[الشهد]

هلا فيك اختي

لفيت على بعض المواقع حتى الطش لك كم فكرة حلوة مثلك وهذي بعضها


الفكره تم تنفيذها بعرس ربيعتى الى حضرته الاسبوع الى الطاف.... ببدا اولا بالقاعه بشكل عام وبعدين الكوشه واخيرا الزفه او الحركه..
القاعه:
الطاولات كانت مرتبه بشكل منسق وجميل لون الشراشف كان ازرق وعلى كل طاوله وفى المنتصف , كوب على شكل فاز..كبير..وطويل... تقريبا (40سم)(مخروطى)وبداخله ماى وسمكه ذهبيه..

الكوشه:
الكوشه كانت على شكل احجار بحريه والمرجان والطحالب البحريه..وعلى السقف كانوا معلقين اسماك حوالى(15 سمكه على مسافات متباعده.. الكرسى وهذا كان احلى شى.. لانه الكرسى كان مصمم بشكل حلو بحيث اسفل الكرسى مصمم على شكل حوض سمك.. على فكره ترى الاسماك الى فالحوض حقيقيه ..وطبعا الاسماك المعلقه لزينه..عن تصدقون بعد انها حقيقيه

واخيرا :الفكره او الحركه الى نزلت فيها العروسه....
قبل لا تنزل العروس طبعا اطفؤا الاضاءه وظهروا اربع بنات لابسات لباس الحوريات بشعورهم الطويله... وكانت الفساتين بالون الابيض... ونزلوا من نفس المكان الى راح تنزل منه العروسه مع اصوات البحر ..... وعلى الممر كانوا الحوريات يقعدون ويمسكون ايادي بعض ويتحركون بشكل الارجوحه ما ادرى اذا الصوره واضحه بس علشان يخلون الواحد يتخيل انه بالبحر..وبعد ما يصلون عند الكوشه يقعدون على كرسى العروسه... وبعدها تصعد بنت خامسه بيدها صدفه كبير..بداخلها مسكه العروس...

والحين تطلع العروسه مع قصيده بسمها واسم المعرس... وتمشى وبيدها نجمة... تمشى لين ما توصل عند البيت الى حامله الصدفه الكبيره تسلم عليها(تبوسها وتحط النجمه بالصدفه وتاخذ المسكه.. وتكمل شويه بعدين الحوريات الاربع وحده ورى الثانيه تقوم وتبوس العروسه وتروح.. وما يبقى غير العروس على الكوشه....

وتوته توته خلصت الحدوته....

[الشهد]

وحابه في هالموضوع اعرض عليكم زفة زوجة اخوي وطبعاً كانت من تصميمي..
في البداية كلمت العروس وأستاذنتها أني اعمل الزفة " كنت خايفة ماتوافق " بس الحمد لله وافقت وعلى طول كلمت محل لتجهيز الزفات وطلبت منه يجهز لي زفة بس يضيف لها في البداية مؤثرات ويخليها مرعبة شوي يعني صوت رياح قوي ودقات ساعة مررررة قوية ولما تنتهي المؤثرات يحط موسيقى إبهار يعني موسيقى ملفتة وقوية.. وبعدين الشعر باسم العروسين ثم الموسيقى اللي راح تمشي عليها العروس واخيرا أغاني لما توصل العروس.. وكان هذا الشريط

وبعدين جهزت فساتين البنات اللي راح يكونون في الزفة وكانت زي فساتين الأميرات يعني بيضاء طويلة مع أكاليل ورد على الرأس.. وكانوا 8 بنات

ولما بدأت الزفة أولاً انزفوا البنات على زفة عادية خاصة بالأطفال وكان لهم طبعاً ترتيب معين بحيث أنه 2 يوقفون في أول الممر وبعدين 2 عند الدرج اللي عند المنصة و2 يمين ويسار الكوشة واخيرا 2 وحدة كان معاها البخور والثانية كانت واقفة جنبها. ووقفوا قدام الكوشة شوي لين خلصت زفتهم. وكانت الإضاءة عليهم..
طبعاً كل وحدة من البنات كان معاها شي في يدها يعني شموع وورد وأعمدة المغانسيوم اللي تولع.

بعد ماانزفوا البنات وترتبوا طفت الإضاءة وصارت القاعة ظلام مررررة.. البنت اللي معاها البخور نزلت على طول والثانية عملت كأنها الأميرة النائمة يعني جبنا لها مخدة كبيرة مرة ولونها عنابي عشان تتناسب مع الديكور اللي كان أبيض وعنابي ونامت عليها فوق المنصة وبعدين ولعنا الكشاف ووجهناه على البنت اللي نايمة وشغلنا شريط الزفة طبعا في البداية كانت المؤثرات هادئة وبعدين بدأت تصير قوية وهنا قامت البنت وكأنها خايفة وصارت تدور على المنصة كأنها تبغى تهرب وهي تدور طريق تهرب منه تلقى شي في الأرض وكنا حاطين لها عصا سحرية في أعلاها نجمة والحلو فيها أنه كان فيها زر صغير في الأسفل يخلي النجمة تولع بأضاءة حمراء ولما البنت لقيت العصا صارت تتفرج فيها وبعدين ولعت النجمة " البنت ضغطت الزر " وصارت العصا تؤشر على الباب اللي بتطلع منه العروس, يعني كأنه العصا صارت تتحكم في البنت.

وبعدين فتح الباب اللي بتطلع منه العروس وبدأت الموسيقى القوية وكان جهاز البخار عند باب العروس وانفتح مع بداية الزفةوبعدين طلت العروس

[الشهد]

موضوع الزفة : زفة هندية % في %

الفكرة

فستان العرس : كان هندي بحت يعني " ساري عروس هندية بس كان راقي وايد و فخم كنت احس عمري ملكة"

الكوشة : تصميم هندي ملكي كانت عبارة عن فوانيس و اقواس و كرسي مرتفع شوي عن سطح الكوشة من المخمل العنابي اللون مزين يالكوشنات الهندية المطرزة و المسابيح المختلفة الاحجام. خلفية الكوشة كانت ذهبية

القاعة : كنت مزينتنها بافوانيس الهندية في اسقف القاعة مع الشالات الهندية المطرزة المعروفة في الثراث الهندي وكانت بشكل اقواس على اسقف القاعة كلها وطبعا الفوانيس كانت تفصل بينهم. اللون المحدد للقاعة كان العنابي و الذهبي تحس بالفخامة عند دمج مثل هذة الالوان و الطاولات كانت مزينة بستاند مشغول بالحديد الذهبي اللون و المفارش عنابية مطرزة و الكراسي عليهم قطعة من الاورجنزا الذهبية المائلة للون العنابي.

تقديم الحلويات: اجرت بنات هنديات من مكتب لتنظيم الحفلات وطبعا لباسهم كان هندي بنجابي والحلويات كلها كانت هندية و المشروبات بعد مع بعض الطقوس الهندية مثل الشموع للزينة طبعا مش اكثر.

اهل العروس و المعرس كانوا كلهم لابسين هندي بس موديلات مختلفة

الشي الحلو اني جبرت زوجي انة يلبس بنجابي مع العمامة الي يلبسونها الهنود في اعراسهم طبعا بطلوح الروح وافق