ومن تااااااانى رجعت علشان نتجمع تحت سقف قصة جديدة

[قمر وخالد للا بد]

الجزء التاسع

في غرفتها كانت نايمة و غرقانة فالنوم بعد .. لانها امس فالليل ما رقدت اوكيه عقب كلام لولوة لها .. قعدت على صوت التلفون .. اللي سكت و رد يرن مرة ثانية .. رفعت و شافت انه هنادي المتصله .. ردت عليها
مريم و كلها نوم: الو
هنادي: هلا يالساحرة صباح الخير
مريم: شتبين؟؟
هنادي: صج ما تستحين .. مو منج من اللي متصل لج
مريم: هنوود فيني رقاد و الله أمس رقدت متأخر
هنادي: و انتي شعندج اصلا سهرانة!! يلا عاد بلا بلادة قومي الساعة 11
مريم: بل 11 و انا راقدة اوووف صج راحت عليي رقدة
هنادي: قومي يلا و انا باييج الحين
مريم: انزين حياج .. انا باقوم اتسبح
هنادي: تدرين باييج عقب ساعه جذيه باييج عشان تكونين برزتي
مريم: صار يلا انطرج عيل
قامت مريم تسبحت و نزلت تحت تسلم على امها
مريم و هي تقعد يم امها و تحضنها: شلونج يما ولهت عليج
الأم: الحمدلله اسال عنج .. الا تاخرتي اليوم
مريم: ايه يما امس ما رقدت عدل عشان جذيه تاخرت اليوم
الام: قومي يما تريقي .. اكو مسوية بلاليط اليوم
مريم: مدام انتي مسويته اكيد حلو و باكله بس بانطر هنوود
الام: بتيي الحين .. الا وين يدي و يدتي غريبة ما اسمع هواشهم
الام: ما شفتيهم الصبح
مريم: ههههههه اكيد الموال المعتاد
الأم: اليوم يتهاوشون على الادوية يدج يقول كل و امي تقول انه ما كل و بدا موالهم اليومي
مريم: هههههههههههههه
الام: راحوا سوق الخضرة يتمشون
مريم: هههههه خوش تمشية في سوق الخضرة
شوي و الا هنادي داخلة عليهم و في يدها صحن فطاير
هنادي: السلام عليكم
أمينة: هلا و الله بنتي شلونج؟ و شلون ابوج و امج؟ ما حاجيت منيرة اليوم
هنادي: بخير الحمدلله .. راحوا بيت عمي راشد
أمينة: قومي تريقي مع هنادي .. يلا انا باخليكم باروحآسير على جيراننا
مريم: سلمي عليهم
.................................................. ..................................................

في العين و بالتحديد في صالة بيت أم سعيد بالتحديد نورة و فاطمة و فاطمة و منى و سلامة متجمعين كلهم بالصالة و قاعدين يشوفون التلفزيون
منى: متى بنسير بيت يدوه
فاطمة: عقب صلاة العصر سمعت اماية تقول
سلامة: اوهو خسارة كان خاطري نسير المبزرة مع قووم خالوه
فاطمة: و منوه بيوديج ان شاءالله
سلامة: عادي بنخلي سعيد يودينا
فاطمة: سعيد سار ويا حرمته دبي
سلامة: انزين مايد
نورة فخاطرها وع مالقوا الا هذا اسير وياه .. يحلمون
منى: مايد مو موجود
فاطمة: ليش وين سار .. ما أحيده يطلع مع ربعه الصبح!!
منى: هو أصلا ما بات فالبيت أمس ..
فاطمة: غريبة مو من عوايده
منى: ما ادري فاخواج عاد اماية قالت جيه
نورة سكتت حز فخاطرها شوي و كسر خاطرها .. لكن كبريائها منعها و خلاها تقول احسن خله يتادب من قاله يغلط عليي .. بعدين هو ما يهمني .. انا اللي يهمني "فهد" و بس
و قطع عليها سرحانها صوت منى: حوووو وينج صار لي ساعه اكلمج!!
نورة: ها شو كنتي تقولين؟؟
سلامة: لا الحبيبة بالها مو معانا .. اللي ماخذ عقلج
نورة: ما شي كنت افكر بشمووس ما كلمتها اليوم الا شو كنتوا تقولون
سلامة: سلامتج قوموا بنصلي الاذان اذن
قاموا البنات يصلون و عقبها كلمت نورة شمسة و قالت لها بكل اللي صار ..
شمسة: حرام عليج و الله
نورة: حرمت عليه عيشته ان شاءالله
شمسة: ما ادري شاقولج و الله بس هو يكسر الخاطر
نورة: شرايج تحبينه و تريحيني
شمسة: ولي لا اونه احبه .. و خليفة فديته
نورة: اقول ولي انتي و ياه .. انا بروح فشلة البنات تحت ينطروني
شمسة: اوكيك حبوبة .. ديري بالج عنفسج
نورة: ان شاءالله و انتي بعد فمان الله
.................................................. ......................................

مايد عقب ما طلع من البيت البارحة راح بيت يدته و نام هناك .. عقبها طلع اليوم الصبح و نزل بوظبي عند ربيعه .. خلاص قرر يبعد عن نورة لين ما ترجع بوظبي .. مايد قرر يبعد عن نورة و ينساها .. لازم ينساها ,, بس هل بيقدر ينساها !!!!!!
.................................................. ........................................

في البحرين في غرفة مريم عقب ما صلوا البنات
هنادي و هي تقعد عالسرير: يلا قولي لي شسالفتج؟؟
مريم و هي تلعب بشعرها: أي سالفة؟؟
هنادي: مريوم انا خابزتج عدل .. انتي فيج شي .. من امس عقب ما حاجتج لولوة و انتي متغيرة
مريم و هي تتنهد: خليفة
هنادي: شفيه بعد؟؟
مريم: لولوة تقول انه يحبني
هنادي و هي مبهته: كملي .. قولي السالفة كاملة
مريم: لولوة اتصلت امس فيابت طاري خليفة .. و قالت لي انه دوم يسولف لسلمان عني .. و انه لا هو و لا سلمان يدرون انه اهيه قالت لي انه خليفة يحبني .. يعني باختصار اهو قايل حق سلمان عني و ما قاله يوصل لي هالكلام عن طريق لولوة .. لولوة بروحها قالت لي من سوالف سلمان
هنادي: انزين يمكن يحبج صج
مريم: أي حب انتي ما تسمعين السوالف اللي تصير من ورى الحب .. ما عاد في حب في هالزمن
هنادي: مريوم انتي غلطانة .. انا معاج ان البنت لازم تحافظ على نفسها .. بس الحب موجود و اكبر مثال جدامج لولوة و سلمان
مريم: لولوة و سلمان غير اهم جيران و يحبها من يوم و هم صغار.. و الكل يدري بحبهم .. يعني حبهم فالنور مثل ما يقولون و عمره ما غلط عليها
هنادي: ما ادري شاقولج و الله
مريم: لا تقولين شي .. بتروحين معاهم اليوم
هنادي: لا شيوديني .. ما احب الرزة انا
مريم: من بيروح؟
هنادي: طلول و جواهر و امها و يعقوب و قالتها و هي تبتسم
مريم: الله يعطيج العقل .. انزين شرايج نخلي امي تودينا الدانة او السيف نشوف ثياب حق الملجة .. ما باقي شي
هنادي: شورج و هداية الله
.................................................. .................................................

العصر راح طلال بيت جواهر و راح معاها هي و امها و اخوها يشترون الشبكة عقب ما عطوهم المهر قبل يومين
أما هنادي و مريم راحوا مع أمينة أم مريم يشترون ثياب حق الملجة اشترت مريم تنورة و قميص مشكوكين بسيطين و بنفس الوقت يناسبون حفلة بسيطة لونه أزرق .. أما هنادي فاشترت بنطلون و قميص فيهم شك بسيط لونهم بنفسجي
.................................................. .................................................. ..................

مر الويك اند سريع و كلن لاهي بشي .. هل البحرين لاهين بتحضيرات الملجة .. مايد بنورة .. و نورة بفهد .. و شمسة بخليفة .. و خليفة فكره كله عند مريم
هالويك اند ما شافها لانه لولوة كانت مشغولة و ما قدرت تكلم سلمان وايد عشان يعرف من طريقها هي وين بتطلع .. تم على نار ينطر يوم السبت .. عشان يشوف مريم .. و هو مقرر انه يصرح لها بحبه
.................................................. .................................................. ...

الساعة 5 و نص الصبح منبه مريم كان يرن و قامت بكل تثاقل لانه اليوم السبت بداية الاسبوع .. فتحسه يوم ثقيل بعد وراها 6 ايام دوام .. تسبحت و صلت و تلبست كالعادة و راحت الجامعه .. حضرت المحاضرة الاولى و اللي هي طبعا من غير لولوة .. عقب ما خلصت المحاضرة راحت مريم الكافتيريا تشرب كوفي و كانت معصبة و مقهورة من المدرس لانه حاطلها في البروجكت 17 من 25 و هي حاله اوكيه .. طلعت و راحت المكتبة .. طبعا كالعادة خليفة كان يلاحقها .. خلصت مريم كتابها و نزلت تحت و شافت خليفة كالعادة موجود فنفس المكان اللي هي فيه ..
انقهرت منه مريم و قالت لازم اوقفه عند حده
كان المكان فاضي شوي لانه مكان محاضرات و اغلب الطلاب فمحاضراتهم و اللي عندهم بريكات لاهين اللي يسولف و غيره
لفت مريم و راحت صوب خليفة وقفت جدامه .. أما هو فاستغرب تصرفها
مريم: آقولك انت تستحي على ويهك!!
خليفة: خير مريم فيج شي؟؟
مريم: لو سمحت بطل هالحركات السخيفة .. كل ما اروح مكان ملاحقني جنك ظلي .. حتى برع الجامعه اشوفك فكل مكان .. انت ما عندك خوات تخاف عليهم .. و لا على بالك انا من هالخايسات !! احترم نفسك احسن لك .. و لا تظن اني مثل باقي البنات ميتة عليك .. انا وحدة محترمة و خلك محترم احسن لك
خليفة: خليني اشرح لج انزين
لكن مريم ما عطته فرصة يتكلم و لفت عنه و كملت طريجها .. اما خليفة اتمنى ان الارض تنشق و تبلعه .. حس بالفشلة و المهانة .. مع انه اليوم كان ياي يصرح لها بحبه .. شل بعمره و طلع من الجامعه بكبرها
.................................................. .................................................. .........

مريم كان جسمها كلها ينتفض اهي بروحها ما حست بعمرها .. شلون راحت له و صارخت عليه .. هو صح مصخها .. بس بعد في اسلوب احسن فالكلام .. بس شكل حركات خليفة و عصبيتها على دكتور الرياضيات هي اللي خلتها تتصرف جذيه .................................................. ...............................................

في الكافتيريا هنادي كانت قاعدة مع رفيجتها عذاري فوقت البريك مالهم كانوا قاعدين يتريقون
عذاري: انزين ما قلتي لي .. متى تسليم البروجكت مالكم
هنادي: السبت الياي
عذاري: لاتقولين للحين ما اشتغلتي عليه
هنادي: امبلة .. بس قلت لج في ذاك الجزء ما فهمته
عذاري: قايلة لج شوفي أي وقت فاضي و تعالي انا بفهمج
هنادي: ما ابي اكلف عليج
عذاري: لا كلافة و لا شي
و قطع عليهم سوالفهم صوت التلفون و مريم هي اللي كانت متصلة بهنادي
هنادي: هلا مريوم
مريم: هلا .. اقول هنادي .. تقدرين تيين تاخذيني من الجامعه الحين
هنادي: مريوم شفيج .. صوتج متغير
مريم: بقولج بعدين .. بليز تعالي لي الحين
هنادي: خلاص باييج الحين
مريم حست بعمرها مو قادرة تركز بشي عشان جذيه اتصلت بهنادي و قالت لها تيي تاخذها من الجامعه .. لانها ما قدرت تتصل بامها و هي بهالحالة

.................................................. .............................................

في الامارات و بالتحديد في بيت بو محمد .. شمسة كانت قاعده بالصالة مع امها .. ما راحت الجامعه اليوم لانه ما عندهم شي مهم ...
شمسة: أماية أبي اسير السوق
الأم: و شتبين به السوق؟؟
شمسة: امايا تعرفين ما باقي شي عن رمضان ابا اتشرى قطع و افصل كنادير
الأم: خلاص تزهبي العصر بنسير مع الدريول
شمسة: خلاص بتصل بنوروه تيي ويانا
الام: هي بعد ما سارت اليوم؟؟
شمسة: لا ما سارت
الأم: خلاص برايج عيل انا بسير ازهب الغدا مع الخدامات
.................................................. .................................................. ....

فسيارة هنادي مريم كانت قاعدة ساكتة و هنادي مو فاهمة منها شي و كانت خايفة عليها .. فنطرت لين ما راحوا البيت .. و حمدت ربها ان ام مريم و اليد و اليدة ما كانوا موجودين و لا جان سووا لهم تحقيق
هنادي: مريوم قولي لي شفيج
مريم فالبداية كانت ساكتة و ما تتكلم بس عقب تحجت و قالت لهنادي السالفة كلها
هنادي: معقولة .. انتي مريوم الهادية تسوين جذيه!!
مريم: خلاص عاد لا تزيديني انا اللي فيني مكفيني
هنادي: اللي فيج يدل على انج متاكدة انج غلطانة .. و متحسفة بعد
مريم: اهوه غلطان .. بس انا مو من عوايدي اتحجى جذيه مع أي حد .. ما أحب اجرح أي احد .. انا شلون سويت جذيه
هنادي: و مو أي احد الانسان اللي يحبج
مريم: و شاللي يخليج متاكدة؟؟!!
هنادي: كل شي يدل كل مواقفه
مريم: هنادي انا تعبانه ..
هنادي: بخليج بروحج شوي .. إذا تبين شي اتصلي لي
طلعت هنادي .. و خلت مريم سارحة بافكارها .. تفكر بكل مواقف خليفة معاها .. تذكرت الاسبوع اللي طاف يوم تاخرت عليها امها .. و الكل راح من الجامعه الا خليفة تم واقف بسيارته .. و لا راح الا يوم راحت هي .. ليش يسوي جذيه .. اكيد هو يحبني .. بس خليفة تصرف غلط .. اه يا ربي من الصح و من الغلط الحين .. يا رب ساعدني .. قامت مريم صلت الظهر و كانت لولوة تتصل فيها بس مريم مالها خلق تكلم حد .. اتصلت بهنادي و تمت تسولف معاها .. و يوم يت امها قالت لها انها تعبت شوي و انها الحين بخير
.................................................. .............................................

في الامارات طلعوا شمة و نورة و امهاتهم و راحوا لاسوق اشتروا قطع و ودوهم الخياط يفصولنهم لرمضان
.................................................. .................................................. ...........
في غرفة جواهر كانت جواهر كانت قاعدة مع عذاري بنت خالتها و تراويها الشبكة مالتها
عذاري: وايد حلوة ما شاءالله .. عليج بالعافية
جواهر: عقبالج .. انش اءالله
عذاري: الله يسمع منج
جواهر: ههههههه حشى ما شفت حد بيموت على العرس كثرج
عذاري: مو على العرس على المعرس و حياتج و تغمز لها
جواهر: هههههههه تعالي براويج صورة المعرس
عذاري: و الله .. من وين لج؟
جواهر: اخته عطتني اياها .. بصراحة اهله ناس وايد طيبين
عذاري: الل يهنيج ان شاءالله .. خواته شكبر
جواهر: عنده اخت وحدة بس اسمها هنادي .. معاج فالجامعه
عذاري و هي تعقد حواجبها: لحظة لحظة ريلج اسمه طلال احمد ال.....
جواهر و هي مستغربة: ايه .. شعرفج فيه؟؟!
عذاري: ويه تصدقين ذي اخو رفيجتي هنوود اللي فالجامعه .. شوف الدنيا شلون صغيرة
جواهر: لحظة هنادي اخته اهي هنوود على قولتج اللي تسولفين عنها دايما
عذاري: ايه اللي بنت خالتها مريم
جواهر: ايه هذه اهمه .. تعرفت عليهم بحوار وايد طيبين
عذاري: انا مريم ما شفتها .. بس هنادي معاي وايد حليوة
جواهر: حتى طلال شكله طيب
عذاري و هي تغمز: اكيد تمدحينه
جواهر: حرام عليج اصلا انا عمري ما قعدت معاه
عذاري: عيل شلون وافقتي عليه؟؟
جواهر: اهله ناس طيبين و ارتحت لهم .. بعدين هو وسيم و سالنه عنه الكل يمدحه .. شابغي اكثر من جذيه
عذاري: الله يهنيج .. خلاص انا بترخص عيل
جواهر: وين تو الناس؟؟
عذاري: أي تو الناس اذن العشا خلاص باروح و ازورج مرة ثانية ان شاءالله
جواهر: يالله بوصلج لي الباب
.................................................. .................................................. ..

الساعة كانت 11 و مريم تتقلب مو يايها نوم .. قامت من سريرها و نزلت تحت و طقت على امها الباب
أمينة: من؟
مريم: يما هذي انا مريم
أمينة: تعالي يما دشي
دخلت مريم الغرفة و قطت عمرها فحظن امها
أمينة: ها يما ما رقدتي؟
مريم: لا ما ياني رقاد
أمينة: شفيج انتي اليوم مو طبيعية؟؟
مريم: ما فيني شي يما .. بس تعب الجامعه
أمينة: لا ترهقين عمرج زيادة حبيبتي
مريم: ان شاءالله
سكتت مريم شوي عقب قالت
يما أبس اقولج شي
أمينة: قولي يما
مريم: آنا احبج وايد
أمينة: حتى انا يما
مريم: يما انا اليوم غلطت على بنت فالجامعه
امينة: ليش يما؟؟
مريم: كنت متضايقة من علامة الرياضيات و صرخت عليها
أمينة: لا حبيبتي مهما كان المفروض تفصلين بين الدراسة و معاملتج للناس .. لا تجرحين حد ابدا
مريم: ادري يما عشان جذيه انا متضايقة
أمينة: خلاص روحي اعتذري لها باجر .. و ترى حطي ببالج الاعتذار ما يقلل من قيمتج .. دامج غلطتي ما فيها شي تعتذرين .. على الاقل تكونين راضية عن نفسج
مريم عقب ما ارتاحت شوي: كلامج صح يما
أمينة و باست بنتها على راسها: يلا حبيبتي رقدي .. باجر وراج دوام
مريم: برقد عندج اليوم
أمينة: انزين حبيبتي يلا تصبحين على خير
حطت مريم راسها يم امها عقب ما ارتاحت شوي و رقدت و قررت انها تعتذر باجر من خليفة


نهاية الجزء التاسع

[دمعــ توبه ــة]

barj3 qamoora aklas alqissa ba3d shwee bas min alawal mabyan aleeha tajnan



samheeni inee ma baktob arabee bas lama ana fee aljam3ah ma feeh keyborad arabee

[قمر وخالد للا بد]

الجزء العاشر


في بوظبي و بالتحديد في غرفة نورة قاعدة تتكلم بالتلفون تكلم شمسة
نورة: صج و الله حلفي حلفي
شمسة: هههههه شو حضرتج تتحريني اتمسخر عليج
نورة: لا بس مو مصدقة و الله
شمسة: ما يسوى عليج ليش سلطان ما خبركم
نورة: لا سلطانو ما اتصل ما ادري يمكن اليوم بيتصل .. مو مصدقة يعني فهوودي فديته بيرمض عندنا هالسنة .. يا بختي و الله
شمسة: الحمدلله و الشكر يالله بنعمة العقل
نورة: أقولج باي باي من الفرحة مو عارفة اتكلم
شمسة: ههههه لا يكون بتروحين تتزهبين من الحين ترى تو الناس باقي اسبوعين او ثلاث
نورة: ههههههه لا يا حمارة بس بروح ابشر اماية
شمسة: خلاص عيل خلاف برمسج و سلمي
نورة: يوصل فمان الله
نزلت نورة تحت و بشرت امها و ابوها بردة اخوها و ولد عمها برمضان لانه عندهم اجازة صح ما بيطولون بس على الاقل بتشوف "حبيب القلب"
......................

دخلت مريم محاضرة التاريخ متاخرة شوي لانها تاخرت بالقعدة اليوم و قعدت يم لولوة
مريم بصوت واطي: السلام عليكم
لولوة: و عليكم السلام. وينج يا حمارة امس ما شفتج بالدوام و ادق و لا تردين و اليوم متاخرة بصراحة اخترعت عليج؟؟
مريم: لا انا امس داومت بس صدعت و هنوود يت خذتني
لولوة: اوبس سكتي سكتي الدكتور يطالعنا ما فينا علسانه عقب المحاضرة نكمل
ابتسمت مريم و التفتت صوب ما يشرح الدكتور و لو انها مرتبكة و عقلها عند خليفة و شلون بتعتذر له .. قلبها كان يدق و خايفة و متوترة
............
مو بعيد وايد عن مريم و لولوة .. بالفرع الثاني من جامعة البحرين هنادي و عذاري قاعدين بالكافتيريا يسولفون
هنادي: صج و الله .. الله يالدنيا شلون صغيرة .. رفيجتي و معاي و فجاة اكتشف انج بنت خاله مرت اخوي
عذاري: ايه سبحان الله انا بروحي انصدمت اول ما دريت من جواهر
هنادي: ههههه يعني وراج وراج لامفر
و من بعيد شافوا بنت جنهم يعرفونها لابسة تنورة جينز ضيقة و فوق الركب بشوي مع بودي أحمر و حاطة فول ميك اب و فالة شعرها المصبوغ بالميش و ياية
هنادي: عذووور تعرفينها؟؟
عذاري: شفيج هذي فطووم اللي كانت ويانا فالمدرسة في فرقة أ
توها كانت بتتكلم هنادي الا و البنت ياية
فاطمة و بكل دلع: هاي بنات شلونكم؟؟ ولهت عليكم و الله
هنادي: هلا و الله شلونج؟؟ وينج ما تنشافين
فاطمة: و الله بعد تعرفين و هي تغمز بزنس
عذاري كانت ساكتة و ما تتكلم جنه لا يعة جبدها من اللي تشوفه جدامها
فاطمة: ها عذووور شلونج؟؟ شنو اشوفج ما تتصلين و لا شي حتى يدتي تسال عنج؟؟
عذاري: و الله تعرفين مشاغل الدنيا
فاطمة بكل سخافة: عاد تمنعج من أعز ربعج؟؟
هنادي حست ان الجو متوتر فحبت تغير جو: اقول فاطمة انتي تدرسين معانا هنيه؟؟ ما اشوفج
فاطمة: لا و الله بس ياية اسلم على ربعي و هي تلتفت صوب عذاري خصوصا اللي نسوني و لا عادوا يسالون
هنادي: و مو ناوية تكملين؟؟
فاطمة: مو محتاجة اكمل شبتفيدني فيه الشهادة .. ناس تخرجوا بإمتياز و كاهم مقعدين بالبيت
هنادي: و لو الشهادة سلاح و اكيد بييج يوم تحتاجين الشغل و ما تدرين مني لين ما نتخرج شبيصير؟؟ يمكن نلاقي وظايف
فاطمة بدلع و هي تلعب بشعرها: مو محتاجة وظيفة .. راتبي ييني لحد عندي .. ليش العبالة!!
هنادي و هي مب فاهمة شي: انزين فاطمة مسامحة بس عندي محاضرة و لازم اروح
عذاري: خذيني معاج
فاطمة: افا عذاري حتى قعدة ما تبين تقعدين .. خلاص رحوا انا بعد وراي اشغال و مواعيد و خلنا نشوفكم .. باي
عذاري و هي تمشي صوب محاضرة هنادي: فكة ما بغت تروح؟؟
هنادي: متغيرة 180 درجة .. ما عرفتها .. بعدين شفيها جذيه .. و انتي شفيج وياها انتوا كنتوا اعز ربع بالمدرسة؟؟
عذاري: قلتيها "كنا"
هنادي: عذوور شالسالفة؟
عذاري: هي اللي تغيرت وايد.. تعرفت على شلت شيخوو و ما يحتاج طبعا اقولج من شيخو!!
هنادي: و ليش ما نصحتيها؟؟
عذاري: و شدعوة انا خليتها .. نصحتها لين ما قلت بس .. بس ما كانت تسمع لي و تقول انها تسولف معاهم بس بس ما تسوي مثلهم .. انا من داخلي ما كنت مقتنعه بس قلت بصبر .. لين ما يا جسووم اخوي و نصحني اهدها .. تخيلي؟؟
هنادي: كانت متعرفة عليه؟؟
عذاري: ما أدري عليه أو على واحد من ربعه المهم ان هو اللي قالي هالحجي .. و بعد رديت انصحها لكنها فرحانة على هالمظاهر و الفلوس .. ما تدري انها كسبت دنيتها و خسرت اخرتها
هنادي: الله يهديها و يستر علينا يا رب
عذاري: آمين
فاطمة كانت مع هنادي و عذاري بالمدرسة .. رفيجة عذاري الروح بالروح .. أمها متوفية و أبوها متزوج و هي عايشة عند يدتها .. كانت بنت فقمة الشطارة و الأدب .. و لكن الصورة انقلبت و اغترت بمظاهر الدنيا .. و تعرفت على شلة فاسدة .. و غرها الربح السريع و خسرت الربح الدايم
............................

نرجع حق لولوة و مريم
لولوة: ويه فكة ما بغى يخلص يا مال الضعفة يتحجى و لا يسكت
مريم: ههههه يحليله بس طيب و الله كفاية امتحاناته سهلة و وايد متساهل معانا
لولوة: تعالي جم خذيتي فبروجكت الرياضيات؟
مريم: سكتي قاهرتني حاطتلي 17 من 25
لولوة: بل ليش؟؟ روحي راجعيه و شوفي شنو اغلاطج
مريم: لالا مابي استحي اصلا
لولوة: حلفي انتي قبل ما فيها شي ذي حقج .. اقولج امشي بنروح له الحين
مريم: لالا شنو الحين بعدين بعدين "مريم كان بخاطرها تدور على خليفة و تعتذر منه و تفتك" فمو قادرة تركز بشيء ثاني
لولوة: مو بكيفج الحين يعني الحين .. و سحبتها غصبا عنها لغرفة الدكتور و دخلت عنده و عقب ما راجعت معاه الورقة اكتشفت ان الدكتور ناسية تصلح سؤال و عدل لها الدرجة من 17 لي 23 و نص
لولوة: مو قلت لج
مريم: سكتي بموت من الوناسة
لولوة: لا يبا لاتموتين هنيه تبلشيني بعدين
مريم: صج ما تستحين هذي ك... و قبل لا تكمل كلمتها شافت خليفة توه مار.. شكله توه كان ياي من البيت لانه داخل من البوابة الرئيسة .. خليفة بعد شاف مريم وقف شوي عقب نزل راسه و راح على طول .. مريم حز بخاطرها مو لانه ما عطاها ويه .. لا لانه حست انها يمكن جرحته بالكلام
لولوة: انتي هيه احاجيج
مريم: شنو ما سمعتج و الله
لولوة: مو منج الحبيبة من اللي طاف توه و شافت خليفة و غمزت
مريم: متفيجة و الله اقولج سبقيني الكافتيريا و انا شوي و بلحقج
لولوة: وين بتروحين
مريم: باروح المكتبة استلف كتاب و بايي
لولوة: عادي بايي وياج
مريم فخاطرها يا هالبلشة شاقولها الحين
مريم: لا تعرفين المكتبة بعيدة شوي و انتي تمشين شوي شوي انا بروح بسرعه و بلحقج
لولوة: على راحتج بس لا تاخرين
مريم: ان شاءالله
راحت مريم صوب المبنى اللي فيه محاضرة خليفة و سلمان هيه كانت تعرف مكان المحاضرة من لولوة راحت و هي ببالها شي و تمنت ربها يعديه على خير
...............................

في الكافتيريا لولوة شافت سلمان قاعد بروحه راحت صوبه
لولوة: قوة
سلمان: هلا و الله هلا و غلا .. عيل وين مريم عنج؟
لولوة: راحت المكتبة و بتيي .. غريبة الا قاعد بروحك؟؟!!
سلمان: ايه خلووف الحمار من امس اتصل له و لا يرد .. توه يه و سبقني المحاضرة
سلمان و لولوة ما لاحظوا ان غياب مريم و خليفة كان بنفس الوقت .. و ان شي من بينهم
غريبة شلوون راحت عليهم هذي !!
..........

دخلت مريم مكان المحاضرة و ما كان فيه حد هي كانت تعرف من سوالف لولوة ان خليفة و سلمان يقعدون اخر ثنينه يم الطوفة خليفة عالطرف و سلمان يمه
راحت صوب المكان و شافت كتب خليفة محطوطين عالطاولة .. هالشي سهل عليها المهمة
طلعت ورقة من دفترها و كتبت
" خليفة .. آسفة على اللي صار أمس .. ما كان قصدي أجرحك .. و يمكن كلامي كان وايد قاسي .. بس تصرفك معاي ما كان له داعي .. أرجوك لا تكرر تصرفاتك معاي .. آسفة مرة ثانية .. مريم"
شقت الورقة و طوتها و فتحت أول صفحة بالكتاب و حطتها فيه لكن جذبها شي كان مكتوب بالورقة .. شافت اسمها مكتوب و تحته
أنت هاجس خاطري .. و أنت فرحة ناظري
يا قريب و يا بعيد .. فيك أمسي و حاضري
وقفت مريم دقايق تتامل بيت الشعر حست شي غريب يسري فيها ما تدري شنو .. سمعت مريم صوت حد ياي حطت الورقة بسرعه و طلعت .. شافت خليفة ياي وقفت شوي و قلبها يدق خافت لا يكون شافها .. عقبها مشت بسرعه .. و راحت عنه .. اما هو فما شاف مريم و استغرب وجودها .. عقب قال يمكن ان هي يات تدور على وحدة من رفيجاتها .. مع ان هي ما عندها حد غير لولوة !!!!!


بالتحديد فبيت ام سعيد بالعين فاطمة كانت بغرفة اخوها مايد تتكلم معاه
فاطمة: حالك هب عايبني
مايد: و شفيه حالي؟؟
فاطمة: انت تحبها؟؟
مايد: شو !! تتكلمين عن منو ؟؟
فاطمة: عن نورة طبعا
مايد: شو .. نورة!!
فاطمة: لا تلف و تدووور انا ادري انك تحبها .. و لا تخاف انا اختك يعني ما بضرك بالعكس بساعدك
مايد: و الله يعني بتخبرينها عني
فاطمة: لا طبعا انته بنفسك قولها
مايد: شوه .. بنفسج شفتيها ذاك اليوم كيف حرجت و قالت ان انا ما اهمها .. تبيني اقولها احبج!!
فاطمة: اخطبها
مايد: شوه
فاطمة: شفيك انت كل ما قلت لك شي شو و شو .. اخطبها .. هي زعلانه عليك من يوم هزبتها و واجعتها ذاك اليوم .. يمكن اعتذارك ما ياب نتيجة .. اخطبها .. ساعتها بتعرف انك تحبها صج و انك ندمان لانك واجعتها .. و بتفك عمرك
مايد: هزرج
فاطمة: هيه طبعا .. تشجع و خل ثقتك بربك كبيرة
مايد: الله كريم
...........................

في شقة خليفة فالبحرين كان توه راد من الجامعه و حط كتبه عالمكتب و غير ثيابه لبس شورت و فانيله و راح المطبخ يبي يشرب عصير .. و هو طالع من المطبخ شاف و رقة طايحة .. قراها .. و تم فترة يتاملها .. عقبها ابتسم و عرف ليش مريم كانت موجودة اليوم
خليفة: فديتها و الله
دخل غرفته و طلع ورقة و كتب

لك حق تزعل ثم لك حق نرضيك
ما اقوى زعل حبيب قلبي و عيني
ما دام قلبي يا أريش العين مغليك
أطلب و لك روحي و ما في إيديني
لا تنشغل مالك وزين يضاهيك
أبيك أنا لو كان غيرك يبيني
يوم الله أحسن صورتك خصني فيك
فيك الجمال و صادق الحب فيني
شعري يزين بوصف زينك و طاريك
و الأرض من ممشاك فيها تزيني
أول غناتي صوت الأشواق يدعيك
و آخر غناتي شق صدري حنيني
آنا آسف يالغالية و أوعدج إني ما بتعرض لج أبدا .. و أوعدج إني أحبج .. و بتم أحبج طول عمري ..
خليفة

طوى خليفة الورقة و قرر يحطها باجر باللوكر مال مريم فالجامعه .. و راح يشرب العصير ماله و هو فرحان انه عنده شي من ريحة مريم "ورقة الاعتذار"
.........................

مرت الايام سريعة خصوصا على اهل البحرين ما بين تجهيزاتهم حق ملجة طلال و جواهر .. و يه اليوم الموعود اللي كان يعتبر نقله خصوصا بحياة اثنين هم "جواهر و طلال"
مريم و هنادي راحوا صالون جوليانا .. و طلال كان محتاس فالصالون و عقبها تجهيزات الاكل و غيره
أما جواهر فكانت فغرفتها و عندها راعية الصالون
و لانه جواهر شعرها قصير فسوت لها المزينة شعرها بحيث تخليه مفتوح و حطت لها مكياج اخضر ارتكواز .. لانه فستانها كان لونه اخضر ارتكواز
جواهر كانت بالاصل جميلة و اليوم كانت اجمل .. و هدوئها و خجلها هم اللي محليينها أكثر
عذاري: ما شاءالله عليج .. لالا لازم خالتي تبخرج عن الحسد
استحت جواهر و نزلت راسها تحت
و شوي و ان ام جواهر داخلة عليهم .. طبعا جواهر كانت البنت الوحيدة و مدللة وايد و امها تحبها وايد .. و فرحة امها الليلة ما تنوصف
جواهر: يما شرايج فيني؟؟
أم يعقوب: تينين ما شاءالله عليج .. الله يحفظج من العين .. ها يما عذاري جهزتي؟؟
عذاري: إيه خالتي انا خالصة من زمان
أم يعقوب: ترى المعازيم بدوا ييون
عذاري: بيت خالتي أم طلال ما يووا
أم يعقوب: لا للحين تلقينهم بالطريج
عذاري: خلاص انا بانزل آتصل فيهم و أشوف المعازيم
نزلت عذاري تحت و قعدت ام يعقوب مع بنتها تساعدها بلبس فستانها و سولف وياها شوي .. تالي حولت تحت تستقبل المعازيم
وصلوا اهل طلال دخوا مريم و هنادي و كانوا بسيطات بس نعومات سلموا على اللي يعرفونهم من المعازيم و ركبوا فوق عند جواهر
بيت اهل جواهر الحوووش ماله كان واااااااايد كبير فاهلها كانوا طامين الحوش و حاطين الكوشة و طاولات و كراسي للمعازيم .. المكان كمان كبير و راقي .. كانه مو فالبيت .. و الحفلة كانت عائلية جدا
عاساعه 9 و نص عقب ما ملجوا الريايل فالميلس "طبعا جواهر وكلت ابوها عنها" نزلت جواهر مع امها و دخلت الخيمة على أغنية هب السعد و أمها كانت تمشي وراها .. جواهر كانت مرتجفة وايد .. و قلبها يدق دق
أما أمها كانت تمشيها و دموعها بعيونها من فرحتها لبنتها الوحيدة لين ما وصلت جواهر الكوشة .. اختفت امها عن الانظار لانها دخلت داخل تصيح .. و ما كانت تبي بنتها تشوفها و تكسر بخاطرها بهالليلة
عقب ما قعدت جواهر و ارتاحت شوي يووا رفيجاتها و أهلها يسلمون عليها .. و يتصورون معاها .. و بدى الرقص و كانوا البنات و اللي من بينهم هنادي و عذاري .. أما مريم فماكانت تحب أو تعرف ترقص فاكتف انها تشارك بالابتسامة و التصفيق من بعيد
عقب ما تعشوا الناس و العشى كانت عبارة عن بوفيه فحوش بيت جواهر .. دخل طلال و كان معاه أبوه و أبو جواهر و اخوانها الثنينه .. عقب ما سلموا عليهم و تصوروا معاهم .. طلعوا و تموا المعاريس بروحهم عالكوشة
طلال: مبرووك
جواهر بصوت ما ينسمع و هي منزله راسها: الله يبارك فيك
طلال أصلا معجب فيها بس اليوم زاد إعجابه فيها و بخجلها
عقب دقايق يتهم أم طلال و أم جواهر و هنادي عساس طلال يلبس جواهر الشبكة
عقبها بشوي طلعوا طلال و جواهر .. و عقب ما رقصوا الاهل و استانسوا خلصت الحفلة و كلن راح بيته
.....................

في الامارات بالتحديد في بيت بو خليفة نورة كانت قاعدة فغرفة امها و ابوها
بو خليفة: ها شقلتي يا بنتي؟؟
نورة نزلت راسها و سكتت و ما ردت
أم خليفة: شبتقول بعد البنت ساكتة يعني اكيد موافقة و مايد ولد اختي ما يعيبه شي
بو خليفة: ها يا بنتي نقول مبرووك؟
نورة: لاء
أم خليفة: ليش يا بنتي مايد شاريج و ريال و النعم
نورة: ابا اكمل دراستي
أم خليفة: مايد ما عنده مانع
نورة: أماية انا ما ابى اتزوج الحين
بو خليفة حاس اصلا ان نورة تبي فهد و هو يبيها عشان جي ما حب يضغط على بنته
بو خليفة: خلاص يام خليفة لا تضغطين عالبنت
أم خليفة: البنت كبرت و الزواج سترة لها
بو خليفة: بنتي انا مربينها و مو عيزان عنها .. نصيبها بييها ان شاءالله
قامت نورة من مكانها و لوت على أبوها: فديتك باباتي
أم خليفة: محد بيخرب البنت بالدلع الا انت
بو خليفة: ما عندي أغلى من نواري أنا
قامت نورة و حبت راس ابوها و طلعت فوق دارها و ما حبت تخبر حد بالسافة حتى "شمسة" توام روحها .. لأنها ما تبي يوصل خبر لفهد عن هالموضوع ابد .. فهد هو الانسان اللي نطرته من يوم و هو صغار شلون تتخلى عنه و تتزوج غيره .. و لا و منو "مايـــد"
أما أم خليفة فاتصلت باختها و قالت لها ان البنت ما تبي تتزوج الحين لانها صغيرة و تبي تكمل دراستها!!



الأبيات فهالجزء للشاعر خالد الفيصل من قصيدين
كل ما نسنس
لك حق تزعل




توقعوا الا حداااث وان شاء الله يكون عجبكم الجزء

وان شاء الله اشوف ردود حلوه تحمسنى شويه

علشان انا بحط الا جزاء مع نفسى

يالابقى ورونى الهمه

وعااااايزة اشوف ردودكم الحلوه بقى

[@@عروب نجد@@]

محجووووووووووووووووز....
اذا خلصلت ردييييييييييييييييييييت....

لك يسلموووووووووووو....