حصريا من مطبخى البالميه بعجينة البف باسترى بالصور

[الشيف مونى]

السلام عليكم ورحمة الله
النهرده عملت البالميه اللى هو البف باسترى(عجينة الميل فى) على شكل نخل وطلع طعمه رائع
المقادير
300 جم دقيق
50 جم زبدة
رشة ملح
160 جم ماء بارد
200 جم زبدة مبردة
سكر
الطريقة
هنضرب ال50 جم زبدة مع الدقيق ورشة الملح
هيبقو عاملين زى حبات الرمل


وهنحط عليهم الميه البارده ونعجن ونخلى العجينة على شكل الكورة


هنعمل العجينة على شكل وردة

احنا عايزين الجزء اللى فى النص ده سميك عشان هنحط عليه ال200 جم زبدة
هنفرد الزبدة بالنشابة على ورق زبدة ونحاول نخليها على شكل مربع ونحطها على الجزء السميك اللى عندنا

ونقفل عليها الاطراف


ونقلبها

ونبدء نفردها بالراحة هنلاقى عندنا فقاقيه هوا كتير لازم نخرم خرمة بالسكينة ونفضى الهوا عشان الزبدة متطلعش منه والعجينة تبوز
اللى فى الاخر دى الفقاقيع وانا حاطالكم عليها علامة

بعد مافضينا الهوا نكمل فرد

[الشيف مونى]

دلوقتى هنطبق العجينة على بعض
شوفو هطبقها ازاى




بعد ماطبقناها بالشكل ده هنغلفها وندخلها التلاجة
وهنكرر موضوع الفرد والطوى بالشكل ده 4 مرات
بين كل مرة ومرة تحطى العجينة فى التلاجة لمدة ساعتين ولو حسيتى ان الزبدة ساحت منك ممكن تحطيها فى الفريز
وطبعا بردو فى كل مرة هتفضى منها الهوا لو لقيتى
خلاص عملنا الموضوع ده 4 مرات
الفرد والتطبيق ده هو اللى بيخلى العجينة مورقة
هنطلعها ونفردها على شكل مستطيل ونطوى منها جانبين ونحط عليها سكر ونضغط عليه بايدينا عشان يمسك فيها كويس زى كده

ونطبق تانى بالشكل ده

ونطبق تالت هيكون شكلها اسطوانة زى كده

ممكن قبل ماتقطعيها تعينيها فى التلاجة لمدة ساعة لو حسيتى ان الزبدة ساحت منك
بعد كده نقطعها ونحاول نخليها على شكل نخل ونحطها فى صينيه على ورق زبدة

وممكن ترشى على كل واحدة سكر من فوق وممكن لاء يعنى الخطوة دى اختيارية
انا عن نفسى حطيت عشان بحبها مسكرة
وتخبزيها على فرن حرارة 200

ودى لما استوت

[moon dz]

صحة وعافية على قلوبكم اختي
وصفاتك جميلة ومفصلة الشرح بالصور كعادتك
وتستاهل التقييم
لاتنسي
خمس نقاط طريقك الي التميز

[زهور 1431]

روعه تسلم ايدك اختي وبالعافيه على قلوبكم اختي الكريمه ..
لاهنت الله يعطيك العافيه ..